YƆƐLƐ 4 - WE NU GALE 1995

Gale a bili sɛ nu gbã hã ogele winɔ

¹ Nɛ NWA tɔ̃a 'bɔ na: “Do 'da fala ni, mi 'dafa sɛ dungi 'da owinɔ 'da mi tɛ Yeruzalɛmɛ, do ngɔ nù Yuda na, wa dungu do dia nɛ, nɛ́ kɛ zi dati ni.

² Mi ngɛmɛ sɛ li ogele winɔ vɛ̃ dɛ kɔ gbangɔlɛ̃ li nɛ a: ‘NWA tɛ gɔnɔ ngbangga’ ni. Nɛ mi gɔnɔ sɛ ngbangga 'da wa we mɛnɔ vɛ̃, kɛ wa dɛa zi do obe Israɛlɛ, owinɔ 'da mi ni dɛ di ni. Mba gɔ, wa bi zi obe Israɛlɛ, nɛ wa pɛsɛ wa dɛ ngɔ gele nùnɔ, nɛ wa ba nùi 'da mi, nɛ wa gɔnɔ sanga nɛ dɛ kɔ̃ ngba wa.

³ Wa kala owinɔ 'da mi, nɛ wa 'bɛnɛ mɔ we kɛ̃ wa dɛ ngbala ngba wa. Wa bia gole obulu benɔ, nɛ wa kala mbili nɛ do owuko ndumba. Nɛ wa be gole oboko benɔ, takɔ wa kpa mbili we oso do dɔ̃.

⁴ “Aa nɛ, Owi kɔ le Tirɛ, do Sidoni, do Owi kɔ lenɔ ngɔ nù Filisti, mɛ kɛ nɛ kɔ̃a we dɛ do mi ni a mɔ ge nde? Nɛ kɔ̃a we bili nu gbã hã mi nde? Fala kɛ nɛ lengge ni, nɛ nde 'da kala sɛ gɔ, nɛ mi gese sɛ olo nɛ hã nɛ do ti.

⁵ Nɛ kala zi mbili, do mɔ mbali, do omɔ olo gã golenɔ 'da mi, nɛ nɛ si do ma dɛ kɔ tɛmpɛlonɔ 'da nɛ.

⁶ Nɛ bia zi gole Oyuda do Oisraɛlɛ hã Ogrɛkɛ, takɔ wa la nyɛlɛ do nùi 'da wa.

⁷ Nɛ nde mi kala sɛ wa tɛ falanɔ nɛ bia zi do wa ni, nɛ mi gese sɛ wa dɛ olo wa. Nɛ mi bili sɛ nu gbã 'dã mɛ kɛ nɛ dɛa zi do wa ni hã nɛ.

⁸ Mi dɛ sɛ na, winɔ wa be gole obulu benɔ 'da nɛ, do oboko benɔ 'da nɛ hã Oyuda. Nɛ Oyuda wa be sɛ gole benɔ ni dɛ dati hã Osaba, kɛ le 'da wa nyɛlɛ wena ni. Mi NWA, mi tɔ̃a ni.”

Gale a gɔnɔ sɛ ngbangga 'da ogele winɔ

⁹ Nɛ sá mbila hã ogele winɔ na, wa 'dáfá tɛ wa we bi bolo. Wa sá mɔ hã onwa bolonɔ 'da wa, nɛ wa ngɛmɛ osodanɔ, kɔ wa la bole.

¹⁰ Wa kálá okongonɔ 'da wa, nɛ wa dolo do odu kɔya bolo. Nɛ wa kala 'bɔ odugbunɔ, nɛ wa dolo do osɛlɛ. Ma wia na, gɛnɛ kɔ owi dɛ kili, nɛ wa tɔ̃ do kpã sila na, lo a onwa bolo.

¹¹ Nɛ, ogele winɔ vɛ̃ kɛ zã nù Israɛlɛ gɛ, nɛ wɛ́lɛ́ tɛ nɛ, nɛ nɛ mbá li ngba nɛ dɛ kɔ gbangɔlɛ̃ li nɛ a: “Gale tɛ gɔnɔ ngbangga” ni. Aa NWA, mɔ tómbó owi bolonɔ 'da mɔ, kɔ wa bi ogele winɔ ni!

¹² Nɛ nwa tɔ̃a 'bɔ na: “Ma wia na, ogele winɔ wa kulu ngɔ, kɔ wa la bole. Wa tɛ dɛ kɔ kpo kpo gbangɔlɛ̃ ni, we duzu kɛ mɛ a fala mi nɛ dungu nɛ, we gɔnɔ do ngbangga 'da owinɔ vɛ̃ kɛ zã nù Israɛlɛ ni.

¹³ Wa dɛa ogã 'dã mɔ. Kɔ nɛ, owinɔ 'da mi, nɛ kálá zanɔ, nɛ nɛ sɛ́lɛ́ gɛlɛ wa, ɔ nɛ kɛ wa sɛlɛ do kpalɛ do li zɔlɔ kala ma ni. Nɛ mbɔ́tɔ́ wa, ɔ nɛ kɛ wele mbɔtɔ do owala te vinɔ, kɛ ma dunu kungba ni. Nɛ dɛ́ ni gbaa, takɔ lì dɔ̃ nɛ dunu kungba sɛlɛlɛ, kɔ ma a nù, sɛ nɛ de.”

Gale a fɔmɔ sɛ owinɔ 'da a

¹⁴ Do fala nɛ ni, gba gili winɔ wa ma ngɔ tɛ dɛ kɔ gbangɔlɛ̃. Tua kɛ kɔ̃ tũi Gale nɛ gɔnɔ do ngbangga 'da winɔ ni, ma kɔla ia.

¹⁵ Wese do zɛkɛ to 'bɔ gɔ, nɛ osɔlanɔ bi tũ do'do.

¹⁶ NWA o dã tɛ ngɔ kala Sioni, tɛ kɔ le Yeruzalɛmɛ. Li nza do nùi tɛ tana nɛ. Nɛ nde NWA a fɔmɔ owinɔ 'da a, obe Israɛlɛ, nɛ a amba zu wa na, da dɛ kɔ 'dã mɔ kpá wa gɔ.

¹⁷ Nɛ a tɔ̃a hã wa na: “Obe Israɛlɛ, nɛ ĩ sɛ wá di ni na, mi a NWA Gale 'da nɛ, nɛ mi ɔ tɛ Sioni, kala santo 'da mi. Nɛ Yeruzalɛmɛ sɛ a le 'da mi kɛ ma santo, nɛ ogele winɔ wa bá sɛ 'bɔ ma fala kpo gɔ.”

¹⁸ Do fala nɛ ni, ote vinɔ ma yɛ'bɛ sɛ ngɔ kalanɔ, nɛ ongɔmbɔ wa kpa sɛ falanɔ vɛ̃. Be wayanɔ ngɔ nù Yuda ma fo sɛ do lì. Nɛ lì kpo ma za'da sɛ kɔ Tɛmpɛloe 'da NWA, nɛ ma 'dafa sɛ nùi kɔ gbangɔlɛ̃ li nɛ a Akasia ni.

¹⁹ Nù Ezipeto ma kulu sɛ, nɛ nù Edɔmɛ ma hɔ sɛ li go, tua kɛ Owi ngɔ nùnɔ ni wa zɛlɛ zi tɛ obe Yuda, nɛ wa gbɛa zi owinɔ kɛ wa dɛ̀ 'dã mɔ gɔ ni.

^20-21 Nɛ NWA tɔ̃a 'bɔ na: “Kafi bina, mi bili sɛ nu gbã hã owinɔ kɛ wa gbɛa zi obe Yuda do mbana iko ni. Na mɛ ni, nɛ Owele wa dɛlɛ sɛ ngɔ nù Yuda, do kɔ le Yeruzalɛmɛ kɔ sabɛlɛ do sabɛlɛ. Nɛ mi NWA, mi ɔ sɛ ngɔ kala Sioni.”