2 Sakonɔ 17 - WE NU GALE 1995

Yozafatɛ hɔa nwa

¹ Yozafatɛ, be 'da Asa dungu nwa olo baa a. Nɛ a dɛa to nwa 'da a, nɛ ma nganda zi wena.

² Nɛ a a ngɔ gili osoda tɛ kɔ lenɔ kɛ wa zĩ ngbonɔ se'de ngɔ nù Yuda ni vɛ̃. Nɛ a a 'bɔ owi fɔmɔ le tɛ ngɔ nùi 'da a, do kɔ lenɔ kɛ baa a Asa kala zi ma kɔ̃ Oefraimɛ ni.

³ NWA Gale zi fala nɛ kpo do Yozafatɛ kɔ dɛa to nwa 'da a, we kɛ a dɛ zi mɛnɔ kpasaa ɔ nɛ kɛ yaa a Davidi dɛa zi do ndo nyanga dɛa to nwa 'da a ni. Nɛ a dɔ̃nggɔ̀ ogale Bala gɔ.

⁴ Nɛ nde a hã tɛ̃ a vɛ̃ we ĩ ti Gale 'da oyaa a, nɛ a gbìnì mbulanɔ 'da Gale ɔ nɛ kɛ onwa ngɔ Israɛlɛ wa dɛ ni gɔ.

⁵ Nɛ NWA dɛa na, to nwa 'da Yozafatɛ ma nganda. Nɛ Oyuda vɛ̃ wa 'dɔlɔ dia mɔ hã a gbaa, nɛ a kpa mɔ wena, nɛ a kpa 'bɔ dɔ̃lɔ̃ li wena.

⁶ Nɛ a ba zi sila a vɛ̃ we dɛ olo nu NWA Gale, nɛ a 'danga falanɔ wa 'dafa we dɔnggɔ do ogale bɛlɛnɔ do okpikima Asera ngɔ nù Yuda ni.

⁷ Ma hɔa tɛ kɔ talɛ sabɛlɛ dɛa to nwa 'da a, nɛ a tombo mbe ogã wi dɛa tonɔ 'da a na, wa nɛ hã wa be mɔ hã owinɔ kɔ lenɔ ngɔ nù Yuda. Owinɔ ni, wi a Bɛnɛ-Hailɛ, Obadia, Zakaria, Nɛtaneɛlɛ do Mikaya.

⁸ Nɛ owinɔ ni wa nɛa fala nɛ kpo do olevitɛ kusi. Olevitɛnɔ ni wi a Sɛmaya, Nɛtania, Zebadia, Asaɛlɛ, Sɛmiramɔtɛ, Yonatanɛ, Adoni, Tobia, do Tobɛ-Adonia, mba do onganga bɔa, Elisama do Yoramɛ.

⁹ Nɛ wa kala 'buku mbula 'da NWA dɛ kɔ̃ wa, nɛ wa yɛnggɛ kɔ lenɔ ngɔ nù Yuda ni vɛ̃ we be mbulanɔ ni hã owinɔ.

NWA hã ngawi hã Yozafatɛ

¹⁰ Owinɔ ngɔ nùnɔ vɛ̃ kɛ zã nù Yuda ni wa dɛa kili NWA Gale, nɛ wele kpo è 'bɔ bolo nù hã Yozafatɛ gɔ.

¹¹ Gɛnɛ kɔ Ofilisti, nɛ nde wa tɛa, nɛ wa 'dɔlɔ odia mɔ do fɛ̃a mɔ bolo hã a. Nɛ Oarabɛnɔ wa tɛa do obata koto sambo do kama sambo hã a, nɛ wa 'dɔlɔ 'bɔ owili dua koto sambo do kama sambo hã a.

¹² Na mɛ ni, ngawi 'da Yozafatɛ ma gã zi dɛ dati gã fai. A zĩ ogba ngbo ngɔ nù Yuda, nɛ a dɛ 'bɔ otɔa usu do mɔ,

¹³ nɛ a usu omɔ kɔ nɛ dɛlɛ wena. Nɛ a a mbe nga sodanɔ 'da a tɛ Yeruzalɛmɛ,

¹⁴ do 'da nu fɛlɛ kulanɔ 'da wa. Nɛ kɔ nu kpala Yuda, a saka ogã wi ngɔ osodanɔ gɛ: Adna, wi kpe dati onga soda koto kama talɛ.

¹⁵ Dɛ ti a ni, nɛ wa kpa Yohananɛ, wi kpe dati osoda koto kama bɔa do 'bu nɛ ngbɛ'dɛ'dɛ.

¹⁶ Nɛ Amasia, be 'da Zikri, a kpia dati onga soda koto kama bɔa. Amasia lia zi toe 'da nwa do sila a wele nɛ.

¹⁷ Nɛ kɔ nu kpala Bɛnzamɛ wa ba mbe nga soda kpo, li a a Eliada, nɛ wa kpe a dati Owi wili koto bɔa, kɛ wa do okpili do Ongele kɔ̃ wa ni.

¹⁸ Dɛ ti a ni, nɛ wa e Yozabadɛ ngɔ Owele koto do kama ngbɛ'dɛ'dɛ, kɛ wa ĩ ti bi bolo wena ni.

¹⁹ Ki ni a osodanɔ wa dɛ zi toe hã nwa tɛ Yeruzalɛmɛ i gɛ a ni. Nɛ wa tɔ̀lɔ̀ owanɔ a a wa kɔ lenɔ kɛ wa zĩ ngbonɔ 'do nɛ tɛ ngɔ nù Yuda ni gɔ.