2 Sakonɔ 23 - WE NU GALE 1995

Yoasi hɔa nwa

¹ Ma hɔa kɔ sambo sabɛlɛ dɛa to nwa 'da Atali, nɛ nganga Yoyada nganda sila ɛ, nɛ a ba zã zu we do ogã wi ngɔ osoda mɔlɔ. Owinɔ ni wi a Azaria, be 'da Yɛroamɛ, Ismaɛlɛ, be 'da Yohananɛ, Azaria, be 'da Obɛdɛ, Maseya, be 'da Adaya, do Elisafatɛ, be 'da Zikri.

² Owinɔ ni wa yɛngga ngɔ nù Yuda, do kɔ lenɔ vɛ̃, nɛ wa sa mɔ hã olevitɛnɔ do ogã wi ngɔ onu fɛlɛ Israɛlɛ. Wa sa mɔ hã winɔ do'do, nɛ wa kpolo tɛ wa do wa dɛ Yeruzalɛmɛ i.

³ Nɛ wa vɛ̃, wa mba li ngba wa dɛ kɔ tɔa Tɛmpɛloe 'da Gale, nɛ wa kpo mbulu we duzu nwa Yoasi. Nɛ Yoyada tɔ̃ hã wa na: “Nɛ zɔ́, wi nɛ dɛ to nwa wi a Yoasi, be 'da nwa Yoramɛ. A dɛ sɛ ɔ nɛ kɛ NWA Gale kpua do mbulu nɛ hã Davidi ngɔ obe zã a ni.

⁴ Kɔ nɛ dɛ na mɛ gɛ: 'Da fala kɛ nganganɔ do olevitɛnɔ wa tɛ we dɛ toe 'da wa do kɔ̃ tũ ɔmɔ tɛ wi ni, nɛ lɛ gɔnɔ sɛ sanga wa talɛ. Nɛ ngɔ gili winɔ kɛ dati, wa yolo sɛ tɛ nu tɔa kɛ ma le dɛ kɔ tɔa Tɛmpɛlo i ni.

⁵ Nɛ ngɔ ogili winɔ kɛ bɔa, wa yolo tɛ nu tɔa 'da nwa, nɛ ngɔ gili winɔ kɛ talɛ, wa yolo tɛ kuti nu ngboe. Nɛ tala ogele winɔ vɛ̃ wa yolo dɛ li ofanda Tɛmpɛloe.

⁶ Nɛ wele kpo tɛ lè kɔ Tɛmpɛloe 'da NWA gɔ. Wi nɛ le i mɔ tati a onganganɔ do olevitɛnɔ, we kɛ mɛ a fala dɛa toe 'da wa, kɛ wa saka wa we nɛ ni. Nɛ ma wia na, ogele winɔ wa dɛ mbula kɛ NWA Gale hã ma ni.

⁷ Nɛ ombe levitɛnɔ wa kala sɛ mɔ bi bole 'da wa dɛ kɔ̃ wa. Nɛ wa linggi nwa, nɛ wa e a dɛ gbogbo, nɛ wa kã a 'da fala a kɔ̃ we nɛ nɔ ni. Kɔ gɛnɛ kɔ wi a wio nde, hã a nɛ we le kɔ tɔa Tɛmpɛloe, nɛ wa gbɛ a.”

⁸ Nɛ olevitɛnɔ do Oyuda vɛ̃, wa dɛa nɛ́ kɛ nganga Yoyada ba do nu a hã wa ni. Nɛ gã wi ngɔ osoda kpo kpo ngɛmɛ li owinɔ 'da a vɛ̃. Owanɔ kɛ wa do to do kɔ̃ tũ ɔmɔ tɛ wi boe, mba do wanɔ kɛ wa do to kɔ tũi ni bina ni, nɛ wa nɛ do wa 'da nganga Yoyada i. Mba gɔ, do ngba soe ni, nganga Yoyada hã̀ zi kɔ̃ tũ ɔmɔ tɛ wi hã ngɔ gili owinɔ ni gɔ.

⁹ Wa hɔa i mɔ, nɛ Yoyada kala sɛlɛnɔ do ngelenɔ kpi do kpi zi olo nwa Davidi, kɛ wa a zi ma kɔ tɔa Tɛmpɛloe 'da Gale ni, nɛ a kɛ̃ ma dɛ kɔ̃ ogã wi ngɔ sodanɔ.

¹⁰ Nɛ a kɛ̃ mɔ bi bolo dɛ kɔ owinɔ vɛ̃. Nɛ owinɔ wa nɛ, nɛ wa yolo dɛ nu tɔa Tɛmpɛloe, nɛ wa gba korr dɛ dati nɛ ni, we zɔ mɔ tɛ nwa. Nɛ nde lɔnggɔ fɛlɛ wa kpɔ̀ nu ngbɛ ɛ kpɔa gɔ.

¹¹ 'Do ki ni, nɛ Yoyada nɛa, nɛ a kpa Yoasi, nɛ wa hɔ do a, nɛ a gu ndasa nwa zu a, nɛ a hã 'buku mbulanɔ hã a. A dɛa na mɛ ni do'do, nɛ Yoyada do obenɔ 'da a, wa a nɔ zu a, nɛ wa e a do nwa. Nɛ owinɔ vɛ̃ wa ma ngɔ he mɔ na: “E kɔ nwa 'bana nza fai!”

¹² Atalia nɛa we zele zɛ nu wi 'da owinɔ tɛ kɛ wa yu 'do nwa ni, nɛ a kulu ngɔ, nɛ a nɛ dɛ 'da ogba gili winɔ nu tɔa Tɛmpɛlo 'da NWA i.

¹³ Kɔ a nɛa we ka mɔ, nɛ a zɔ mbé nwa, nɛ nde a yula dɛ tɛ bɛlɛduma tɔa, kɛ ma sakata nu tɔa Tɛmpɛloe ni. Nɛ ogã wi ngɔ sodanɔ do owi dama mɔtũlũnɔ, wa yolo dɛ kɛ zã a ni, nɛ Owi dama mɔtũlũnɔ wa tɛ dama nɛ. Nɛ Owi ga Zumanɔ wa kala mɔ zɛ Zumanɔ 'da wa, nɛ wa kpe dati owi zɛ kaliãnɔ. Nɛ owinɔ vɛ̃ wa ma ngɔ he mɔ do yangga. Kɔ Atali nɛa we zɔ ni, nɛ a ɛ̃ tulu tɛ̃ a, nɛ a zɛ nu a na: “Nɛ gbɛa mi ia! Nɛ gbɛa mi ia!”

¹⁴ Nɛ Yoyada ba nu ɛ hã ogã wi ngɔ sodanɔ wa zɔ mɔ tɛ nwa ni na, wa ba a, nɛ wa gbɔtɔ a sanga owinɔ dɛ nza i. Nɛ a tɔ̃ hã wa na: “Fala kɛ wele nɛ 'do a, nɛ nɛ gbɛ́ wi ni.” Yoyada dɛa zi ni, we duzu kɛ a kɔ̃̀ zi na, wa gbɛ a dɛ kɔ ngbo Tɛmpɛloe ni gɔ.

¹⁵ Nɛ ogã wi ngɔ sodanɔ wa ba Atali, nɛ wa la do a dɛ nu tɔa 'da nwa i. Wa nɛa we hɔ dɛ nu ngboe li nɛ a Ngbo 'da Ombalatanɔ ni, nɛ wa gbɛ a dɛ di ni.

¹⁶ 'Do nɛ, nɛ Yoyada dɛa na, nwa Yoasi do owinɔ 'da a, wa gba tɔkɔ ngbala wa do NWA Gale, takɔ wa hɔ owinɔ 'da a fai.

¹⁷ Wa dɛa ni do'do, nɛ owinɔ wa la dɛ fala kɛ tɔa sambala 'da Bala se'de ni, nɛ wa 'danga ma vɛ̃. Nɛ wa gbini 'bɔ sanga gbagalanɔ do kpikimanɔ, nɛ wa ba Matanɛ, nganga 'da Bala, nɛ wa gbɛ a dɛ dati gbagalanɔ ni.

¹⁸ 'Do nɛ, nɛ Yoyada a olevitɛnɔ kɛ wa a nganga ni na, wa zɔ mɔ tɛ tɔa Tɛmpɛloe 'da NWA. Davidi kɛ̃a zi wa vɛ̃ do ngɔ gili we dɔ sa'de we dɔnggɔ do NWA, ɔ nɛ kɛ wa kɔma kɔ 'buku mbula 'da Mɔizɛ ni. Nɛ Davidi tɔ̃a zi hã wa na, wa dɛ toe 'da wa fala nɛ kpo do ga ozuma yangga.

¹⁹ Nɛ Yoyada a owi zɔ mɔ tɛ nu ngbo tɔa Tɛmpɛloe na, da dɛ kɔ wi kɛ a a wi ndi li Gale ni a lé i mɔ gɔ.

²⁰ Nɛ Yoyada mba 'bɔ li ogã wi ngɔ sodanɔ, do kumunɔ, do owi kpe dati owinɔ, do Owi lenɔ vɛ̃, nɛ a kã nwa yolo tɛ nu tɔa Tɛmpɛloe ni we e a tɛ nu tɔa nwa 'da a i. Nɛ tala owinɔ vɛ̃ wa kpia dɛ 'do a we kã a. Wa hɔa i mɔ, nɛ wa le do gã nu ngboe dɛ kɔ nɛ i, nɛ Yoasi nɛ, nɛ a dungu nù ngɔ kpongbo nwa,

²¹ nɛ owinɔ vɛ̃ wa dɛa yangga. 'Do kɛ wa gbɛa zi Atali ni, nɛ le kpa dungu fio.