Itsɛ́ 5 - Ifè: Ìwé-Ɔ̀ɖáyé Ìmↄl̀ɛ̀-Ìk̀ã́ã̀nyì

Ànàníyà òŋu Sàfírà ɖã́ Mímí-Ɔ̀ɖáyé wò

¹ Ó ɖi, ɔ̀nyà-kã̀ gbo wà, tsí à nàa kpèé ní Ànàníyà, tsí à náa kpe aya‐ɛ̀ gbo ní Sàfírà. Ilɛ̀-kã̀ wà fú ŋa, tsí à mú arũ ɖé, tsí ta ilɛ̀#ɛ́.

² Tsí Ànàníyà kpɛ̃́ owó-ilɛ̀#ɛ́ méèdzì, tsí kɛ́ akpálà-kã̀, tsí ń tse ti ara‐ɛ̀. Tsí aya‐ɛ̀ gbo mà ní bɛ́ɛ̀ ní ó tse#ɛ́ ńnɛ̀ɛ́. Tsí Ànàníyà kɛ́ owó yèé bɔ̀#ɛ́ wáa lɔ káà fú adzítsɛ́-Yèésù† ŋa.

³ Ńbɛ̀ɛ́, Òkúta wà bere Ànàníyà ní: Kí tse tsí ó kɔ ìsérè‐ɛ̀ dzɔ̀ɔ́ fú Ètsù†, tsí Ètsù rúu títí ó rú Mímí-Ɔ̀ɖáyé†, tsí kɛ́ akpálà-kã̀-owó-ilɛ̀ yèé ó tà#á, tsí ń tse ti ara‐ɛ̀ bɛ́ɛ̀?

⁴ Ó má tédzú kɔ ilɛ̀#ɛ́ dzɔ̀ɔ́ náàrì tàá nɔ̀. Tsí kíbí ó sì tàá gbo tã́ báàyí#ɛ́, owó‐ɛ̀ má kí fúu, tsí ó má ń tse iŋɛ́ yèé wùú#ɛ́. Bí ó tse fáà, tsí tsèsérè, tsí tse iŋɛ́ ìrɔ́ nyɛ̀ŋɛ̀ yá? Kò tsi ɔ̀nyà ŋa ní ó rú#ɛ́. Ó ɖi, Ɔ̀ɖáyé ni.

⁵ Kíbí Ànàníyà gbɔ́ afɔ̀ nyɛ̀ŋɛ̀ ŋa gé#ɛ́, ó tsubúlɛ̀ gbòkã́, tsí kú ńǹɖì-bɛ̀. Ńbɛ̀ɛ́, ɛnɛ yèé ŋa gbɔ́ ní bɛ́ɛ̀ ní iŋɛ́ ŋa#á lɔ gbà#á, dzidzi mú ŋa kpó.

⁶ Tsí ɔmɔ̀tsɔ́ ŋa wá, tsí mú atsɔ wé òkú#ɛ́, tsí kɛ́ɛ lɔ káà rì.

⁷ Ká fɔ̀ ní aŋgo mɛ́ɛta náànyì-bɛ́ɛ̀#ɛ́, aya‐ɛ̀ gbo wɔlé wáa tó náàrìmáa ma iŋɛ́ yèé wà tse#ɛ́.

⁸ Tsí Òkúta wà bèrèé ní: Ìmarũ-owó yèé bɛ́ ní òŋu ɔkɔ‐ɛ̀ méèdzì ta ilɛ̀-ŋa áà? Kó fɔ̀ɔ́ fú òŋu káyí. Tsí ó ní: Ɛ̃ɛ̃, ìmarũ-owó nyɛ̀ŋɛ̀ ni.

⁹ Tsí Òkúta sɛ̃̀ wà rɔ́ fúu ní: Bí à tse fáà, tsí mú arũ ɖé, tsí ɖã́ Mímí-Ɔlɔ́dzɔ́ wò bɛ́ɛ̀? Kó rí gé! Ɛnɛ yèé ŋa lɔ káà ri ɔkɔ‐ɛ̀#ɛ́ ní tó náànkpã̀nàkũ̀#ɛ́. À nákó kɛ́ òŋu gbo lɔ ńǹsɛ̃̀ɛ̃́.

¹⁰ Gbòkã́ gé#ɛ́, ó tsubúlɛ̀ si ńwádzú-Òkúta, tsí kú. Tsí ɔmɔ̀tsɔ́ ŋa wɔlé, tsí rí ní ó kú, tsí à kɛ́ òŋu gbo lɔ káà rì gbe ɔkɔ‐ɛ̀.

¹¹ Tsí dzidzi lákṹ-kã̀ mú ɔma-ɛgbɛ́-Kírísítò ŋa kpó òŋu ɛnɛ yèé ŋa kpó gbɔ́ iŋɛ́ yèé tse nyɛ̀ŋɛ̀#ɛ́.

¹² Ńbɛ̀ɛ́, adzítsɛ́-Yèésù ŋa wà tse iŋɛ́-àwùsì kpíkpɔ̀ kpíkpɔ̀ náàŋírĩ-ɔ̀nyà ŋa. Tsí atɛ̀náànyì-Yèésù ŋa náa wà kpérí má kpó náàdzɔ́ nɔ́gbà-ilé-Ɔ̀ɖáyé† nábɛ́-ìfáfɛ́ yèé à náa kpè ní ìfáfɛ́-Sàlòmɔ́†#ɛ́.

¹³ Tsí ɔ̀nyà-kã̀ kpókpó náàŋírĩ-ɛnɛ-àtíbɔ̀ ŋa kà tì ɖɔ́ɔ̀rɔ̀‐ɛ̀ sɔ ní òŋu kó lɔ káà má ŋa. Ó ɖi, ɔ̀nyà ŋa kpó náa wà wíìnyɛ̀-ire nára-ŋa.

¹⁴ Tsí ɔ̀nyà ŋa wà kpɔ̀ máa, tsí wáa gba Yèésù gbɔ́, ɔnɔkɛ̃̀ɛ̃ gbo, ɔnɔbɛ̃̀ɛ̃ gbo, tsí à waà má ŋa.

¹⁵ À náa tse iŋɛ́-àwùsì ŋa gìɖì héŋú títí ɔ̀nyà ŋa náa kɛ́ àkɔ̃̀rɔ̃̀ ŋa si nání òŋu ńbànkàrá ŋa, tsí ń si nétí-ɔ̀nà ŋa lɔ àtóoríi bí Òkúta wáa làkóò ná, ni òdzìmdzim‐ɛ̀ gé kó kã ɔ̀kã̀-ŋa-kã̀.

¹⁶ Ɔ̀nyà kpíkpɔ̀ gbo náa wà ti ńǹlú ńǹlú yèé ŋa wà sɔ́má-Yèrúsàlɛ́mì#ɛ́, tsí wà kɛ́ àkɔ̃̀rɔ̃̀ ŋa wá òŋu ɛnɛ yèé edzò† ŋa wà ɖɔ́kpɔ fú ŋa gbo#ɛ́, tsí àŋa kpó, àrɔ̃̀ náa tã́ fú ŋa.

Onùgbó-ɔma-Ìyúɖà ŋa wà tsoró bá adzítsɛ́-Yèésù ŋa

¹⁷ Kíbí ó dzɛ́ ní adzítsɛ́-Yèésù† ŋa wà tse iŋɛ́-àwùsì ŋa tó bɛ́ɛ̀#ɛ́, ɔ̀gã́-atsɛbɔ-Ɔ̀ɖáyé ŋa òŋu ɛnɛ yèé náa gbé báa ŋa#á má nára-ɔma-ɛgbɛ́-Sàɖùké† ŋa, àŋa kpó, à kpé owú-ŋa dzídzɛ, tsí à wí,

¹⁸ tsí à káà mú adzítsɛ́-Yèésù ŋa lɔ káà sé nɛ́ɛ̀ŋà-ɔ̀nyà-nákpo ŋa.

¹⁹ Tsí ó ɖi nóoru‐ɛ̀, tsí adzítsɛ́-ɔ̀rɔ̃†-kã̀ wá, tsí wáa tsí èkũ̀-ilé-ɛ̀ŋà#á, tsí gbɛ̃́ adzítsɛ́-Yèésù ŋa fùɖá nóòɖe, tsí wà rɔ́ fú ŋa ní:

²⁰ Ká lɔ nɔ́gbà-ilé-Ɔ̀ɖáyé†, tsí ká káà dzíkɔ̀ kpó ti nára-àyɛ̀ titɔ̃ yèé Ɔ̀ɖáyé fú ŋa#á fú ɔ̀nyà ŋa.

²¹ Ńbɛ̀ɛ́, adzítsɛ́-Yèésù ŋa gbà si ńǹtá-afɔ̀#ɛ́, tsí náàwúrɔ̀ kùtùkùtù gé#ɛ́, à lɔ nɔ́gbà-ilé-Ɔ̀ɖáyé, tsí wà tsɛ̀kɔ́ fú ɔ̀nyà ŋa. Ńǹwèrè nyɛ̀ŋɛ̀#ɛ́, ɔ̀gã́-atsɛbɔ-Ɔ̀ɖáyé ŋa òŋu ɛnɛ yèé náa gbé báa ŋa#á kpe ɛgbɛ́-àkpɛ̀dzɔ́-ɔma-Ìyúɖà ŋa† kpó kpàɖé. Tsí à bɛkɔ̀ lɔ nɛ́ɛ̀ŋà ní ká lɔ káà gbɛ̃́ adzítsɛ́-Yèésù ŋa wá.

²² Kíbí àɖèlé-ilé-Ɔ̀ɖáyé yèé à bɛ̀ lɔ ŋa#á káà tó#ɛ́, à kò rí adzítsɛ́-Yèésù ŋa ńbí à mú ŋa si#ɛ́ ró. Tsí à sɛ̃̀ wáa lɔ káà wí fú ŋa ní:

²³ Kíbí àŋa lɔ káà tó nɛ́ɛ̀ŋà#á, àŋa rí, tsí èkũ̀ ŋa#á sé si ńǹɖì-ŋa si rere kpó, tsí aɖe-ɛ̀ŋà ŋa gbo wà ńǹɖì-ŋà ŋa lɔ si kpó. Ó ɖi, kíbí àŋa tsí èkũ̀#ɛ́, àŋa kò rí ɔ̀nyà-kã̀ kpókpó ńnɔlé#ɛ́.

²⁴ Ńbɛ̀ɛ́, kíbí ɔ̀gã́-àɖèlé-ilé-Ɔ̀ɖáyé#ɛ́ òŋu onùgbó-atsɛbɔ-Ɔ̀ɖáyé† ŋa gbɔ́ bɛ́ɛ̀#ɛ́, ó mu àŋa kpó. Tsí à wà bere ara-ŋa ní: Bí iŋɛ́ ŋa#á lɔ gbà fáà ńnɛ̀ɛ́?

²⁵ Tsí ɔ̀nyà-kã̀ wáa tó, tsí wà wí fú ŋa ní: Hàá! Ɛnɛ yèé ŋa è mú sé nɛ́ɛ̀ŋà#á, à wà nɔ́gbà-ilé-Ɔ̀ɖáyé si, tsí wà tsɛ̀kɔ́ fú ɔ̀nyà ŋa.

²⁶ Gbòkã́#á, ɔ̀gã́-àɖèlé-ilé-Ɔ̀ɖáyé ŋa ǹɖe òŋu enìkéèdzì‐ɛ̀ ŋa, tsí à lɔ káà gbɛ̃́ adzítsɛ́-Yèésù ŋa wá. À kò tse iŋɛ́-íbàɖí-kã̀ kpókpó bá ŋa. Iŋɛ́ yèé tse#ɛ́, à wà sá ní ɔ̀nyà ŋa kó máa ta àŋa nóòkúta.

²⁷ Tsí à gbɛ̃́ ŋa wáa lɔ ńɖi-ɛgbɛ́-àkpɛ̀dzɔ́-ɔma-Ìyúɖà ŋa, tsí ɔ̀gã́-atsɛbɔ-Ɔ̀ɖáyé ŋa†#á wà bèrè ŋá náfɔ̀,

²⁸ tsí wà wí fú ŋa ní: Àŋa kɔ̀ fú ŋa ní ká máa wà kɛ́ ɛ́kɔ-idza nyɛ̀ŋɛ̀, tsí wà ń tsɛ̀kɔ́ láyé láyé ró nɔ̀! Ó ɖi, ɛ̀kɔ́-ŋa#á túùnkã́ ńnɔ́-ìlú-Yèrúsàlɛ́mì wérí kpó, tsí à wà wo ká tse tsí àŋa kó dzèrè-ikú‐ɛ̀ ńnɛ̀ɛ́ nɔ̀!

²⁹ Tsí Òkúta òŋu adzítsɛ́-Yèésù àtíbɔ̀ ŋa wà wí fúu ní: Bí à nɛ́ àrísá fú Ɔ̀ɖáyé, ó sã̀ láre ká nɛ́ àrísá fú ɔ̀nyà.

³⁰ Ó ɖi, àŋa ká-ŋa, à mú Yèésù#ɛ́, tsí kã̀ã́ si ńǹtá-egi-ìɖáàgàlàdzà†, tsí ó kú. Tsí Ɔ̀ɖáyé yèé gbágbóǹgbàgbò-àŋa ŋa sɛ̃̀ wáa lɔ#ɛ́ dzíi ti náàŋírĩ-òkú ŋa wá náyé.

³¹ Òŋu ní Ɔ̀ɖáyé gbà si náàwóòtã́‐ɛ̀, tsí múu dzɛ ɔ̀gã́ òŋu Agbanɛlà àtóoríi ɔma-Ìsàràyɛ́lì† ŋa kpó ká nyíìlò kpaɖà, tsí Ɔ̀ɖáyé kó mú àbi-ŋa tɔrɛ fú ŋa#á.

³² Mímí-Ɔ̀ɖáyé† gbo, àŋa gbo, àŋa mà, tsí àŋa nákó nyáa nya àyídzá‐ɛ̀. Mímí-Ɔ̀ɖáyé#ɛ́, Ɔ̀ɖáyé tse tsí ó tì wɔ̀ ńǹtá-ɛnɛ yèé ŋa wà tse si ńǹtá-afɔ̀‐ɛ̀#ɛ́.

³³ Kíbí onùgbó-ɛgbɛ́-àkpɛ̀dzɔ́-ɔma-Ìyúɖà ŋa gbɔ́ afɔ̀ nyɛ̀ŋɛ̀ ŋa#á, inɔ́ bí ŋa gbòkã́, tsí à wò ní àŋa má kpa adzítsɛ́-Yèésù ŋa#á nóòkú.

³⁴ Ó ɖi, ɔ̀nyà-kã̀ wà náàŋírĩ-ŋa bɛ̀, tsí dzɛ́ ɔma-ɛgbɛ́-Fàrísì† ŋa. À náa kpèé ní Gàmàlɛ́lì. Akɔ́nɛ nɛ́kpa-Ɔ̀ɖáyé† ní ó dzɛ́#ɛ́, ɔ̀nyà kpó náa bu ìɖì si fúu. Ńbɛ̀ɛ́, ó ǹɖe ɖóro náàŋírĩ-ŋa, tsí ní: Ká fú, tsí adzítsɛ́-Yèésù ŋa ká fùɖá lɔ, tsí àŋa kó lɔ ńǹkpá oɖé tã́ná.

³⁵ Kíbí à fùɖá tã́#á, ó wà wí fú ŋa ní: Ɔma-Ìsàràyɛ́lì ŋa, ká tsɔ́ éwo-ara-ŋa rere nára-iŋɛ́ yèé à wà wo ká tse bá idza ŋa#á.

³⁶ Ńǹyàsɛ̃̀ɛ̃́-kã̀ ní ɔ̀nyà-kã̀ wá, tsí à náa kpèé ní Túɖà#á. Tsí ó mú ara‐ɛ̀ kpe ɔ̀nyà lákṹ-kã̀ títí ɔ̀nyà kíbí ɔ̀nyà irɛ̃́wó (400) bɛ́ɛ̀ tɛ̀ náànyì‐ɛ̀. Tsí à kpaá nóòkú, tsí atɛ̀náànyì‐ɛ̀ ŋa gbo túùnkã́ wérí kpó, tsí à kò gbɔ́ ìdzã̀mà-ŋa gìɖì ró.

³⁷ Náànyì-bɛ́ɛ̀#ɛ́, ɛnɛ-òmírɛ̃̀-kã̀ gbo wáa wá, tsí à náa kpe òŋu gbo ní Yúɖà ti Gàlìlé. Ńǹwèrè nyɛ̀ŋɛ̀ tútútú ní à wà kãnɛ#ɛ́. Tsí ɔ̀nyà kpíkpɔ̀ tɛ̀ náànyì tɛ̀ɛ̀ gbo, tsí à kpa òŋu gbo nóòkú, tsí lé atɛ̀náànyì tɛ̀ɛ̀ ŋa gbo soko wérí kpó.

³⁸ Báàyí#ɛ́, ká rɛ̃tígbè, tsí ká gbɔ́. Ká máa tse iŋɛ́-íbàɖí-kã̀ kpókpó bá ɛnɛ yèé ŋa gbo ró. Ká nya ɔwɔ́ nára-ŋa, tsí ká lɔ. Iŋɛ́ yèé tse#ɛ́, bí ó dzɛ́ ní iŋɛ́ yèé à wà tse kpó ŋa#á, ni ìsérè-ɔ̀nyà ní wà gbɛ̃́ ŋa#á, kàkó dzɛ̃̀ lárè bɛ́ɛ̀ tã́ná arũ‐ɛ̀ nákó kũ.

³⁹ Ó ɖi, bí ó sì dzɛ́ ní iŋɛ́ yèé à wà tse ŋa#á, ni ńɖi-Ɔ̀ɖáyé ní ó wà ti#ɛ́, à kàkó nyáa kpa ŋá. Ètsù† kó máa tse ŋá, tsí ká kɔ afɔ̀-Ɔ̀ɖáyé. Ńbɛ̀ɛ́, àŋa kpó, à dzɛ́ si ńǹtá-ìsérè yèé Gàmàlɛ́lì fú ŋa#á.

⁴⁰ Tsí à sɛ̃̀ kpe adzítsɛ́-Yèésù ŋa ní ká wɔlé wá, tsí à wɔlé#ɛ́ lɔ káà bá ŋa ró. Tsí à fú, tsí à tsɔ̀ ŋá náàtàmì. Tsí à kɔ̀ fú ŋa ní àŋa kó máa tɔ́ gbɔ́ ɛ́kɔ-Yèésù#ɛ́ nárũ-ŋa láyé ró. Tsí à kɔ̀ ŋá dzɔ̀ɔ́, tsí à lɔ.

⁴¹ Ńbɛ̀ɛ́, adzítsɛ́-Yèésù ŋa#á fùɖá ńɖi-ɛgbɛ́-àkpɛ̀dzɔ́-ɔma-Ìyúɖà ŋa, tsí à wà táyè ní àŋa gbo, à kò mú àŋa kpe iŋɛ́-kã̀, tsí àŋa dzɔ ní ká tsoró bá àŋa náàtsùgbé-Yèésù.

⁴² Tsí nɔ́dzɔ́ kɔ́dzɔ́#ɛ́, à náa wà gbé nɔ́gbà-ilé-Ɔ̀ɖáyé, tsí wà lɔ ńɖi-ɔ̀nyà ŋa gbo. À kà kɔ àrìmáa wà tsɛ̀kɔ́ fú ɔ̀nyà ŋa, tsí wà dzíkɔ̀ ɖíɖɔ̃̀-Yèésù fú ŋa ní òŋu ní dzɛ́ Kírísítò Agbanɛlà yèé Ɔ̀ɖáyé tsã̀#á.