Online Bible

Záan 7 - Neyo

Zozíi nɩ́ yrá la glɩ̀sɩ́sɩ a kʋ́ mʋmʋ́ɛ́

¹ Ɩ̀lɩa a plɩ́ a, Zozíi bhlie Galiléebhlɩɛ́. Cémʋ́ Zúfʋnyʋa a cífɩnyʋaá kʋ ɔ bɩ́ a kɔ́ɔ́ bhlá a, ɔ nɩ́ bhli yɩ́ la Zudéebhlɩɛ́.

² Bhè Zúfʋnyʋa a gbògbí a pápáglɩ̀sɩ́sɩ̀ɛ̀ a tányɩ ya ʋ́ mɛ́.

³ Zozíi ɔ níayúó srʋ ɔ́ mà: «Wlʋ́ bhlɩ́ɛ́ lɩ̀à jɩ̀ lé mʋ Zudée bhʋ́ nà kʋjɩ̀nyʋ̀àà yi wɔlɩ́ɛ́ ɩ̀ nie a, yɛ́.

⁴ Nyɔɔ́ ɔ̀ yrá lé a kɔ́ɔ́ yɩbhlɩ a, ɔ nɩ́ nɩ wɔlɩ́ zúzùòda, bhè cémʋ́ ɩ̀ nie sɩ́tɛ̀ a wɔlɩ́ a, tʋa ɩ nyoku kɔ́.»

⁵ Cɩ́ɩ kʋ a, ɔ níayúó mɔ̀glʋ̀ nɩ́ ɔ cɩ́cása kaa.

⁶ Bhʋ́ Zozíi srʋ á mà: «Ná tányɩ nɩ́ àyɩ ŋnɩ, mà ɛ̀ nɩ̀ ŋwɔ́ɔ amɔ a, tányɩɛ́ fɩ́ɛ́ náa a zà.

⁷ Nyʋa nɩ́ ka amɔ mʋ́ gblɩ̀, mà mɔ́ɔ, nyʋa gblɩ̀ mɔ́ɔ mʋ́, cémʋ́ ɩ́ srʋ á mà a nɩnɩgbɩ nyù a zà.

⁸ Naa amɔ, a mʋ glɩ̀sɩ́sɩ kʋ́! Mà mɔ́ɔ nɩ́ a ká glɩ̀sɩ́sɩ̀ɛ̀ lɩ̀à kʋ́ mʋ. Ɛ̀kʋ̀ à? Ná tányɩɛ́ nɩ́ àyɩ ŋnɩ a zà.»

⁹ Ɔ́ srʋ á saá a, ɔ́ɔ tuo Galilée.

Zozíi mʋ yɩ́ glɩ̀sɩ́sɩ̀ɛ̀ kʋ́

¹⁰ Ɔ nɩ́ayúó mʋ yɩ́ glɩ̀sɩ́sɩ̀ɛ̀ kʋ́ a, ɔ sɛ́fʋɔ́ mà ɔ́ mʋ sáà mɔ̀ɔ, mà ɔ nɩ́ glɩ̀sɩ́sɩ a jrèè yɩ́ flʋ ɔ́ɔ zúzùòlàà yuosa yɩ́.

¹¹ Mà glɩ̀sɩ́sɩ̀ɛ̀ a tányɩɛ́, Zúfʋnyʋa a cífɩnyʋaá mʋ́mɔɔ́, á nie: «Bhè dɛ́gbá ɔ́ kʋ a?»

¹² Bhè jrèè a mnɩ́ nyʋa bhlalɛ ɔ́ wɔlɩ́ kʋ́, á nie: «Ɔ́ ŋwɔ́ɔ nyɔ lé ɔ̀ kɔ̀ɔ wɔlɩ́ ɩ̀ náa.» Lé àna nie: «Ɩ nɩ́ cɩ́cása ŋwɔ́ɔ, ɔ́ nɩnɩwɔlɩ nie lé nyʋa wlʋ́ɛ́ lagɔ̀nyùzɔ kʋ́.»

¹³ Mà cémʋ́ nyʋaá gúle Zúfʋnyʋa a cífɩnyʋa a kʋ́ a, wláa wɔlɩ́ɛ́ né.

¹⁴ Á kʋ Glɩ̀sɩ́sɩ̀ɛ̀ a yɛ́ɛ da, ɛ wúkɩɛ́ a mʋ́ mímilo dà a, Zozíi mʋ Lagɔ̀wlʋ̀ kádʋ a mnɩ́ nyʋa cɩ́a ka.

¹⁵ Tányɩɛ́ mʋ́ Zúfʋnyʋaá nú ɔ cɩ́acɩ́awɔlɩɛ́ a, neé mnaá, á anɩ́: «Cégbá mʋ́ ɩ́ kʋ lé nyɔɔ́ ɔ̀ nɩ́ Lagɔ̀jràmá a sùklúu pla a, ɔ́ yì sɩ́tɛ̀ Lagɔ̀wɔ̀lɩ̀ɛ̀ kɔ́kɔ́mnɩ́ à?»

¹⁶ Bhʋ́ Zozíi srʋ á mà: «Wɔlíɛ́ ɩ́ cɩ́alɛ lɛ́ a, ná duo kʋ́ mʋ́ nɩ́ɩ́ bhá, mà nyɔɔ́ ɔ̀ cíe mɔ́ɔ a, ɔ́mɔ́ ɔ̀ nyɛ́ mɔ́ɔ mɩ́.

¹⁷ Nyɔɔ́ yrá Lagɔ a duo kʋ́ a wɔlɩ́ a ninie a, Lagɔ nɩ̀ cíe mɔ́ a, ɔ́ yi saá yɩbhlɩ, ɩ́zà mɔ́ɔ mɔ̀glʋ̀, ná duo kʋ́ mʋ́ nɩ bhɩ́ɩ́ a, ɔ́ yi sáà saa yɩbhlɩ.

¹⁸ Nyɔɔ́ nɩ̀ bhá ɔ duo kʋ́ wɔlɩ́ lé ɔ̀ nɩ̀ cíí a, ɔ nyoku ɔ́ falɛ ŋwnú, ɩ́zà nyɔɔ́ ɔ̀ yrá lé nyɔɔ́ ɔ̀ cíeó a, ɔ ŋwnú ká mʋ a, cɩ́cása a cínyɔ ɔ ŋwɔ́ɔ, ɔ nɩ́ kpɔkplá ka.

¹⁹ Moyízɩ nyɛ́ amɔ jràmá a, kpɔkplá a? Sɩ́tɛ̀ ɩ́ kʋ bhè a nɩ́ ŋwʋ́ á kpá. Bhè ɛ̀kʋ̀ʋ̀ lé a yrá a ká mɔ́ɔ bhlá a?»

²⁰ Lé nyʋaá kʋ̀ jrèè kʋ́ a, yrɔ́ɔ́ mà: «Mɔ̀ɔ nyumozùzu kʋ jɩ̀ a! Nyɔ gbá yrá nà bhlábhlʋ́ a?»

²¹ Zozíi srʋ á mà: «Sɩ́tɛ̀ ɩ́ kʋ bhè wɔlɩpɩʋ a múó ɩ́ nɩ lɛ́ a, ʋ́ ya amɔ neé mna!

²² Moyízɩ srʋ amɔ mà, ɔ nɩ̀ va yuwliyʋ a, ɔ díó kʋ́, ɩ́ ka ŋnɩ́ lé amɔ Zúfʋnyʋa a nyɔbhleyruó kʋ́ a díle nyʋa kʋ́. Bhè ɔ́mɔ́ nɩ́ɩ wláa, sɩsɔɔ́ á tányɩɛ́, à tɩtɩa nie wá mɩ́.

²³ A nɩ dí yuwliyʋ kʋ́ Zúfʋnyʋa a nyɔbhleyru kʋ́ a, a nɩ́ bhli Moyízɩ a jràmáá, mà mɔ́ɔ nɩ̀ yalɩma yrúkanyɔ nyɔbhleyru kʋ́ ɩ́mɩ́ ŋwɔ́ɔ a dɩɩ?

²⁴ Aa nɩ cí mà a ká nyɔ plɔ a, a plɔɔ námasa, mà a ná dʋdʋ̀ ɔ kʋkʋlɩ lé a kɔ́ɔ́ plɔɔ!»

Zozíi ŋwɔ́ɔ Kláyɩ́sɩ?

²⁵ Zelízalɛ́mʋ a nyʋa àna nie mà: «Nyɔɔ́ lɩ̀à mɔ́ a nɩ́ mʋ́mɔ lé a ká lɛ́ bhlá a?

²⁶ Ɔ́mɔ́ ɔ̀ nɩ́ dɛ́ kʋ ɔ̀ nɩ́ cí lɛ́ nyʋaá fɩ́ɛ́ a klʋ́ jɩ̀, lé a nɩ́ srɔɔ́ né! Ɛ ŋnɩ́ a, cífɩnyʋaá áa yɩbhlɩ cɩɩ saá mà ɔ́mɔ́ ɔ̀ ŋwɔ́ɔ Kláyɩ́sɩɩ?

²⁷ Bhè Kláyɩ́sɩ nɩ̀ kʋ̀ la ʋ́ a, nyɔ nɩ́ ka la ɔ́ wlʋɔ́ dá yɩbhlɩ, mà ɔ́mɔ́, à yì ɔ wlʋɔ́ dá.»

²⁸ Wɔlíɛ́ á cíé a, ɩ́ ka ŋnɩ́ lé Zozíi kʋ Lagɔ̀wlʋ̀ɔ̀ a mnɩ́ nyʋa a cɩ́àda lé ɔ́ bhá niwɔlɩ kʋ́: «Aan! A yì mɔ́ɔ, lé à yì sáà dɛ́ ɩ́ wlʋ́ɛ́ a, mà náa srʋɛ sáà yɩ́ amɔ mà mɔ́ɔ mɔ̀glʋ̀ nɩ́ ɩ nyoku cíè. Nyɔɔ́ ɔ̀ cíe mɔ́ɔ a, ɔ́ ŋwɔ́ɔ bɛ̀srɩnyɔ mà a nɩ́ ɔ́ yì.

²⁹ Mɔ́ɔ, ɔ́mɔ́ gɔ̀ ɩ́ wlʋ́ɛ́, ɩ́ yìo lé ɔ́mɔ́ cíe sáà mɔ́ɔ.»

³⁰ Zozíi cí sɩ́tɛ̀ a, nyʋaá yrá yɩ́ la ɔ́ kʋ bhlibhlie, mà cémʋ́ ɔ tányɩɛ́ nɩ́ àyɩ ŋnɩ a, nyɔ nɩ́ míi.

³¹ Mà sɩ́tɛ̀ mʋ́ ɩ́ kʋ bhè bhʋ́alɛ jrèè mnɩ́, nyʋa kɔ́kɔ́mnɩ́ ka ɔ́ fádùò lé á pʋpʋ a nyièdɩ á nie mà: «Bhè Kláyɩ́sɩɛ mɔ́ nɩ̀ yi la a, ɔ́ nɩnɩgbɩ yii la ɔ̀lɩa a nɩɛ́ kʋ́ zii?»

³² Tányɩɛ́ mʋ́ Falizɩ́ɛnyʋaá nú wɔlɩ́ɛ́ jrèè ŋwúŋwuole Zozíi a zà a, a yà Lagɔ̀bʋ̀bɔ̀nyʋ̀àkádàà sɔ́ cíe sʋ́ja Zozíi bɩ́ a kɔ́ɔ́ kʋ́ bhli.

Zozíi anɩ́ ɔ́ na ká yɩ́ mʋ

³³ Zozíi anɩ́: «Ɩ́ yi àyɩ amɔ gɔ̀ tányɩ a zùò zi, fɩ́ɛ́ lé nyɔɔ́ ɔ̀ cíe mɔ́ɔ a, kɔ́ɔ́ yɩ́ gɔ̀ mʋ.

³⁴ A yi yɩ́ mɔ́ɔ mʋ́mɔ lé a nɩ́ ka yɩ́ mɔ́ɔ yɛ́, máà dɛ́ɛ́ náa ká mʋ a, a nɩ́ ka mɔ̀ɔ a mʋmʋ́ɛ́ míi.»

³⁵ Ɔ́ cí sɩ́tɛ̀ a, Zúfʋnyʋaá yráyralɛ, á nie: «Bhè dɛ́gbá ɔ́ mnɛ bhè à nɩ kɔɔ́ lɛ́ yɛ́ a? Glɛ́kɩbhlɩ kʋ́ Zúfʋnyʋa ànàà nyièdɩɩ? Mɔ̀ɔmɔ ɔ́ mnɛ Glɛ́kɩnyʋa cɩ́a ka a?

³⁶ Ànɩ̀ gbá ŋwɔ́ɔ mà: A yi mɔ́ɔ mʋ́mɔɔ̀ lé à nɩ ka mɔ́ɔ yɛ́ a, lé mɔ̀ɔ dɛ́ɛ́ ɩ́ mnɛ lɛ́ a, à nɩ́ ka sáà mɔ̀ɔ a mʋmʋ́ɛ́ míi a?»

Nyɔɔ́ mnátʋ nɩ bhlá a, ɔ yi Zozíi gɔ̀

³⁷ Glɩ̀sɩ́sɩ̀ɛ̀ a bɩ́kʋ́bhɩayruó ʋ̀ ŋwɔ́ɔ yrukádʋ̀ɔ̀ a, ʋ́mʋ́ kʋ́ Zozíi soglù lé ɔ́ bháʋ́ niwɔlɩ lé ɔ́ cí, ɔ́ anɩ́: «Nyɔɔ́ mnátʋ nɩ bhlá a, ɔ yi mɔ́ɔ gɔ̀ ɔ ká mná!

³⁸ Nyɔɔ́ nɩ̀ tɔ̀ mɔ́ɔ duo a, cémʋ́ á jɩ́jrà Lagɔ̀bɔ̀gʋ̀ɔ̀ a mnɩ́ mà, nyíé ɛ̀ kwlíe a, ɔ mnɩ́ mʋ́ ɛ́ na ká wlʋ́.»

³⁹ Wɔlíɛ́ Zozíi cí lɛ́ sɩ́tɛ̀ a, ɩ́mɩ́ ɩ̀ ŋwɔ́ɔ mà, Blɔ̀blɔ̀zùzùò yi kɛ́zɔ̀ nyʋa à kà ɔ fádùò a, jɩ̀ kwlíi. Mà cémʋ́ Zozíi nɩ́ àyɩ ɔ blɔ̀blɔ́ɔ́ a mnɩ́ pla a, ɩ́ ka ŋnɩ́ lé Blɔ̀blɔ̀zùzùò nɩ́ àyɩ yi.

Nyʋa dúlo mʋ́ lé á bhlalɛ Zozíi a zà

⁴⁰ Tányɩɛ́ mʋ́ nyʋaá kʋ̀ jrèè a, á nú wɔlɩ́ɛ́ ɔ́ cí a, á nyièdɩ a nyʋa àna cíé mà: «Nyɔɔ́ lɩ̀à ɔ́mɔ́ ɔ̀ ŋwɔ́ɔ cɩ́cása Lagɔ a nékʋ́cinyɔ!»

⁴¹ Bhè àna nie: «Kláyɩ́sɩ kʋ̀ʋ.» Lé nyʋa àna cíé sɔ́kʋ́ mà: «Kláyɩ́sɩɛ́, Galiléeyʋ ɔ́ na ká la plɩ́ɩ?

⁴² Lagɔ̀bɔ̀gʋ a mnɩ́, wɔlɩ́ɛ́ ɩ̀ jɩ́jrɔ̀ mɔ̀ɔ a, ɩ́mɩ́ ɩ̀ ŋwɔ́ɔ mà, à tɩtɔ Davídɩ a lɔ́lɔ́kpaá a mnɩ́ Kláyɩ́sɩ na ká wlʋ́. Bɛtlɛɛ́mʋ a nyɔ nà kà wá ʋ́ kʋʋ, dúó mnɩ́ Davídɩ sí wá a, ʋ mnɩ́ mʋ́ Kláyɩ́sɩ na ká wlʋ́. Ɛ̀ nɩ́ saá ŋwɔ́ɔ?»

⁴³ Mà wɔlɩ́ɛ́ lɩ̀à ka ŋnɩ́ lé jrèè a nyʋaá dúlo mʋ́ Zozíi a zà.

⁴⁴ Nyʋa àna yrá yɩ́ kakamnɩ́lɛ́ ɔ́ kʋ bhlibhlie, bhè a nɩ́ ka míi.

Zúfʋnyʋa a cífɩnyʋa tɛ́ nyúkwlí

⁴⁵ Ɩ́ ka ŋnɩ lé sʋ́jàà á cíe a, tányɩɛ́ mʋ́ á yrɩ́bha lé á yi Lagɔ̀bʋ̀bɔ̀nyʋ̀àkádàà yà Falizɩ́ɛnyʋaá sɔ́ gɔ̀ a, á yráa mà: «Ɛ̀kʋ̀ʋ̀ lé a nɩ́ ɔ́ la a?»

⁴⁶ Bhʋ́ sʋ́jàà srʋ á mà: «À nɩ́ à zà nyɔ yì cí sa ɔ́mɔ́ bhísakʋ́ a, yɛ́!»

⁴⁷ Falizɩ́ɛnyʋaá srʋ á sɔ́kʋ́ mà: «Ɔ́ ya sáà a sɛ́fʋ nyɩ́glɩ̀?

⁴⁸ A ya wá tagàsa cífɩnyʋa yà Falizɩ́ɛnyʋa sɔ́ yɛ́ lé á ya wá ɔ cícíwɔlɩ duo tɔ̀ɔ̀?

⁴⁹ Nyʋaá lɩ̀à a nɩ́ Lagɔ̀jràmá yì, kplínyʋa kʋ̀ʋ!»

⁵⁰ Mà á cíé lɛ́ sɩ́tɛ̀ a, Falizɩ́ɛyʋɔ́ ɔ̀ ŋwɔ́ɔ lɛ́ Nikodémʋ lé ɔ̀ yi wá lɛ́ tányɩ a múó Zozíi gɔ̀ a, ɔ́ kʋ a nyièdɩ. Bhʋ́ ɔ́ yráa mà:

⁵¹ «À bhílieyɩ, náa yrá ca a, à jràmá a mnɩ́, gbʋ́ ká nyɔ sɩa a, a nɩ́ nú fɩ́ɛ́ ɔ neé? Lé wɔlɩdrèè ɔ́ nɩ a, a nɩ́ yɩbhlɩlaa fɩ́ɛ́ lé gbʋ́ nɩ́ sɩɔɔ́?»

⁵² Lé á yrɔ́ɔ́ mà: «Nà sɛ́fʋɔ́ Galiléeyʋ ɩ̀ ŋwɔ́ɔ yɩ́ɩ? Dʋdʋ̀ námasa jràmábɔ̀gʋ a mnɩ́, mà ɩ̀ yi sa yɩbhlɩ cémʋ́ Lagɔ a nékʋ́cinyɔ nɩ́ ka kɔ́ɔ̀kɔ́ Galilée wlʋ́ a!» [

Zozíi cie bheyiliŋwnɔ

⁵³ Ɩ̀lɩa á lɔ̀fɩ́ɛ́ plɩ́ a, nyɔ nɩ̀ kʋ a, ɔ́ɔ mnɛ ɔ gbó.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy