Záan 20 - Neyo

Zozíi ya galɔ̀

¹ Sɔ́lɩɛ́ a zizìèda, cúcú kʋ àyɩ dʋdʋ̀ kʋ́, lé Malí Madɩlɛ́nɩ soglù lé ɔ́ mʋ lésuó jɩ̀, mà ɔ́ dʋdʋ̀ a, cɔ́kʋɔ́ á bhá lé a bhle lésuó a né a, ʋ́ ya ʋ́ wlʋ́.

² Bhʋ́ ɔ́ fa sóo lé ɔ́ mʋ Simɔ́ Pɩ́ɛ́lɩ yà Zozíi a kʋjɩ̀nyɔ̀ɔ̀ ɔ́ wà wá lɛ́ kpanyɩ a sɔ́ gɔ̀. Ɔ́ mʋ a, ɔ́ srʋ á mà: «Nyʋa ya Kanyɔ lésuó a mnɩ́ bhá, lé dɛ́ɛ́ á ŋwʋ́ ɔ́ a, à nɩ́ ʋ́ yì!»

³ Lé Pɩ́ɛ́lɩ yà kʋjɩ̀nyɔ̀ànɔ̀ɔ̀ sɔ́, ámá à mʋ lésuó jɩ̀.

⁴ Áa sɔ́ɔ́ bháʋ́ sóo, mà ɔ́mɔ́ kʋjɩ̀nyɔ̀ànɔ̀ɔ̀ fío lé ɔ́ zi Pɩ́ɛ́lɩ kʋ́, ɔ́mɔ́ tɛ̀tɛ̀ ŋnɩ lésuó jɩ̀.

⁵ Ɔ́ bhlí sá, lé ɔ́ púo yɩ́ sá a, ɔ́ yɛ́ lɔkwɩɛ́ ɛ́ pʋ́ ʋ́, mà ɔ nɩ́ lésuó a mnɩ́ pla.

⁶ Simɔ́ Pɩ́ɛ́lɩɛ́ ɔ̀ gbɛlɔɔ́ la jɩ̀ a, ɔ́ yi a, ɔ́ɔ pla lésuó a mnɩ́, ɔ́ dʋdʋ̀ a, ɔ́ yɛ́ lokupɩɛ́, ɩ́ kʋ mɔ̀ɔ,

⁷ mà lɔkwɩɛ́ á bhá lé á pɩpɩa Zozíi a wlú a, ɔ́ yɛ́ɛ́ ɛ́ pɩpɩɔ, ɛ́ pʋ́ ɛ nɩ dá, ɛ yà lokupɩɛ́ sɔ́ nɩ́ dáamúó kʋʋ̀.

⁸ Lé Zozíi a kʋjɩ̀nyɔ̀ɔ̀ tɛ̀tɛ̀ ŋnɩ la lésuó jɩ̀ a, ɔ́ pla sáà lésuó a mnɩ́, mà tányɩɛ́ mʋ́ ɔ́ yɛ́ wɔlɩ́ɛ́ fɩ́ɛ́ lɩ̀à, ɔ́ ka yɩ́ ɩ cɩ́cása.

⁹ Mà bháa wá jɩ̀ lé kà zɩmnɛ́ ŋnɩ a, ɩ́ wɔlɩdrèè á jɩ́jrà wá Lagɔ̀bɔ̀gʋ̀ɔ̀ mnɩ́ lé à ŋwɔ́ɔ wá mà, Zozíi yi galɔ̀ a, a nɩ́a zà a mnɩ́ nú.

¹⁰ Kʋjɩ̀nyʋ̀àà sɔ́ɔ́ à yi la lésuó jɩ̀ a, á yrɩ́bha yɩ́.

Zozíi flʋ Malí Madɩlɛ́nɩ yɩ́

¹¹ Bhè Malíi nynʋ́vʋ̀ jrùkʋ́ lésuó gɔ̀ ɔ́ ŋwíé. Ɔ́ kʋ ŋwíida lé ɔ́ gbí sá lé ɔ́ púo lésuó a mnɩ́ yɩ́ sá,

¹² ɔ́ dʋdʋ̀ a, Kplɔkplɔzìzi a sɔ́ pla bànɩ pápɩ́ mʋ́, ɩ́ bɔ́ɔ lésuó a mnɩ́. Dɛ́ɛ́ á púo la Zozíi a gàzɛ̀ɛ̀ a, bhʋ́ ɩ́ kʋ, múó kʋ wlú kʋ́, lé sɔ́anʋɔ́ kʋ bhɩɩ́ zɔ̀.

¹³ Lé Kplɔkplɔzìzìè yrɔ́ɔ́ mà: «Ɛ̀kʋ̀ʋ̀ lé ɩ̀ ŋwíé a, máayʋ́ʋ̀?» Malíi anɩ́: «Nyʋaá ya ná Kanyɔɔ́ lésuó a mnɩ́ bhá lé nɩ́ dɛɛ́ á ŋwʋ́ ɔ́ a yì!»

¹⁴ Mà Malíi kʋ mɔ̀ɔ saà da lé ɔ́ yrɩ́bha wlú lé ɔ́ dʋdʋ̀ a, Zozíi lɛ̀ɛ̀, ɔ́ nynʋ́vʋ̀ ɔ drɩ̀, mà Malíi nɩ́ ɔ́ yɩbhlɩ.

¹⁵ Bhʋ́ Zozíi yrɔ́ɔ́ mà: «Ɛ̀kʋ̀ʋ̀ bhè ɩ̀ ŋwíé á máayʋ́ʋ̀? Nyɔ gbá ɩ̀ mʋ́mɔ a?» Mà Malíi a dùòkʋ́ zalɩdɛgbòò a kanyɔ ɔ yrɔ́ɔ́, bhʋ́ ɔ́ sané, ɔ́ anɩ́: «Ɩ́bhìè! Mɔ̀ nɩ̀ fɔɔ́ a, pápa mɔ́ɔ dɛɛ́ ɩ̀ ŋwʋ́ ɔ́ a, bhè ká ʋ́ mɔ́ bhá!»

¹⁶ Lé Zozíi wleó: «Malíi!» Lé ɔ́ yrɩ́bha lé ɔ́ gàlɔ̀ɔ̀ klʋ́, lé ɔ́ bhá Ebléewɔlɩ lé ɔ́ ŋwnʋ́ kʋ́: «Labunii!» Ɩ́ gba ŋwɔ́ɔ «Másɛɛ̀!»

¹⁷ Zozíi anɩ́: «Cíe mɔ́ɔ sá mà, nɩ́ àyɩ ɩ Tʋ́ gɔ̀ gblà. Mà mʋ lé srʋ ɩ níayúó mà ɩ Tʋ́ bhè ná Lagɔ, ɔ́ ŋwɔ́ɔ sáà a Tʋ́ lé a Lagɔ a, mà náa gblá yɩ́, ɩ́ mnɛ yɩ́ mɔ́ gɔ̀.»

¹⁸ Ɔ cí lɛ́ sɩ́tɛ̀ a, Malí Madɩlɛ́nɩ ɔ́ɔ mʋ yɩ́, lé ɔ́ srʋ Zozíi a kʋjɩ̀nyʋ̀àà mà: «Ɩ́ yɛ́ Kanyɔ, mà wɔlɩ́ɛ́ Kanyɔ srʋ mɔ́ɔ a, ɩ́mɩ́ lɛ̀ɛ̀.» Lé ɔ́ srʋ á mɩ́.

Kʋjɩ̀nyʋ̀àà kʋ wlʋɔ́ a mnɩ́ lé Zozíi flʋlaá yɩ́

¹⁹ Bhʋ́ a sɔ́lɩɛ́ bhlɔ̀bhlɔ̀ a kosúgbòsa, Zozíi a kʋjɩ̀nyʋ̀àà ŋnɩlɔ̀ wlʋ a múó mnɩ́ wlú. Mà cémʋ́ á gúle Zúfʋnyʋa a cífɩnyʋaá kʋ́ a, ɩ́ ka ŋnɩ́ lé á bhle wlʋɔ́. Wlʋɔ́ bhli mà sɩ́tɛ̀ ɩ́ kʋ bhè Zozíi pla sré, lé ɔ́ plɩ́ɩ á nyièdɩ lé ɔ́ nynʋ́vʋ̀ lé ɔ́ srʋ á, ɔ́ anɩ́: «Pʋ́pʋ́ɛ́ ŋnɩ amɔ kʋ́!»

²⁰ Ɔ́ cí sɩ́tɛ̀ a, ɔ́ tʋalaá ɔ glɔ̀gbɩ́ɛ́ yà ɔ gbakɩɛ́ sɔ́. Mà tányɩɛ́ mʋ́ á yɛ́ Kanyɔɔ́ a, lɔlɔɔ́ ʋ̀ bhlá á, ʋ́ plɩ́ á gɔ̀.

²¹ Lé Zozíi srʋ á sɔ́kʋ́ mà: «Pʋ́pʋ́ɛ́ ŋnɩ amɔ kʋ́! Cémʋ́ Tʋ́ɔ́ cíe lɛ́ mɔ́ɔ a, sɩ́tɛ̀ mʋ́ ɩ́ cíe sáà amɔ.»

²² Ɔ́ cí kɔ́ɔ̀kʋ́ sɩ́tɛ̀ a, ɔ́ pá nyobhuo kʋ́ lé ɔ́ srʋ á mà: «Blɔ̀blɔ̀zùzùò kwlíi amɔ jɩ̀!

²³ A nɩ cie kɛ́zɔ̀ nyʋa a nyumoé a, ɛ́ yi á cieloò, ɩ́zà a nɩ nɩ́ kɛ́zɔ̀ nyʋa cie a, á nyumoé nɩ́ ka á cieloò.»

Zozíi flʋ sáà Tomáa yɩ́

²⁴ Mà, kʋjɩ̀nyʋ̀àà kʋ́gbá sɔ́ɔ́ a nyièdɩ a nyɔɔ́ á wlele Tomáa bhè á ŋwʋ́ Dáblɩ̀yʋ̀ɔ̀ ŋnɩ́ a, tányɩɛ́ mʋ́ Zozíi yi a, ɔ nɩ́ la nyʋa ànàà nyièdɩ kʋ.

²⁵ Ɔ li kʋjɩ̀nyʋ̀àà ànàà ámá srʋ ɔ́ mà: «À yɛ́ Kanyɔ!» Bhʋ́ Tomáa anɩ́: «Mɔ́ɔ mɔ̀glʋ̀, nɩ nɩ́ ɔ glɔ̀gbɩ́ɛ́ a mnɩ́ a leteyi a jíé yɛ́ lé nɩ nɩ́ fɩ́ɛ́ ɩ́mɩ́ jíé a mnɩ́ ná wlie kʋ, lé ɔ́ gbakɩɛ́ a mnɩ́ á srí lɛ́ jrɛ̀ɛ̀ a, nɩ nɩ́ fɩ́ɛ́ mɛ́ gbɔ́ a, wɔlɩ́ɛ́ fɩ́ɛ́ a cíe lɛ́ a, nɩ́ kɩɩ́ cɩ́cása kʋ́ bhá.»

²⁶ Lé sɔ́lɩ a lɛblɩ̀ plɩ́ lé kʋjɩ̀nyʋ̀àà ŋnɩlɔ̀ sɔ́kʋ́ wlʋ a múó a mnɩ́ wlú, Tomáa kʋ yɩ́ la cɩɩ ámá nyièdɩ. Wlʋɔ́ a kplié fɩ́ɛ́ bhli lé á kʋ mɔ̀ɔ. Lé Zozíi yi, lé ɔ́ nynʋ́vʋ̀ á nyièdɩ lé ɔ́ srʋ á mà: «Pʋ́pʋ́ɛ́ ŋnɩ amɔ kʋ́!»

²⁷ Lé ɔ́ srʋ Tomáa mà: «Tomáà! Yi, la nà wlié lé dʋdʋ̀ ná glɔ̀gbɩ́ a mnɩ́, lé la sáà nà glɔ̀gbáá lé fa ná gbakɩ a mnɩ́ wlɩ. Lé nɩ̀ nɩ sáà a, nà bhlalɛ ná zumò, mà ka fádùò!»

²⁸ Tomáa ŋwnʋ́ kʋ́, ɔ́ anɩ́: «Ná Kanyɔɔ̀ lé ná Lagɔɔ̀!»

²⁹ Bhʋ́ Zozíi srʋ ɔ́ ɔ́ anɩ́: «Yà yɩ́ lɛ́ mɔ́ɔ yɛ́ a, ɩ́zà ɩ̀ kà yɩ́ lɛ́ ná cɩ́cása. Nyʋaá à nɩ́ yɛ́ wɔlɩ́ bhè à kɩ̀ɩ cɩ́cása a, a pʋ́ a gwlɛɛ̀!»

A lɛ́bhɛ bɔ́gʋ̀ɔ̀ lɩ̀à a gba

³⁰ Zozíi nɩ sɔ́kʋ́ ɔ́ kʋjɩ̀nyʋ̀àà a klʋ́ jɩ̀ lɛ̀wɔ̀lɩ kɔ́kɔ́mnɩ́ ànɩ, lé ɩ nɩ́ bɔ́gʋ̀ɔ̀ lɩ̀à a mnɩ́ jɩ́jrɔ̀.

³¹ Mà ànɩ̀ɛ̀ lɩ̀à, ɩ́ɩ jɩ́jrɔ̀ lé a ká saá yɩbhlɩ cémʋ́ Zozíi ŋwɔ́ɔ Kláyɩ́sɩ lé ɔ́ ŋwɔ́ɔ Lagɔ a Yuwliyʋ a. Lé a ká ɩ fádùò ka bhè a ká ɔ ŋnɩ́ɛ́ mʋ́ kɔ́ɔ́ ʋ̀ nɩ́ bhɩada ka a yɛ́.