Záan 21 - Neyo

Zozíi flʋ ɔ́ kʋjɩ̀nyʋ̀àà yɩ́ Tibelíádɩ a nyíé gɔ̀

¹ Tányɩ plɩ́ a, Zozíi flʋ sɔ́kʋ́ ɔ́ kʋjɩ̀nyʋ̀àà yɩ́ Tibelíádɩ a jie gɔ̀. Cémʋ́ ɔ́ flʋlaa yɩ́ a, ɩ́mɩ́ ŋwɔ́ɔ mà,

² tányɩ a múó, Simɔ́ Pɩ́ɛ́lɩ lé Tomáa á wlele Dáblɩ̀yʋ̀ɔ̀ a, lé Natanayɛ́lɩ, Galilée a dúó á wlele Kanáa a, mɔ̀ɔ a nyɔɔ́ ɔ́ ŋwɔ́ɔ, lé Zebedée a yúó, lé Zozíi a kʋjɩ̀nyʋ̀àà àna a sɔ́, á lɔ̀fɩ́ɛ́ ŋnɩlɔ dáamúó wlú.

³ Lé Simɔ́ Pɩ́ɛ́lɩ srʋ á mà: «Ná mnɛ fɩa ka.» A sɛ́fʋɔ́ á anɩ́: «À yà mɔ̀ɔ sɔ́ à yi mʋ!» Lé á pla gɔ́lʋ́ lé á mʋ. Mà bhʋ́ a dɩ́bɩ̀ɛ̀, á fɩa mà a nɩ́ zrɩ bhlá.

⁴ Zrɩ̀ɩ yie la yɩ́ zɩ ka, Zozíi kʋ nyíé gɔ̀, mà ɔ́ kʋjɩ̀nyʋ̀àà nɩ́ saá yì mà ɔ́mɔ́ kʋ̀ʋ.

⁵ Lé ɔ́ yrá á mà: «Ná yúó yɩ, a ya lelilɛ yɛ́ a ká lii?» Á anɩ́: «Ʋ́ʋ̀n!»

⁶ Bhʋ́ ɔ́ srʋ á mà: «A páa píloó gɔ́lʋ́ a lilie kʋ́ a pɩ́ʋ́ a mnɩ́, mà a yi lɛ́ yɛ́!» Mà á pá píloó a, a nɩ́ míi a ká á jri, zrìi á bhlá a, ɩ nɩ́ bɛ́.

⁷ Lé Zozíi a kʋjɩ̀nyɔ̀ɔ̀ ɔ́ wà lɛ́ kpanyɩ a, srʋ Pɩ́ɛ́lɩ ɔ́ anɩ́: «Kanyɔɔ̀ kʋ̀ʋ!» Mà Simɔ́ Pɩ́ɛ́lɩ nú mà Kanyɔ kʋ̀ʋ a, kótuó ɔ́ sa la mʋ́ lé ɔ́ fɩa la a, ɔ́ plʋʋ mʋ́ lé ɔ́ bhli nyíé.

⁸ Kʋjɩ̀nyʋ̀àà ànàà, ámá à jri píloó zrìè yíe kʋ́ a, nyie a mnɩ́ sá àààn lé á la gɔ́lʋ́ɔ́ lé á pɛ́, cémʋ́ a nɩ́ la dʋdʋ̀ gɔ̀ dá trʋ̀ a, wlʋ́ dɛ́ɛ́ á páa píloó lé kà pɛ́ a, ɩ́ yi mɛ́trɩ a gwlɩ̀ gbɩ́ nɩ.

⁹ Tányɩɛ́ mʋ́ á wlʋ́ gɔ́lʋ́ɔ́ a mnɩ́ lé á kwlíi dʋdʋ̀ kʋ́ a, á yɛ́ kosu, kosuó jɩ̀ kʋ zrìi lé flɔ́ɔ.

¹⁰ Lé Zozíi srʋ á mà: «A bhá zrìyuo zrìè a bhlá a mnɩ́ lé a laà.»

¹¹ Lé Simɔ́ Pɩ́ɛ́lɩ pla gɔ́lʋ́ a mnɩ́, lé ɔ́ jri píloó zrìkádɩ̀ɛ̀ yie kʋ́ a kíké wlú, mà píloó nɩ́ yrɔɔ̀. Zrìè kʋ̀ píloó a mnɩ́ a, ɩ́ bhli zrì kádɩ a gwlɩ̀ gbàásɔ́ lé kʋ́gbá ta.

¹² Lé Zozíi srʋ á, ɔ́ anɩ́: «A yi a ká li.» Mà kʋjɩ̀nyʋ̀àà á nyièdɩ a nyɔ a múó nɩ́ fɩ́ yɛ́ lé ɔ kɔ́ɔ́ yrá mà: «Mɔ̀ nyɔ gbá kʋ̀ʋ a?» Á yì saá mà Kanyɔɔ́ ɔ́mɔ́ kʋ̀ʋ.

¹³ Lé Zozíi ŋnɩ á gɔ̀ lé ɔ́ bhá flɔ́ɔbhuo lé ɔ́ nyɛ́ á lé ɔ́ nyɛ́ á sáà zrìi.

¹⁴ Zozíi wlʋ́ lɛ́ kú yra á, taàda lɛ̀ lé ɔ́ flʋlɛ lɛ́ ɔ́ kʋjɩ̀nyʋ̀àà yɩ́.

Zozíi yà Pɩ́ɛ́lɩ sɔ́ cí

¹⁵ Á bhɩa lilie zɔ̀ a, Zozíi srʋ Simɔ́ Pɩ́ɛ́lɩ mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ lé ɩ̀ zi nyʋaá fɩ́ɛ́ lɩ̀à kʋ́ ʋ?» Pɩ́ɛ́lɩ anɩ́: «Aan, Kanyɔɔ̀! Ɩ̀ yì saá mà ɩ́ wà mɔ̀ a.» Zozíi anɩ́: «Lɔ́bhʋ ná bhlábhlɩ́ɛ́ kʋ́.»

¹⁶ Lé Zozíi yrɔ́ɔ́ sɔ́kʋ́ mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ?» Pɩ́ɛ́lɩ anɩ́: «Aan, Kanyɔɔ̀! Ɩ̀ yì saá mà ɩ́ wà mɔ̀ a.» Zozíi anɩ́: «Plɩ́ ná bhlábhlɩ́ɛ́ a kanyɔ.»

¹⁷ Lé Zozíi yrá sɔ́kʋ́ Pɩ́ɛ́lɩ taàda mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ?» Mà tányɩɛ́ mʋ́ Zozíi yrɔ́ɔ́ taàdàà mà: «Ɩ̀ wà mɔ́ɔ à?» Wɔlíɛ́ kla Pɩ́ɛ́lɩ ɩ́ nɩ lé ɔ́ srʋ ɔ́ mà: «Kanyɔɔ̀, ɩ̀ yì wɔlɩ́ɛ́ fɩ́ɛ́, lé ɩ̀ yì saá mà ɩ́ wà mɔ̀.» Zozíi anɩ́: «Lɔ́bhʋ ná bhlábhlɩ́ɛ́ kʋ́!»

¹⁸ Cɩ́cása a mnɩ́, náa srʋɛ mɔ̀ mà, tányɩɛ́ mʋ́ ɩ̀ ŋwɔ́ɔ wá zɔ̀kpɩ́yʋ a, mɔ̀ mɔ̀glʋ̀ gʋa wá nà kótu a bɛ́tʋ, lé ɩ̀ mnɛ wá dɛ́ ɩ̀ wà a, mà nɩ̀ plɩ́ kɛ́zɔ̀ zubònyɔ a, nà ka yɩ́ nà glɔ̀gbɩ́ tʋà lé nyɔ ànɔ nà kà kɛ́zɔ̀ yi lé ɔ̀ kà nà kótu a bɛ́tʋ gʋà lé dɛ́ɛ́ kɛ̀ mʋ tʋ ʋ̀ nɩ́ yrá a, ɔ ká ʋ́ mɔ̀ fa.

¹⁹ Zozíi cí saá, lé cémʋ́ Pɩ́ɛ́lɩ a kwɩ́ɛ́ a wɔlɩ́ na ká plɩ́ɩ lé ɛ ká Lagɔ ŋnú fa a ɔ ká a mɩ́ pápa à. Ɔ́ bhɩa zɔ̀ a, ɔ́ srʋ ɔ́ mà: «Pɩ́ɛ́lɩɩ̀, jɩ́ mɔ́ɔ kʋ́.»

Zozíi lé ɔ kʋjɩ̀nyɔ̀ɔ̀ ɔ́ wà lɛ́ kpanyɩ a

²⁰ Mà tányɩɛ́ mʋ́ Pɩ́ɛ́lɩ yrɩ́bha wlú a, ɔ yɩ́ bhli Zozíi a kʋjɩ̀nyɔ̀ɔ̀ ɔ́ wà lɛ́ kpanyɩ a jɩ̀, ɔ gbíó wá wlúó gɔ̀ tányɩɛ́ mʋ́ á lie wá a, lé ɔ̀ yrɔ́ɔ́ wá mà: «Kanyɔɔ̀, nyɔ gbá nà kà mɔ̀ sa áa?»

²¹ Pɩ́ɛ́lɩ yɛ́ ɔ́ a, ɔ́ yrá Zozíi mà: «Bhè ɔ̀lɩa, Kanyɔɔ̀, wɔlɩ́ gbá nà kɔ̀ɔ ŋnɩ a?»

²² Zozíi anɩ́: «Bhè nɩ yrá lé ɔ ká kɔ́ kʋ àààn lé ná yiyitanyɩ ká kɛ́zɔ̀ ŋnɩ a, nàa wɔlɩ́ɩ? Mɔ̀, jɩ́ mɔ́ɔ kʋ́!»

²³ Wɔlíɛ́ Zozíi srʋ Pɩ́ɛ́lɩ a, ɩ́ mʋ lé ɩ́ pla a níayúó ànàà nyúkwlí, ɩ́mɩ́ ŋwɔ́ɔ mà, Zozíi anɩ́ bhʋ́anɩ kʋjɩ̀nyɔ̀ɔ̀ nɩ́ ka kú. Bhè sɩ́tɛ̀ mʋ́ Zozíi nɩ́ cí. Zozíi anɩ́: «Nɩ yrá lé ɔ ká kɔ́ kʋ àààn lé náa yiyitanyɩ ká kɛ́zɔ̀ ŋnɩ a, nà wɔlɩ́ɩ?»

Ɩ́ bhliìda

²⁴ Ɔ́mɔ́ wàwàkʋ̀jɩ̀nyɔ̀ɔ̀ ɔ̀ yɛ́ wɔlɩ́ɛ́ a dá lé ɔ̀ kɩ̀ɩ̀ cɩ́cása a, ɔ́mɔ́ mɔ̀glʋ̀ jɩ́jrɩ̀ɩ bɔ́gʋ̀ɔ̀ lɩ̀à a mnɩ́, lé àmɔ̀ mɔ̀glʋ̀ à yì sáà saá mà wɔlɩ́ɛ́ ɔ́ cí a, ɩ́ ŋwɔ́ɔ cɩ́cása à.

²⁵ Zozíi nɩ sɔ́kʋ́ wɔlɩkɔ́kɔ́mnɩ́ ànɩ, mà nyʋa ká la ɩ́ lɔ̀fɩ́ɛ́ bɔ́gʋ jɩ̀ ŋwʋ́ a, ɩ́ yì saá mà bɔ́gwɩ̀ɛ̀ nɩ́ ka la ŋwʋ́da yɛ́ dɛ́ zɩkpa zɔ̀.