2 Onwanɔ 3 - WE NU GALE 1995

Yoramɛ hɔa nwa ngɔ nù Israɛlɛ

¹ Yozafatɛ ɔa tɛ to nwa 'da a sabɛlɛ 'bu ngɔ nɛ ngbɛ'dɛ'dɛ, nɛ Yoramɛ, be 'da Akabɛ hɔ nwa ngɔ nù Israɛlɛ. Nɛ a dɛa to nwa 'da a tɛ Samaria 'do sabɛlɛ 'bu ngɔ nɛ bɔa.

^2-3 A nɔ̃lɔ̃ zi zã NWA, we kɛ a dɛa kpo kpo 'dã mɛ kɛ nwa Yeroboamɛ, be 'da Nɛbatɛ dɛa zi, nɛ a tumba obe Israɛlɛ we dɛ 'dã mɛ ni. Nɛ a là fala dɛ kpo kpo o'dã mɛnɔ, kɛ Yeroboamɛ dɛa zi ni gɔ. Nɛ nde a 'dàngà zi ɔ nɛ baa a Akabɛ, do naa a Yezabɛlɛ gɔ, we kɛ a gbini zi kpikima kɛ baa a dɛa zi we dɔnggɔ do gale Bala ni.

Oisraɛlɛ do Oyuda wa bi Omoabɛ

⁴ Meka, nwa ngɔ nù Moabɛ zi do oba'de batanɔ 'da a. Nɛ sabɛlɛ kpo kpo, a hã zi obe bata koto kama kpo, mba do ogã bata koto kama kpo, mba do sala tɛ wa, we futa do takoe hã nwa ngɔ nù Israɛlɛ.

⁵ Kɔ nwa Akabɛ fia, nɛ Meka bɛ̃ nu Yoramɛ, nwa olo Akabɛ ni do'do.

⁶ Gulu nɛ hã nwa Yoramɛ kulu ngɔ tɛ Samaria, nɛ a ngɛmɛ li osoda Israɛlɛ vɛ̃,

⁷ nɛ a tombo to hã Yozafatɛ, nwa ngɔ nù Yuda na: “Nwa ngɔ nù Moabɛ bɛ̃a nu mi do'do. Kɔ mɔ kɔ̃, nɛ mɔ mba do mi, hã lɛ bi le 'da a.” Nɛ nwa ngɔ nù Yuda gese hã a na: “Mi kɔ̃a! Lɛ do mɔ, lɛ a wele kpo, osodanɔ 'da mi do wanɔ 'da mɔ, ombalatanɔ 'da mi do wanɔ 'da mɔ wa vɛ̃ kpo.

⁸ Nɛ nde mi aka mɔ na, lɛ ba sɛ wala ki nge nde?” Nɛ nwa Yoramɛ gese hã a na: “Lɛ ba sɛ wala li gba zɔ̃ Edɔmɛ.”

⁹ Nɛ onwa ngɔ nù Israɛlɛ, do Yuda do Edɔmɛ, wa le wala, nɛ wa nɛ gbaa 'do tũ sambo, nɛ nde wa kpà mbamba lì nɔ nɔa we osodanɔ do osa'de kala tolenɔ 'da wa gɔ.

¹⁰ Nɛ nwa ngɔ nù Israɛlɛ he mɔ na: “Kɛ gɛ a 'bako, lɛ nɛ dɛ do kɛ gɛ nɛ nde! Wi a NWA hã a kã lɛ Onwanɔ talɛ gɛ dɛ dɛ, we 'dɔlɔ lɛ hã Omoabɛ!”

¹¹ Nɛ Yozafatɛ aka na: “Mbe wi gba olo nu NWA Gale kpo, kɛ lɛ wia we aka Gale do wala 'da a ni dɛ bina nde?” Nɛ mbe wi ngɔ sodanɔ 'da nwa Yoramɛ gese na: “Wi lɛ do a dɛ, wi a Elize, be 'da Safatɛ, kɛ a dɛ zi toe fala nɛ kpo do Elia, nɛ we zã wa do a kpo ni.”

¹² Nɛ Yozafatɛ tɔ̃ 'bɔ na: “Elize a ngbongbo wi gba olo nu Gale ngboo.” Nɛ Onwanɔ talɛ ni wa kulu ngɔ, nɛ wa nɛ we kpa Elize.

¹³ Nɛ Elize tɔ̃ hã nwa Yoramɛ na: “Gulu kɛ mɔ tɛa we tulu mi we ge nde? Mɔ nɛ́ 'bɔ hã mɔ áká owi gba olo nu galenɔ 'da baa mɔ, do wanɔ 'da naa mɔ gɔ nde?” Nɛ Yoramɛ gese na: “Ɔ̃ ɔ̃, wi a nwa hã a kã lɛ Onwanɔ talɛ gɛ dɛ dɛ, we 'dɔlɔ lɛ hã Omoabɛ.”

¹⁴ Nɛ Elize gese na: “Do zu li Gale wele kpasi, kɛ a nwa ngɔ mɔ nyanga nza vɛ̃, nɛ mi a wi dɛa toe 'da a ni, mi tɔ̃ hã mɔ na, we lengge Yozafatɛ, nwa ngɔ nù Yuda gɔ, nɛ nde mi dɛ́ sɔ mɔ kpo we mɔ gɔ, nɛ mi ká sɔ 'bɔ mɔ li mɔ gɔ.

¹⁵ Kɔ we bina, wa sá mɔ hã wi zɛ kundu hã mi.” Wi zɛ kundi tɛa, hã a ma ngɔ zɛ kundi 'da a, nɛ ngawi 'da nwa le kɔ Elize,

¹⁶ nɛ a ma ngɔ tɔ̃ na: “NWA tɔ̃a na, nɛ zã okɔ̃ dɛlɛ wena dɛ olo fua lì gɛ.

¹⁷ 'Do nɛ, nɛ kɔ̃nɔ ni ma dunu sɛ do lì, nɛ nde nɛ zélé sɛ giti bũ gɔ, nɛ nɛ zɔ́ sɛ lĩ kolo gɔ. Nɛ nɛ, do onadalamɛnɔ 'da nɛ, do osa'de kala tolenɔ 'da nɛ, nɛ kpa sɛ lì nɔ nɔa, ɔ nɛ kɛ ma wia do nɛ ni.”

¹⁸ Nɛ Elize tɔ̃ 'bɔ na: “Ki ni mɛ a be mɔ sĩ iko we duzu NWA. A 'dɔlɔ sɛ 'bɔ nùi 'da Omoabɛ hã nɛ.

¹⁹ Nɛ nɛ ba sɛ dia lenɔ 'da wa vɛ̃, kɛ gba ngbonɔ zĩ ma takpa ni. Nɛ gɔmɔ sɛ ote dia wala tenɔ 'da wa vɛ̃ dɛ nù. Nɛ kpe sɛ o'denɔ 'da wa, nɛ nɛ da sɛ ota dɛ kɔ ofɔ kpalɛnɔ 'da wa, takɔ nɛ 'danga ma vɛ̃.”

²⁰ Fala sa 'do nɛ, kɔ ma nɛa we hɔ tɛ sa wa hã do dɔnggamɔ titole hã Gale ni, nɛ lì yolo ngɔ nù Edɔmɛ, nɛ ma tofo, nɛ ma kpa ngɔ nùi ni vɛ̃.

²¹ 'Da fala Omoabɛ wa nɛa we zele na, onwa talɛ wa tɛa we bi wa ni, nɛ owinɔ vɛ̃ kɛ wa wia we bi bolo ni, wa ngɛmɛ ngba wa yolo ngɔ okpasa winɔ we hɔ ngɔ ozagbãlãnɔ. Wa kulu ngɔ, nɛ wa nɛ, nɛ wa 'bɔ dɛ li ngbala le.

²² Fala sa titole, kɔ wa nɛa we kulu ngɔ, nɛ nde tua wese ndele ngɔ lì kpala kpala. Kɔ wa nɛa we zɔ fila li lì ni, nɛ wa lengge na, mɛ a tɔkɔ,

²³ nɛ wa he mɔ na: “Mɛ a tɔkɔ! Onwanɔ do osodanɔ 'da wa, wa kpa we, hã wa gbɛa ngba wa. Aa mbaanɔ, lɛ nɛ́ hã lɛ kálá mɛnɔ olo wa!”

²⁴ Wa nɛa, kɔ wa nɛ kɔlɔ do fala ɔi 'da Oisraɛlɛ, nɛ osoda Israɛlɛ wa kulu ngɔ, nɛ wa bi wa, nɛ osoda Moabɛ wa yu. Nɛ Oisraɛlɛ wa ndaka 'do wa, nɛ wa le ngɔ nùi 'da wa, nɛ wa nɛ ngɔ wa.

²⁵ Wa 'danga lenɔ 'da wa, nɛ wele kpo kpo da ota dɛ kɔ ofɔ kpalɛnɔ, nɛ ma kpa do kɔ nɛ vɛ̃. Nɛ wa kpe 'bɔ o'denɔ vɛ̃, nɛ wa gɔmɔ ote dia wala tenɔ vɛ̃ dɛ nù. Le kɛ wa 'dàngà ma gɔ kpo mɛ a Kirɛ-Herɛsi. Nɛ nde osoda da lasipɛnɔ wa tɛa, nɛ wa linggi le ni, nɛ wa 'danga ma.

²⁶ 'Da fala nwa ngɔ nù Moabɛ nɛa we zɔ na, bole tia do ɛ do'do ni, nɛ a ngɛmɛ li osoda kama sambo do odu kɔya dɛ kɔ̃ wa, nɛ wa la si 'da nwa ngɔ nù Edɔmɛ, we nɛ we bi do a. Nɛ nde ma wè 'bɔ do wa gɔ.

²⁷ Ma kɛ a ba kuti bulu be 'da a, kɛ ma zi na, a hɔ nwa olo a ni, nɛ a gbɛ a dɛ ngɔ ngbo le, we dɔnggɔ do gale 'da wa. Kɔ Oisraɛlɛ wa nɛa we zɔ ni, nɛ wa dɛ kili, nɛ wa la fala bi bole do wa, nɛ wa si.