Tɔlɔ Mɔ 36 - WE NU GALE 1995

Mbula ngɔ nùi 'da obokonɔ

¹ Okpasa wi ngɔ nu fɛlɛ Galadɛ, wa nɛa 'da Mɔizɛ do okpasa wi ngɔ nu kpala obe Israɛlɛ. (Okpasa wi nu fɛlɛ Galadɛ ni zi a obe zã Makirɛ, be yaa Manase. Nɛ wa vɛ̃ a obe zã Yozɛfu.)

² Nɛ wa kpa wa, nɛ wa tɔ̃ na: “Mɔizɛ, nwa ba zi nu ɛ hã mɔ na, mɔ to zeke, kɔ mɔ gɔnɔ sanga nùi hã nu kpala obe Israɛlɛ. A ba 'bɔ nu a hã mɔ na, mɔ hã 'bili tɛ nùi 'da nya lɛ Sɛlofadɛ hã oboko benɔ 'da a.

³ Nɛ nde tɛ mɔ ɔ́ ngɔ na, fala kɛ wa ba wili kɔ gele nu fɛlɛ, nɛ 'bili tɛ nùi 'da wa ma la sɛ dɛ ngɔ kɛ 'da gele nu fɛlɛ wa ba do wili ni. Na mɛ ni, nɛ nu 'bili tɛ nù kɛ wa tua zeke, nɛ wa hã ma hã lɛ ni, ma fo sɛ tɛ̃ ɛ kɔ lɛ.

⁴ Nɛ 'da fala ma hɔ sɛ kɔ sabɛlɛ kɛ 'bu nɛ mɔlɔ, 'da fala kɛ nùnɔ wa bia zi gole nɛ ni, ma kpolo tɛ̃ ɛ dɛ kɔ wele nɛ ni, nɛ 'bili tɛ nùi 'da wa ma la sɛ 'bana do zu ɛ dɛ kɔ gele nu fɛlɛ ni.”

⁵ Ma kɛ NWA ba nu a hã Mɔizɛ na, a e mbulanɔ gɛ hã obe Israɛlɛ na: “Ogaladɛ wa do dia gulu we.

⁶ NWA ba nu a ngɔ oboko benɔ 'da Sɛlofadɛ na, wa wia do ba wili kɛ vɛ̃ zã wa kɔ̃a ni. Nɛ nde ma wia na, wi wili nɛ a ɔ́ do wele dɛ kɔ nu fɛlɛ kula 'da baa wa.

⁷ Na mɛ ni, nɛ nùnɔ 'da obe Israɛlɛ, ma wé sɛ we la dɛ kɔ mbé gele nu fɛlɛ gɔ. Be Israɛlɛ kpo kpo a 'bana sɛ dɛ kɔ 'bili tɛ nùi 'da nu kpala a.

⁸ Fala kɛ kɔ nu kpala obe Israɛlɛ kpo, wuko kpa 'bili tɛ nù do mɔ́ a, nɛ ma wia na, a ba wili dɛ kɔ nu fɛlɛ kula 'da baa a, takɔ nu kpala be Israɛlɛ kpo kpo 'bana do 'bili tɛ nù olo yaa a.

⁹ Na mɛ ni, nɛ nùnɔ yóló sɛ kɔ nu kpala kpo we la dɛ kɔ gele nu kpala gɔ. Nu kpala obe Israɛlɛ kpo kpo ma 'bana sɛ do 'bili tɛ nùi 'da a.”

^10-11 Obenɔ 'da Sɛlofadɛ: Mala, Tirsa, Hogla, Milka do Nowe, wa dɛa olo nu NWA kɛ a tɔ̃a hã Mɔizɛ ni. Nɛ wa kala obenɔ 'da nya baa wa do wili wa.

¹² Nɛ wa ba ngba wa dɛ sanga wa obe zã Manase, be 'da Yozɛfu. Na mɛ ni, nɛ 'bili tɛ nùnɔ wa kpa zi ni, ma 'bana dɛ kɔ nu fɛlɛ baa wa.

¹³ Ki ni a ombulanɔ kɛ NWA ia hã obe Israɛlɛ do wala 'da Mɔizɛ tɛ li mbɛ nù Moabɛ, dɔ̃ɔ do nu lì Yɔrdanɛ, kɛ ma ka mɔ dɛ li le Yeriko gɛ a ni.