Ndo Nyanga Dɛ Mɔ 22 - WE NU GALE 1995

Gale yamba sila Abrahama

¹ 'Do mɛnɔ ni vɛ̃, nɛ Gale yamba sila Abrahama. Gale sa mɔ hã a na: “Abrahama!” Nɛ Abrahama kɔ̃, nɛ a na: “Mi kɛ!”

² Nɛ Gale tɔ̃ na: “Mɔ bá kpo bulu be 'da mɔ Izaka, kɛ mɔ kɔ̃a gɛnɛ a nɛ ge nde ni, kɔ mɔ kulu ngɔ, hã nɛ nɛ do a dɛ ngɔ nù Mɔria. Mɔ hɔ i mɔ, nɛ mɔ kũ kala kɛ mi be sɛ ma hã mɔ ni, nɛ mɔ gbɛ be 'da mɔ dɛ di ni we dɔnggɔ do mi.”

³ Fala sa titole belee, nɛ Abrahama kulu ngɔ, nɛ a gba gua we dɔ sɛ do dɔnggamɛ, nɛ a ɛnzɛ ma, nɛ a e li 'do punda, nɛ wa la do be 'da a Izaka, do mbe owi dɛa to bɔa. Nɛ wa la si tɛ fala kɛ Gale bia hã a ni.

⁴ Wa nɛa ni gbaa 'do tũ bɔa, nɛ kɔ̃ tũ kɛ talɛ, nɛ Abrahama ka mɔ, nɛ a zɔ kala ni ndũu.

⁵ Nɛ a tɔ̃ hã owi tonɔ bɔa ni na: “Nɛ 'báná dɛ dɛ, fala nɛ kpo do punda. Nɛ mi do be 'da mi, lɛ kũ sɛ dɛ ngɔ kala i we dɔnggɔ Gale, sɛ nɛ lɛ ĩ ti kpolo tɛ lɛ dɛ 'da nɛ nga de.”

⁶ Abrahama ba lã gua we dɔ do dɔnggamɛ ni, nɛ a e ma zu Izaka na a tolo. Nɛ a do tɛ̃ a, a ba we do kɔya, nɛ wa bɔa nɛ wa la.

⁷ Wa hɔa li wala i, nɛ Izaka aka baa ɛ na: “Lɛ ba we, do gua, kɔ be bata kɛ lɛ nɛ dɔ a ni a do nde?”

⁸ Nɛ Abrahama gese na: “Be 'daa, Gale do tɛ̃ a, a hã sɛ bata kɛ ma wia na lɛ dɔnggɔ do a ni hã lɛ.” Nɛ wa bɔa nɛ, wa ma ngɔ la ma.

⁹ Wa hɔa tɛ fala kɛ Gale bia zi hã Abrahama ni, nɛ wa yolo nù. Nɛ Abrahama dɛ gbagala do ta, nɛ a a gua ngɔ nɛ. Nɛ a ba be 'da a Izaka, nɛ a ɛnzɛ kɔ̃ a do nyanga a, nɛ a bɔlɔ a dɛ ngɔ gua ni.

¹⁰ Kɔ a nɛa we ba kɔya we 'bili gɛlɛ a,

¹¹ nɛ anzɛ 'da NWA sa mɔ hã a do li nza i na: “Abrahama, Abrahama!” Nɛ Abrahama kɔ̃ na: “Mi kɛ!”

¹² Nɛ NWA tɔ̃ na: “Mɔ tɛ è kɔ̃ mɔ tɛ be gɔ, nɛ mɔ tɛ dɛ a 'danga gɔ. Mi ĩ di ngangga ni na, mɔ dɛ kili mi NWA Gale dɛa, we kɛ mɔ bɛ̃̀ we 'dɔlɔ kpo bulu be 'da mɔ hã mi gɔ.”

¹³ Abrahama fi li a kɛ zã a, nɛ a zɔ be wili bata, nɛ nde a haka dɛ zã ndu'bu, nɛ ndu'bi ni ma du'bulu zamba zu a vɛ̃. Nɛ Abrahama nɛ, nɛ a ba a, nɛ a dɔ a we dɔnggɔ do Gale olo li be 'da a.

¹⁴ Nɛ a e li fala ni na: “NWA a hã mɔ.” Ma kɛ tia do sɔɛ gɛ, wa tɔ̃ na: “Dɛ ngɔ kala gɛ, NWA a hã sɛ mɛ kɛ ma wia ni.”

¹⁵ Nɛ anzɛ 'da NWA sa 'bɔ mbé mɔ hã Abrahama do li nza i,

¹⁶ nɛ a tɔ̃ hã a na: “Abrahama, mɔ dɛa olo nu mi, nɛ mɔ 'dɔlɔ kpo bulu be 'da mɔ hã mi. Ma kɛ mi NWA, mi zonggo tɛ mi do zu li mi wele nɛ ngboo na,

¹⁷ mi wele sɛ nu mi tɛ mɔ, nɛ mi dɛ sɛ na, obe zã mɔ wa dɛlɛ wena nɛ osɔlanɔ li nza, tabi gbãlã kɛnzɛ nu gã lì ni. Nɛ obe zã mɔ wa nɛ sɛ ngɔ owi sɛnɛ wa, nɛ wa kala sɛ lenɔ 'da wa.

¹⁸ Nɛ mi wele sɛ nu mi tɛ nu kɔnggɔnɔ ngɔ nù gɛ vɛ̃ do wala 'da obe zã mɔ, we kɛ mɔ zila we nu mi.”

¹⁹ Abrahama zila we ni do'do, nɛ a kpolo tɛ̃ a dɛ 'da owi tonɔ 'da a i, nɛ wa kulu ngɔ, nɛ wa kpe li wala kpo, nɛ wa si dɛ tɛ Bɛrseba, le kɛ Abrahama ɔ zi kɔ nɛ ni.

Obe zã Nahɔrɛ

²⁰ 'Do nɛ, nɛ Abrahama zila na Milka, wuke 'da nya a Nahɔrɛ kua obulu be ngbɛ'dɛ'dɛ hã a.

²¹ Li kuti be a: Usi, 'do a ni a Buzɛ, Kɛmuɛlɛ, kɛ a a baa Aramɛ ni.

²² 'Do nɛ ni a Kɛsɛdɛ, Hazo, Pildasi, Yidlafɛ do Bɛtuɛlɛ.

²³ Wanɔ ni a obulu benɔ kɛ Milka kua wa hã Nahɔrɛ, nya Abrahama gɛ a ni. Bɛtuɛlɛ zi a baa Rebɛka.

²⁴ Nɛ Nahɔrɛ zi 'bɔ do wuko makango, li a a Reuma, nɛ Reuma kua 'bɔ obe. Li benɔ ni a Teba, Gahamɛ, Tahasi do Maka.