Matíe 7 - Neyo

Yɩ́ a ŋányɩ bhè yɩ́ a sipɩʋ so a núnúó

¹ «A ná cí a lía nyumosa, bhè a nɩ ka á nyumosa cí.

² Cémʋ́ a bhlile a lía kʋ́ a, sɩ́tɛ̀ mʋ́ á na ká amɔ kʋ́ bhli. Lɛ́ a bhá lé a mɩ́zɩɛ a, ɛ́mɛ́ á na ká sáà bhá lé a ká amɔ mɩ́zɩ̀.

³ Cégbá mʋ́ ɩ́ kʋ lé ɩ̀ liyʋ a yɩ́ a mnɩ́ a ŋányɩɛ́ ɩ́mɩ́ ɩ̀ yɛ́ kʋ́ bhè nà nɩ yɩ́ a sipɩʋ kʋ̀ mɔ̀ a, nɩɩ́ yɩ́ʋ́ kʋ́ a?

⁴ Ɛ̀kʋ̀ʋ̀ lé ɩ̀ srʋɛ ɩ̀ liyʋɔ́ mà: Kʋ ʋ́ ká mɔ̀ɔ nà yɩ́ a mnɩ́ a ŋányɩplʋɔ́ kʋ̀ mɔ̀ɔ a sa à, bhè na nɩ sipɩʋɔ́ kʋ̀ nà yɩ́ a mnɩ́ áa?.

⁵ Yrʋnyɔɔ̀, sa fɩ́ɛ́ mɔ̀ɔ nànɩ yɩ́ a mnɩ́ a sipɩʋɔ́, bhʋ́ ɩ̀ yi kʋ́ yɛ́, lé ɩ̀ yi mɔ̀ɔ ɩ̀ liyʋɔ́ a nɩ yɩ́ a ŋányɩɛ́ mɔ̀ɔ sa à.

A ná nyɛ́ vʋ̀ʋ Lagɔ̀duú a lɛ́

⁶ Lɛ́ ɛ̀ ŋwɔ́ɔ Lagɔ a lɛ́ a, a ná nyɛ́ɛ́ vʋ̀ʋ, ɛ̀kʋ̀ʋ̀ a? Vʋ̀ʋ nɩ ka lɛ amɔ kʋ́ yrɩ́bha, ʋ nɩ ka lɛ amɔ mnemnè. A ná páa sáà a glìgbàlɩ bhuzàlɩ drɩ̀, ɛ̀kʋ̀ʋ̀ a? Bhuzàlɩ nɩ ka lɛ a glìgbàlɩ̀ɛ̀ jɩ̀ cécreè.

Zrazrʋ́, mʋ́mɔɛ́ lé kplu a bhiteé

⁷ A zraà mà á yi amɔ nyɛ́; a mʋ́mɔɔ̀, mà a yi yɛ́, a bhɩtɩ kpli, mà á yii ka a.

⁸ Mà nyɔ nɩ zra a, á nyɛ́ ɔ́, nyɔ nɩ mʋ́mɔ a, ɔ́ yɛ́; lé nyɔ nɩ bhɩtɩ kplu a, á kalʋʋ́.

⁹ A nyièdɩ a nyɔ gbá ɔ̀ kɔ̀ɔ̀ yʋ́ nɩ zrɔɔ́ flɔ́ɔbhuo lé ɔ̀ yió cɔ́kpalɩ́bhuo nyɛ́ à?

¹⁰ Ɩ́ zà ɔ nɩ zra zrɩ̀ lé ɔ̀ yió bɛbɛlɛ nyɛ́ à?

¹¹ Amɔ, mɔ́nyùmònyʋ̀àà lɩ̀à, a yì a yúó a námalɩ a nyɛ́ sa. A nɩ́ saá yì mà a Tʋ́ɔ́ ɔ̀ kʋ̀ lagɔɔ́ lé ɔ̀ kà námalɩɛ́ fɩ́ɛ́ a, nyɔ nɩ yrálɔɔ́ lɛ́ mʋ́ a, ɔ́ yi ɔ̀ mɛ́ nyɛ́ ɛ?

¹² Wɔlɩ́ɛ́ fɩ́ɛ́ a yrá lé nyʋa nɩ nɩ amɔ a, ɩ́mɩ́ a nɩ nɩ sáà nyʋa á zà! Wɔlɩ́ɛ́ lɩ̀à ɩ́mɩ́ Moyízɩ a Jràmáá yà Lagɔ a nékʋ́cinyʋaá sɔ́ a bɔ́gwɩ̀ɛ̀ yrálɛ àmɔ̀ mʋ́.

Sríni sɔ́ a dɔ̀

¹³ A blée srínitòyilɛ̀ɛ̀! Mà sríni kádàà, kwɩ́ a nyúzɔ á gà klʋ́, bhʋ́anɩ nyúzɔ̀ɔ̀ ʋ́ wlʋ̀ kʋ́, ʋ́mʋ́ nyʋa kɔ́kɔ́mnɩ́ bhlie.

¹⁴ Mà srínitòyilɛ̀ɛ̀ a nyúzɔ̀ɔ̀ ʋ́ bhlibhlie ka nyakalɩ kʋ́, nyʋaá à bhliú a, a nɩ́ zù.

Kpɔkplá Lagɔ a nékʋ́cinyɔ

¹⁵ A mányɩ kpɔkplá lagɔ̀ɔ̀ a nékʋ́cinyʋa kʋ́. Á yile amɔ mʋ́ bhlábhlɩ́ bhísakʋ́, bhè á di nyù nànɩ́ klá a mnɩ́ a vʋvʋvʋ̀ʋ.

¹⁶ Á nɩnɩgbɩ̀ɛ̀ ɩ́mɩ́ a na ká bhá lé a ká á yɩbhlɩ. A lɛ́bhɛɛ! A nɩ́ a zà glàyʋ nyníci kpaká yɩ́ sa à, lé á nɩ́ a zà sáà tɩtɔ nyníci su yɩ́ sa.

¹⁷ Suó ʋ̀ na a, námabhi ʋ́ trʋɛ, ɩ́zà suó ʋ̀ nyù a, nyumo bhi ʋ́ trʋɛ.

¹⁸ Náma su nɩ́ trʋ nyumobhi, lé nyumo su nɩ trʋ sáà námabhi.

¹⁹ Sié fɩ́ɛ́ ɩ̀ nɩ́ trʋ námabhi a, áa díí kʋ́ lé á pálɩɩ́ kosuú.

²⁰ Naa nyʋaá à cíé kpɔkplá Lagɔ̀wɔ̀lɩ̀ɛ̀ a, á nɩnɩgbɩ a na ká bhá lé a ká á yɩbhlɩɩ̀.

Cícíwɔlɩ yà nɩnɩgbɩ sɔ́ a dɔ̀

²¹ Nyʋa fɩ́ɛ́ à srʋɛ mɔ́ mà Kanyɔ, Kanyɔ a, a lɔ̀fɩ́ɛ́ ɛ̀ nɩ́ a ká Lagɔ a Léyibhlɩɛ́ a mnɩ́ pla! Mà nyɔ ká Lagɔ a Léyibhlɩɛ́ a mnɩ́ pla a, ɔ́ ka lé ɔ ká wɔlɩ́ɛ́ ɩ Tʋ́ Lagɔ̀ɔ̀ ɔ̀ kʋ̀ lagɔɔ́ a yrá a nɩ.

²² Tɩ́tɩ́ plɔyruo kʋ́, nyʋa kɔ́kɔ́mnɩ́ yi mɔ́ yrá mà: Kanyɔ, Kanyɔ, nà ŋnɩ́ mʋ́, à nɩ́ lɛ́ Lagɔ a niwɔlɩ cíi? Nà ŋnɩ́ mʋ́ à nɩ́ lɛ́ nyumozìzi jɩ́ɩ? Nà ŋnɩ́ mʋ́ à nɩ́ lɛ́ lɛ̀wɔ̀lɩ kɔ́kɔ́mnɩ́ɛ́ nɩɩ?

²³ Bhʋ́ na ká á srʋ mà: Nɩ́ a zà amɔ yɛ́, a wlʋ́ mɔ́ɔ yɩ́kʋ́! Bhàlʋ̀nyʋa yɩ.

Ghlɩ sɔ́ a núnúó

²⁴ Nyɔɔ́ nà kà wɔlɩ́ɛ́ fɩ́ɛ́ ɩ́ cí lɛ́ a, nú lé ɔ̀ kɩ̀ɩ̀ nɩ a, ɔ́ wlʋ́ mànɩ́ fíke nyɔɔ́ ɔ̀ pá ɔ wlʋ́ kíké wlú.

²⁵ Nyú yi bhla, ʋ́ yi gblʋ́ʋ, nyíé yi yíe, vʋ̀vɔ̀lʋ a céàna yi yi, mà cémʋ́ kíké wlú ɔ́ pá wlʋɔ́ a, ʋ nɩ́ bhli.

²⁶ Ɩ́ zà nyɔɔ́ nɩ̀ nú ná cícíwɔlɩ lé ɔ̀ nɩɩ́ nɩ a, bhʋ́anɩ nyɔɔ́ wlʋ́ mànɩ́ nɩnà nyɔ̀ɔ̀ ɔ̀ pá ɔ wlʋ nyíbòdú a mnɩ́ a.

²⁷ Nyú bhla lé nyɩ́é yíe lé vʋ̀vɔ̀lʋ kádʋ yi a, cémʋ́ ɔ́ wlʋɔ́ nyíbòdú a mnɩ́ ɔ́ pálʋʋ́ a, vʋ̀vɔ̀lʋ̀ɔ̀ yi a, ʋ́ bhli lé ʋ́ lɔ̀fɩ́ɛ́ ŋátɔ.»

²⁸ Mà Zozíi bhɩa cícíé zɔ̀ a, nyʋa fɩ́ɛ́ à pʋ ɔ cícíwɔlɩ nyúkwlí a, neé mnaá.

²⁹ Ɔ cícíwɔlɩɛ́ a mnɩ́ kʋ pɔ́wa, ɔ nɩ́ cɩ́a lɔ̀ a másɛnyʋa bhísakʋ́.