2 Onwanɔ 4 - WE NU GALE 1995

Elize gbaka wi fio wili

¹ Mbe ngba soe kpo, nɛ wuko olo mbe wi gba olo nu Gale kpo, nɛa 'da Elize, nɛ a ala nu a hã a na, a gala ɛ. A na: “Aa Elize, wili mi fia do'do! Nɛ mɔ ĩ na, a zi a wi dɔnggɔ NWA Gale. Nɛ nde zi dati, lɛ lia zi ku'da mbili 'da mbe wele kpo. Kɔ ngangga gɛ, a kɔ̃a we kala benɔ 'da mi bɔa nɛ do ngbá olo mbili 'da a.”

² Nɛ Elize aka a na: “Mɛ mɔ kɔ̃a na mi dɛ hã mɔ ni a ge nde? Mɔ tɔlɔ kpamɛnɔ kɔ tɔa 'da mɔ ni hã mi.” Nɛ wuke gese na: “Mi do mɔ kpo bina. Mɛ 'bana kɔ̃ mi gɛ, mɛ tati a tala go'do nɔ yɔmbɔ be sĩ we fɛlɛ do tɛ mi iko.”

³ Nɛ Elize tɔ̃ hã a na: “Mɔ sí, hã mɔ gɔ́ owula kpana kɔ̃ ongba mɔ wi tɔanɔ. Nɛ ma wia na, mɔ gɔ ma ɔ dɔa.

⁴ Dɛ 'do nɛ, nɛ mɔ le tɔa do obenɔ 'da mɔ, nɛ mɔ kpe nu tɔa dɛ ngɔ nɛ, nɛ mɔ kã ma. Nɛ mɔ tɛnɛ nɔɛ ni dɛ kɔ kpananɔ, hã kɛ dunu, nɛ mɔ e ma do tɛ̃ ɛ, nɛ mɔ ba mbé nɛ, ni do ni.”

⁵ Wuke ni si, kɔ a hɔa nu tɔa 'da a i, nɛ a le tɔa, nɛ a kã nu tɔa dɛ ngɔ a do obenɔ. Nɛ benɔ wa ma ngɔ ɛfɛ kpananɔ hã a, nɛ a tɛ tɛnɛ nɔɛ dɛ kɔ nɛ na ma dunu.

⁶ 'Da fala wa tɛnɛ ma kpa kɔ kpananɔ vɛ̃ ia do'do, nɛ a tɔ̃ hã mbe be 'da a kpo na, a ba 'bɔ wula kpana hã ɛ. Ĩ na, kpananɔ vɛ̃ dunu ia, nɛ mbe be kpo gese hã a na, wula kɔ kpana 'bànà 'bɔ gɔ. Na mɛ ni, nɛ nɔɛ ɔmɔ tɛ hulu nɛ.

⁷ Wuke kulu ngɔ, nɛ a nɛ 'da wi gba olo nu Gale i, nɛ a tɔ̃ mɛ ma la ni hã a. Nɛ Elize tɔ̃ hã a na: “Mɔ nɛ́, hã mɔ be gole nɔɛ ni, nɛ mɔ gese ku'da 'da mɔ, nɛ tala mbili kɛ ma 'bana sɛ ni, ma gala sɛ mɔ do obenɔ 'da mɔ.”

Elize hɔa kɔ le Sunɛmɛ

⁸ Mbe ngba soe kpo, nɛ Elize nɛa kɔ le Sunɛmɛ. A hɔa i mɔ, nɛ mbe wuko kpamɔ kpo sa mɔ hã a na, a nɛ we nyɔngɔ mɔ 'dɛ ɛ i. Gulu nɛ hã yolo do kɔ̃ tũi ni, fala kɛ Elize hɔ kɔ le ni, nɛ a nɛ fai we nyɔngɔ mɔ tɛ 'da wuke ni.

⁹ Nɛ wuke ni tɔ̃ hã wili ɛ na: “Mɔ ĩ do dia nɛ na, wi hɔ 'da lɛ gɛ fai ni, a a ngbongbo wi 'da Gale ngboo.

¹⁰ Kɔ ma dia fɛ̃ na, lɛ dɛ 'bili tɔa kpo tɛ ngɔ tɔa 'da lɛ gɛ, nɛ lɛ fi mɔ ɔi kɔ nɛ hã a, do mɛsa, mɔ dungu, do mwinda. Kɔ a hɔ 'da lɛ nga, nɛ a ɔ dɛ di ni.”

¹¹ Ma kɛ mbe ngba soe kpo, nɛ Elize hɔa 'da owinɔ ni, nɛ a kũ we ɔ kɔ be 'bili tɔa wa dɛa ni.

¹² 'Do nɛ, nɛ a tombo wi toe 'da a Gehazi na, a nɛ hã a sa mɔ hã wuko wele tɔa na, a tɛ tɛa sɛ. Wuke ni tɛa, kɔ a nɛa we hɔ dɛ kpongbo nu tɔa ni,

¹³ nɛ Elize tombo Gehazi we tɔ̃ hã a na, ɔ nɛ kɛ a hã tɛ̃ a we lo wena ni, mɛ a kɔ̃a na lo dɛ hã a ni a ge nde? Lo wele we do nwa ngɔ nùi, tabi do gã wi ngɔ sodanɔ we a nde? Nɛ wuke gese na: “Ɔ̃ ɔ̃! Ma ɔ ni kpa, mi dɛ sanga Owi nanɔ 'da mi, nɛ mi zɔlɔ mɔ kpo gɔ.”

¹⁴ Gehazi kpula tɛ̃ ɛ, nɛ Elize aka a na: “Mɛ lɛ dɛ hã a ni a ge nde?” Nɛ Gehazi gese na: “Mɔ zɔ́, a do bulu be bina, nɛ wili a dɛa gbɛlɛ do'do.”

¹⁵ Nɛ Elize tɔ̃ hã Gehazi na: “Mɔ tɔ̃ hã a na, a kpolo 'bɔ tɛ̃ a sɛ.” A kpula tɛ̃ a, kɔ a nɛa we hɔ dɛ kpongbo nu tɔa ni,

¹⁶ nɛ Elize tɔ̃ hã a na: “Sabɛlɛ tɛ gɛ, do kpo ngba soenɔ gɛ, mɔ ba sɛ bulu be dɛ kɔ̃ mɔ.” Nɛ wuke he mɔ na: “Bɛlɛ iko! Mɔ a wi gba olo nu Gale, mɔ tɛ ɔ̀kɔ̀lɔ̀ mi gɔ!”

¹⁷ Nɛ nde wuke ni ba zã, nɛ sabɛlɛ 'do ki ni, do kpo kpo ngba soe zi ni, nɛ a kua bulu be, ɔ nɛ kɛ Elize tɔ̃a zi hã a ni.

Elize kpasa be 'da nwa gɛnɛ a

¹⁸ Be gã, nɛ mbe ngba soe kpo, nɛ baa a zi tɛ dɛ to do owi sɛlɛ kpalɛnɔ, nɛ a nɛ 'do a.

¹⁹ A hɔa i mɔ, kɔ 'da kala sĩ, nɛ a ndo bi zu a, nɛ a tɔ̃ hã baa a na, zu ɛ zɛlɛ wena. Nɛ baa a tɔ̃ hã mbe wi toe 'da a kpo na: “Mɔ bá be nɛ do a hã naa a.”

²⁰ Nɛ wi toe ba be, nɛ a nɛ do a hã naa a. Nɛ naa a ba a, nɛ a e a dɛ ngɔ ku a gbaa, kɔ ma nɛa we hɔ midi, nɛ a fe.

²¹ Nɛ naa a ba a, nɛ a kũ do a dɛ kɔ 'bili tɔa 'da Elize i, nɛ a fi a dɛ ngɔ mɔ ɔi olo a ni. Nɛ a hɔ, nɛ a kpe nu tɔa, nɛ a la dɛ sa fɔ i.

²² A hɔa i mɔ, nɛ a sa mɔ hã wili a, nɛ a tɔ̃ hã a na: “Mɔ tómbó wi to kpo do naa punda hã mi. Mi nɛ nɛ 'da wi 'da Gale i, sɛ nɛ mi si 'do de.”

²³ Nɛ wili a aka a na: “Sɔɛ gɛ, mɛ a kɔ̃ tũ ɔmɔ tɛ wi, tabi ɛngga mbé hɔa zɛkɛ gɔ. Kɔ gulu kɛ mɔ nɛ nɛ 'da a i we ge nde?” Nɛ wuke gese na: “We bina, mɔ mbɔkɔ sila mɔ.”

²⁴ A si, nɛ a 'dafa mɔ dungu li 'do punda, nɛ a tɔ̃ hã wi toe na: “Mɔ ngbɔ́kɔ́ punda hã lɛ nɛ dɔ̃ dɔ̃. Da dɛ kɔ mɔ yóló nù iko gɔ, mi tɔ̃ na lɛ yolo nù sɛ nɛ de.”

²⁵ A ba wala ngɔ kala Karmɛlɛ, we nɛ we fa Elize. Kɔ Elize zɔa a tɛ tɛ ma, nɛ a tɔ̃ hã wi toe 'da a Gehazi na: “Mɔ zɔ, wuke dɛ gbɛla lɛ tɛ Sunɛmɛ i gɛ a ni.

²⁶ Mɔ gɔnɔ dati a, nɛ mɔ aka a na, a do wili a, do be 'da wa, wa dungu vɛ̃ do dia nɛ nde?” Gehazi nɛa do olo nu Elize ni, nɛ a aka wuke, nɛ a gese hã a na, lo dungu vɛ̃ iko.

²⁷ Kɔ a nɛa we hɔ kɛ zã Elize ngɔ kala i, nɛ a gu nù ti a. Gehazi zɔa ni, nɛ a fa we ngbɔ a dɛ 'do. Nɛ Elize tɔ̃ hã a na: “Mɔ é a ni, a do 'bako wena, nɛ mi ĩ̀ gulu nɛ gɔ, we kɛ Gale tɔ̃̀ gulu nɛ hã mi gɔ.”

²⁸ Do 'da fala ni, nɛ wuke he mɔ na: “Aa mɔ wi 'da Gale, mi gɔa zi be kɔ mɔ nde? Nɛ mi tɔ̃̀ zi hã mɔ na, mɔ tɛ ɔ̀kɔ̀lɔ̀ mi gɔ gɔ nde?”

²⁹ Nɛ Elize tɔ̃ hã Gehazi na: “Mɔ 'dáfá tɛ mɔ, nɛ mɔ ba dɔndɔlɛ 'da mi, hã mɔ wɛlɛ tɛ mɔ tɛ Sunɛmɛ i. Fala kɛ mɔ kpa ngba mɔ do wele li wala, nɛ mɔ tɛ fànà a gɔ. Kɔ fala kɛ wele fana mɔ, nɛ mɔ tɛ gèsè we hã a gɔ. Kɔ mɔ hɔ i mɔ, nɛ mɔ é dɔndɔlɛ 'da mi dɛ bula li be.”

³⁰ Nɛ naa be tɔ̃ hã Elize na: “Do zu li NWA wele kpasi, mɔ kùlù ngɔ gɔ, nɛ nde mi sí sɛ gɔ.” Ma kɛ Elize kulu ngɔ, nɛ a nɛ do a.

³¹ Gehazi la, nɛ a hɔ i mɔ dati hã wa. Nɛ a e dɔndɔlɛ 'da Elize dɛ bula li be, nɛ nde mɔ kpo dɛ̀ tɛ̀ ɛ gɔ, nɛ be yɛ̀kɛ̀ mbe tɛ̃ ɛ sĩ gɔ. Ma kɛ a kpula tɛ̃ a dɛ 'da Elize nga, nɛ a tɔ̃ hã a na: “Be tùnù gɔ.”

³² Elize nɛa we hɔ nu tɔa i, nɛ nde wɔlɔ be 'bana dɛ ngɔ mɔ ɔi olo a ni.

³³ Nɛ Elize lia dɛ kɔ tɔa i, nɛ a kpe nu tɔa dɛ 'da a, nɛ a ma ngɔ sambala NWA.

³⁴ 'Do nɛ, nɛ a ɔa dɛ ngɔ be, nɛ a e nu a dɛ nu be, gbali a dɛ ngɔ gbali be, nɛ tambala kɔ̃ a dɛ ngɔ kɛnɔ 'da be. A ɔa dɛ ngɔ a ni gbaa, nɛ tɛ be ba we.

³⁵ Nɛ Elize kulu ngɔ, nɛ a ma ngɔ yɛnggɛ do kɔ tɔa ni. 'Do nɛ, nɛ a ɔ 'bɔ dɛ ngɔ be, nɛ be zafa fala sambo, nɛ a hũi li a.

³⁶ Nɛ Elize sa mɔ hã Gehazi, nɛ a tɔ̃ hã a na, a nɛ, kɔ a sa mɔ hã naa be. Gehazi nɛa, nɛ a sa mɔ hã a. Kɔ a hɔa, nɛ Elize tɔ̃ hã a na: “Mɔ tɛ̃, hã mɔ ba be 'da mɔ.”

³⁷ A tɛa, nɛ a gu nù ti Elize, nɛ a bili zu a gbaa nɛ ma to nù. 'Do nɛ, nɛ a kulu ngɔ, nɛ a ba be 'da a, nɛ a hɔ.

Elize dɛa 'bɔ mbé gba sɔ̃ mɔ bɔa

³⁸ Mbe 'da fala kpo, nɛ gba wɔ tia ngɔ nùi, nɛ Elize si dɛ Gilgalɛ. Nɛ mbe tũ kpo, nɛ a mba li owi gba olo nu Gale dɛ kɛ zã a, we be we hã wa. Nɛ a ba nu a hã wi toe 'da a na, a ba gã kpana, kɔ a gi supu hã lo.

³⁹ Nɛ mbe wi gba olo nu Gale kpo kulu ngɔ, nɛ a nɛ kɔ fɔnɔ i we fa nwa Sanggo. A kpa te nyaka kpo, wala nɛ ɔ nɛ wala sa ni, nɛ a 'bi ma dɛ kɔ koe tuli 'da a, nɛ ma dunu. A kpula tɛ̃ a nu tɔa nga, nɛ a gba sanga nɛ, nɛ a a ma kɔ kpana gi do supi. Nɛ nde wele kpo ĩ̀ ti wala te ni gɔ.

⁴⁰ Kɔ 'da fala wa kɛ̃a supi ni hã winɔ, hã wa nɛ yamba nɛ, nɛ wa ma ngɔ he mɔ na: “Aa wi 'da Gale! Wa a ina 'dɔ supi!” Nɛ wele kpo wè zi we nɔ ma gɔ.

⁴¹ Ma kɛ Elize ba nu a na, wa tɛ do fũ farini. A ba ma, nɛ a a ma 'dɔ supi, nɛ a tɔ̃ hã wi toe 'da a na, a kɛ̃ ma hã winɔ, hã wa nɔ. Wa yamba, nɛ wa kpa na, ma hɔa 'bɔ mɔ nɔ nɔa.

⁴² Do kpo 'da fala ni, nɛ mbe wele kpo yula tɛ Bala-Salisa, nɛ a tɛ do mapa 'bu nɛ bɔa, kɛ wa dɛa ma do kuti farini ɔrzɛ ni, nɛ a hã ma hã Elize. A tɛa 'bɔ do gbãlã mɔ kɛ a kala ma li fɔnɔ i ngangga gɛ iko ni kɔ saki kpo. Nɛ Elize tɔ̃ hã wi toe 'da a na, a kala nyɔngɔmɛ ni, kɔ a kɛ̃ hã winɔ vɛ̃.

⁴³ Nɛ wi toe gese na: “Mi nɛ dɛ fala kɛ̃ be nyɔngɔmɔ ɔ nɛ gɛ hã Owele kama kpo ni nɛ nde?” Nɛ Elize na: “Mɔ kɛ̃ ma hã winɔ vɛ̃, tua kɛ NWA Gale tɔ̃a na: ‘Wa vɛ̃ wa nyɔngɔ sɛ, nɛ zã wa hɛ̃, nɛ tala nɛ 'bana.’ ”

⁴⁴ Nɛ wi toe kɛ̃a nyɔngɔmɛ ni hã winɔ vɛ̃, nɛ wa vɛ̃ wa nyɔngɔ, nɛ zã wa hɛ̃a, nɛ tala nɛ 'bana 'bɔ, ɔ nɛ kɛ nwa tɔ̃a zi ni.