EKSODUS 6 - SURAT BARASIH BARITA BAHALAP

Hatalla mantehau Moses

¹ Hatalla hakotak dengan Moses, Ie hamauh, “Aku toh Tuhan.

² Aku mamparahan arep-Ku akan Abraham, Isaak tuntang Yakob kilau Hatalla Je Jaton Tikas Kuasae, tapi Aku dia mamparahan arep-Ku akan ewen dengan aran ‘Tuhan’.

³ Aku kea mampendeng janji dengan ewen. Aku hajanji handak manenga tanah Kanaan akan ewen; tanah eka ewen bihin belom kilau oloh bangsa beken.

⁴ Aku jari mahining tarahing oloh Israel je buah katulas awi oloh Misir, palus aku mingat kare janjing-Ku te.

⁵ Awi te keleh sanan akan bangsa Israel je Aku hakotak dengan ewen: Aku toh Tuhan; keton handak ilapas-Ku bara penda kajipen bangsa Misir. Aku handak mamparahan kuasang-Ku je hai hapa manyalamat keton tuntang mawi hukuman je babehat akan bangsa Misir.

⁶ Keton kareh injadiang-Ku jadi ungkup-Ku, tuntang Aku jadi Hatallan keton. Te keton kareh katawan je Aku toh Tuhan, Hatallan keton je malapas keton bara kajipen intu Misir.

⁷ Keton handak iimbit-Ku akan tanah je injanji-Ku hapan sumpah dengan Abraham, Isaak tuntang Yakob; tanah te inenga-Ku akan keton, mangat jadi ayun keton kabuat. Aku toh Tuhan.”

⁸ Uras peteh Tuhan te inyampai Moses akan oloh bangsa Israel, tapi ewen dia paduli auh Moses, awi gawi kajipen je ngapehe te jari mawi ewen nihau kaharape.

⁹ Limbah te Tuhan hamauh dengan Moses,

¹⁰ “Lius, naharep raja Misir tuntang sanan je ie musti manyoho oloh Israel malihi tanahe.”

¹¹ Tapi Moses tombah, “Oloh Israel kabuat dia maku mahining auhku. Kueh tau raja Misir mahining auh oloh je dia tau hakotak kilau aku toh.”

¹² Kalote Tuhan manyoho Moses tuntang Aron mangat manyampai akan bangsa Israel tuntang akan raja Misir je ewen inyoho Tuhan uka mimbit bangsa Israel balua bara Misir.

Horoi turonan Moses tuntang Aron

¹³ Toh horoi rinring turonan Moses tuntang Aron: Ruben, anak Yakob tambakase, aton epat anak hatue: Henokh, Palu, Hesron, tuntang Karmi. Ewen te tato hiang kare jalahan huang suku Ruben.

¹⁴ Simeon tuntang sawae ije biti bawin oloh Kanaan aton jahawen anak hatue: Yemuel, Yamin, Ohad, Yakin, Sohar tuntang Saul. Ewen te tato hiang kare jalahan huang suku Simeon.

¹⁵ Lewi aton telo anake hatue: Gerson, Kehat tuntang Merari; ewen te tato hiang ain kare jalahan oloh huang suku Lewi. Lewi manyampai umur 137 nyelo.

¹⁶ Gerson aton due anak hatue: Libni tuntang Simei; ewen te are turonae.

¹⁷ Kehat aton anake epat biti hatue: Amram, Yishar, Hebron, Usiel. Kehat manyampai umur 133 nyelo.

¹⁸ Merari aton anake due biti hatue: Mahli tuntang Musi. Jete kare jalahan huang suku Lewi dengan turonan ewen mije mije.

¹⁹ Amram kawin dengan Yokebed, betau bapae. Kare anak ewen iete Aron tuntang Moses. Amram belom 137 nyelo.

²⁰ Yishar bara anak telo hatue: Korah, Nepeg tuntang Sikhri.

²¹ Usiel kea aton anake telo biti hatue: Misael, Elsapan tuntang Sitri.

²² Aron kawin dengan Eliseba, anak Aminadab; Eliseba kea hampahari dengan Nahason. Aliseba manak Nadab, Abihu, Eleasar tuntang Itamar.

²³ Korah aton anake telo biti hatue: Asir, Elkana tuntang Abiasap. Ewen te tato hiang kare oloh bara keluarga Korah.

²⁴ Eleasar, anak hatue ain Aron, kawin dengan ije biti bara anak bawi ain Putiel, tuntang anak ewen te arae Pinehas. Jete uras kapala jalahan tuntang kapala keluarga oloh huang suku Lewi.

²⁵ Aron tuntang Moses te je inyoho Tuhan manaharep raja Misir uka ewen mambebas kare oloh Israel.

²⁶ Ewen due manaharep raja Misir mangat ie malapas oloh Israel.

Tuhan manenga parentah Akan Moses tuntang Aron

²⁷ Katika Tuhan hakotak dengan Moses intu Misir,

²⁸ Tuhan hamauh, “Aku toh Tuhan. Keleh nyampai akan raja Misir kare taloh handiai je jari insanang-Ku akam.”

²⁹ Tapi Moses tombah, “Tuhan, ikau katawan je aku dia tau hakotak. Dia baka raja maku mahining auhku.”