Lamentations 3 - Nan Hapit Apo Dios

Hay Amoltaan, ya hay Puntutuyuan, ya hay Hahalimidon Nan Mahhun an Pampun ya nan Aleph

Nan Mahhun an Pampun ya nan Aleph

¹ Ha"in nan tagun namadah hi ligat an gapuh bungot Apo Dios

² ti inyuya' hinan pa'ahhelong ta impadalana' hidi,

³ ya gunna' pinaligligat hi a'alga'algaw.

Nan Miyadwan Pampun ya nan Beth

Nan Miyadwan Pampun ya nan Beth

⁴ Ya paddungnay nun'aphit di lamoh'u, ya nun'a'ipung di tungal'u.

⁵ At nidugah di ha'it di nomnom'uh nan nunholholtapa'

⁶ an paddungnay inhinaa' ay Hiyah nan munhehellong an lubu' din nun'a'atoy hidin penghana.

Nan Miyatlun Pampun ya nan Gimel

Nan Miyatlun Pampun ya nan Gimel

⁷ Ya mi'id goh udot di ato' an lumayaw ti binangkilingana',

⁸ ya ta"on hi unna' numpahpahmo' ay Apo Dios mu agguyna dengngol din inluwalu'.

⁹ Ya paddungnay hinawananah natpeng an batu nan owo' ta maligatana' ahan an dumalan.

Nan Miyapat an Pampun ya nan Daleth

Nan Miyapat an Pampun ya nan Daleth

¹⁰ At hay punle'na' ay Apo Dios ya paddungnay layon unu bear an nipo"oy hinan dalan ta bota'ona'.

¹¹ At hene'mata' hinan dalan, ya ginuyuguyuda' an inyuy hi adagwi ta nunggudunay odol'u ya unna' taynan ay Hiya.

¹² Ya hay oha goh hi inatna ya paddungnay immali ta indodongdongnan ha"in di nalad an panana.

Nan Miyaleman Pampun ya nan He

Nan Miyaleman Pampun ya nan He

¹³ Ya numpanaa' ta numpangahalom hi odol'u,

¹⁴ at inaba'abatlana' hinan tatagu, ya gunda ingkankantay pamihuldan ha"in.

¹⁵ Pinaligata' ahan ay Apo Dios an paddungnay impa'inumana' hinan nidugah an mun'aklit.

Nan Miyonom an Pampun ya nan Waw

Nan Miyonom an Pampun ya nan Waw

¹⁶ Ya paddungna goh di inggatina' ta nihubuhuba' hinan pito', ya intemoga' hinan batu ta nun'a'aan di baba'.

¹⁷ At dumalat ay daten na'at ay ha"in ya mi'id mahkay di poto' di nomnom'u an mi'id di inila' hi aat di amlong.

¹⁸ At alyo' di, “Mi'id ahan di abalina', ya adi' mahkay namnamaon di badang Apo Dios ay ha"in!”

Nan Miyapitun Pampun ya nan Zayin

Nan Miyapitun Pampun ya nan Zayin

¹⁹ Ya wa ay ta nomnomo' nan nunligligata' ya nan niyadagwia' hinan ni'babluya' ya munha'it ahan di punnomnoma'

²⁰ ti nomnomnomo' ay daten na'at ya nidugah an mangluya'.

²¹ Mu himmungdu ay nan maphod an punnomnom'u ya wada damdamay namnama' ay Apo Dios.

Nan Miyawalun Pampun ya nan Heth

Nan Miyawalun Pampun ya nan Heth

²² Ti nan nidugah di pamhodna ya munnononnong an adi malumluman, ya mi'id di pogpog di homo'na

²³ an paddungnay baluh abigabigat. At mundenola' hinan anahamadna an adi mabalin hi maluman.

²⁴ At hay ninomnom'u ya alyo' di, “Hi Apo Dios ya anggay di mahapul'u, at Hiya ya anggay di ehdol'u!”

Nan Miyahiyam an Pampun ya nan Teth

Nan Miyahiyam an Pampun ya nan Teth

²⁵ Hi Apo Dios ya ma'ulay hinan mange'kod ay Hiya, ya Hiya ya anggay di dayawonda.

²⁶ At hay maphod ya way ohaan mahapul an anuhanan munhood hinan pamaliwan Apo Dios ay ditu'u.

²⁷ Ya ma"aphod hi un way ohaan impa'enghanan mangedpol hi ligat an ete"anah a'ungana.

Nan Miyapulun Pampun ya nan Yodh

Nan Miyapulun Pampun ya nan Yodh

²⁸ At wa ay ta waday ligat ya inila tu'un mangedpol an nonong ya didindinong tu'u, ya inyokod tu'un Apo Dios.

²⁹ Ti hi Apo Dios ay di pangiyokodan hinan ligat tu'u ya badangan ditu'u.

³⁰ At ta"on hi un ditu'u ipaligligat hinan buhul ta tapa'on ditu'u mu olom ya mabainanda ahan.

Nan Miyapulu ta han Ohan Pampun ya nan Kaph

Nan Miyapulu ta han Ohan Pampun ya nan Kaph

³¹ At hi Apo Dios ya ongol di homo'na an adi ditu'u inganuy hi enggana,

³² ya ta"on hi unna iyabulut di punligatan tu'u mu hom'on ditu'u damdama an miyunnudan hinan ongol an pamhodna an adi malumluman.

³³ Ti adi pun'amlongan Apo Dios di ay tu'u ipaligligatan unu numanomnoman.

Nan Miyapulu ta han Duwan Pampun ya nan Lamedh

Nan Miyapulu ta han Duwan Pampun ya nan Lamedh

³⁴ Ti undan agguyna inilay aat di nunligatan tu'uh din na'abakan tu'u ta numbalinon ditu'uh himbut hi udum an babluy?

³⁵ Ti hi Apo Dios an na'abbagtu ya inilana an layah nan lebbengna tuwalin ma'at ay ditu'u,

³⁶ ya i'innilana goh an layah di pamanuhdah nan ohan tagu.

Nan Miyapulu ta han Tulun Pampun ya nan Mem

Nan Miyapulu ta han Tulun Pampun ya nan Mem

³⁷ Ti anggay hi Apo Dios hi mangiyabulut hinan pohdonah ma'at

³⁸ ti mabalin an ipa'at Apo Dios an na'abbagbagtu nan maphod ya nan adi maphod.

³⁹ Mu anaad ta munlili tu'u ya wan na'at hana ay ditu'un gapuh nan numbaholan tu'u?

Nan Miyapulu ta han Opat an Pampun ya nan Nun

Nan Miyapulu ta han Opat an Pampun ya nan Nun

⁴⁰ At mahapul an hamadon tu'uy aat tu'u ta muntutuyu tu'u ya numbangngad tu'un Apo Dios.

⁴¹ Ti Hiya an wad abuniyan ya titiggon ditu'u, at hiyanan mahapul an iyokod tu'un amin di nitaguan tu'un Hiya an alyon tu'uy,

⁴² “Numbahol ami ahan ay He"a, ya nginohoymi He"a, at hiyanan agguymu inaliwan di baholmi!

Nan Miyapulu ta han Leman Pampun ya nan Samekh

Nan Miyapulu ta han Leman Pampun ya nan Samekh

⁴³ At gapuh bungotmu ya paddungnay inunud da'mih nan immayanmi ta pumpatoy da'min mi'id ah homo'mu.

⁴⁴ Ya paddungnay nihani'ah nan ma'ugtul an bunut ta adi dumatong nan luwalumin He"a.

⁴⁵ Ya inyabulutmu an hay pannig di Hentil hi udum an babluy ay da'mi ya ay ami galut an mi'id di hulbimi!

Nan Miyapulu ta han Onom an Pampun ya nan Ayin

Nan Miyapulu ta han Onom an Pampun ya nan Ayin

⁴⁶ Ya pinadngopadngolan ya binaibain da'mih nan buhulmi,

⁴⁷ ya nidugah di wumogwoganmin dumalat di ta'otmih nan inyammadan namituda ya nan nama"iandan da'mi.

⁴⁸ At ha"in ay ya nidugah di lugwa' an paddungnay wangwang an umayu'ayuh an dumalat din nun'a'ubahan nan ibba' an iJudah.

Nan Miyapulu ta han Pitun Pampun ya nan Pe

Nan Miyapulu ta han Pitun Pampun ya nan Pe

⁴⁹ At namaagan limmugwalugwaa' an mi'id ah duminngana

⁵⁰ ta engganah unna' hemmo' ay Apo Dios. At Hiya nongkay ya tigon da'mi, ya hom'on da'mi.

⁵¹ Mu tigo' ay nan inat nan buhulmih nan tatagud Jerusalem ya nidugah an numanomnoma'!

Nan Miyapulu ta han Walun Pampun ya nan Tsadhe

Nan Miyapulu ta han Walun Pampun ya nan Tsadhe

⁵² Ya paddungnay unna' hamutin nunhu'u' nan buhul'u an ta"on hi un mi'id di dimmalat.

⁵³ Ya penhoddan mamatoy ay ha"in ta uhbungona' hinan bitu, ya nun'uhunana' hi batu.

⁵⁴ Ya he'ne'noba' hi danum, at hay ninomnom'u ya hiyay apogpoga'.”

Nan Miyapulu ta han Hiyam an Pampun ya nan Qoph

Nan Miyapulu ta han Hiyam an Pampun ya nan Qoph

⁵⁵ Mu nunluwalua' ay Apo Dios ta badangana' hi awada' hi bunol nan bitu.

⁵⁶ At dengngolmu, Apo Dios, din numpabadanga' hidin nangalya' hi, “Donglom ni' ahan nan pumpahmo'a'!”

⁵⁷ Ya inabulutmu din imbaga', ya inalim ay ha"in di, “Adi'a tuma'ot!”

Nan Miyaduwampulun Pampun ya nan Resh

Nan Miyaduwampulun Pampun ya nan Resh

⁵⁸ At immannung an binadangana' ay Apo Dios, ya binaliwana' ta agguya' natoy.

⁵⁹ Ya inali' ay Apo Dios di, “Inilam, Apu, nan adi maphod an nangatdan da'mi, at He"a ni' di mangiballoh ta humalyaom dida!

⁶⁰ Ya i'innilam goh nan nidugah an boholda ya an amin nan ninomnomdan adi maphod an aton ay ha"in.

Nan Miyaduwampulu ta han Ohan Pampun ya nan Sin (unu Shin)

Nan Miyaduwampulu ta han Ohan Pampun ya nan Sin (unu Shin)

⁶¹ Ya dengngolmu nongkay din namadngopadngolandan ha"in ya an amin din ninomnomdan adi maphod an aton ay ha"in

⁶² an gunna' inulgu'ulgud ay didan buhul'uh abigabigat.

⁶³ Ya undan adim tigon an ta"on un hinan um'umbunanda unu tuma'ta'doganda ya gunda ikankantay pamahiwdan ha"in?

Nan Miyaduwampulu ta han Duwan Pampun ya nan Taw

Nan Miyaduwampulu ta han Duwan Pampun ya nan Taw

⁶⁴ Uggoh mah ta paligatom kogoh dida, Apo Dios, ta miyunnudan hinan adi maphod an inatdan da'mi!

⁶⁵ At punheglaom ay ni' di punligatanda,

⁶⁶ ya numpudugmu ay ni' dida an dumalat nan nidugah an bungotmu ta pumpatoymu dida!”