2 Sakonɔ 18 - WE NU GALE 1995

Yozafatɛ si 'do Akabɛ nwa ngɔ nù Israɛlɛ

¹ Yozafatɛ, nwa ngɔ nù Yuda hɔa zi wi kpamɔ, nɛ a kpa zi 'bɔ dɔ̃lɔ̃ li wena. Nɛ a 'dafa na, bulu be 'da a kpo ba ngba ɛ do be zɔnga be 'da Akabɛ, nwa ngɔ nù Israɛlɛ.

² Ma ɔa olo nɛ ni gbaa, nɛ Yozafatɛ fala nɛ kpo do owinɔ dɛ ti a ni, wa kulu ngɔ, nɛ wa nɛ Samaria i we zɔ Akabɛ. Wa hɔa i mɔ, nɛ Akabɛ ba nu a hã owinɔ 'da a, nɛ wa gbɛa gba gili obata do ongɔmbɔ hã wa. 'Do nɛ, nɛ Akabɛ mbese Yozafatɛ na, a kɔ̃, nɛ wa mba do a hã wa nɛ we bi le Ramɔtɛ tɛ ngɔ nù Galadɛ.

³ Akabɛ mbisa a do'do, nɛ a aka a na: “Mɔ kɔ̃ sɛ we mba do mi we bi le Ramɔtɛ tɛ ngɔ nù Galadɛ i nde?” Nɛ Yozafatɛ gese hã a na: “Mi do mɔ, lɛ a wele kpo, owinɔ 'da mɔ do wanɔ 'da mi vɛ̃ a Owele kpo. Mi kɔ̃a we mba do mɔ, fala nɛ kpo do owinɔ 'da mi, hã lɛ bi le Ramɔtɛ.

⁴ Nɛ nde ma wia na, mɔ aka nwa dati sɛ.”

⁵ Nɛ Akabɛ sa mɔ hã Owi gba olo nu Gale kama nalɛ, nɛ a aka wa na: “Nɛ lengge na, lɛ wia we nɛ we bi le Ramɔtɛ tɛ ngɔ nù Galadɛ we ba ma, tabi lɛ tɛ nɛ̀ gɔ nde?” Nɛ Owi gba olo nu Gale wa gese na: “Mɔ nɛ́, NWA a 'dɔlɔ sɛ le ni hã mɔ.”

⁶ Nɛ Yozafatɛ aka 'bɔ na: “Mbe gele wi gba olo nu Gale, kɛ lɛ wia tɛ aka NWA do wala 'da a ni, a bina nde?”

⁷ Nɛ nwa Akabɛ gese na: “Wele boe, wi a Mike, be 'da Imla. Nɛ nde mi kɔ̃̀ gɛnɛ a gɔ, we duzu kɛ a tɔ̃́ mbe dia we hã mi fala kpo gɔ. A tɔ̃́ hã mi fai a 'dã we iko.” Nɛ Yozafatɛ gese na: “Ee, mɔ tɛ tɔ̃̀ ni gɔ!”

⁸ Nɛ Akabɛ sa mɔ hã mbe wi dɛa to kɔ tɔa nwa 'da a, nɛ a tombo a na, a nɛ́ hã a sa mɔ hã Mike be 'da Imla na, a tɛ dɔ̃ sɛ.

⁹ Nwa Akabɛ do nwa Yozafatɛ, wa hi'da zi tulu nwanɔ 'da wa, nɛ wa dungu nù ngɔ kpongbo nwa 'da wa dɔ̃ɔ do nu ngbo le Samaria. Nɛ owi gba olo nu Gale, wa tɛ gba olo nu a dɛ dati wa ni.

¹⁰ Nɛ mbe wele kpo sanga wa ni, li a a Sidɛkia, nɛ a be 'da Kɛnana, a dula zi mɔ bolo do ozamba zu sa'de, a tɔ̃ na: “NWA Gale tɔa na, zamba zu sa'denɔ gɛ ma be ngawi kɛ mɔ kumu sɛ do osoda Siri ni.”

¹¹ Nɛ tala owi gba olo nu Gale vɛ̃, wa tɔ̃a 'bɔ kpo kpo we nu a ni, na: “Aa nwa, mɔ wia we nɛ we bi le Ramɔtɛ tɛ ngɔ nù Galadɛ. NWA a 'dɔlɔ sɛ le ni hã mɔ, nɛ mɔ nɛ sɛ ngɔ osoda Siri.”

Mike mbisa Akabɛ na bole ma nɛ sɛ ngɔ a

¹² Do 'da fala ni, nɛ wi nɛ toe, kɛ nwa tombo sɔ a we sa mɔ hã Mike ni, a hɔa 'da Mike i, nɛ a tɔ̃ hã a na: “Mɔ ĩ na, nu owi gba olo nu Gale vɛ̃ kpo, nɛ wa mbisa nwa na, a nɛ sɛ ngɔ ongba a wi bolonɔ. Kɔ ma wia na mɔ nɛ, nɛ mɔ tɔ̃ tɛ mɛ 'bɔ kpasaa na mɛ ni.”

¹³ Nɛ Mike gese hã a na: “Do zu li NWA Gale wele kpasi, mi tɔ̃ hã mɔ na, mi gba sɛ tati a olo nu Gale kɛ a tɔ̃a hã mi ni iko.”

¹⁴ Nɛ a nɛa, nɛ a hɔ dati nwa Akabɛ, nɛ Akabɛ aka a na: “Mike, mɔ lengge na, lɛ wia we nɛ we bi le Ramɔtɛ tɛ ngɔ nù Galadɛ we ba ma, tabi lɛ tɛ nɛ̀ gɔ nde?” Nɛ Mike gese na: “Mɔ wia tɛ nɛ nɛ. NWA a 'dɔlɔ sɛ le ni hã mɔ, nɛ mɔ nɛ sɛ ngɔ owinɔ di ni ni.”

¹⁵ Nɛ Akabɛ tɔ̃ 'bɔ na: “Mɔ kɔ̃a na mi ala nu mi hã mɔ gbaa, sɛ nɛ mɔ ĩ ti gba olo nu NWA Gale hã mi de nde?”

¹⁶ Nɛ Mike gese na: “Mi zɔa osoda Israɛlɛ, nɛ nde wa pɛsɛ do ngɔ kalanɔ vɛ̃, ɔ nɛ obata kɛ wi zɔ mɔ tɛ wa bina ni. Nɛ NWA Gale tɔ̃ na: ‘Nɛ́ kɛ owinɔ gɛ, wa do nwa ngɔ wa 'bɔ bina ni, ma wia na, wele do wele si dɛ nu tɔa 'da ɛ.’ ”

¹⁷ Nɛ Akabɛ tɔ̃ hã Yozafatɛ na: “Mi tɔ̃̀ sɔ hã mɔ gɔ nde? Mi tɔ̃a sɔ na, a gbá mbe olo nu Gale hã mi do dia nɛ fala kpo gɔ, a tɔ̃ hã mi tɛ mɛ fai a 'dã we iko.”

¹⁸ Nɛ Mike tɔ̃ 'bɔ na: “Mɔ zélé 'bɔ we NWA tɔ̃ gɛ! Mi zɔa NWA Gale, nɛ nde a dungu ngɔ kpongbo nwa 'da a tɛ li nza i, nɛ anzɛnɔ 'da a wa yula dɛ kɛ zã a.

¹⁹ Nɛ NWA Gale aka na: ‘Wi kɔ̃a we nɛ we ɔkɔlɔ Akabɛ na, a nɛ hã a bi le Ramɔtɛ, hã a fe dɛ i mɔ, wi a wio nde?’ Nɛ nde ombe anzɛnɔ wa tɔ̃ kpi, nɛ ombee nɛ wa tɔ̃ tɛ mɛ 'bɔ kpi.

²⁰ Nɛ hi wi kɛ a gala owi gba olo nu Gale ni, a ngbɔ dɛ dati nwa, nɛ a tɔ̃ na: ‘Mi nɛ sɛ we ɔkɔlɔ a!’ Nɛ NWA aka na: ‘Mɔ dɛ sɛ nɛ nde?’

²¹ Nɛ a gese na: ‘Mi nɛ sɛ, nɛ mi dɛ na, Owi gba olo nu Gale vɛ̃ wa 'bili bɛlɛ hã Akabɛ.’ Nɛ nwa gese hã a na: ‘Ki ni a dia wala we ɔkɔlɔ a. Mɔ nɛ́, nɛ mɔ dɛ́ na mɛ ni!’ ”

²² Nɛ Mike tɔ̃ 'bɔ na: “Mɔ zɔ́, mɛ ma la gɛ a ni! NWA dɛa na, Owi gba olo nu a vɛ̃ wa 'bili bɛlɛ hã mɔ. Nɛ nde ĩ na, NWA kɔ̃a ngboo we tombo ngamɔ hã mɔ.”

²³ Sidɛkia, be 'da Kɛnana, nɛa we zele ni, nɛ a kulu ngɔ, nɛ a zɛ li Mike, nɛ a tɔ̃ hã a na: “Mɔ lengge na, Hi Wi 'da NWA wia we la fala wele we hã mi do'do, nɛ a wele we hã mɔ nde?”

²⁴ Nɛ Mike gese na: “Mɔ ĩ sɛ ti gulu nɛ ngboo do ngba soe kɛ mɔ yu sɛ wi sɛnɛ mɔ dɛ kɔ usu tɔa 'da mɔ ni.”

²⁵ Nɛ nwa Akabɛ ba nu ɛ hã mbe wi toe 'da a kpo na: “Mɔ bá Mike, hã mɔ nɛ́ do a hã gã wi ngɔ le Amoni, mba do be 'da mi Yoasi.

²⁶ Nɛ mɔ tɔ̃ hã wa na, wa fi a bɔlɔkɔ, nɛ wa hã hã a tati a be 'bulu mapa sĩ do lì iko gbaa, we 'bɔ na, mi si li bole do lɔa tɛ mi sɛ nɛ de.”

²⁷ Nɛ Mike gese hã Akabɛ na: “Mɔ si li bole do lɔa tɛ mɔ, nɛ nde nwa wèlè we do wala 'da mi gɔ!” Nɛ a tɔ̃ 'bɔ na: “Ma wia na, nɛ winɔ vɛ̃, nɛ zele we mi tɔ̃a ni.”

Wa gbɛa nwa Akabɛ li bolo

²⁸ Akabɛ, nwa ngɔ nù Israɛlɛ, do Yozafatɛ, nwa ngɔ nù Yuda, wa kulu ngɔ, nɛ wa nɛ we bi le Ramɔtɛ tɛ ngɔ nù Galadɛ.

²⁹ Nɛ Akabɛ tɔ̃ hã Yozafatɛ na: “Mi nɛ he'de gele tulu do tɛlɛ tɛ kɛ na wa yɔ ti mi, sɛ nɛ mi nɛ bole de. Nɛ nde we duzu mɔ, mɔ wia we he'de tulu nwa 'da mɔ.” Nɛ Akabɛ, nwa ngɔ nù Israɛlɛ, kpula otulu dɛ tɛ̃ a na, wa yɔ ti a, nɛ a la bole.

³⁰ Ĩ na, nwa ngɔ nù Siri sa zi mɔ hã ogã wi kũ ongilingili bolonɔ 'da a, nɛ a ba nu a hã wa na, wa tɛ bì do ogele sodanɔ tabi do ogã wi ngɔ sodanɔ gɔ. Nɛ nde wa bi tati a do nwa ngɔ nù Israɛlɛ.

³¹ Gulu nɛ hã ogã wi kũ ongilingilinɔ, wa nɛa we zɔ nwa Yozafatɛ, nɛ wa lengge vɛ̃ na, wi a nwa ngɔ nù Israɛlɛ, nɛ wa nɛ we bi do a. Yozafatɛ nɛa we zɔ ní, nɛ a ala nu a hã NWA Gale, nɛ Gale ndaka owi sɛnɛ a.

³² 'Da fala kɛ ogã wi kũ ongilingilinɔ ni, wa nɛa we ĩ na, wi a nwa ngɔ nù Israɛlɛ gɔ ni, nɛ wa la fala ndaka a.

³³ Ĩ na, mbe soda Siri kpo, a gbɔtɔ kpili, nɛ a sukpu dɛ sanga owi bolonɔ i, nɛ ma ndɔlɔ nwa ngɔ nù Israɛlɛ, nɛ ma le ngbala otulu mɔ bolonɔ, kɛ ma kele ngu'du a ni, nɛ ma kpa a. Nɛ nwa Akabɛ tɔ̃ hã wi ba ngilingili 'da a na: “Mɔ sí 'do! Mɔ hɔ́ nza do mi kɔ bole do'do, we kɛ mi kpa dani!”

³⁴ Nɛ nde ngba soe ni, bole fila zi kerr, nɛ wala hɔ nza bina. Nɛ nwa dungu do go'do a dɛ kɔ ngilingili 'da a, dɛ dati osoda Siri ni gbaa, kɔ wese nɛa we gɛ̃ nɛ, nɛ a fe.