Matíe 6 - Neyo

Zozíi pápa cémʋ́ á nyɛ́ lɛ́ ŋazɩ̀nyʋa a

¹ «A mányɩ a Lagɔ̀nɔ̀nʋ̀ɔ̀ kʋ́, a ná nɩ dʋdʋ̀ dʋdʋ̀gbɩ nyʋa nɩ ka amɔ yɩ́gɔ̀ ŋwʋ́! A nɩ nɩ dʋdʋ̀ dʋdʋ̀gbɩ a, a Tʋ́ɔ́ ɔ̀ kʋ̀ lagɔɔ́ a, ɔ nɩ́ ka kɛ́zɔ̀ amɔ dàzɩ̀.

² Nɩ̀ nyɛ́ ŋazɩ̀nyɔ lɛ́ a, nà nɩ lé nyʋa ká saá yɩbhlɩɩ̀, cémʋ́ yrʋnyʋa nie lɛ́ zúfʋcɛcɩghlɩɛ́ a mnɩ́ yà tríi jɩ̀ sɔ́ a, áa nie sɩ́tɛ̀ lé nyʋa ká á dʋdʋ̀ lé a ká á ŋwnú fa. Náa srʋɛ amɔ cɩ́cása, a sɩ́tɛ̀ a wɔlɩ́ɛ́ ka ŋnɩ́ lé á ya wá má sɩsɔɔ́ dàzɩ̀.

³ Mà mɔ̀, nà lilisɔ nɩ nyɛ́ ŋazɩ̀nyɔ lɛ́ a, nà kɔmɩsɔ ná yɩbhlɩ saá.

⁴ Bhʋ́ a tányɩɛ́, lɛ́ɛ́ ɩ̀ nyɛ́ ŋazɩ̀nyɔ a, ɛ́ wɔlɩ́ nɩ́ flʋzɔ̀, bhʋ́alɛ́ ɩ̀ Tʋ́ Lagɔ̀ɔ̀ yì wɔlɩ́ɛ́ fɩ́ɛ́ a, ɔ́ yi kɛ́zɔ̀ mɔ̀ dàzɩ̀.

Cégbá mʋ́ á bhibhie a

⁵ A nɩ bhibhie Lagɔ a, a ná nɩ yrʋnyʋa bhísakʋ́, ámá á nynʋ́vʋlɛ zúfʋcɛcɩghlɩɛ́ yà nyɩ́zɛ̀glàgbɩ sɔ́ kʋ́, dɛ́ á yi kʋ lé á yi bhibhie lé nyʋa yi á dʋdʋ̀ a. Cɩ́cása a mnɩ́ a náa srʋɛ amɔ mà, Lagɔ ká á dàzɩ̀ a, ɩ́mɩ́ a nɩ mʋ́mɔ a, ɔ́ ya wá ámá sɩsɔɔ́ dàzɩ̀.

⁶ Mà mɔ̀, nɩ̀ cí mànɩ́ kà Lagɔ bhibhie a, pla wlʋdrèè mnɩ́ yrè nɩ́ kʋ a lé kà bhibhie, mà ɩ̀ Tʋ́ Lagɔ̀ɔ̀ ɩ̀ cílelɛ́ gɔ̀ a, ɔ́ kʋ dɛ́ɛ́ ɩ̀ zúzùò a, wɔlɩ́ɛ́ fɩ́ɛ́ ɩ̀ yrá a, ɔ́ yìi, ɔ́ yi mɔ̀ dàzɩ̀.

⁷ A nɩ bhibhie a, wɔlɩdrèè a yrálɛ́ áa múóó a ná bhá á kʋ́ a ka á sábhla lé a ká mʋ́ trʋma, nyʋaá à nɩ́ Lagɔ yì a, bhísakʋ́; á dùòkʋ́ a nɩ cí wɔlɩ́ kɔ́kɔ́mnɩ́ a, bhʋ́ Lagɔ yi á bhibhiewɔlɩɛ́ nú.

⁸ A ná nɩ ámá bhísakʋ́, mà a Tʋ́ Lagɔ yì wɔlɩ́ɛ́ a yrá a, fɩ́ɛ́ lé a ká lɛ́ bhibhiè.

Zozíi cɩ́a ɔ́ kʋjɩ̀nyʋ̀àà cémʋ́ á bhibhie Lagɔ a

⁹ Sɩ́tɛ̀ mʋ́ a ka lé a ká bhibhie: À Tʋ́ɔ́ ɔ̀ kʋ ɔ̀ lagɔɔ́ a, Nà ŋnɩ́ɛ́ ɩ blɔ̀.

¹⁰ Nà nɩnɩgbɩɛ ɩ yi Na wàwàlɛɛ́ kʋ lagɔɔ́ a ɛ Kwlíi sáà dʋ̀dʋ kʋ́!

¹¹ Nyɛ́ àyɩ zɩmnɛ́ a yruó a lelilɛ,

¹² Cémʋ́ à ciele nyʋa a, Cie àmɔ̀ sɩ́tɛ̀,

¹³ Naá sa àmɔ̀ wlɩgɔ̀, Lé a ka nyumoé nɩ, Mà sa ʋ́ ayɩ neé! [Máà mɔ̀ zi kʋ́, Mɔ̀ kà pɔ́wa lé mɔ̀ à ŋwʋ́ɛ́ kpá Kɔ́ lé kɔ́ a mnɩ́! Ɩ kʋ saá.]

¹⁴ A nɩ cie a lía a á nyumoé a, a Tʋ́ɔ́ ɔ̀ kʋ ɔ̀ lagɔɔ́ a, ɔ́ yi sáà amɔ ciè.

¹⁵ Mà a nɩ nɩ́ a lía cie a, a Tʋ́ɔ́ kʋ̀ lagɔɔ́ a, ɔ nɩ́ ka lɛ sáà amɔ ciè.

Zozíi pápa cémʋ́ á pʋ́lɛ kleé a

¹⁶ A nɩ pʋ́ʋ kleé a, a ná nyɔnɔ̀ a kwɛ́ɛ́ yrʋnyʋa bhísakʋ́: Ámá nɩ̀ pʋ́ʋ kleé lé à nyɔnɔ a kwɛ́ lé nyʋa ká saá yɩbhlɩ mà kleé mʋ́ á pʋ́lɛ. Cɩ́cása a mnɩ́ náa srʋɛ amɔ mà á nɩ pɛ́ɛ fɩ́ɛ́ ɛ́mɛ́ á yɛ́ lɛ́ sɩ́tɛ̀.

¹⁷ Mà mɔ̀, nɩ̀ pʋ́ʋ kleé a, wɔlɔ klʋ́ lé nyidò dàŋwóni,

¹⁸ bhè nyʋa nɩ ka saá yɩbhlɩ mà, kleé mʋ́ ɩ̀ pʋ́lɛ, mà ɩ̀ Tʋ́ Lagɔ yɛ́ mɔ̀ kʋ́, ɔ́ a múó coco yì saá mà kleé mʋ́ ɩ̀ pʋ́lɛ a, ɔ́mɔ́ nà kà mɔ̀ dàzɩ̀.

Zɩkpa zɔ̀ a léyri lé lagɔ̀duú a léyri

¹⁹ A nɩ nɩ a, a ná mʋ́mɔ zɩkpa zɔ̀ a léyri a lilíé, mà ŋwɔnʋ́ lé wlɔ̀sʋ ʋ́ʋ ŋátɩɩ́, lé ghlíighlíinyʋa wáta kpli lé á yríií.

²⁰ Mà lagɔ̀duú a léyri a lilíé a nɩ mʋ́mɔɔ̀, mɔ̀ɔmɔ̀ nɩ́ ŋwɔnʋ́ yà wlɔ̀sʋ sɔ́ kʋ, lé ʋ kɩ́ɩ́ ŋáta lé ghlíighlíinyʋa nɩ́ sáà mɔ̀ɔmɔ̀ kʋ lé a ká kpli wáta lé a ká ghlíi.

²¹ Mà dɛ́ nyɔ ŋwʋ́lɛ ɔ́ gbakalɩmalɛ sá a, bhʋ́ ɔ duo kʋɛ.

Yɩ́ ŋwɔ́ɔ yrúkanyɔ a nápɛ

²² A lɛ́bhɛɛ, yɩ́ ŋwɔ́ɔ nyɔ a nápɛ. Nà yɩ́ nɩ kplɔ a, ɛ́ ŋana nà lɔ̀fɩ́ɛ́ kʋ́.

²³ Mà nà yɩ́ nɩ bhlá mɔ̀ a, nɩ́ yɛ́ kʋ́, cúcú a mnɩ́ ɩ̀ kʋ̀. Nà nápɛɛ́ kʋ̀ mɔ̀ mʋ́ a, ɛ nɩ nɩ́ ŋana a, cúcúkpe a mnɩ́ ɩ̀ kʋɛ!

Lagɔɔ, mà moníi

²⁴ Nyɔ nɩ́ ka míi lé ɔ ká kanyʋa a sɔ́ gà zrɩɩ̀. Ɔ kɩ́ɩ́ nɩ a, ɔ́ yi múó mʋ́ gblɩ̀, lé ɔ́ yi ànɔ wà. Ɩ́zà ɔ yà múó sɔ́ yi núnuù lé ɔ nɩ́ ka ànɔ yɩ́ sra. Nyɔ nɩ́ ka míi lé ɔ ká Lagɔ gà zrɩɩ̀, lé ɔ ká moníi gà zrɩɩ̀.

Lagɔ nyɛ́ àmɔ̀ lɩ́ɛ́ fɩ́ɛ́ à yrá a

²⁵ Náa srʋɛ ɩ́ lɛ́ amɔ mà: A ná bhɔtɔ a zɩkpa a zà lé a ká cí mà: Bhè dɛ́gbá à yi lelilɛ yɛ́ lé à yi li a? A ná bhɔtɔ sáà á kpɩkpɩ a zà lé a ká cí mà: Bhè dɛ́ gbá à yi kótu bhá lé à yi mʋ́ pla a? Nyɔ a zɩkpa ka gbʋ́ lé á zi lelilɩ kʋ́. Lé nyɔ a kpɩkpɩ ka sáà gbʋ́ lé ɩ́ zi kótu kʋ́.

²⁶ A dʋdʋ̀ lagɔɔ́ a nimni, ɩ nɩ́ glɩ lelilɩ, ɩ nɩ́ sáà lelilɩ a saŋwʋ̀da ka, sɩ́tɛ̀ ɩ́ kʋ bhè a Tʋ́ɔ́ ɔ̀ kʋ̀ lagɔɔ́ a ɔ́ fínilɩɩ́! Bhè nyɔ ka gbʋ́ lé ɔ́ zi nimne kʋ́ a!

²⁷ Á nyièdɩ a nyɔ gbá yi míi lé ɔ̀ yi bhobho àààn lé ɔ́ bhobhoé yi yru a múó bhá lé ɛ́ yi ɔ́ zɩkpa zɔ̀ a yri kʋ́ ŋwʋ́ a?

²⁸ Bhè lɛ́gbá kʋ̀ʋ lé kóti wɔlɩ́ bhlá amɔ a? A dʋdʋ̀ caá flɛ́lɩ jɩ̀ a, a dʋdʋ̀ cémʋ́ ɩ námɛ kʋ a, ɩ nɩ́ zrɩɩ, ɩ nɩ́ bhla sáà loku.

²⁹ Mà náa srʋɛ amɔ mà sɩ́tɛ̀ ɩ́ kʋ lé lóo á wlele wá Salomɔ́ɔ a, ɔ̀ li wá kɔ́ a léyrié fɩ́ɛ́ a, ɔ mʋ́plakotu a námɛ nɩ́ flɛ́lɩyie a múó námɛɛ́ zi.

³⁰ Klá a mnɩ́ a pití kʋɛ ʋ́ zɩmnɛ́, lé zrɩ nɩ zɩ a, á ŋwʋ́ɩ́ kosu, sɩ́tɛ̀ ɩ́ kʋ bhè Lagɔ yrʋ́ɩ, amɔ Lagɔ nɩ́ ka míi lé ʋ́ ká yrʋ́ʋ? A Lagɔ a fádùò nɩ́ zù!

³¹ A ná bhɔtɔ lé a ká cí mà: Bhè dɛ́gbá à yi lelilɛ yɛ́ɛ a?

³² Bhʋ́anɩ wɔlɩ́ɛ́ fɩ́ɛ́ lɩ̀à, nyʋaá à nɩ́ Lagɔ yì a, ámá bhobuí. Mà amɔ, lɛ́ a gbʋ́ nɩ bhlá amɔ a, a Tʋ́ɔ́ ɔ̀ kʋ̀ lagɔɔ́ a, ɔ́ yìi.

³³ A jɩ́ fɩ́ɛ́ Lagɔ a Léyibhlɩɛ́ a mnɩ́ a námawɔlɩɛ́ kʋ̀ mɔ̀ a kʋ́, a bhli lagɔ̀nyùzɔ, bhʋ́ lɩ́ɛ́ fɩ́ɛ́ a yrá a, Lagɔ yi amɔ mɩ́ nyɛ́.

³⁴ A ná bhɔtɔ kɛ́ɛ̀lɛ a zà! Mà zrɩ̀ɛ̀ ɛ̀ zɩɛ a, ɛ́mɛ́ la ɛ́ wɔlɩ́. Yru lé ʋ́ ka ʋ mɔ̀glʋ̀ a wɔlɩ́.»