ESTER 3 - SURAT BARASIH BARITA BAHALAP

Haman manampa rencana papa uka mambinasa oloh Yehudi

¹ Pire-pire katahie limbah te Raja Ahasweros mangkat ije biti oloh je bagare Haman jadi perdana menteri. Haman te anak Hamedata bara turonan Agag.

² Raja marentah kakare pagawaie uka mahormat Haman dengan sontop intu taharep ie. Uras oloh manumon parentah te kacuali Mordekhai.

³ Kare pagawai beken intu istana misek dengae mbuhen ie malanggar parentah raja.

⁴ Genep andau ewen hajajuan ie uka manumon parentah te. Tapi ie dia maku manumoe. Koae, “Aku oloh Yehudi, aku dia tau sontop intu taharep baun olon.” Palus ewen manyampai auh te akan Haman awi ewen handak mangatawan narai je iawie kareh dengan Mordekhai.

⁵ Haman sangit toto sana ie katawan je Mordekhai dia maku sontop mahormat ie.

⁶ Tuntang sana ie katawan je Mordekhai oloh Yehudi, ie mamutus uka mahukum Mordekhai. Tuntang dia baya ie bewei, tapi hapus bangsa Yehudi je aton intu karajaan Persia uras imbinasa kea.

⁷ Intu nyelo kadue walas metoh Raja Ahasweros marentah, intu bulan ije iete bulan Nisan, Haman manyoho batenong je inyewut “purim” uka mangatawan andau tuntang bulan narai je cocok uka malalus rencanae je papa te. Palus inukas tanggal telo walas bulan due walas, iete bulan Adar.

⁸ Palus Haman hamauh dengan raja, “Tuan Raja, aton ije bangsa je kasaburan intu genep propinsi karajaan toh. Hadate beken toto bara kare hadat bangsa beken. Ewen dia mamenda kare atoran karajaan. Jadi, keleh Tuan Raja ela manalua ewen malalus taloh en-en tumon kakilak ateie kabuat.

⁹ Amon puna dia hakalawan dengan tirok Tuan Raja keleh impalua surat parentah uka mambinasa ewen. Tuntang amon Tuan Raja maku manarima tirok aingku, musti kareh aku olih manamean labih bara 340.000 kilogram perak akan huang kambut duit Tuan Raja.”

¹⁰ Sana mahining auh te, raja manjawut bara tunjoke tisin je ihapae akan mancap kare pansanan pamarentah, palus inengae akan Haman, musoh hai bangsa Yehudi.

¹¹ Koan raja dengae, “Bangsa te tuntang kea kare duite inyarahku akam. Lalus narai je inirokm bahalap akan ewen.”

^12-13 Palus hong tanggal telo walas bulan ije, Haman mantehau kare jurutulis raja. Ewen inyohoe manampa surat tumon parentahe. Surat te inyalinan akan kakare basa tuntang inyurat huang kakare ampin hurup je ihapan intu karajaan te. Surat te inyurat mahapan aran Raja Ahasweros tuntang incap hapan tisie. Balalu surat te impait bajeleng akan kare oloh je kuasa, gubernur tuntang oloh hai hong genep propinsi. Auh huang surat te iete parentah uka hong tanggal telo walas bulan Adar, hapus bangsa oloh Yehudi, aloh bakas aloh tabela, bawi tuntang anak oloh uras impatei jaton ampun, tuntang panatau ewen induan.

¹⁴ Parentah te patut insanan intu genep propinsi mangat oloh uras batatap hong andau je jari inukas te.

¹⁵ Kare sarohan bajeleng haguet magah kare surat te akan gagenep propinsi hong karajaan te. Awi sohon raja, parentah te insanan kea intu Susan, lewu eka raja Persia marentah. Limbah te raja tuntang Haman mondo-mondok sambil mihop anggor, tapi lewu Susan geger awi barita te.