1 Tɛsalɔnikɛ 1 - Fana Ngbangɔ 1987

Balangɔ

¹ Mbi Polo, na Silasi, nga na Timɔte la e to mbɛti olo hɛ̃ ĩ azi ti Eklezia mɛ ka kɔdɔrɔ ti Tɛsalɔnike, ĩ azi tɛ To e Nzapa nga na tɛ Gbia Yezo Kristo. E bala ĩ. Nzapa ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Polo ahɛ̃ sia kɔli hɛ̃ Nzapa na lo tɛ awa Kristo ti Tɛsalɔnikɛ

² E ndohɛ̃ sia kɔli ngoi zu hɛ̃ Nzapa na lo tɛ ĩ zu, ko e ndoda nga bɛ e na ĩ la kwɛ, na ngoi sambela tɛ e.

³ Ngoi mɛ e ndosambela To e Nzapa ko, e ndoda bɛ e ngoi zu na se mɛ ĩ ndoli na kwa, na lo mɛ ya, ĩ ye lo tɛ lo. E ndoda bɛ e na se mɛ ĩ ndoli na kpengba kwa hɛ̃ lo, ta sanga ma, bɛ ĩ aye lo. E ndoda nga bɛ e na se mɛ ĩ ndolɛndɛrɛ na Gbia tɛ e Yezo Kristo kpengbani.

⁴ Aya bua, e hĩnga ya, Nzapa ndoye ĩ, ko lo sara ĩ lo kpã ya, ĩ du azi tɛ ni.

⁵ Ta sanga ma, ta e pa ndo Nzɔ̃ Pa hɛ̃ ĩ bo na nyɔ e gɛgɛrɛ ma, kanda e pa ndo nga ni na nguru tɛ Tɔrɔ Santo. E hĩnga ndo nzɔ̃ni ya, Nzɔ̃ Pa mɛ ndo e pa ko, adu bɛtani buai. Ngoi mɛ ndo e dɛ ka popo tɛ ĩ ko, ĩ hĩnga ndo se du tɛ e, ko e ndoli ndo so ya, e za ĩ.

⁶ Ĩ mu ndo nzɔ̃ lɛ lo tɛ e, ĩ mu ndo nga tɛ Gbia Yezo. Ngoi mɛ ndo ĩ ye tɛnɛ tɛ Nzapa ko, ĩ hũ ndo pɛnɔ sĩ na lo ni, kanda Tɔrɔ Santo ahɛ̃ ndo ĩ dengɔ bɛ na lo ni.

⁷ Na lo ni ko, ĩ ti awa fangɔ nzɔ̃ lɛ lo hɛ̃ awa Kristo zu mɛ ndodu ka sese ti Masedoanɛ, nga na ala mɛ ka sese ti Grɛsɛ.

⁸ Na lo tɛ ĩ ndo la azi ahĩnga tɛnɛ tɛ Gbia ka tɛ ĩ, ta bo ka sese ti Masedoanɛ na sese ti Grɛsɛ kɔi ma. Kanda na ndo kwɛ zu la azi ahĩnga lo yengɔ lo tɛ Nzapa mɛ ka bɛ ĩ, ko ta e lengbi ti tɛnɛngɔ oko tɛnɛngɔ ma.

⁹ Azi ndopa se mɛ ndo ĩ yamba na e, na ngoi mɛ ndo e si ka tɛ ĩ. Ala ndopa nga se mɛ ndo ĩ dɔ vɔrɔngɔ angbilondo ĩ zia, so lingɔ kwa hɛ̃ bɛta Nzapa mɛ lɛ lo ngɛ̃,

¹⁰ nga so masingɔ ya, Nyi lo Yezo mɛ ndo lo so lo na pɛ kwa, alo ka yayu aga. Ko Nyi lo ni aso e na ya siɔ ye, so Nzapa ali ngɔnzɔ hɛ̃ e na ngoi ti fangɔ ngbanga.