Tɔlɔ Mɔ 13 - WE NU GALE 1995

Mɔizɛ tumba Owele na wa yɛnggɛ we zɔ nù Kanana

¹ Ngba soe kpo, nɛ NWA tɔ̃ hã Mɔizɛ na:

² “Mɔ tómbó Owele, kɔ wa yɛnggɛ we zɔ nù Kanana, kɛ mi hã ma hã nɛ obe Israɛlɛ ni. Kɔ nu kpala wi kpo, nɛ mɔ saka sɛ wi wili kpo sanga okumunɔ 'da wa.”

^3-15 Mɔizɛ zila nu NWA, nɛ a tombo Owele 'bu ngɔ wa bɔa kɛ wa a ogã wi ngɔ obe Israɛlɛ. Wa yula tɛ li gba zɔ̃ Paranɛ, nɛ wa la. Li wa ma kɛ: Nu kpala Li wi wa saka a Rubɛnɛ Samua, be 'da Zakurɛ Simeoni Safatɛ, be 'da Hori Yuda Kalɛbɛ, be 'da Yɛfune Isakarɛ Igalɛ, be 'da Yozɛfu Efraimɛ Hose, be 'da Nunɛ Bɛnzamɛ Palti, be 'da Rafu Zabuloni Gadiɛlɛ, be 'da Sodi Manase Gadi, be 'da Susi Danɛ Amiɛlɛ, be 'da Gɛmali Asɛrɛ Sɛturɛ, be 'da Mikaɛlɛ Nɛftali Nabi, be 'da Vofsi Gadɛ Guɛlɛ, be 'da Maki

Nu kpala Li wi wa saka a

¹⁶ Ki ni a li owinɔ kɛ Mɔizɛ tumba wa na, wa yɛnggɛ we zɔ nù Kanana gɛ a ni. (Mɔizɛ ia zi li Hose, be 'da Nunɛ na Yozue.)

¹⁷ 'Da fala Mɔizɛ tombo winɔ ni, nɛ a tɔ̃ hã wa na: “Nɛ lé ngɔ nù Kanana do li gba zɔ̃ Negɛvɛ si ba gɔtɔ. 'Do nɛ, nɛ nɛ la si ngɔ kalanɔ.

¹⁸ Nɛ nɛ yɛnggɛ ngɔ nùi we zɔ tɛlɛ tɛ kɛ ma ɔ nɛ ni. Nɛ nɛ zɔ́ na, winɔ wa dɛlɛ wena, tabi wa dɛlɛ gɔ nde. Nɛ wa nganda wena, tabi wa ngàndà gɔ nde.

¹⁹ Nɛ zɔ́ 'bɔ na, nù Kanana de wena, tabi ma dè gɔ nde. Nɛ owinɔ wa ɔ kɔ lenɔ kɛ gba ngbo zĩ ma takpa, tabi ma iko nde.

²⁰ Nɛ nɛ zɔ́ 'bɔ na, nùi ni de do kpalɛ dia, nɛ ote ngɔ nɛ boe, tabi gɔ nde. Nɛ nɛ do kpã sila, nɛ nɛ 'bi mbe wala tenɔ ngɔ nùi ni si do nɛ.” (Mɛ zi a zɔlɔ kɛ wala vinɔɛ ndo fele nɛ ni.)

²¹ Owinɔ ni wa nɛa, nɛ wa hɔ tɛ li gba zɔ̃ Tisinɛ. Nɛ wa yolo di ni, nɛ wa nɛ, nɛ wa yɛnggɛ we zɔ nù Kanana gbaa, nɛ wa hɔ Rɛhɔbɛ, dɔ̃ɔ do Lɛbo-Hamatɛ.

²² Wa lia ngɔ nùi do li gba zɔ́ Negɛvɛ, nɛ wa hɔ Hebroni, fala onu fɛlɛ Ahimanɛ, Sekai do Talmai wa ɔ do ma ni. Wa a obe zã du wi, li a a Anakɛ. (Wa dɛa zi le Hebroni sabɛlɛ sambo dati kɛ na, wa dɛ le Soanɛ tɛ ngɔ nù Ezipeto ni.)

²³ 'Do nɛ, nɛ wa la dɛ kɔ gbangɔlɔ̃ Ɛsɛkɔlɛ. Wa hɔa i mɔ, nɛ wa 'bili gbakɔ̃ te vinɔ do owala nɛ dɛ tɛ nɛ, nɛ wa fi ngbangbo tɛ nɛ, nɛ wa kala 'bɔ wala grɛnadɛ do wala figɛ, nɛ wele bɔa wa ba tole mɛnɔ ni.

²⁴ (Wa sa zi li fala ni na Gbangɔlɔ̃ Ɛsɛkɔlɛ, we duzu gbakɔ̃ te vinɔɛ obe Israɛlɛ wa 'bili zi ni.)

Owi yɛnggɛ we zɔ nùi wa si

²⁵ Owinɔ ni wa yɛnggɛ, nɛ wa zɔ nùi vɛ̃ 'do 'bu tũ nalɛ.

²⁶ Nɛ wa kpolo tɛ wa dɛ Kadɛsɛ, tɛ li gba zɔ́ Paranɛ, dɛ 'da Mɔizɛ, Aroni do obe Israɛlɛ. Nɛ wa tɔ̃ we mɛnɔ vɛ̃ wa zɔa i mɔ ni, nɛ wa be 'bɔ wala tenɔ ngɔ nùi ni hã wa.

²⁷ Nɛ wa tɔ̃ hã Mɔizɛ na: “Lɛ nɛa, nɛ lɛ le ngɔ nùi mɔ tumba zi lɛ ngɔ nɛ ni. Mɛ a gbãlã we na, mɛ a nù kɛ ma do nyɔngɔmɔ la li ngele. Mɔ zɔ mbe wala tenɔ i mɔ ni kɛ.

²⁸ Mɔ kpo a kɛ winɔ wa ɔ ngɔ nùi ni, wa nganda wena, nɛ lenɔ 'da wa gã wena, nɛ gba ngbo zĩ ma takpa. Lɛ zɔa 'bɔ odu winɔ kɛ wa a obe zã Anakɛ ni.

²⁹ Oamalɛkɛ wa ɔ tɛ li gba zɔ́ Negɛvɛ. Nɛ Ohiti do Oyebuzi do Oamori, wa ɔ do ngɔ kalanɔ. Nɛ nde Okanana wa ɔ do nu kolo gba lì Meditɛrane do nu kolo lì Yɔrdanɛ.”

³⁰ Ombe winɔ sanga obe Israɛlɛ, wa ma ngɔ tɔ̃ 'dã we hã Mɔizɛ, nɛ Kalɛbɛ ga wa, nɛ a tɔ̃ na: “Lɛ nɛ́! Lɛ wia we bi wa, nɛ lɛ ba nùi 'da wa.”

³¹ Nɛ ongba Kalɛbɛ wa na: “Lɛ wè we bi winɔ ni gɔ, wa nganda nɛa ngɔ lɛ wena.”

³² Wa tɔ̃a ni do'do, nɛ wa ma ngɔ tɔ̃ lɛnggɛ bɛlɛ we nùi wa yɛnggɛ we zɔ ma ni na: “Nùi lɛ yɛnggɛ ngɔ nɛ we zɔ ma ni, winɔ wa yolo gele fala kɔ wa hɔ i mɔ, nɛ wa fe do'do. Owinɔ vɛ̃ lɛ zɔa wa i mɔ ni, wa dulu wena.

³³ Lɛ zɔa 'bɔ odu winɔ, kɛ wa a obe zã Anakɛ ni. Kɔ lɛ we tɛ lɛ do wa, nɛ lɛ ɔ nɛ olaka iko ni. Nɛ wa zɔ tɛ mɛ 'bɔ lɛ li wa ɔ nɛ mɛ ni.”