Ndo Nyanga Dɛ Mɔ 43 - WE NU GALE 1995

Bɛnzamɛ nɛa do onya ɛ tɛ ngɔ nù Ezipeto

¹ Nɛ nde gba wɛ 'bana ngɔ nù Kanana, nɛ ma fila kerr.

² Nɛ 'da fala kɛ nu fɛlɛ Yakɔbɔ wa nyɔngɔ mɛnɔ wa yula zi nɛ tɛ Ezipeto i ni ia do'do, nɛ baa wa tɔ̃ hã wa na: “Nɛ kpóló tɛ nɛ, hã nɛ oso 'bɔ mbé nyɔngɔmɔ.”

³ Nɛ Yuda gese hã a na: “Gã wi ngɔ tonɔ vɛ̃ ngɔ nù Ezipeto i ni mbisa zi lɛ na, fala kɛ we kpolo tɛ lɛ, hã lɛ nɛ fala nɛ kpo do tala bulu be nya le gɔ, nɛ nde ɛ kɔ̃ sɛ gɛnɛ lɛ gɔ.

⁴ Kɔ fala kɛ mɔ hã wala hã nya lɛ Bɛnzamɛ na, a nɛ fala nɛ kpo do lɛ nde, nɛ lɛ nɛ sɛ we oso nyɔngɔmɛnɔ.

⁵ Kɔ ní gɔ, nɛ lɛ nɛ́ sɛ tɛ mɛ 'bɔ gɔ. We kɛ wi wili ni tɔ̃a zi ngboo na, fala kɛ we kpolo tɛ lɛ, hã lɛ nɛ̀ fala nɛ kpo do tala bulu be nya lɛ ni gɔ, nɛ nde ɛ kɔ̃́ sɛ gɛnɛ lɛ gɔ.”

⁶ Nɛ Yakɔbɔ gese na: “Nɛ dè mi de gɔ. Gulu kɛ nɛ tɔ̃a hã wi ni na, tala bulu be nya nɛ boe ni we ge nde?”

⁷ Nɛ wa gese hã a na: “Wi wili ni a aka lɛ do we kpi do kpi we ĩ ti lɛ do nu fɛlɛ kula 'da lɛ vɛ̃. A aka lɛ na, baa lɛ 'bana nza nde? Nɛ lɛ do mbe gele bulu be nya lɛ boe nde? Ma kɛ lɛ gisa zi nu aka we 'da a ni. Nɛ nde lɛ ĩ̀ zi kɛ na, a kɔ̃a we zɔ tala bulu be nya lɛ ni gɔ.”

⁸ Nɛ Yuda tɔ̃ hã baa a Yakɔbɔ na: “Mɔ lá be, hã a nɛ do lɛ. Ma wia na lɛ la do a do ti, ní gɔ nɛ wɛ ma gbɛ sɛ lɛ do mɔ, do nu fɛlɛ kulanɔ 'da lɛ vɛ̃.

⁹ Mi zɔ sɛ mɔ tɛ̃ a. Kɔ fala kɛ mi sì do a hã mɔ gɔ, nɛ mɔ aka sɛ mi. Nɛ mi ɔ sɛ wi dɛ 'dã mɔ gbali mɔ fai.

¹⁰ Lɛ tɛ zĩ̀ sɔ tɛ lɛ gbaa gɔ, nɛ nde lɛ nɛa hã lɛ kpolo sɔ 'bɔ tɛ lɛ fala bɔa ia.”

¹¹ Nɛ baa wa Yakɔbɔ gese hã wa na: “Ma ɔ ní, nɛ nɛ dɛ́ na mɛ gɛ: Nɛ kálá mbe odia mɛnɔ ngɔ nùi 'da lɛ gɛ dɛ kɔ sakinɔ 'da nɛ, kɔ nɛ hã ma hã nwa ngɔ nù Ezipeto. Nɛ kala sɛ mɔpaka, ndibili, nɔ yɔmbɔ, nɔ gɔlɔ, do ogbãlã wala te, nɛ nɛ nɛ do nɛ hã a.

¹² Nɛ nɛ gésé mbili kɛ nɛ kpa zi ma 'da fala nɛ sukpu mɔ kɔ sakinɔ 'da nɛ ni. Wele zɔ̀lɔ̀ zi yɔ kɔ̃ a yɔa gɔ. Nɛ nɛ kálá 'bɔ mbé mbili dɛ kɔ̃ nɛ we oso do nyɔngɔmɛ.

¹³ Nɛ nɛ kpé do bulu be nya nɛ, hã nɛ nɛ 'da wi wili ni.

¹⁴ E kɔ Gale kɛ a do nganda vɛ̃ ni, dɛ na, wi ni a ĩ 'bako hã nɛ, nɛ a hã wala hã nɛ na, nɛ si do Bɛnzamɛ, do Simeoni kɛ a 'bana i mɔ ni fala nɛ kpo. Kɔ we duzu mi, fala kɛ ma we na obulu benɔ 'da mi wa yɔ nde, nɛ wa yɔ iko!”

Yozɛfu kpa 'bɔ mbé ngba a do onya a

¹⁵ Onya Yozɛfu wa kala odɔnggamɛnɔ, mba do ngɔ gili mbili ngɔ ngbɛ ɛ bɔa, nɛ wa la fala nɛ kpo do Bɛnzamɛ tɛ Ezipeto i. Wa hɔa i mɔ, nɛ wa nɛ we hɔ 'da Yozɛfu.

¹⁶ Yozɛfu nɛa we zɔ wa do Bɛnzamɛ, nɛ a tɔ̃ hã wi zɔ mɔ tɛ mɛnɔ kɔ tɔa 'da a ni na: “Mɔ ka winɔ gɛ dɛ nu tɔa 'da mi i. Nɛ mɔ gbɛ sa'de kpo, nɛ mɔ gi ma, we duzu kɛ owinɔ ni wa nyɔngɔ sɛ midi 'da mi i.”

¹⁷ Nɛ wi dɛa toe ni dɛa ɔ nɛ kɛ Yozɛfu ba do nu ɛ hã a ni. Nɛ a kã onya Yozɛfu dɛ nu tɔa 'da Yozɛfu i.

¹⁸ Wa nɛa we le dɛ tɔa i, nɛ kili ba wa wena. Nɛ wa ma ngɔ tɔ̃ dɛ sanga tɛ ngba wa na: “Mɛ a we duzu mbili kɛ zi dati wa gese ma dɛ kɔ saki nyɔngɔmɛnɔ 'da lɛ ni, ma kɛ wa kɔ̃a we te ngɔ lɛ na, wa zɛlɛ tɛ lɛ, nɛ wa kala pundanɔ 'da lɛ, nɛ wa a lɛ do ngbá ni.”

¹⁹ Nɛ wa nɛa we le dɛ tɔa i, nɛ wa tɔ̃ hã wi zɔ mɔ tɛ mɛnɔ kɔ tɔa 'da Yozɛfu na:

²⁰ “Aa nwa, mɔ mbɔkɔ lɛ. Lɛ tɛa zi kuti nɛ i nga we oso nyɔngɔmɔ.

²¹ Nɛ 'da fala kɛ lɛ hɔa li wala i tɛ si mɔ lɛ ni, nɛ tũ tũ, nɛ lɛ yolo nù we ɔ nù. Kɔ wele do wele nɛa we yala nu saki nyɔngɔmɛnɔ 'da a, nɛ a kpa mbili dɛ nu saki ni. Nɛ mɛ a kpo kpo mbili kɛ lɛ usa zi do nyɔngɔmɛnɔ ni. Ma kɛ lɛ kala, hã lɛ tɛa do ma gɛ.

²² Nɛ lɛ tɛa 'bɔ do gele mbili we oso do ombé nyɔngɔmɔ. Nɛ nde lɛ ĩ̀ ti wi kɛ a a zi mbili dɛ kɔ sakinɔ 'da lɛ ni gɔ.”

²³ Nɛ wi dɛa toe gese hã wa na: “Nɛ tɛ dɛ̀ kili gɔ, nɛ fí sila nɛ nù. Wi a Gale 'da baa nɛ hã a a zi kpamɛnɔ kɔ sakinɔ 'da nɛ. Nɛ nde mi kpa zi mbilinɔ 'da nɛ do dia nɛ.” Nɛ wi dɛa toe ni fo Simeoni kɔ bɔlɔkɛ dɛ nza, nɛ a tɛ do a hã wa.

²⁴ Nɛ a hã wala hã wa na, wa le kɔ tɔa 'da Yozɛfu. Wa lia, nɛ owi tonɔ 'da Yozɛfu wa hã lì hã wa na, wa fɔlɔ do nyanga wa, nɛ wa hã 'bɔ nyɔngɔmɔ hã opundanɔ 'da wa.

²⁵ Nɛ onya Yozɛfu wa 'dafa mbɔkɔ dɔnggamɛnɔ vɛ̃ we 'bɔ 'da a, we kɛ wa zila zi na, a si sɛ do midi we nyɔngɔ mɔ fala nɛ kpo do wa.

²⁶ 'Da fala kɛ Yozɛfu si dɛ nu tɔa nga, nɛ wa hã odia dɔnggamɛnɔ ni hã a, nɛ wa gu nù ti a.

²⁷ Nɛ Yozɛfu aka wa na: “Nɛ vɛ̃ a dia nde?” Nɛ a aka 'bɔ wa na: “Baa nɛ, kɛ nɛ tɔ̃a zi we 'da a hã mi na, a dɛa kpasa wi ia ni, a 'bana nza nde? Nɛ a vɛ̃ a dia nde?”

²⁸ Nɛ wa gese hã a na: “Ĩi, baa lɛ wi dɛa toe 'da mɔ a vɛ̃ a dia.” Nɛ wa gu 'bɔ nù ti a mbé nɛ.

²⁹ Yozɛfu nɛa we zɔ bulu nya a Bɛnzamɛ, kɛ naa wa do a kpo ni, nɛ a tɔ̃ na: “Wele kɛ mɔ ni a be hɔ dɛ 'do nɛ, kɛ nɛ tɔ̃a zi we 'da a hã mi gɛ a ni nde? Aa be 'da mi, e kɔ Gale wele nu ɛ tɛ mɔ.”

³⁰ Yozɛfu dɛ zi yangga wena we zɔ nya a, nɛ mili kɔ̃a ala li a. Nɛ a wɛlɛ tɛ̃ a dɔ̃ dɛ kɔ 'bili tɔa 'da a i, nɛ a ma ngɔ he ma.

³¹ A fɔla li a olo kɔ̃a do'do, nɛ a hɔ nza, nɛ a kpãlã sila a. Nɛ a ba nu a na, wa tɛ do nyɔngɔmɛ.

³² Nɛ wa 'dafa fala nyɔngɔmɛ hã Yozɛfu zu a kpo. Nɛ wa 'dafa fala kɛ 'da onya Yozɛfu do tɛ̃ ɛ. Nɛ Oezipeto wa nyɔngɔ 'bɔ kɛ 'da wa do tɛ̃ ɛ. Mba gɔ, wa wè tɛ nyɔngɔ mɔ fala nɛ kpo do Ohebre gɔ, we kɛ mbula 'da Ohebrenɔ bɛ̃a ma bɛ̃a.

³³ Wi dɛa toe lɔnggɔ onya Yozɛfu nu mɛsa dɛ dati Yozɛfu ni, yolo ngɔ kpasa wi dati wa gbaa, we hɔ ngɔ tala be. Onya a wa zɔa ni, nɛ wa ɔngbɔ wena, nɛ wa ma ngɔ ka mɔ tɛ ngba wa.

³⁴ Nɛ Yozɛfu kɛ̃a mbe nyɔngɔmɛ kɛ ma zi ngɔ mɛsa 'da a ni dɛ ngɔ kɛ 'da wa. Nɛ a hã nyɔngɔmɛ ni hã Bɛnzamɛ gã nɛa ngɔ kɛ 'da onya a fala mɔlɔ. Wa nyɔngɔ mɛ ia do'do, nɛ wa nɔ dɔ̃ fala nɛ kpo do Yozɛfu gbaa, nɛ wa dɛ yangga wena.