2 Sakonɔ 20 - WE NU GALE 1995

Omoabɛ wa bi nù Yuda

¹ 'Do ki ni, nɛ Omoabɛ do Oamoni wa mba li ngba wa do ombe Omeuni, nɛ wa nɛ we bi nwa Yozafatɛ.

² Owinɔ 'da Yozafatɛ wa zila we nɛ, nɛ wa nɛ, nɛ wa tɔ̃ we nɛ hã a na: “Mɔ ĩ na ogba gili soda wa tɛ we bi mɔ. Wa yula do kulu gã lì Ndɔ Fio tɛ ngɔ nù Edɔmɛ, kɔ wa di dɔ́ ni a tɛ le Hasasoni-Tamarɛ kɛ mbe 'bɔ li nɛ a Ɛnɛ-Gedi ni.”

³ Yozafatɛ zila we ni, nɛ kili ba a wena, nɛ a 'bili do kɔ sila a we aka NWA Gale. Nɛ a ba nu a hã owinɔ ngɔ nù Yuda vɛ̃ na, wa bɛ̃ nyɔngɔmɔ we aka Gale.

⁴ Nɛ Oyuda wa yula kɔ lenɔ ngɔ nùi ni vɛ̃, nɛ wa nɛ Yeruzalɛmɛ we ala nu wa hã Gale na, a gbaka lo.

⁵ Yozafatɛ do owinɔ 'da a wa mba ngba wa do Owi Yeruzalɛmɛ do Oyuda, nɛ wa yolo tɛ mbé li fanda Tɛmpɛloe ni. Nɛ Yozafatɛ kulu ngɔ,

⁶ nɛ a ma ngɔ sambala na: “Aa NWA Gale 'da oyaa lɛ, mɔ a nwa tɛ li nza i, nɛ mɔ 'bɔ a nwa ngɔ nu kɔnggɔnɔ vɛ̃. Mɔ do ngawi wena, nɛ wele kpo wè tɛ yolo dati mɔ gɔ.

⁷ Wi a mɔ Gale 'da lɛ hã mɔ ndaka zi owinɔ ngɔ nùi gɛ, 'da fala kɛ owinɔ 'da mɔ, obe Israɛlɛ kɛ wa zi a obe zã yali ngba mɔ Abrahama, wa hɔa ngɔ nùi gɛ ni. Nɛ mɔ hã ma hã wa do mɔ wa fai.

⁸ Nɛ wa dɛa fala ɔi 'da wa dɛ di ni, nɛ wa dɛa 'bɔ fala we dɔnggɔ do mɔ Gale. 'Do nɛ, nɛ wa tɔ̃ hã mɔ na:

⁹ ‘'Da fala kɛ 'bako, bolo, ngamɔ, 'dã zɛlɛ, tabi gba wɔ ma te ngɔ lɛ nde, nɛ lɛ nɛ sɛ, nɛ lɛ yolo dɛ dati mɔ Gale, tɛ fala dɔnggɔ do mɔ gɛ. We kɛ mɛ a fala mɔ be do tɛ mɔ hã lɛ se'de bia fai. Nɛ lɛ sa sɛ mɔ hã mɔ na, mɔ tɛ́ we gbaka lɛ kɔ gã 'bako 'da lɛ. Na mɛ ni, nɛ mɔ zele sɛ lɛ, nɛ mɔ kpasa lɛ.’

¹⁰ “Kɔ di dɔ̃ ni, mɔ zɔ́, Oamoni do Omoabɛ do Oedɔmɛ, wa tɛa hã wa tɛ bi lɛ. 'Da fala kɛ oyaa lɛ wa yula zi ngɔ nu Ezipeto tɛ si ma ni, nɛ mɔ kɔ̃̀ zi na, wa la do ngɔ nùnɔ 'da owinɔ gɛ gɔ. Nɛ oyaa lɛ wa sa'ba zi do gele wala, nɛ wa kùmù zi owinɔ ni gɔ.

¹¹ Nɛ nde ngangga ni, owinɔ ni wa gese nu de mɛ mɔ dɛa zi hã wa ni hã lɛ do 'dã mɔ. Wa tɛa, hã wa ndaka lɛ ngɔ nùi kɛ mɔ hã ma hã lɛ ni.

¹² Kɔ NWA Gale, mɔ hã́ sɛ ngamɔ hã wa we do mɛ kɛ wa dɛ gɛ gɔ nde? Lɛ do ngawi dati gba gili sodanɔ 'da wa bina, nɛ lɛ ĩ̀ ti mɛ lɛ wia we dɛ ma ni gɔ. Gulu nɛ a lɛ kala li lɛ dɛ 'da mɔ, nɛ lɛ ala nu lɛ hã mɔ na, mɔ gbaka lɛ.”

¹³ Nɛ Owi wili Yuda vɛ̃, mba do owukonɔ do obenɔ wa yula dɛ dati Gale, tɛ fala dɔnggɔ do a ni.

Oyuda wa nɛa ngɔ owi sɛnɛ wa

¹⁴ Nɛ kɔ mba li ngba wi ni, nɛ Hi Wi 'da nwa lia kɔ mbe levitɛ kpo, li a a Yaziɛlɛ. (Yaziɛlɛ a be 'da Zakaria, nɛ a 'bɔ a be yaa Bɛnaya. Bɛnaya a be 'da Yeiɛlɛ, nɛ a 'bɔ a be yaa Matania kɛ a a be zã Asafɛ ni).

¹⁵ 'Da fala Hi Wi 'da nwa lia kɔ Yaziɛlɛ ni, nɛ a he mɔ na: “Aa mɔ, nwa Yozafatɛ, do nɛ owi Yeruzalɛmɛ, do nɛ Oyuda, nɛ gɛ́ zala nɛ, hã nɛ zele we kɛ NWA Gale tɔ̃a hã nɛ gɛ. A na: ‘Kili tɛ bà nɛ gɔ. Nɛ nɛ tɛ dɛ̀ kili gba gili sodanɔ ni gɔ, we kɛ wi bi sɛ bole ni wi a nɛ gɔ, nɛ nde wi bi sɛ wi a mi Gale 'da nɛ.

¹⁶ Bindɛ, nɛ nɛ bá wala kɛ owi sɛnɛ nɛ wa a se'de ni. Wa tɛ kũ do nyanga li kala wa sa li nɛ na Fulɛlɛ ni. Nɛ nɛ kpa sɛ wa tɛ ndɔti gbongboe kɛ ma ka mɔ dɛ li gba zɔ̃ Yeruɛlɛ ni.

¹⁷ Nɛ hɔ i mɔ, nɛ nɛ tɛ bì do wa gɔ. Nɛ yóló nù, nɛ nɛ 'bɔ we zɔ tɛlɛ tɛ kɛ mi nɛ bi ngɔ nɛ ni. Aa nɛ Oyuda, do Owi Yeruzalɛmɛ, nɛ tɛ dɛ̀ kili gɔ, nɛ nɛ tɛ yàkà tɛ nɛ gɔ. Bindɛ, nɛ nɛ nɛ́ we kpa ngba nɛ do wa, mi sɛ fala nɛ kpo do nɛ.’ ”

¹⁸ Yozafatɛ sambala ia do'do, nɛ a bili zu a nù gbaa, nɛ ma to nù dati NWA. Nɛ owi Yeruzalɛmɛ do Oyuda, wa bili tɛ mɛ 'bɔ zu wa nù dati nwa we dɔnggɔ a.

¹⁹ 'Do nɛ, nɛ olevitɛnɔ kɔ onu fɛlɛ Kehatɛ do Kore wa kulu ngɔ, nɛ wa ga zuma do nga gɛlɛ we dɔnggɔ NWA Gale 'da obe Israɛlɛ.

²⁰ Fala sa titole belee, nɛ wa kulu ngɔ we la tɛ li gba zɔ̃ Tekoa i. Wa nɛa we la nɛ, nɛ Yozafatɛ tɔ̃ hã wa na: “Aa nɛ owi Yeruzalɛmɛ do Oyuda, nɛ zélé mi sɛ! Nɛ gbíní zã nɛ do NWA Gale 'da nɛ, nɛ a hã sɛ ngawi hã nɛ. Nɛ gbíní zã nɛ do owi gba olo nu a, nɛ nɛ nɛ sɛ ngɔ Owi sɛnɛ nɛ.”

²¹ 'Do nɛ, nɛ Yozafatɛ wele we do owinɔ, takɔ wa saka wanɔ kɛ wa kpe sɛ dati sodanɔ ni. Nɛ a ba nu a hã Owi ga Zumanɔ na, wa he'de dia tulu sambala 'da wa, nɛ wa kpe dati tɛ ga zuma we dɔnggɔ do NWA Gale na: “Lɛ dɔ́nggɔ́ NWA, we kɛ kɔ̃a zã 'da a ma do ndɔti nɛ bina.”

²² 'Da fala kɛ wa tɛ dɔnggɔ NWA ni, nɛ a vĩ zu Oamoni do Omoabɛ do Oedɔmɛ kɛ wa tɛa we bi Oyuda ni. Nɛ wa ma ngɔ bi dɛ sanga tɛ ngba wa.

²³ Nɛ Oamoni do Omoabɛ wa si ngɔ ngba wa, nɛ wa bi Omoabɛ gbaa, nɛ wa gbɛ wa vɛ̃. 'Do nɛ, nɛ Oamoni do Omoabɛ wa gbɛ 'bɔ ngba wa dɛ sanga tɛ ngba wa.

²⁴ 'Da fala kɛ Oyuda wa nɛa we hɔ tɛ fala kɛ wa wia tɛ ka mɔ dɛ li gba zɔ̃ i, takɔ wa zɔ Owi sɛnɛ wa ni, nɛ wa zɔ tati a wɔlɔ Owele ma ɔ kululu dɛ nù gɛ, nɛ nde wele kpo kɔ wa 'bànà do tunu li ɛ gɔ.

²⁵ Nɛ Yozafatɛ do owinɔ 'da a wa ma ngɔ kala mɛnɔ li bole ni. Nɛ wa kpa gba gili onadalamɔ, do okpamɔ, do otulu, do omɔ olo gã gole. Omɛnɔ ni ma dɛlɛ zi wena, nɛ wa ɔa tũ talɛ dɛ fala ni we kala mɛnɔ olo fionɔ ni. Gɛnɛ kɔ ní, nɛ nde wa wè zi we kala ma vɛ̃ gɔ.

²⁶ Ma hɔa tɛ kɔ tũ kɛ nalɛ, nɛ Oyuda wa mba ngba wa tɛ kɔ gbangɔlɔ̃ Bɛraka we hã iɔ̃nae hã Gale. Tia do sɔɛ gɛ, owinɔ wa sa li fala ni na: “Gbangɔlɔ̃ Bɛraka.” Gulu li Bɛraka do Hebre na: “Iɔ̃nae.”

²⁷ 'Do nɛ, nɛ Yozafatɛ kpia dati owinɔ 'da a, nɛ wa si dɛ Yeruzalɛmɛ i do gã yangga, we kɛ NWA kpasa wa ti kɔ̃ Owi sɛnɛ wa.

²⁸ 'Da fala kɛ wa hɔa le i, nɛ wa ba wala tɔa Tɛmpɛloe 'da NWA, nɛ wa ga zuma tɛ zɛ be kundu do gã kundu do dama mɔtũlũ.

²⁹ Kɔ ogele nu kɔnggɔnɔ wa nɛa we zele na, NWA Gale bi Owi sɛnɛ obe Israɛlɛ ni, nɛ wa vɛ̃ wa dɛa kili NWA wena.

³⁰ Na mɛ ni, nɛ to nwa 'da Yozafatɛ ma la zi do dia nɛ, we kɛ Gale 'da a dɛa zi na, a ɔ do dungu fio falanɔ vɛ̃.

Ndɔti dɛa to nwa 'da Yozafatɛ

³¹ Yozafatɛ hɔa nwa ngɔ nù Yuda, nɛ nde a do 'bu sabɛlɛ talɛ ngɔ nɛ mɔlɔ. Nɛ a dɛa zi to nwa 'da a tɛ Yeruzalɛmɛ 'do 'bu sabɛlɛ bɔa ngɔ nɛ mɔlɔ. Li naa a zi a Azuba, be 'da Sili.

³² Yozafatɛ dɛa zi mɔ tɛ̃ a do bɔlɔ nɛ, ɔ nɛ kɛ 'da baa Asa ni, nɛ a dɛ̀ mɔ kɛ ma 'danga li NWA ni gɔ.

³³ Gɛnɛ kɔ na mɛ ni, nɛ nde a 'dàngà zi falanɔ wa 'dafa we dɔnggɔ do okpikimanɔ ni gɔ. Nɛ we duzu nɛ, owinɔ wa gbìnì zi zã wa do Gale 'da oyaa wa gɔ.

³⁴ Tala mɛnɔ vɛ̃ kɛ Yozafatɛ dɛa yolo do ndo nyanga dɛa to nwa 'da a gbaa we hɔ Sɔkpɔ nɛ ni, wa kɔma ma kɔ 'buki li nɛ a: “Dɛa tonɔ 'da Yehu, be 'da Hanani.” Nɛ wa yulu 'buki ni dɛ sanga 'bukunɔ kɛ ma tɔ̃ we ngɔ onwa ngɔ nù Israɛlɛ ni.

³⁵ 'Do ki ni, nɛ Yozafatɛ, nwa ngɔ nù Yuda, dɛa na do Ahazia, nwa ngɔ nù Israɛlɛ, kɛ a dɛ zi 'dã mɔ wena ni.

³⁶ Nɛ wa mba bɔa nɛ we dɛ omasua, takɔ ma kala otole gele fala hã wa. Nɛ wa dɛa masuanɔ ni tɛ nu kolo lì Esioni-Gebɛrɛ.

³⁷ Nɛ wi gba olo nu Gale, Eliezɛrɛ, be 'da Dodava, wi Maresa tɔ̃ hã Yozafatɛ na: “Mɔ dɛa na do Ahazia, kɔ mɔ ĩ na, NWA a 'danga sɛ mɛ mɔ dɛa ni.” Nɛ do ngbongbo nɛ, masuanɔ ni, ma nɛ̀ zi we kala tole gele fala gɔ, we kɛ ma si zi ti lì.