EKSODUS 35 - SURAT BARASIH BARITA BAHALAP

Atoran tahiu andau Sabat

¹ Moses mamumpong hapus bangsa Israel palus hamauh dengan ewen, “Toh parentah Tuhan akan keton:

² Aton jahawen andau akan bagawi, tapi andau je kauju iete andau akan malayan, andau hai je ingabeken tantai akan Tuhan. Eweh je bagawi intu andau Sabat musti ihukum matei.

³ Hong andau te keton dia tau mambelom apui intu human keton.”

Parapah akan Kemah Tuhan

⁴ Moses hamauh dengan hapus bangsa Israel, “Toh parentah Tuhan:

⁵ Imbit parapah akan Tuhan. Eweh je mahian ateie, musti maluput amas, perak tuntang tambaga;

⁶ Benang baputi halus, wol biru, ungu tuntang bahandang; benang bara bulun kambing;

⁷ upak tabiri hatue je impahandang, upak halus, kayu panaga,

⁸ minyak akan sumbo; rarampah akan minyak upacara tuntang akan garo je mangat ewaue;

⁹ permata dalima tuntang permata beken akan irasuk intu baju epod tuntang tutup usok Imam Hai.”

Ramo akan Kemah Tuhan

¹⁰ “Uras tukang tuntang oloh pintar marak keton dumah mawi kare taloh je irentah Tuhan, iete:

¹¹ kemah, sapau tuntang tutupe, kawit tuntang rangkae, kare kayu hamparang tuntang tihang bauntonggang dengan lasehe;

¹² Patin Janji dengan kayu pikule, tutupe dengan benang panutupe;

¹³ Meja dengan kayu pikule, uras pakakase tuntang rote,

¹⁴ tantahan sumbo akan kalawa dengan pakakase, sumbo dengan minyak;

¹⁵ mesbeh eka mamapui garo dengan kayu pikule, minyak upacara, garo je mangat ewaue; dinding-benang akan bauntonggang kemah,

¹⁶ mesbeh akan parapah je ingehu dengan galang tambaga, kayu pikul dengan uras pakakase; bak eka menyau dengan lapike,

¹⁷ dinding-benang akan perantaran, kare tihang tuntang lapike, dinding-benang lawang parantaran,

¹⁸ kare pasak tuntang tali akan kemah tuntang akan parantarae;

¹⁹ pakaian sombayang akan kare imam metoh ewen bagawi intu Kamar Ije Barasih tuntang pakaian je ingabeken akan imam Aron, tuntang kare anake.”

Bangsa Israel mimbit parapah ewen

²⁰ Palus uras oloh Israel je hapumpong te haguet,

²¹ tuntang eweh bewei je pahias ateie mimbit parapah akan Tuhan hapa manyukop Kemah Tuhan. Ewen kea mimbit uras taloh je ihapan hapa sombayang tuntang ramo akan pakaian imam.

²² Eweh bewei je handak, aloh hatue atawa bawi, dumah mimbit tusok hiasan, sowang, tisin, giwang, tuntang kakare macam hiasan amas uka iluput akan Tuhan.

²³ Genep biti je aton benang baputi halus, wol biru, ungu tuntang bahandang, benang bara bulun kambing, upak tabiri hatue je impahandang, atawa upak halus balalu maluput ramo te.

²⁴ Genep biti je tau manenga perak atawa tambaga, mimbite akan Tuhan. Kalote kea ilalus awi kare oloh je aton kayu panaga akan gawi te.

²⁵ Kare oloh bawi je tau manantang mimbit benang baputi halus tuntang wol biru, ungu tuntang bahandang je jari iawi ewen.

²⁶ Ewen kea manantang benang bara bulun kambing.

²⁷ Kare pamimpin mimbit permata dalima tuntang kare permata beken indu irasuk intu epod tuntang tutup usok.

²⁸ Ewen kea mimbit rarampah tuntang minyak akan sumbo, minyak upacara tuntang garo je mangat ewaue.

²⁹ Uras oloh Israel dengan kahias atei mimbit panengan ewen akan Tuhan indu gawi je irentah Tuhan mahalau Moses.

Kare tukang inyoho mawi Kemah Tuhan

³⁰ Limbah te Moses hamauh dengan oloh Israel, “Tuhan jari mintih Besaleel anak Uri, eson Hur, bara suku Yuda,

³¹ tuntang manenga kuasan Ayue; Hatalla manenga kaharati, kaapik tuntang katau hong narai bewei kare ampin macam gawi,

³² uka mawi rencana kare gawi je mahapan kapintar, palus manampae bara amas, perak tuntang tambaga;

³³ uka masa batu permata je handak irasuk; uka mukir kayu tuntang kakare macam gawi beken je tau mandahang kahalap ampin kare ramo.

³⁴ Akan Besaleel tuntang Aholiab, anak Ahisamakh bara suku Dan, Tuhan manenga kapintar majar kaapik ewen akan oloh beken.

³⁵ Ewen inenga pangatawan sepsimpan macam gawi je ilalus awi tukang pahat, tukang marancana ampin tampan kare ramo, tukang je apik manantang lena halus, wol biru, ungu tuntang bahandang, tuntang benang je beken. Ewen te tukang marancana ampin tampan kare ramo je tau manguan sepsimpan kare gawi.