Záan 2 - Neyo

Zozíi pláa nyú duváa mʋ́

¹ Yri sɔ́ plɩ́ a, nyʋa síelaá Galiléebhlɩ a mnɩ́ a dúó á wlele Kanáa a. Zozíi ɔ nɛ́ kʋ la ʋ́.

² Zozíi a sɛ́fʋ, ɔ yà ɔ́ kʋjɩ̀nyʋ̀àà sɔ́ kʋ la mɔ̀ɔmɔ̀.

³ Cémʋ́ duváa ya lúbhoé jɩ̀ bhɩa a, bhʋ́ Zozíi ɔ nɛ́ srʋ ɔ́ mà: «Nyʋaá nɩ́ yɩ́ duváa kaa!»

⁴ Bhʋ́ Zozíi srʋ ɔ́ mà: «Máa, mɔ̀ nà kà mɔ́ɔ wɔlɩ́ɛ́ ná ká nɩ a, srʋʋ? Ná glíiyie nɩ́ àyɩ kla.»

⁵ Sɩ́tɛ̀ ɩ́ kʋ bhè ɔ nɛ́ srʋ nyʋaá à pláa nʋ́ a, mà: «A nɩ wɔlɩ́ɛ́ fɩ́ɛ́ ɔ́ na ká amɔ srʋ a!»

⁶ Jìdàní kádɩ a gbɩ́flɔ́ kʋ la bhʋ́alɛ́, jìdàní a múó yi mi ɛ́ yi nyúlitrɩ a gwlɩ̀ gbɩ́ bhá. Zúfʋnyʋa a jràmá a mnɩ́, ɩ́mɩ́ á yíele nyú kʋ́ lé á wɔlɔ wlɩ, bhʋ́ á kplɔɔ Lagɔ a drɩ̀ɩ.

⁷ Zozíi srʋ á nyʋa mà: «A yíe nyidie lɩ̀à nyú kʋ́!» Lé á yíelɩɩ nyú kʋ́.

⁸ Lé ɔ́ srʋ á mà: «A bhá mɔ̀ɔ lé a fa lúbhoé a kanyɔ.» Lé á plí mɔ̀ɔ lé á fɔɔ́.

⁹ Ɔ́ yráa a, nyúó ya duváa mʋ́ plɩ́ɩ. Dɛ́ɛ́ bhʋ́anɩ duváa ká wlʋ́ a, ɔ nɩ́ ʋ́ yì, mà nyʋaá à plí nyúó a, ámá yìi.

¹⁰ Bhʋ́ ɔ́mɔ́ jrìkànyɔ̀ɔ̀ wle sísíyʋwlɩɛ́ lé ɔ́ srʋ ɔ́ mà: «Plɔ́plɔdùváa ámá á la fɩ́ɛ́ jrè kʋ́, tányɩɛ́ mʋ́ nyʋaá ya yɩ́ má kʋ́ lʋ a, bhʋ́ ànɛ̀ɛ̀ ɛ̀ nɩ́ lɛ́ ná a, bhɩalɛ bɩ́. Mà mɔ̀, ɩ ŋwʋ́ plɔ́plɔdùváa sá àààn lé tányɩɛ́ lɩ̀à!»

¹¹ Wɔlíɛ́ lɩ̀à ɩ́mɩ́ ŋwɔ́ɔ tagàlɛ̀ɛ̀ Zozíi wláa Galiléebhlɩ a dúó á wlele Kanáa a. Sɩ́tɛ̀ mʋ́ Zozíi tʋa nyʋa ɔ tagàsèkéé, bhʋ́ ɔ́ kʋjɩ̀nyʋ̀àà bháa ɔ fádùò a kalɛ kʋ́.

¹² Wlʋ́ yɩ́ ʋ́ a, ɔ yà ɔ nɛ́ ɔ níayúó lé ɔ́ kʋjɩ̀nyʋ̀àà sɔ́ áa mʋ yɩ́ Kapɛnayʋ́mʋ mà a nɩ́ mɔ̀ɔ gwlɛ.

Zozíi jɩ́ɩ pɛ́lʋ́panyʋa Lagɔ̀wlʋ̀kádʋ̀ɔ̀ a mnɩ́

¹³ Zúfʋnyʋa a flíiflíiglɩ̀sɩ́sɩ̀ɛ̀ a tányɩ yie ŋnɩ ka, ɛ́mɛ́ fa Zozíi Zelízalɛ́mʋ.

¹⁴ Mà ɔ́ mʋ lé ɔ́ pla Lagɔ̀wlʋ̀kádʋ̀ɔ̀ a mnɩ́ lé ɔ́ dʋdʋ̀ a, pɛ́lʋ́panyʋa ya mɔ̀ɔ kʋ́ yie, á ŋwʋ́ɛ́ bhlií, bhlábhlɩ́ yà kpóòkpí sɔ́ pɛ́lʋ́, nyʋa àna kʋ tébhli jɩ̀ á cɩ́cɩlɛ moníi.

¹⁵ Lé ɔ́ bhá bhlí lé ɔ́ nɩ pɛɛ́, ɛ́mɛ́ ɔ́ bhá lé ɔ́ jɩ́ɩ nyʋaá fɩ́ɛ́ kʋ̀ Lagɔ̀wlʋ̀kádʋ̀ɔ̀ a mnɩ́ a, ŋwʋ́ a bhlií, a bhlábhlɩ́, nyʋa ànàà kʋ̀ tébhlié jɩ̀ à cɩ́cɩlɛ moníi a, ɔ́ jɛjɛ̀ a moníe sá, ɔ́ bhóbhuo a tébhié.

¹⁶ Ɔ́ srʋ nyʋaá à ŋwʋ́ɛ́ kpóòkpíé pɛ́lʋ́ a, mà: «A fle a lɩ́ɛ́ fɩ́ɛ́ lɩ̀à zɔ̀! A ná bhá ɩ Tʋ́ a wlʋɔ́ pɛ́lʋ́pawlʋ kʋ́!»

¹⁷ Ɔ́ kʋjɩ̀nyʋ̀àà yɛ́ wɔlɩ́ɛ́ fɩ́ɛ́ ɔ́ nɩ a, áa luo wɔlɩ́ɛ́ ɩ̀ jɩ́jrɔ̀ Lagɔ̀bɔ̀gʋ a mnɩ́ mà: Cémʋ́ nà wlʋɔ́ a wàwʋ́ɔ́ kʋ mɔ́ɔ duo a mnɩ́ a, weé! À Tʋ́ Lagɔ, ʋ́ yi mɔ́ɔ bhlá!

¹⁸ Lé Zúfʋnyʋa a cífɩnyʋaá yrɔ́ɔ́ mà: «Lɛ̀wɔ̀lɩ a cégbá ɩ̀ yi amɔ tʋa lé à yi saá yɩbhlɩ mà, wɔlɩ́ɛ́ ɩ̀ nɩ lɛ́ a, ɩ̀ kɩ̀ɩ nɩ sa á?»

¹⁹ Bhʋ́ Zozíi srʋ á mà: «A wlawla Lagɔ̀wlʋ̀kádʋ̀ɔ̀ lɩ̀à, a sa ʋ́ mʋ́, mà ɩ́ yi yrií ta bhá lé yiú sɔ́kʋ́ pá.»

²⁰ Bhʋ́ Zúfʋnyʋaá srʋ ɔ́ mà: «Lagɔ̀wlʋ̀kádʋ̀ɔ̀ lɩ̀à ká pálɔ a, lɩkpɩ á gwlɩ̀ a sɔ́ lé gbɩ́flɔ́ mʋ́ á pálʋʋ́, ʋ́mʋ́ mɔ̀ ɩ̀ yi yrií a ta bhá lé ɩ̀ yi pá á?»

²¹ Mà Lagɔ̀wlʋ̀ɔ̀ ʋ̀ kʋ̀ʋ wɔlɩ́ ɔ́ cíé lɛ́ a, ɔ nyoku ɔ́ sa.

²² Tányɩɛ́ mʋ́ Zozíi galɔ̀ a, bhʋ́ ɔ́ kʋjɩ̀nyʋ̀àà luo cémʋ́ ɔ́ cí wá a kʋ́. Bhʋ́ á bhá yɩ́ cɩɩ́ Lagɔ̀bɔ̀gʋ̀ɔ̀ mnɩ́ a wɔlɩ́ɛ́ yà Zozíi a cícíwɔlɩɛ́ sɔ́ cɩ́cása kʋ́.

²³ Tányɩɛ́ mʋ́ Zozíi kʋ la flíiflíiglɩ̀sɩ́sɩ̀ɛ̀ a tányɩɛ́ Zelízalɛ́mʋ a, ɔ́ nɩ lɛ̀wɔ̀lɩ kɔ́kɔ́mnɩ́, ɩ́mɩ́ nɩ lé nyʋa kɔ́kɔ́mnɩ́ bháa ʋ́ ɔ fádùò kalɛ kʋ́.

²⁴ Ɛ̀ nɩ̀ ŋwɔ́ɔ Zozíi a, cémʋ́ ɔ́ yì a, ɩ́ ka ŋnɩ́ lé ɔ nɩ a wɔlɩ́ɛ́ fɩ́ɛ́ á nie a wɔlɩ́ kʋ́ bhá.

²⁵ Wɔlíɛ́ fɩ́ɛ́ kʋ̀ nyɔ a duo a kʋ́ a, Zozíi yìi, ɩ nɩ́ ŋwɔ́ɔ mà nyɔ srʋ ɔ́ fɩ́ɛ́ nyɔ a gɔ̀ a wɔlɩ́ lé ɔ kɔ́ɔ́ yɩbhlɩ.