2 Sakonɔ 19 - WE NU GALE 1995

Wi gba olo nu Gale dãlã dɛ tɛ Yozafatɛ

¹ Yozafatɛ, nwa ngɔ nù Yuda si zi do lɔa tɛ̃ a dɛ tɛ Yeruzalɛmɛ i.

² Nɛ Yehu, be 'da Hanani, kɛ a a wi gba olo nu Gale ni, a tɛa 'da a, nɛ a aka a na: “Gulu kɛ mɔ gala wi kɛ a a wi dɛ 'dã mɔ ni we ge nde? Wele wia we kɔ̃ gɛnɛ wi kɛ a sɛnɛ NWA Gale ni nde? We duzu mɛ mɔ dɛa ni, ma kɛ zã NWA Gale nɔ̃lã dɛ tɛ mɔ.

³ Gɛnɛ kɔ ni, nɛ nde mɔ do de dɛa mɔ boe, we kɛ mɔ dɔa okpikima gale Asera ngɔ nùi 'da mɔ, nɛ mɔ dɛa mbula 'da Gale do sila mɔ vɛ̃.”

Yozafatɛ saka Owi gɔnɔ we

⁴ Yozafatɛ ɔ zi do Yeruzalɛmɛ sɛ, nɛ a yɛnggɛ ngɔ nùi we zɔ owinɔ 'da a de. A ndo zi yɛnggɛ ma yolo do kɔ le Bɛrseba, kɛ ma si ba gɔtɔ, gbaa we hɔ tɛ ngɔ kalanɔ ngɔ nù Efraimɛ. A yɛnggɛ zi ni we sa mɔ hã owinɔ na, wa kpolo tɛ wa dɛ 'da nwa kɛ oyaa wa wa dɔnggɔ zi a ni.

⁵ Yozafatɛ a Owi gɔnɔ we kɔ lenɔ vɛ̃ kɛ wa dɛa ngbonɔ zĩ ma takpa tɛ ngɔ nù Yuda ni.

⁶ Nɛ a tɔ̃ hã wa na: “Nɛ dɛ́ toe 'da nɛ do wala olo nɛ ngboo. Nɛ nɛ tɛ gɔ̀nɔ̀ we do zu li wele gɔ, nɛ nde nɛ gɔnɔ ma do zu li NWA Gale. Nɛ dɛ na mɛ ni, nɛ a sɛ fala nɛ kpo do nɛ 'da fala kɛ nɛ 'bili we mɔ́ wele ni.

⁷ Nɛ dɛ́ kili NWA, nɛ nɛ dɛ zĩ do mɛnɔ kɛ nɛ dɛ ni. We kɛ NWA Gale 'da lɛ, a kɔ̃̀ na wele gɔnɔ we do bɛlɛ, tabi a zɔ bila li wele, sɛ nɛ a gɔnɔ dia we hã a de gɔ. Nɛ a kɔ̃̀ 'bɔ na, wele futa avoka sɛ nɛ wa gɔnɔ dia we hã a de gɔ.”

⁸ Yozafatɛ saka ombe levitɛ, do onganga, do ogã wi ngɔ nu fɛlɛ winɔ tɛ Yeruzalɛmɛ ni vɛ̃, nɛ a a wa na, wa 'bili we do zu li NWA Gale, nɛ wa ga mɔ̃lãnɔ sanga Owi kɔ lenɔ.

⁹ Nɛ a ba nu a hã wa na: “Ma wia na, nɛ dɛ kili NWA Gale, takɔ nɛ dɛ toe 'da nɛ do sila nɛ vɛ̃, nɛ́ kɛ ma wia ni.

¹⁰ Nɛ nde 'da falanɔ vɛ̃ kɛ onya nɛ wa yolo sɛ kɔ lenɔ 'da wa, nɛ wa tɛ we da we dati nɛ ni, nɛ nɛ 'bili ngbangga 'da wa. Kɔ fala kɛ wele da we gbɛa wi, tabi we mɔ̃lã, tabi we kɛ ma zɔa gbini mbula nde, nɛ nɛ gɔnɔ sanga nɛ hã wa. Fala kɛ wa dɛ na mɛ ni, nɛ nde wa té sɛ li ngbangga dati NWA Gale gɔ. Nɛ zã Gale nɔ̃lɔ̃ sɛ tɛ mɛ 'bɔ dɛ tɛ nɛ do onya nɛ gɔ. Nɛ dɛ̃ na mɛ ni na, da dɛ kɔ nɛ té do ngbangga dati NWA gɔ.

¹¹ Amaria, gã nwa nganga, a zɔ sɛ mɔ tɛ nɛ we mɛnɔ kɛ ma zɔa sambala 'da Gale ni. Nɛ Zebadia, be 'da Ismaɛlɛ, gã wi dɛa to mbati ngɔ nùi gɛ, a 'bili sɛ wenɔ 'da owinɔ. Nɛ olevitɛnɔ wa dɛ sɛ tonɔ 'da wa fala nɛ kpo do nɛ. Nɛ dɛ́ toe 'da nɛ do kpã sila, nɛ e kɔ NWA ɔ do owinɔ kɛ wa dɛ mɔ do wala olo nɛ ni.”