ESTER 4 - SURAT BARASIH BARITA BAHALAP

Mordekhai balaku dohop dengan Ester

¹ Sana Mordekhai mahining taloh je manjadi te, ie marabit pakaiae tuntang mahapan tapih kampil tanda pehe atei. Ie mambowor kawo hong takoloke, palus mananjong intu lewu sambil manangis hai auhe, tuntang asi-asi.

² Intu baun Lawang istana ie tende, awi oloh je hapakaian kampil ingahana tame.

³ Kalote kea intu gagenep propinsi, kare oloh Yehudi manatum limbah parentah raja te insanan. Ewen puasa, manangis tuntang manarahing. Are bara ewen je mahapan tapih kampil tuntang menter intu hunjun kawo.

⁴ Katika kare oloh bawi tuntang pejabat khusus je melayani Ratu Ester mansanan akae taloh je kanjeran ilalus awi Mordekhai, Ester pehe ateie. Ie mangirim pakaian akan Mordekhai mangat ie mangganti tapih kampile, tapi Mordekhai dia maku manarimae.

⁵ Limbah te Ester mantehau Hatah, ije biti bara pejabat khusus je inyoho bagawi awi raja tantai melayani Ester. Ie manyoho Hatah misek dengan Mordekhai en taloh je manjadi tuntang mbuhen ie mawi arepe kalote.

⁶ Balalu Hatah manalih Mordekhai intu baun lawang istana.

⁷ Mordekhai manyarita akae taloh je manjadi tuntang pire kare duit perak je injanji Haman akan inamean akan huang kambut duit raja, limbah uras oloh Yehudi imbinasa.

⁸ Mordekhai kea manenga akan Hatah salinan surat raja je jari impalua intu Susan tuntang je basuang parentah uka membinasa oloh Yehudi. Ie manyoho Hatah manenga surat te akan Ester tuntang manarang perkara te akae, hayak balaku uka Ester manaharep raja mangat balaku asi akan bangsae.

⁹ Palus Hatah haguet manalih Ester tuntang manyampai peteh Mordekhai akae.

¹⁰ Tapi Ester manyoho ie haluli talih Mordekhai tuntang mimbit peteh toh.

¹¹ “Genep biti, aloh hatue atawa bawi, je dia intehau manaharep raja intu parantaran huang istana, batantu ihukum matei. Jete puna atoran tuntang uras oloh are nampara bara oloh je tau manenga tirok akan raja sampai dengan rayat intu kare propinsi, mangatawan taloh te. Baya aton ije jalan uka luput bara atoran te, iete amon raja manjuju tungkeh amase akan oloh te. Amon jete manjadi maka ie salamat. Tapi jari ije bulan toh aku jaton intehau awi raja.”

¹² Balalu Hatah manyampai peteh Ester te akan Mordekhai.

¹³ Palus Mordekhai mangirim pampingat toh akan Ester, “Ela ikau manyangka je ikau kareh labih mangat bara oloh Yehudi je beken, baya awi ikau melai intu istana!

¹⁴ Oloh Yehudi musti kareh dinon pandohop hapan cara en bewei kea sampai ewen salamat. Tapi amon ikau tetep manyuni arepm ih hong taloh je kalotoh, ikau kareh matei tuntang tundah kolam kareh lepah matei lumat. Eweh katawae, mikeh tantai akan kare katika kilau toh ikau jari iintih jadi ratu!”

¹⁵ Palus Ester mangirim barita toh akan Mordekhai.

¹⁶ “Keleh mumpong uras oloh Yehudi je aton intu Susan uka balakudoa akangku. Ela kuman tuntang mihop katahin telo andau telo alem. Aku kabuat tuntang kare oloh bawi ayangku kareh puasa kea. Limbah te aku kareh manaharep raja aloh jete malanggar atoran. Amon aku patut matei tagal jete, nauhe aku matei!”

¹⁷ Balalu Mordekhai haguet tuntang malalus kakare taloh je imeteh Ester akae.