Luka 4 - Fana Ngbangɔ 1987

Satana atara bɛ Yezo

¹ Yezo ĩ lua nguru tɛ Tɔrɔ Santo sĩ ko, lo lo ka Yurdɛnɛ lo diri, ko Tɔrɔ Santo amu lo, anɔ na lo ka bɛ ndo.

² Yezo ĩ si kai ko, Satana amu bi sui siɔ atara na bɛ lo. Ta lo ndotɛ ndo ye na ya bi ni ko ma, ko ngoi mɛ bi ni ko ĩ ɔ we ko, gwɛ̃ agbɔ̃ lo.

³ La Satana apa hɛ̃ lo ya: “Se mɔ du Nyi Nzapa ko, pa hɛ̃ tɛnɛ olo agbinyangbi ati tɛ, mɔ tɛ.”

⁴ Yezo agbinya hɛ̃ lo ya: “Buku tɛ Nzapa apa ya: ‘Ta zo ndodu le lo ngɛ̃ bo na lo ti tɛ ma.’ ”

⁵ So pɛni Satana amu lo, agwe na lo ka ndozu nvɛni, ko bo na ngoi kɔi ko, lo fa Yezo na akɔdɔrɔ zu mɛ na lɛ sese,

⁶ lo pa hɛ̃ lo ya: “Mbi na hɛ̃ngɔ mɔ nguru ya, mɔ lɛ gbia na ndo akɔdɔrɔ olo kwɛ zu, ko mbi nga na hɛ̃ngɔ mɔ nwa ti kɔdɔrɔ ni ko zu. Aye ni ko zu tɛ mbi, ko mbi lengbi ti hɛ̃ngɔ ni hɛ̃ zo mɛ bɛ mbi aye lo.

⁷ Wa se mɔ kuku gbɛlɛ mbi ko, aye ko zu na dungɔ ti mɔ.”

⁸ Yezo agbinya hɛ̃ lo ya: “Buku tɛ Nzapa apa nga ya: ‘Ale mɔ vɔrɔ Gbia Nzapa tɛ mɔ, ko bo lo la ale mɔ li kwa hɛ̃ lo.’ ”

⁹ So pɛni, Satana amu lo, anɔ na lo ka Yeruzalɛmɛ, akpã lo ka bɛ li kota da Nzapa, apa hɛ̃ lo ya: “Se mɔ du Nyi Nzapa ko, zunda ge tise.

¹⁰ Ta sanga ma, Buku tɛ Nzapa apa ya: ‘Nzapa ahɛ̃ gbanda nyɔ hɛ̃ aangelo tɛ lo ya, ala bata mɔ.’

¹¹ Buku ni apa nga ya: ‘Ala lia gbanda mɔ, so mɔ gu gɛrɛ mɔ na tɛ́nɛ, ko mɔ ɔ̃ kã.’ ”

¹² Ko Yezo agbinya hɛ̃ lo ya: “Buku tɛ Nzapa apa nga ya: ‘Ta mɔ tara Gbia Nzapa tɛ mɔ ma.’ ”

¹³ Satana ĩ tara bɛ Yezo na se kɔdɛ zu gba ko, azia lo aɔ so kungɔ ngoi mɛ ndɛ̃.

Yezo ato nda lingɔ kwa tɛ lo ka Galilea

¹⁴ Yezo adiri ka Galilea na nguru tɛ Tɔrɔ Santo sĩ na ya tɛrɛ lo. Ko pa ili lo ati ka lɛ sese ti Galilea zu gboo!

¹⁵ Lo ndoha ndo azi na lo tɛ Nzapa na ya da sambela tɛ Ayuda, ko azi zu ndogonda ndo lo.

Awa Nazarɛtɛ akɛ Yezo

¹⁶ Yezo anɔ ka Nazarɛtɛ, kɔdɔrɔ mɛ ndo aka na lo. Ĩ da na lá ti wɔngɔ tɛrɛ tɛ Ayuda ko, lo nɔ lo li ya da sambela, nga ma se mɛ lo ndoli ngoi zu. Lo ĩ lo ndozu so dingɔ Buku tɛ Nzapa ko,

¹⁷ hɛ lo buku mɛ Ezai wa pangɔ nyɔ Nzapa asu. Adu buku mɛ agana ni ganangɔ. Lo zara ya ni, ko lo lua tɛnɛ mɛ asu ya:

¹⁸ “Tɔrɔ tɛ Gbia azu ndo mbi, Gbia asara nga mbi akpã ya, mbi pa Nzɔ̃ Pa hɛ̃ awa yɛlɛ. Lo to mbi ya, mbi pa hɛ̃ awa bɔlɔkɔ ya, na zingɔ la ka bɔlɔkɔ. Mbi pa nga hɛ̃ awa ziba ya, ala na hũngɔ ndo. Lo to mbi ya, mbi zi azi mɛ andohɛ̃ la pɛnɔ.

¹⁹ Gbia ato mbi ya, mbi pa nga hɛ̃ azi buru mɛ ni na fangɔ hɛ̃ la ya, ni ndoli nzɔ̃ bɛ hɛ̃ la.”

²⁰ Yezo ĩ di tɛnɛ ko wɛ ko, lo ti gana buku ni, lo hɛ̃ wa kwa ti ya da sambela, lo ko lo du tise. Ko azi kwɛ zu mɛ so ya da sambela asa lɛ la tɛrɛ lo, so ndoba lo toka toka.

²¹ La lo pa hɛ̃ la ya: “Na lá olo ko, tɛnɛ mɛ buku olo atɛnɛ ati na seni, bo na ngoi mɛ fɛrɛ ĩ ma mbi ndodi ni.”

²² Ala zu agonda Yezo, ko ala bema na lo nzɔ̃ tɛnɛ mɛ lo tɛnɛ. Ala pa ya: “Ta nyi Yozɛfu lo mɛ ma?”

²³ Yezo apa hɛ̃ la ya: “Mbi hĩnga nzɔ̃ni ya, ĩ na tongɔ matɔ hɛ̃ mbi, matɔ ni lo mɛ: ‘Mɔnganga, sara tɛrɛ mɔ, mɔ nvɛni.’ Ĩ nga na pangɔ hɛ̃ mbi ya: ‘E ma pa ti aye zu mɛ mɔ li ka Kapɛrnaumɛ, wa li nga ngi lɛ aye ni ko ge kɔdɔrɔ tɛ mɔ nvɛni.’ ”

²⁴ La Yezo apa nga hɛ̃ la ya: “Mbi pa hɛ̃ ĩ ti bɛta tɛnɛ ya, ta ndoyamba wa pangɔ nyɔ Nzapa so ya kɔdɔrɔ tɛ lo nvɛni ma.

²⁵ Na ngoi tɛ Elia wa pangɔ nyɔ Nzapa ko, aɔ ndo buru ota na nzɛ̃ mana, ta ngu ndoni ma. Gwɛ̃ aya nga alengbi na lɛ sese ti Izrayɛlɛ kwɛ zu. Mbi pa hɛ̃ ĩ ti biani ya, awe muã ma wo ma ndodu ndo ka Izrayɛlɛ na ngoi ni ko,

²⁶ ko ta Nzapa ato ndo Elia ka tɛ awe muã ko ma. Kanda lo to ndo lo ka tɛ we muã kɔi mɛ ndo ndodu ka kɔdɔrɔ ti Sarɛpeta, ka sese ti Sidona.

²⁷ Awa ndiba ma wo ma ndodu nga ndo ka Izrayɛlɛ na ngoi tɛ Elize wa pangɔ nyɔ Nzapa. Ko ta ndiba tɛ zo kɔi na popo tɛ la awe ndo ma, bo Naama mɛ ndo wa Siria la ndiba tɛ lo awe.”

²⁸ Azi kwɛ zu mɛ ndo so ya da sambela ĩ ma so ko, ngɔnzɔ agbɔ̃ la sĩ.

²⁹ Ala longa ndozu, amu Yezo so ya kɔdɔrɔ ni ko asi na ni. Ala ma na lo ka bɛ li hɔtɔ mɛ ndo ala du kɔdɔrɔ da. Ala ma ndo na lo kai ya, ani yuru lo, lo ti.

³⁰ Ko Yezo alo so popo tɛ la aɔ.

Zo kɔli mɛ siɔ tɔrɔ ndogia lo

³¹ La Yezo anɔ ka kɔdɔrɔ ti Kapɛrnaumɛ, ka sese ti Galilea. Ko ĩ da na lá ti wɔngɔ tɛrɛ tɛ Ayuda ko, lo ha azi na lo tɛ Nzapa.

³² Ala bema ndo sĩ na se kɔdɛ mɛ lo ndoha na lo tɛ Nzapa, ta sanga ma, lo ndotɛnɛ ndo tɛnɛ nga ma se tɛ gbia.

³³ Mbanga kɔli kɔi mɛ na siɔ tɔrɔ ya tɛrɛ lo ndo so ya da sambela ni ko. Lo to nda dɛrɛngɔ kɔngɔ kpengbani ya:

³⁴ “Oo. Yezo wa Nazarɛte, ye mɛ mɔ ye lingɔ na e nɛ? Mɔ ga ya mɔ ho e? Mbi hĩnga mɔ nzɔ̃ni, mɔ santo mɛ Nzapa ato mɔ!”

³⁵ Yezo ĩ ma so ko, agbo ndo siɔ tɔrɔ ko, ahɛ̃ nga nyɔ hɛ̃ lo ya: “Kai so, si ya tɛrɛ kɔli olo mɛ!” Ko siɔ tɔrɔ akinda kɔli ko so gbɛlɛ azi zu, alo ka ya tɛrɛ lo asi, kanda ta siɔ tɔrɔ ni ali ndo lo siɔni bɛ yakere ma.

³⁶ Azi zu ĩ hũ so ko, ala bema, ko ala so ndotɛnɛ ka popo tɛ la ya: “Kɔdɛ tɛnɛ mɛ sia? Kɔli olo ndohɛ̃ nyɔ nga ma gbia hɛ̃ asiɔ tɔrɔ, ko ala ndolo ka ya tɛrɛ azi asi o!”

³⁷ La pa ili Yezo ati gboo na lɛ sese ti Galilea zu.

Yezo asara awa ngã ma wo ma

³⁸ Yezo alo ka ya da sambela asi, anɔ ka tɛ Simɔ. Ko lo tã tɛrɛ wogara Simɔ ndogbi gambu gambu. La azi agbɔ̃ gɛrɛ Yezo ya, lo sara lo.

³⁹ Ko Yezo awo tɛrɛ lo na ndo wali ko, agbo ndo tɛrɛ zo wali mɛ ndogbi gambu gambu, la tɛrɛ zo wali ko ade lelele. La zo wali ko alo vu, ahɛ̃ la tɛ.

⁴⁰ Ndɔ ĩ de ko, azi zu alɔ awa nga tɛ la mɛ na lɛ ngã tɛrɛ la ndɛ̃ ndɛ̃ ndɛ̃, aga na la hɛ̃ Yezo. Lo kpãkpã ti lo ndo zo kɔi kɔi, lo sara la zu.

⁴¹ Asiɔ tɔrɔ alo ndo ka ya tɛrɛ awa ngã ma wo ma asi na kɔngɔ yanga la ya: “Mɔ Nyi Nzapa! Mɔ Nyi Nzapa!” Yezo ĩ ma so ko, agbo ndo la, agbanzi la ya, ta ala tɛnɛ tɛnɛ ma, na lo mɛ ya, ala hĩnga ndo ya, lo Mɛsia.

Yezo aha lo tɛ Nzapa ka Yudea

⁴² Lá ĩ bo za ko, Yezo alo so ya kɔdɔrɔ ko, anɔ ka bɛ ndo. Azi butu butu ato nda gingɔ lo. Ala ĩ nɔ ĩ tã lo ko, ala separa gbanzingɔ lo ya, ta lo zia ani lo gwe ma.

⁴³ La lo pa hɛ̃ la ya: “Ale mbi pa nga Nzɔ̃ Pa ti lo Lɛngɔ Gbia tɛ Nzapa na ya akɔdɔrɔ mɛ ndɛ̃, ta sanga ma, Nzapa ato mbi ge lɛ sese na lo ni.”

⁴⁴ Ko lo ndopa lo tɛ Nzapa na ya da sambela mɛ ka sese ti Yudea.