2 Sakonɔ 14 - WE NU GALE 1995

Ndo nyanga dɛa to nwa 'da Asa

¹ 'Da fala dɛa to nwa 'da Asa, nɛ nù Yuda kpa zi dungu fio 'do sabɛlɛ 'bu. Nwa Asa dɛa zi mɔ kɛ ma dia tɛ NWA Gale 'da a ni.

² A 'danga zi gbagalanɔ do fala sambala do ogale bɛlɛnɔ. Nɛ a gbini okpikimanɔ, do otanɔ wa ndɛngɛlɛ dɛ ngɔ ngbɛ ɛ ni.

³ Nɛ a ba nu a hã Oyuda na wa dɔnggɔ NWA Gale 'da oyaa wa, nɛ wa dɛ mbula 'da a.

⁴ Asa 'danga fala sambala do ogale bɛlɛnɔ, do ogbagala dɔ do yɔmbɔnɔ kɔ lenɔ ngɔ nù Yuda vɛ̃. Nɛ nùi ma kpa zi dungu fio.

⁵ Nɛ kɔ sabɛlɛnɔ ni, wele kpo bì zi 'bɔ nùi 'da a gɔ, we kɛ NWA hã zi dungu fio hã a. Nɛ do 'da fala ni, nɛ a zĩ ngbo nu gba gili lenɔ ngɔ nù Yuda ni.

⁶ Nɛ a tɔ̃ hã Oyuda na: “Lɛ dɛ́ ngbo, hã ma zĩ 'do lenɔ ngɔ nù Yuda vɛ̃ takpa. Nɛ lɛ dɛ́ nu ngboe ni, we do kɛ na, lɛ wia we kpe ma kpia, nɛ lɛ kã ni. Lɛ dɛ́ ní do 'da fala kɛ le ma 'bana ti mbula 'da lɛ ni. Mba gɔ, lɛ dɛa mbulanɔ 'da NWA Gale 'da lɛ, ma kɛ a hã dungu fio hã lɛ falanɔ vɛ̃ ni.” Wa nɛa we zele ni, nɛ wa ma ngɔ dɛ ngboe ni, nɛ ma zĩ 'do lenɔ vɛ̃ takpa.

⁷ Asa zi do osoda Yuda koto kama talɛ, kɛ wa kala ogã ngele do sɛlɛ dɛ kɔ̃ wa, do osoda Bɛnzamɛ koto kama bɔa, kɛ wa kala obi ngele dɛ kɔ̃ wa, nɛ wa ĩ ti da nzabele ni. Osodanɔ ni vɛ̃ zi a onga soda.

⁸ Nɛ mbe ngba soe kpo, nɛ Zera, wi Etiopi, nɛa we bi wa, nɛ sodanɔ 'da a wa zi miliɔ̃ kpo, nɛ ongilingili bolonɔ 'da a zi kama talɛ. Nɛ a nɛa gbaa tɛ kɔ le Maresa.

⁹ Asa zila we nɛ, nɛ a gɔnɔ dati a do sodanɔ 'da a, nɛ a lɔnggɔ wa tɛ kɔ gbangɔlɔ̃ Sɛfata, dɔ̃ɔ do le Mareka we bi bole.

¹⁰ Nɛ Asa ala nu a hã NWA Gale na, a gbaka ɛ. A na: “Aa nwa, mɔ wia we gbaka osoda kɛ wa ĩ̀ ti bi bolo gɔ ni, ɔ nɛ kɛ mɔ wia we gbaka onga soda ni. Kɔ NWA Gale 'da lɛ, mɔ gbáká lɛ, we kɛ lɛ gbini zã lɛ do mɔ. Mba gɔ, lɛ tɛa dɛ we bi do gili sodanɔ gɛ do zu li mɔ. NWA, mɔ a Gale 'da lɛ, mɔ tɛ hã̀ wala na, wele kpo nɛ ngɔ lɛ owinɔ 'da mɔ gɔ.”

¹¹ NWA zila ala nu 'da Asa, nɛ a ndaka osoda Etiopi, nɛ wa yu bole dati a do osoda Yuda.

¹² Nɛ Asa do osodanɔ 'da a wa ndaka 'do wa gbaa dɛ kɔ le Gerarɛ, nɛ wa gbɛ osoda Etiopi wena. Osoda Etiopi wa fia we kɛ wa bi zi do NWA do owinɔ 'da a. Olo bole ni, nɛ osoda Yuda wa kala mɛnɔ kɛ wa kpa ma li bole ni dɛlɛ wena.

¹³ Nɛ wa bi lenɔ kɛ zã Gerarɛ ni, nɛ wa kala ma vɛ̃, we kɛ kili NWA ba zi owinɔ kɔ lenɔ ni wena. Osoda Yuda wa 'danga lenɔ, nɛ wa kala ogba gili mɛnɔ kɛ wa kpa ma kɔ nɛ ni.

¹⁴ Wa bi zi 'bɔ Owi fɔmɔ nadalamɛnɔ, nɛ wa kala obatanɔ do osamonɔ 'da wa dɛlɛ wena. Nɛ 'do nɛ, nɛ wa kpula tɛ wa dɛ Yeruzalɛmɛ.