Záan 19 - Neyo

Á ya Zozíi a bhlábhláwɔlɩ kʋ́ ŋwʋ́ʋ

¹ Naa, Pilátɩ fa Zozíi lé ɔ́ nyɛ́ ɔ́ sʋ́jàà sɩ́àda.

² Sʋ́jàà bhá nyríci lé á bhla wlúgblè lé á ŋwʋ́ ɔ́ wlú. Lé á bhá bànɩ̀zàla lé á plɔɔ mʋ́.

³ Lé á yio gɔ̀ lé á pɔ́ɔ́ yúó, á nie: «Àyúó Zúfʋnyʋa a lóò!» Lé á klálɛ ɔ nyúkwlí kpɩ́.

⁴ Pilátɩ flʋ sɔ́kʋ́ zɔ̀, lé ɔ́ srʋ Zúfʋnyʋaá mà: «Náa ká amɔ mɔ́ laà lé a kɔ́ɔ́ yɛ́, mà wɔlɩdrèè ɔ ká lɛ́ nɩ bhè à kɔ̀ɔ̀ lɛ́ gbʋ gʋa a, nɩ́ yɛ́ a.»

⁵ Lé Zozíi flʋ zɔ̀, nyníciwlùgblèè á ŋwʋ́ ɔ́ la wlú a, á kʋ ɔ wlú, lé á plɔɔ la sáà bànɩ̀zàlàà mʋ́, lé Pilátɩ srʋ á mà: «Nyɔɔ́ mɔ́ lɛ̀!»

⁶ Tányɩɛ́ mʋ́ Lagɔ̀bʋ̀bɔ̀nyʋ̀àkádàà yà a sʋ́jàà sɔ́ yɛ́ ɔ́ a, á yrè mɩ́á kʋ́: «Kʋɔ́ kúsuó jɩ̀! Kʋɔ́ kúsuó jɩ̀!» Lé Pilátɩ srʋ á: «Mɔ́ɔ, nɩ́ yɛ́lɔɔ́ nyumowɔlɩ gɔ̀, amɔ mɔ̀glʋ̀ a fɔɔ́ a kɔ́ɔ́ kúsu jɩ̀ kʋʋ̀!»

⁷ Zúfʋnyʋaá anɩ́: « Àmɔ̀ à ka jràmá, ɛ̀ nɩ̀ ŋwɔ́ɔ à jràmá a mnɩ́, ɔ́ ka lé ɔ kú, máà ɔ́ bhá ɔ nyoku Lagɔ a Yuwliyʋ kʋ́.»

⁸ Pilátɩ nú wɔlɩ́ɛ́ a, zuzu wlʋ́ɔ́ jɩ̀.

⁹ Ɔ́ pla gɔ̀mnàwlʋ̀ɔ̀ a mnɩ́ lé ɔ́ yrá Zozíi mà: «Dɛ́gbá ɩ̀ wlʋ́ɛ́ a?» Zozíi nɩ́ ɔ́ né sra.

¹⁰ Lé Pilátɩ srʋ ɔ́ mà: «Nɩɩ́ sra mɔ́ɔ né à? Nɩɩ́ saá yì mà ɩ́ yi míi lé ɩ́ yi nɩ lé á yi mɔ̀ɔ sá cíè, lé ɩ́ yi míi lé ɩ́ yi nɩ lé á yi mɔ̀ɔ kúsu jɩ̀ kʋʋ?»

¹¹ Bhʋ́ Zozíi srʋ ɔ́ mà: «Nà pɔ́waá nɩ́ pɩa mɔ́ɔ kʋ́, Lagɔ nɩ̀ nɩ́ mɔ̀ má nyɛ́ a. Ɩ́mɩ́ kà ŋnɩ́ a zà nyɔɔ́ ɔ̀ sa mɔ́ɔ a, ɔ nɩ nyumoé zù lé ɛ́ plɩ́ nà nɛɛ́ gɔ̀.»

¹² Bháa yɩ́ ʋ́ jɩ̀ a, Pilátɩ yrá yɩ́ la Zozíi a sá ciecú. Mà Zúfʋnyʋaá nɩ́ ŋwnʋ́ʋ̀, á sa yrè, á nie: «Nɩ̀ cíe nyɔɔ́ lɩ̀à sá a, nɩ́ yɩ́ lóo Sezáa ɔ bheyi ŋwɔ́ɔ! Nyɔ nɩ̀ wle ɔ nyoku lóo a, ɔ́ɔ gblɩ̀ Sezáa.»

¹³ Pilátɩ nú wɔlɩ́ɛ́ á cíé a, ɔ́ɔ fle Zozíi jrùkʋ́ lé ɔ́ plɩ́ɩ ɔ tɩ́tɩ́plɔkpoó jɩ̀ lé ɔ́ bɔ́ɔ sá, bhʋ́ á wlele cazɩ zɔ̀, mà Ebléenyʋa nie Gabatáa.

¹⁴ Flíiflíiglɩ̀sɩ́sɩ̀ɛ̀ a yrɩlɩlɛ a yruó kʋ́ɔ́, yrʋ́ a wlúnyɩ̀dɩ ŋnɩ lé Pilátɩ srʋɛ ɩ́ lɛ́ Zúfʋnyʋaá mà: «A lóo ɔ́mɔ́ lɛ̀!»

¹⁵ Bhè a yrè mɩ́á sɔ́kʋ́ kʋ́: «Ɔ kú wee! Ɔ kú wee! Kʋlɔɔ kúsu jɩ̀!» Pilátɩ anɩ́: «Ɩ kʋ a lóo kúsu jɩ̀ɩ̀?» Lagɔ̀bʋ̀bɔ̀nyʋ̀àkádàà anɩ́: «À nɩ́ sɔ́kʋ́ lóo ànɔ ka, ɛ̀ nɩ nɩ́ Sezáa a múó ŋwɔ́ɔ a.»

¹⁶ Bhʋ́ ɔ́ nyɛ́ à mɔ́ a kɔ́ɔ́ kúsuó jɩ̀ kʋ. Lé á bhli Zozíi kʋ́ lé á fɔɔ́.

Á kʋ Zozíi kúsu jɩ̀

¹⁷ Zozíi mɔ̀glʋ̀ gbɩdɩ̀ ɔ kúsuó lé á wlʋ́ dú lé á mʋ bhlɩ́ɛ́jɩ̀ á wlele Kúwlukofó a, mɔ̀ɔmɔ̀ Ebléenyʋa wlele wá Glɔgɔtáa.

¹⁸ Mɔ̀mɔɔ á kʋlɔ kúsuó jɩ̀, á kʋ ɔ a, á kʋ sáà nyʋa àna a sɔ́ bhlɛ̀gbɩ́ kʋ ɔ lilie kʋ́, lé ànɔ kʋ ɔ kɔmɩa kʋ́.

¹⁹ Pilátɩ srʋ nyʋa lé á jɩ́jrà kplipá jɩ̀, lé á kʋlaá kúsuó jɩ̀. Á jɩ́jrà mà: Nazalɛ́tɩ a Zozíi, Zúfʋnyʋa a lóo.

²⁰ Dɛ́ɛ́ mɔ̀ɔ á kʋlɔ a, mɔ̀ɔmɔ̀ mɛ́ du gɔ̀, ɩ́ ka ŋnɩ́ lé Zúfʋnyʋa kɔ́kɔ́mnɩ́ zɛ kplipáá jɩ̀, wɔlɩ́ɛ́ á jɩ́jrà a, á jíjràlɩ̀ɩ̀ Ebléewɔlɩ mʋ́, Latɛ́ɛwɔlɩ mʋ́, lé Glɛ́kɩwɔlɩ mʋ́.

²¹ Zúfʋnyʋa a Lagɔ̀bʋ̀bɔ̀nyʋ̀àkádàà srʋ Pilátɩ mà: «Nàa jɩ́jrà ʋ́ jɩ̀ Zúfʋnyʋa a lóo, mà jɩ́jrà ʋ́, Nyɔɔ́ lɩ̀à anɩ́: Mɔ́ ŋwɔ́ɔ Zúfʋnyʋa a lóo!»

²² Bhʋ́ Pilátɩ srʋ á mà: «Cémʋ́ ɩ́ jɩ́jrà lɛ́ a, ɩ́mɩ́ nà kà ʋ́ tuò.»

²³ Tányɩɛ́ mʋ́ sʋ́jàà kʋ Zozíi kúsuó jɩ̀ lé á bhɩa zɔ̀ a, á bhábha ɔ kótié mɔ̀na kʋ́, ànɔ a nʋ, ànɔ a nʋ. Lé á bhá sáà ʋ́ ɔ bànàà, á dʋdʋ̀ a, bhlɛ̀gbɩ́ kʋ́ á kplálaá, á bháa lagowlú àààn, lé á ŋnɩ zɔ̀.

²⁴ Lé sʋ́jàà srʋ srʋ, ɩ́mɩ́ ŋwɔ́ɔ mà: «Bànàà à ná yrayraá, mà à páa nɩ̀gbɩ kʋ́, nyɔɔ́ jɩ̀ ɩ́ na ká bhli a, ɔ́mɔ́ kà a.» Sɩ́tɛ̀ mʋ́ ɩ́ ka lé ɩ́ ká la plɩ́ɩ̀, bhʋ́alɛ́ Lagɔ̀bɔ̀gʋ̀ɔ̀ a mnɩ́ a jɩ́jràlɩ̀ɛ̀ yi neé sralɔɔ̀. Á jɩ́jrà wá mɔ̀ɔ mà: Á bhábha ná kótié, Ɛ̀ nɩ̀ ŋwɔ́ɔ ná bànàà a, Nɩ̀gbɩ̀ kʋ́ á pálaá. Sɩ́tɛ̀ mʋ́ sʋ́jàà nɩ.

²⁵ Bhʋ́ a tányɩɛ́, Zozíi ɔ nɛ́ Malíi, lé ɔ nɩ́ayʋ́ŋnɩkeyʋ, lé Klopásɩ a ŋwnɔ́ Malíi lé Malí Madɩlɛ́nɩ, á kʋ bhʋ́alɛ kúsuó gɔ̀.

²⁶ Zozíi yɛ́ ɔ nɛ́ lé ɔ́ kʋjɩ̀nyɔ̀ɔ̀ ɔ́ wà lɛ́ kpanyɩ a, ɔ́ nynʋ́vʋ̀ ɔ nɛ́ gɔ̀. Lé Zozíi srʋ ɔ nɛ́ mà: «Máà, lɛbhɛɛ nà yʋ́ lɛ̀ɛ̀!»

²⁷ Lé ɔ́ srʋ sáà ɔ́ kʋjɩ̀nyɔ̀ɔ̀ mà: «Mɔ̀, nà sɛ́fʋ, ɩ̀ nɛ́ lɛ̀ɛ̀!» Bhá yɩ́ ʋ́ jɩ̀ a, ɔ́ kʋjɩ̀nyɔ̀ɔ̀, ɔ́ɔ bhá yɩ́ Malíi lé ɔ́ fa yɩ́ mɔ́ ɔ gbó ɔ nyoku gɔ̀.

Zozíi ya kú

²⁸ Bháa yɩ́ ʋ́ jɩ̀ a, Zozíi yì yɩ́ saá mà nɔnʋɔ́ fɩ́ɛ́ ɔ́ yi wá kʋ́ a, ʋ́ ya yɩ́ zɔ̀ bhɩɔ̀, bhʋ́ ɔ́ sa yɩ́ cɩɩ né, ɔ́ anɩ́: «Mnátʋ bhlá mɔ́ɔ!» Cémʋ́ ɩ jɩ́jrɔ̀ wá Lagɔ̀bɔ̀gʋ̀ɔ̀ mnɩ́ ɔ́ zà a, sɩ́tɛ̀ mʋ́ ɩ́ plɩ́ɩ̀.

²⁹ Bóo bɔ́ɔ dʋdʋ̀ kʋ́, a mnɩ́ kʋ kalɩma nʋ. Nyʋa bhá lokupɩʋ lé á gʋalʋʋ́ gblie zìzie yɩ́, lé á ŋwʋ́a bhʋanɩ nɔkalʋɔ́ a mnɩ́ lé á kʋ ʋ́ Zozíi né kʋ.

³⁰ Tányɩɛ́ mʋ́ ɔ́ yráa nʋ́ɔ́ a, bhʋ́ ɔ́ sané, ɔ́ anɩ́: «Wɔlíɛ́ fɩ́ɛ́ a zɔ̀ bhɩada lɛ̀!» Ɔ́ cíí lé ɔ́ bhle wlú sá a, ɔ́ɔ dí nyobhuo.

³¹ Bhè Zúfʋnyʋa a nyɔbhleyruó ʋ́mʋ́ yie ŋnɩ ka, nyʋa yrɩlɩlɛ yɩ́, lé Zúfʋnyʋa nɩ́ yrá sáà lé bhʋ́ a tányɩɛ́, gàzɛ kʋ kúsu jɩ̀. Fɩ́ɛ́ lé bhʋ́anɩ nyɔbhleyruó ŋwɔ́ɔ yru kádʋʋ̀, ɩ́ ka ŋnɩ́ a, Zúfʋnyʋaá srʋ Pilátɩ mà, ɔ srʋ nyʋa lé a zɛzɩ̀à nyʋaá kʋ̀ kúsie jɩ̀ a bhɩɩ́ fɩ́ɛ́ lé a ká gàzɩ̀ɛ̀ ʋ́ sa à.

³² Lé sʋ́jàà yi lé á zɛzɩ̀à nyʋaá sɔ́ɔ́ ɔ yàsɔ́ kʋ kúsie jɩ̀ a bhɩɩ́, á zɛ tagà anɔɔ́ a bhɩɩ́, lé á zɛ sɔ́anɔɔ́ a bhɩɩ́.

³³ Mà á ŋnɩ Zozíi jɩ̀ lé á dʋdʋ̀ a, ɔ́ ya kú. Ɩ́ ka ŋnɩ́ lé a nɩ́ ɔ́ yɩ́ bhɩɩ́ zɛzɩ̀à.

³⁴ Mà sʋ́jàà nyièdɩ a sʋ́jàyʋ a múó kpla ɔ jrɛ̀ɛ̀ lé ɔ́ gblúu Zozíi a gbakɩ, mà ɔ́ gblúo a, nyú yà dòlú sɔ́ ʋ̀ wlʋ́ ɔ́ mʋ́.

³⁵ Nyɔɔ́ ɔ̀ nɩ ŋwɔ́nɩ́srɩ̀lɛ a, wɔlɩ́ɛ́ ɔ́ cí a, ɔ́ɔ yɛ́ ɩ́ dá, lé ɩ́ ŋwɔ́ɔ sáà cɩ́cásaà. Naa ɔ ŋwɔ́nɩ̀srɩ̀lɛ̀ɛ̀ cɩ́cása ɛ́ ŋwɔ́ɔ. Lé ɔ́mɔ́ mɔ̀glʋ̀ ka sáà wɔlɩ́ɛ́ ɔ́ cí a ɩ cɩ́cása, naa ɔ́ɔ cíi lé a sɛ́fʋɔ́ a kɩ́ɩ́ duo tɔ̀.

³⁶ Wɔlíɛ́ fɩ́ɛ́ lɩ̀à, ɩ́ɩ ŋnɩ lé Lagɔ̀bɔ̀gʋ̀ɔ̀ a mnɩ́ a wɔlɩ́ɛ́ ká neé sralɔɔ̀: A nɩ́ ka ɔ fée zɛ.

³⁷ Lé á jɩ́jrà wá sɔ́kʋ́ mà: Nyɔɔ́ kɔ̀ɔ gbakɩ á bhá jrɛ̀ lé á gblúu a, ɔ́mɔ́ á na ká kɛ́zɔ̀ klʋ́ gà.

Á zízìè Zozíi a gàzɛ̀ɛ̀

³⁸ Wɔlíɛ́ fɩ́ɛ́ lɩ̀à plɩ́ a, dúó ʋ̀ ŋwɔ́ɔ Alimatée a, mɔ̀ɔ a nyɔɔ́ á wlele wá Zɔ̀zɛ́fʋ a, lé ɔ̀ ŋwɔ́ɔ wá sáà Zozíi a kʋjɩ̀nyɔ a, mà cémʋ́ ɔ́ gúle wá Zúfʋnyʋa a cífɩnyʋa kʋ́ a, zúzùòlɩ̀ mʋ́ ɔ́ jɩ́ ɔ́ wá kʋ́. Ɔ́mɔ́ Zɔ̀zɛ́fʋɔ́, ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. Ɔ́ cí saá a, Pilátɩ nɩ́ mɔ̀ɔ wɔlɩ́ sa à, ɔ́ɔ nyɛ́ ɔ́ lɔ̀. Lé Zɔ̀zɛ́fʋ mʋ ʋ́ gàzɛ̀ɛ̀ sa ka.

³⁹ Lé Nikodémʋɔ́ ɔ̀ mʋ wá tányɩ a múó a dɩ́bɩ Zozíi yɛ́ ka a, ɔ́ la nɔ́nʋ́nyokwié á wlele mílɩ a, lé nɔ́nʋ́nyokwi ànɩ̀ɛ̀ ɩ̀ ŋwɔ́ɔ alowɛ́sɩ a, lé ɔ́ bhlábhlalɩ mʋ́, ɩ́ zumole yi kilóoyuo a glɩ̀ gbɩ́ wɛ́ɛ̀.

⁴⁰ Lé áa sɔ́ɔ́ bháʋ́ Zozíi a gàzɛ̀ɛ̀. Á mʋ a, á bhá loku lé á pɩpɩɛ́ lé á bʋ́ɛ́ nɔ́nʋ́kpʋ cémʋ́ Zúfʋnyʋa nie a kúdùkuo lé á zízie áa.

⁴¹ Mà á kʋ Zozíi kúsuó jɩ̀ a, zalɩdɛ́ɛgbo a múó kʋ ʋ́ gɔ̀, a mnɩ́ kʋ lésuyalʋ, a nɩ́ à zà mɔ̀ɔ nyɔ zízìè.

⁴² Lé Zúfʋnyʋa a nyɔbhleyruó yie ŋnɩ ka, bhè lésuyalʋ mɛ́ ʋ́ gɔ̀ a, ɩ́ ka ŋnɩ́ lé Zɔ̀zɛ́fʋ yà Nikodémʋ sɔ́ zízìèlòò mɔ̀ɔ.