DANIEL 1 - SURAT BARASIH BARITA BAHALAP

SARITAN DANIEL TUNTANG KARE SOBATE 1:1–6:29 Kare oloh tabela ain oloh Yehudi intu istana Nebukadnesar

¹ Telo nyelo limbah Raja Yoyakim marentah Yuda, Nebukadnesar raja Babel, manyarang Yerusalem tuntang mangaponge.

² Tuhan manyoho ie mampakalah Raja Yoyakim tuntang marabut belahe bara kare ramo barega intu Human Tuhan. Kare oloh je inawae imbite akan human dewae intu Babel, tuntang ramo barega je irabute iingkes intu huang gudang intu human dewa te.

³ Limbah te raja marentah Aspenas, kapala keluarga istana, uka mintih bara kare tawanan Israel pire-pire oloh tabela turonan raja atawa aton dahan bangsawan.

⁴ Ewen te kare oloh tabela je tinduh. Ewen bakena, sakola gantong, pintar tuntang are pangatawae hayak patut akan bagawi hong istana. Aspenas majar ewen mambasa tuntang manyurat basa Babel.

⁵ Raja manukas kea, panginan tuntang taloh ihop akan ewen sama dengan je inatap akan keluarga raja. Limbah ilatih katahin telo nyelo, ewen manaharep raja akan bagawi intu istana.

⁶ Marak kare oloh tabela te aton kea Daniel, Hananya, Misael tuntang Asarya, uras bara suku Yuda.

⁷ Kapala keluarga istana mangganti kare aran ewen jari: Beltsasar, Sadrakh, Mesakh tuntang Abednego.

^8-9 Dengan pandohop Hatalla, Daniel inyayang tuntang iasi awi Aspenas. Daniel manukas dia mamapa arepe dengan panginan tuntang anggor bara istana raja, awi te ie balaku dengan Aspenas uka tau mandino panginan beken.

¹⁰ Awi mikeh dengan raja, Aspenas hamauh, “Raja kabuat jari manukas panginan tuntang taloh ihopm, amon manumon tampayahe ikau ampie kurang barigas bara kare oloh tabela je beken, batantu aku akan impateie.”

¹¹ Limbah te Daniel manahiu taloh te dengan oloh jaga je inyoho Aspenas uka manantuani Daniel tuntang telo sobate. Koan Daniel,

¹² “Uji ikei katahin sapuluh andau; tenga akan ikei baya sayur tuntang danum akan panginan tuntang taloh ihop.

¹³ Limbah sapuluh andau nanding ampin ikei dengan ampin oloh tabela awang beken je kuman panginan je inukas awi raja. Palus duan putusanan hagalang pangatawam te.”

¹⁴ Oloh jaga te nahuang tuntang mancobae katahin sapuluh andau.

¹⁵ Limbah katika te lepah, ewen gitan labih barigas tuntang abas bara oloh tabela je jari mandino panginan bara mejan raja.

¹⁶ Bara katika te oloh jaga te dia tinai manyarongan akan ewen panginan tuntang taloh ihop je inukas awi raja, malengkan baya sayur tuntang danum bewei.

¹⁷ Hatalla manenga akan kaepa-epat oloh tabela te pangatawan tahiu kapintar tuntang kaharati tuntang pangatawan huang kasusastraan tuntang ilmu. Beken bara te akan Daniel inengae kapintar uka tau manarang paite tuntang nupi.

¹⁸ Hong lawin telo nyelo katika sakola je inukas awi raja te, Aspenas mimbit uras oloh tabela te manaharep raja Nebukadnesar.

¹⁹ Limbah hapander dengan kare ewen te, raja sondau je Daniel, Hananya, Misael tuntang Asarya malabien bara je beken intu uras perkara. Palus ewen nampara bagawi intu istana raja.

²⁰ Sining katika raja mimbit perkara je mamerlu katarangan tuntang tirok, ie mite je pampuji tuntang tirok kaepa-epat oloh tabela te sapuluh tingkat labih bahalap bara pampuji tuntang tirok, uras kare oloh je ahli manujum tuntang oloh ahli hong kaji intu hapus karajaae.

²¹ Daniel tetep bagawi intu istana sampai raja Kores bara Persia mampakalah Babel.