2 Sakonɔ 15 - WE NU GALE 1995

Asa 'danga okpikimanɔ

¹ Do 'da fala ni, nɛ Hi Wi 'da Gale lia kɔ Azaria, be 'da Odɛdɛ,

² nɛ a kulu ngɔ, nɛ a nɛ, nɛ a kpa Asa, nɛ a tɔ̃ hã a na: “Aa nwa, mɔ zélé mi! Nɛ nɛ Oyuda, do Obɛnzamɛ vɛ̃, nɛ zélé 'bɔ mi! NWA sɛ fala nɛ kpo do nɛ, 'da fala kɛ nɛ fala nɛ kpo do a ni. Fala kɛ nɛ fa a, nɛ a be sɛ tɛ̃ a hã nɛ. Kɔ fala kɛ nɛ bɛ̃ gɛnɛ a, nɛ a bɛ̃ sɛ tɛ mɛ 'bɔ gɛnɛ nɛ.

³ Ma la zɛ́ sabɛlɛ dɛlɛ wena, obe Israɛlɛ wa sámbálá zi Gale 'da wa ngboo ni gɔ. Nɛ onganga zi we be we 'da Gale hã wa bina, nɛ wa dɛ́ zi 'bɔ mbula 'da a gɔ.

⁴ Nɛ nde kɔ ngamɛ 'da wa, nɛ wa kpula tɛ wa dɛ 'da NWA Gale 'da wa obe Israɛlɛ. Nɛ wa fa a, nɛ a bia tɛ̃ a hã wa.

⁵ Do ngba soe ni, wele wè zi tɛ kulu ngɔ we nɛ gɛnɛ gele fala, nɛ a kpolo tɛ̃ a do lɔa tɛ̃ a iko gɔ. Mba gɔ, do ngba soe ni owinɔ nù gɛ vɛ̃ wa hã zi ngamɔ hã ngba wa wena.

⁶ Nu kɔnggɔ kpo wia zi we bi mbe gele nu kɔnggɔ, nɛ le kpo bi do mbé gele le. Ma ɔ zi na mɛ ni, we kɛ Gale tombo zi ongamɔ kpi do kpi dɛ ngɔ wa.

⁷ Nɛ nde ngangga ni, we duzu nɛ, nɛ tɛ dɛ̀ kili gɔ. Nɛ ɔ́ do kpã sila, we kɛ Gale a si sɛ olo dɛa tonɔ 'da nɛ hã nɛ.”

⁸ 'Da fala kɛ nwa Asa zila we 'da Azaria be 'da Odɛdɛ, kɛ a 'bɔ a wi gba olo nu Gale ni, nɛ a kpa kpã sila, Nɛ a ba nu a, nɛ wa 'danga okpikimanɔ ngɔ nù Yuda do Bɛnzamɛ vɛ̃. Nɛ wa dɛ 'bɔ na mɛ ni tɛ kɔ lenɔ kɛ wa bi zi ma, nɛ wa kala ma tɛ ngɔ okalanɔ tɛ Efraimɛ ni. 'Do nɛ, nɛ a 'dafa gbagala 'da NWA kɛ wa zĩ zi ma dɛ dati Tɛmpɛloe ni dɛ olo nɛ.

⁹ Nɛ 'do nɛ, nɛ nwa Asa mba li Oyuda do Obɛnzamɛ, fala nɛ kpo do ogba gili obe Israɛlɛ, kɛ wa kɔ nu kpala Efraimɛ do Manase do Simeoni ni. Wa a owinɔ kɛ wa si zi do a, nɛ wa ɔ zi dɛ ngɔ nùi 'da a yolo do ngba soe wa ĩ zi na, NWA Gale 'da a fala nɛ kpo do a ni.

¹⁰ Nɛ wa mba li ngba wa tɛ Yeruzalɛmɛ, do zɛkɛ 'da talɛ, kɔ 'bu ngɔ nɛ mɔlɔ sabɛlɛ dɛa to nwa 'da Asa.

¹¹ Nɛ do ngba soe wa hɔa nɛ ni, nɛ wa gbɛa osa'denɔ kɛ wa kala zi ma tɛ li bole kɔ Owi sɛnɛ wa ni, nɛ wa hã do dɔnggamɔ hã NWA. Wa gbɛa zi ongɔmbɔ kama sambo, nɛ obata koto sambo.

¹² Nɛ wa gba tɔkɔ we dɛ olo nu NWA Gale 'da oyaa wa, do sila wa vɛ̃.

¹³ Do 'da fala ni, kɔ be zagbãlã tabi kpasa wi, wi wili tabi wuko kɔ̃̀ we dɛ olo nu NWA Gale 'da obe Israɛlɛ gɔ nde, nɛ wa gbɛ a.

¹⁴ Wa kpua mbuli ni hã NWA do'do, nɛ wa zɛ kaliã, nɛ wa zɛ kɔ wa, nɛ wa dama omɔtũlũ.

¹⁵ Nɛ owinɔ ngo nù Yuda wa zi do yangga we duzu mbuli kɛ wa kpua ma do sila wa vɛ̃ ni. Nɛ wele do wele dɛa olo nu nwa kɛ a bia tɛ̃ a hã wa, nɛ a hã dungu fio ngɔ nùi 'da wa vɛ̃ ni.

¹⁶ Do 'da fala ni, nɛ nwa Asa fua yaa a Maaka tɛ toe 'da a kɛ wa ia zi li nɛ zu a na “Gã nwa wuko” ni do'do. Asa fua a we kɛ a dɛa zi kpikima gale Asera. Asa ba nu a na, wa gbini sanga kpikima ni kisi kisi vɛ̃, nɛ wa dɔ ma tɛ nu lì Sedroni.

¹⁷ Gɛnɛ kɔ a kɔa zi gɛnɛ NWA Gale do sila a vɛ̃, nɛ nde a 'dàngà zi fala wa 'dafa we dɔnggɔ do okpikimanɔ ngɔ nù Israɛlɛ ni gɔ.

¹⁸ A kala zi 'bɔ odɔnggamɛnɔ olo baa a, do kɛnɔ 'da a, nɛ a a ma kɔ Tɛmpɛloe 'da NWA. Mɛnɔ ni zi a fɛ̃a mɔ bolo, do du mbali do ogele mɔ kpi do kpi.

¹⁹ Nɛ wa bì 'bɔ mbé bolo gɔ gbaa, we hɔ tɛ 'bu sabɛlɛ talɛ ngɔ nɛ mɔlɔ dɛa to nwa 'da Asa.