Online Bible

Záan 9 - Neyo

Zozíi yalɩma yɩ́cucúkanyɔ
( Málɩ́kɩ 8.22‑25 ; 10.46‑52 )

¹ Zozíi kʋ plɩ́ɩda lé ɔ yɩ́ bhli yɩ́cucúkanyɔ jɩ̀. Ɔ́mɔ́ nyɔɔ́, ɔ tʋ́ yà ɔ nɛ́ sɔ́ valɔɔ́ a, ɔ nɩ́ yɛ́ kʋ́.

² Lé Zozíi a kʋjɩ̀nyʋ̀àà yrɔ́ɔ́ mà: «Kanyɔɔ̀, ɛ̀kʋ̀ʋ lé nyɔɔ́ lɩ̀à á valɔɔ́ a, ɔ nɩ́ yɛ́ kʋ́ à? Nyumoé ɔ́ nɩ a, ɛ́mɛ́ nií? Mà ɔ tʋ́ yà ɔ nɛ́ sɔ́ a nyumoé nii?»

³ Zozíi anɩ́: «Ʋ́nn, ɛ̀ nɩ́ cémʋ́ ɔ yà ɔ tinyʋa sɔ́ ká nyumoé nɩ a, zà ŋwɔ́ɔ, mà kɔ́ a nyʋa ká Lagɔ a zrɩzrɩnɔnʋɔ́ yɛ́ a ɩ́zà nyɔɔ́ lɩ̀à kʋ cúcú a mnɩ́.

⁴ Dɛ́ zrɩ gà àyɩ a, à kà lé à zrɩ nyɔɔ́ ɔ̀ cíe mɔ́ɔ a, ɔ nɔnʋ. Mà cúcú nɩ ya pla a, nyɔ nɩ́ ka yɩ́ lɛ ʋ́ zrɩzrɩɛ míi.

⁵ Dɛ́ ɩ́ kʋ àyɩ zɩkpa zɔ̀ a, mɔ́ ŋwɔ́ɔ zɩkpa zɔ̀ a nápɛ.»

⁶ Tányɩɛ́ mʋ́ ɔ́ cí sɩ́tɛ̀ a, ɔ́ pá dàdɩ dʋdʋ̀ kʋ́, lé ɔ́ cráka lé ɔ́ nɩ plaplɩ, lé ɔ́ bhá plaplɩɛ́ lé ɔ́ tɩ́ɩ́ yɩ́cucúkanyɔɔ́ a yɩ́ɛ́ jɩ̀

⁷ lé ɔ́ srʋ ɔ́ mà: «Mʋ nyíé á wlele Silowée a mnɩ́ kà klʋ́ wɔlɔɔ̀!» Silowéeŋnɩɛ́ a gba ŋwɔ́ɔ ciecú. Lé nyɔɔ́ mʋ mɔ̀ɔ lé ɔ́ wɔlɔɔ̀ klʋ́. Ɔ́ yrɩ́bha lé ɔ́ yi a, ɔ́ yɛ́ yɩ́ kʋ́.

⁸ Nyʋaá ɔ yàsɔ́ sí dáamúó lé nyʋaá fɩ́ɛ́ yìi ɔ́ zrazra wɔlɩ́ɛ́ a, yráyralɛ, áa nie: «Nyɔɔ́ lɩ̀à, ɔ́mɔ́ ɔ̀ nɩ́ bɔ́ɔ lɛ́ ɔ̀ crɩ́kpaá a mnɩ́ ɔ̀ nɩ́ zra lɛ́ɛ?»

⁹ Lé bhlɔ̀bhlɔ̀nyʋa àna nie: «Ɔ́mɔ́ kʋ̀ʋ!» Lé àna nie: «Ʋ́nn, ɛ̀ nɩ́ ɔ́mɔ́ ŋwɔ́ɔ, ɔ wlʋ́ʋnyɔ kʋ̀ʋ!» Bhè ɔ́mɔ́ mɔ̀glʋ̀ ɔ́ nie: «Mɔ́ɔ kʋ̀ʋ ya!»

¹⁰ Bhʋ́ á yrɔ́ɔ́ mà: «Bhè cégbá ɩ́ nɩ lé nà yɩ́ɛ́ wlelo a?»

¹¹ Ɔ́ anɩ́: «Nyɔɔ́ á wlele Zozíi a, ɔ́mɔ́ bhá plaplɩ lé ɔ̀ susuo ná yɩ́ jɩ̀ lé ɔ̀ srʋ mɔ́ɔ mà ɩ mʋ Silowée a nyíé mnɩ́ ká klʋ́ wɔlɔɔ̀. Ɩ́ mʋ mɔ̀ɔ lé ɩ́ wɔlɔɔ̀ klʋ́ a, bhʋ́ ná yɩ́ wlelo.»

¹² Bhʋ́ áa yrɔ́ɔ́ mà: «Dɛ́gbá ɔ́ kʋ a?» Nyɔɔ́ anɩ́: «Nɩ́ ʋ́ yì.»

Falizɩ́ɛnyʋa yrá nyɔɔ́ ɔ̀ kɔɔ yɩ́ wlelo a

¹³ Lé á fa nyɔɔ́ Falizɩ́ɛnyʋa drɩ̀.

¹⁴ Mà, yruó kʋ́ Zozíi nɩ plaplɩɛ́ lé ɔ́ wle nyɔɔ́ yɩ́ a, ʋ́ ŋwɔ́ɔ Zúfʋnyʋa a nyɔbhleyru.

¹⁵ Ɩ́mɩ́ kà ŋnɩ́ a zà Falizɩ́ɛnyʋaá a sɛ́fʋ yrá nyɔɔ́ mà: «Cégbá mʋ́ ɩ́ nɩ lé ɩ̀ yɛ́ lɛ́ kʋ́ a?» Lé ɔ srʋ á, ɔ́ anɩ́: «Ɔ́ bhá plaplɩ lé ɔ́ susuo mɔ́ɔ yɩ́, lé ɩ́ mʋ lé ɩ́ wɔlɔɔ̀ klʋ́ a, ɩ́ yɛ́ yɩ́ kʋ́.»

¹⁶ Falizɩ́ɛnyʋa àna dʋdʋ̀ wɔlɩ́ɛ́ a mnɩ́ a, áa anɩ́: «Nyɔɔ́ ɔ̀ nɩ wɔlɩ́ɛ́ a, ɔ nɩ́ Zúfʋnyʋa a nyɔbhleyruó kpá ŋwʋ́ lé ɔ nɩ́ sáà Lagɔ̀nyɔ ŋwɔ́ɔ!» Lé àna nie mà: «Cégbá mʋ́ nyɔɔ́ ɔ̀ nie nyumosa a, ɔ́ yi míi lé ɔ́ yi sɩ́tɛ̀ a lɛ̀wɔ̀lɩ nɩ a?» Ɩ́ kà ŋnɩ́ lé á pʋpʋ dúlo mʋ́.

¹⁷ Falizɩ́ɛnyʋaá yi lé áa yrá sɔ́kʋ́ yɩ́bhlanyɔɔ̀ yalɩmaa mà: «Bhè mɔ̀ɔ, cégbá mʋ́ ɩ̀ cíe nyɔɔ́ ɔ̀ wle mɔ̀ɔ yɩ́ a, zà a?» Nyɔɔ́ anɩ́: «Lagɔ a nékʋ́cinyɔ kʋ̀ʋ.»

¹⁸ Mà, yɩ́cucúkanyɔɔ́ a yalɩmɛɛ́ Zúfʋnyʋa a cífɩnyʋaá nɩ́ bhɛ́ɛ́ cɩ́cása kʋ́. Ɩ́ ka ŋnɩ́ lé á wle ɔ tʋ́ yà ɔ nɛ́ sɔ́,

¹⁹ lé á yráa mà: «A yʋ́ɔ́ ɔ̀ kɔ̀ɔ̀ wɔlɩ́ a cíé wá lé a nie wá mà tányɩɛ́ mʋ́ a valɔɔ́ a, ɔ nɩ́ yɛ́ kʋ́ a, ɔ́mɔ́ lɛ̀ɛ̀? Bhè cégbá ɩ́ kʋ lé ɔ́ yɛ́ yɩ́ cɩɩ kʋ́ a?»

²⁰ Yʋ́ɔ́ ɔ tinyʋaá anɩ́: «À yʋ́ kʋ̀ʋ lé à nɩ̀ kɔ̀ɔ̀ wá va a, ɔ nɩ́ à zà kʋ́ yɛ́, à yì saá.

²¹ Mà cémʋ́ ɩ́ plɩ́plɩ mʋ́ lé ɔ́ yɛ́ yɩ́ lɛ́ kamnɩ́lɛ́ kʋ́ a, à nɩ́ɩ yì. Lé nyɔɔ́ kà lɛ́ sáà nɩ lé ɔ ká lɛ́ kʋ́ yɛ́ a, à nɩ́ ɔ́ yì. A yrɔ́ɔ́ mà cɩ́cányɔ ɔ́ ŋwɔ́ɔ ɔ́mɔ́ mɔ̀glʋ̀ ɔ ká amɔ wɔlɩ́ mʋ́ sɩsa à.»

²² Mà cɩ́cása a mnɩ́, yʋ́ɔ́ ɔ tinyʋaá Zúfʋnyʋa a cífɩnyʋa ámá á gúle kʋ́ a, ɩ́zà á cí saá. Wɔlíɛ́ Zúfʋnyʋa a cífɩnyʋa ŋwʋ́ʋ kʋ́ a, ɩ́mɩ́ ŋwɔ́ɔ mà, ɔ̀ nɩ̀ cí mà Zozíi ŋwɔ́ɔ Kláyɩ́sɩɛ́ a, á yio zúfʋcɛcɩwlʋɔ́ a mnɩ́ jɩ́ɩ.

²³ Ɩ́mɩ́ kà ŋnɩ́ a zà ɔ tinyʋa cí lɛ́ mà, ɔ́ ŋwɔ́ɔ cɩ́cányɔ a, a yrá ɔ́mɔ́ mɔ̀glʋ̀.

²⁴ Lé Falizɩ́ɛnyʋaá wle sɔ́kʋ́ nyɔɔ́, lé áa srʋ ɔ́ mà: «Cí nà cɩ́cása Lagɔ a drɩ̀ɩ! Àmɔ̀, à yì saá cémʋ́ bhàlʋ̀nyɔ yalɩma mɔ̀ɔ a.»

²⁵ Bhʋ́ nyɔɔ́ srʋ á mà: «Ɔ́ ŋwɔ́ɔ bhàlʋ̀nyɔ ò! Ɔ nɩ́ bhàlʋ̀nyɔ ŋwɔ́ɔ ò! Nɩ́ɩ yì, wɔlɩdrè kà a múó coco ɩ́ yì a, ámá ŋwɔ́ɔ mà, yɩ́cucú bhlá wá mɔ́ɔ, lé ɩ́ yɛ́ yɩ́ kakamnɩ́lɛ́ lɩ̀à kʋ́.»

²⁶ Á anɩ́: «Bhè cégbá mʋ́ ɔ́ nɩ mɔ̀ɔ a? Cégbá mʋ́ ɔ́ nɩ nɩ mʋ́ lé nà yɩ́ɛ́ wléelo a?»

²⁷ Nyɔɔ́ anɩ́: «Yáa wá amɔ srʋ, lé a nɩ́ wá mɔ́ɔ nyúkwlí pʋ. Ɛ̀kʋ̀ʋ̀ lé a yrá sɔ́kʋ́ mɔ́ɔ a? A ká la sáà ná kʋjɩ̀nyʋ̀àà plɩ́ɩ?»

²⁸ Mà ɔ́ cí saá, áa bháa ʋ́ ɔ trʋlɛ kʋ́ lé á srʋ ɔ́ mà: «Mɔ̀ɔ ŋwɔ́ɔ ɔ kʋjɩ̀nyɔ, mà àmɔ̀, Moyízɩ a jɩ́ɛ́ kʋ́!

²⁹ Moyízɩ Lagɔ cíi gɔ̀, ɩ́mɩ́ àa yì, mà ɔ̀lɩa lɩ̀à, àa nɩ́ dɛ́ ɔ́ wlʋ́ a yì.»

³⁰ Nyɔɔ́ anɩ́: «Ɩ́mɩ́ mna lɛ́ mɔ́ɔ neé! A nɩ́ dɛ́ nyɔɔ́ wlʋ́ɛ́ a yì, mà sɩ́tɛ̀ ɩ́ kʋ lé ɔ́ wlée mɔ́ɔ yɩ́.

³¹ À yì saá cémʋ́ Lagɔ nɩ́ ŋwnʋ́ wɔlɩ́ɛ́ bhàlʋ̀nyʋa yrálɔɔ́ mʋ́ a, kʋ́ à, mà nyɔɔ́ ŋwʋ́ɛ́ Lagɔ kpá, lé ɔ̀ nie wɔlɩ́ɛ́ ʋ́ yrá a, ɔ́mɔ́ ɔ́ pʋɛ nyúkwlí.

³² À nɩ́ à zà sáà nú mà nyɔɔ́ á va lé ɔ̀ nɩ́ yɛ́ kʋ́ a, ɔ liyʋ yɔɔ́ yɩ́ wléè.

³³ Nyɔ lɩ̀à nɩ nɩ́ la Lagɔ̀nyɔ ŋwɔ́ɔ a, ɔ nɩ́ ka la míi lé ɔ ká la lɛ́ nɩ.»

³⁴ Ɔ́ cí saá a, bhʋ́ nyʋaá srʋ ɔ́ mà: «Mɔ̀ɔ á va bhàlʋ a mnɩ́ lé nà lɔ̀fɩ́ɛ́ ŋwɔ́ɔ bhàlʋ a pʋpʋ a, mɔ̀ɔ yrá ɔ̀ kà àmɔ̀ cɩ́a a?» Ɩ́ ka ŋnɩ́ lé, á jɩ́lɔɔ́ Lagɔ̀wlʋ̀ a mnɩ́.

Zozíi yà nyɔɔ́ ɔ́ yalɩma lɛ́ a, sɔ́ gbɩ́dà

³⁵ Tányɩɛ́ mʋ́ Zozíi nú mà Falizɩ́ɛnyʋa ya nyɔɔ́ Lagɔ̀wlʋ̀ a mnɩ́ jɩ́ a, ɔ́ mʋ lé ɔ yɔ̀sɔ́ gbɩ́dà, lé ɔ́ yrɔ́ɔ́ mà: «Mɔ̀, ɩ̀ tɔ̀ Nyɔɔ́ a Yuwliyʋɔ́ duoo?»

³⁶ Nyɔɔ́ anɩ́: «Kanyɔɔ̀, nyɔ gbá kʋ̀ lɛ́ fɩ́ɛ́ ʋ́ bhè ná kɔ́ɔ́ lɛ́ duo tɔ̀ a?»

³⁷ Zozíi anɩ́: «Ɔ́mɔ́ ɩ̀ dʋdʋɛ lɛ́ dɛ́ yɩ́, nyɔɔ́ yɔ̀sɔ́ a cíé lɛ́ a, ɔ́mɔ́ kʋ̀ʋ.»

³⁸ Nyɔɔ́ anɩ́: «Ɩ́ tɔ̀lɔ̀ɔ̀ duo Kanyɔɔ̀.» Lé ɔ́ sra Zozíi a drɩ̀ koti sá.

³⁹ Lé Zozíi srʋ ɔ́, ɔ́ anɩ́: «Náa yi lé ká zɩkpaá lɩ̀à zɔ̀ a nyʋa a tɩ́tɩ́ plɔɔ̀, nyʋaá à nɩ́ yɛ́ kʋ́ a, á ká kʋ́ yɛ́, lé ànàà yɛ́ kʋ́ a, a ká cúcú tuò.»

⁴⁰ Mà Falizɩ́ɛnyʋaá kʋ̀ la mɔ́ gɔ̀ lé a pʋ wɔlɩ́ɛ́ ɔ́ cí a nyúkwlí a, á yrɔ́ɔ́ mà: «Naa, à sɛ́fʋɔ́, à nɩ́ yɛ́bhlɛ́ɛ sáà kʋ́ʋ?»

⁴¹ Zozíi anɩ́: «A nɩ nɩ́ la kʋ́ yɛ́ a, a nɩ́ ka la bhàlʋ ka à. Mà cémʋ́ a anɩ́ a yɛ́ kʋ́ a, ɩ́zà a nɩ́ ka kɔ́ɔ̀kɔ́ a bhàlʋ̀ɔ̀ a gbʋ́ wlʋ́.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy