Aebreo 1 - Fana Ngbangɔ 1987

Nzapa atɛnɛ tɛnɛ hɛ azi

¹ Ndo gã ko, Nzapa atɛnɛ ndo tɛnɛ fani sĩni, nga na lege ndɛ̃ ndɛ̃ ndɛ̃ hɛ̃ akotara e. Lo kpã ndo tɛnɛ ni na nyɔ awa pangɔ nyɔ lo, la ala tɛnɛ hɛ̃ akotara e.

² Ko ĩ da na olo na ndangba ngoi ko, lo kpã tɛnɛ ni na nyɔ Nyi lo, la Nyi lo atɛnɛ hɛ̃ e. Nzapa ali ndo aye zu ti ndo Nyi lo, lo la Nzapa asara lo akpã ya, lo du Nvɛ̃ aye zu.

³ Ndima tɛ Nzapa ndosũ na tɛrɛ Nyi lo, du tɛ lo na du tɛ To lo Nzapa bo kwɛ kɔi. Lo ndobata sese na nguru ti tɛnɛ ti nyɔ lo. Ngoi mɛ ndo lo ĩ zi lege ti kpongɔ siɔ ye tɛ azi ko, lo ma ka yayu, lo du na ndo kɔti ti Nzapa mɛ nguru tɛ lo aɔ nguru zu.

Nyi Nzapa aɔ aangelo

⁴ Nyi Nzapa aɔ aangelo, la Nzapa ahɛ̃ lo ili mɛ ngbondoni aɔ tɛ la.

⁵ Ta sanga ma, ta Nzapa atɛnɛ tɛnɛ olo hɛ̃ mbanga angelo tɛ lo kɔi bɛ gbɔ ma. Tɛnɛ ni lo mɛ: “Mɔ Nyi mbi, Ko na lá olo mɛ ko, mbi pa ya, mbi To mɔ.” Ta Nzapa ade nga atɛnɛ tɛnɛ olo na lo tɛ angelo kɔi bɛ gbɔ ma. Tɛnɛ ni lo mɛ: “Mbi na dungɔ To lo, Ko lo nga na dungɔ Nyi mbi.”

⁶ Ngoi mɛ ndo Nzapa aye tongɔ kɔzo Nyi lo ge le sese ko, lo pa ndo a: “Ale aangelo tɛ mbi zu avɔrɔ lo.”

⁷ Tɛnɛ mɛ ndo Nzapa atɛne na lo tɛ aangelo lo mɛ: “Mbi kpã aangelo tɛ mbi awa kwa tɛ mbi, Mbi li la nga ma yá, na menga wá.”

⁸ Kanda ĩ da na tɛ Nyi lo ko, lo pa hɛ̃ lo ya: “Oo Nzapa, mɔ Gbia ti kaka. Mɔ ndole gbia ndo azi tɛ mɔ na seni.

⁹ Bɛ mɔ ndoye ye mɛ bɛtani, Kanda bɛ mɔ ndokɛ̃ siɔ ye. Nda mɛ mbi Nzapa tɛ mɔ, mbi sara mɔ, Mbi kpã mɔ ndo afɔ̃ mɔ, Mbi li nga ya, bɛ mɔ ade sĩ la.”

¹⁰ Nzapa apa nga hɛ̃ lo ya: “Oo Gbia, ndo uzu gã ko, mɔ ndo la mɔ li sese, Mɔ ndo nga la mɔ li ndozu na ti mɔ nvɛni.

¹¹ Ndozu na sese awɛ gbanda, ko mɔ ngbã tɛ mɔ gbanda kaka. Ndozu na sese agbɛ̃ gbanda, ati nga ma mbusu bɔngɔ,

¹² Mɔ ngo gbanda ni mɔ zi, nga ma se mɛ andongo na bɔngɔ. Ndozu na sese agbɛ̃ gbanda, anzuruka, Nga ma se mɛ, se bɔngɔ agbɛ̃ ko, anzuruka. Kanda tɛ mɔ ko, mɔ ndongbã na se tɛrɛ mɔ, Ta mɔ ti gbanda bange bɛ gbɔ ma.”

¹³ Ta Nzapa atɛnɛ tɛnɛ olo hɛ̃ mbanga angelo tɛ lo kɔi bɛ gbɔ ma. Tɛnɛ ni lo mɛ: “Du na ndo kɔti ti mbi, Nga ka mbi nwɔ awa kɛ̃ngɔ mɔ, Mbi kpã la na gbe gɛrɛ mɔ.”

¹⁴ Wa aangelo adu ana? Aangelo adu atɔrɔ mɛ ndoli kwa hɛ̃ Nzapa. Nzapa ndoto la ya, ala nɔ aza azi mɛ ni ye songɔ la.