Online Bible

Matíe 3 - Neyo

Zán Batísɩ cí Lagɔ̀wɔ̀lɩ̀ɛ̀
( Málɩ́kɩ 1.2‑8 ; Lúkɩ 3.15‑17 ; Záan 1.19‑28 )

¹ Bhʋ́ a tányɩɛ́, Zán Batísɩ yi Zudée a bhlɩ́ a zɩkpɩkɔfʋ́ a mnɩ́, ɔ́ pá wɔlɩ́

² ɔ́ nie: «A cɩ́cɩ á nɩnɩgbɩ mà Lagɔ a Léyibhlɩɛ́ a yiyitanyɩ ya ʋ́ mɛ́.»

³ Ɔ́mɔ́ Záan Batísɩɛ́, ɔ́ wɔlɩ́ Lagɔ a nékʋ́cinyɔ Ezayíi cíé wá mà: Nyɔ pá wɔlɩ́ zɩkpɩkɔfʋ́ a mnɩ́, Ɔ́ cíé lé ɔ́ nie mà, A gɩglà Kanyɔ a nyúzɔ̀ɔ̀! A srí ɔ nyízɛ̀ɛ̀ sá.

⁴ Záan pla mnamneku kotu mʋ́, lé ɔ́ gʋa mneku bɛ̀tʋ mnɩ́. Ɔ́ lie kpáàkpɩ́, lé ɔ́ mɛlɛ lovúkpʋ.

⁵ Zelízalɛ́mʋ yà Zudéebhlɩɛ́ a mnɩ́ a nyʋaá sɔ́, lé Zrʋdɛ́ɛnyié gɔ̀ a nyʋaá a lɔ̀fɩ́ɛ́, á yió gɔ̀,

⁶ lé á sa á nyumoé mnɩ́, lé Záan ŋwʋ́ɛ́ á nyú wlú Zrʋdɛ́ɛnyié a mnɩ́.

⁷ Záan yɛ́ kɔ́ɔ̀kʋ́ Falizɩ́ɛnyʋaá yà Sadisɩɛ́nyʋaá sɔ́ a kpá lé á yió gɔ̀ nyú wlú ŋwʋ̀ ka a, ɔ́ srʋ á mà: «Mónyùmònyʋa yɩ, amɔɔ́ nyù mnɩ́ bɛbɛlɩ bhísakʋ́ a, ɔ̀ pápa amɔ cémʋ́ á nie lé á gúle Lagɔ a dɩŋwʋ̀yrùò ʋ̀ yie áa?

⁸ A nɩ námagbɩ, wɔlɩ́ɛ́ a na ká nɩ lé ɩ̀ kà nyʋa srʋ mà a ya cɩ́cɩ a!

⁹ A ná srʋ flɛ́flɛ̀sa a nyoku mà: À tɩtɔ ɔ̀ ŋwɔ́ɔ Ablaámʋ. Mà náa yie lɛ́ amɔ srʋ ka mà, Lagɔ nɩ wà a, ʋ́ yi cɔ́kpalɩ́ɛ́ lɩ̀à Ablaámʋ a yúó mʋ́ pláa.

¹⁰ A lɛ́bhɛɛ, dɔ̀mɛ̀ɛ̀ ya yrɩ̀lɩ̀ ɛ ká suó a bhlíkpié dédìè: suó ʋ̀ nɩ́ trʋ námabhi a, áa dí ʋ́ kʋ́ lé á pálʋʋ́ kosuú.

¹¹ Mɔ́ɔ, náa ŋwʋ́ɛ́ amɔ nyú wlú lé a ká a nyumogbɩ̀ɛ̀ fɩ́ɛ́ a gbʋ́ wlʋ́, mà nyɔɔ́ ɔ̀ yie mɔ́ɔ bɩ́ a, ɔ́ ka fɩ́ lé ɔ́ zi mɔ́ɔ kʋ́. Nɩ́ ɔ sí a mɔ̀ɔ sasʋ́ neé bhɩa. Ɔ́mɔ́, Blɔ̀blɔ̀zùzùò yà kosu sɔ́ mʋ́ ɔ́ na ká amɔ nyú wlú ŋwʋ́.

¹² Ɔ́ gbá bɩ́tɛ́ɛ́ mʋ́ ɔ́ na ká pʋ a wlɩɩ́, ɛ́mɛ́ ɔ́ na ká bhá lé ɔ ká fɩfɩɛ́ yà yʋ́ɔ́ sɔ́ yɩ́ sɩsa à. Ɔ ká yʋ́ɔ́ wlʋ kʋ ŋwʋ́, ɩ́zà fɩfɩɛ́, ɩ́mɩ́ na ɔ ká kosuú páa lé ɩ ká si. Bhʋ́anɩ kosuó ʋ̀ nɩ́ nyúmo kɔ́ɔ̀kɔ́.»

Zán Batísɩ ŋwʋ́ Zozíi nyú wlú
( Málɩ́kɩ 1.9‑11 ; Lúkɩ 3.21‑22 )

¹³ Tányɩ a múó Zozíi wlʋ́ Galilée, lé ɔ́ yi Zrʋdɛ́ɛnyié gɔ̀ Záan kɔ́ɔ́ nyú wlú ŋwʋ́.

¹⁴ Záan nɩ́ fɩ́ɛ́ ŋwnʋ́ʋ̀, ɔ́ srʋ Zozíi mà: «Mɔ̀ kà lé ɔ̀ kà mɔ́ɔ nyú wlú ŋwʋ́ a, mɔ̀ yie lé ɔ̀ nie mà, mɔ́ɔ nɩ̀ ŋwʋ́ mɔ̀ nyú wlúu!»

¹⁵ Zozíi anɩ́: «Ŋwnʋ́ lé ɩ nilo mà sɩ́tɛ̀ mʋ́ Lagɔ yrálɩɩ́.» Zozíi cí sɩ́tɛ̀ a, Záan ɔ́ɔ ŋwnʋ́ yɩ́.

¹⁶ Lé Záan ŋwʋ́ Zozíi nyú wlú lé ɔ́ wlʋ́ nyɩ́é. Mà ɔ́ wlʋ́ kɔ́ɔ̀kʋ́ nyɩ́é a, lagɔ kalɔ klʋ́ ɔ́ zà, lé Blɔ̀blɔ̀zùzùò kwlíloó jɩ̀ kpóòkpú bhísakʋ́.

¹⁷ Lé niwɔlɩ wlʋ́ lagɔɔ́ lé ɩ́ kwlíi, ɩ́ anɩ́: «Ɔ̀lɩa, ŋwɔ́ɔ ná Wàwàyʋ ɔ́mɔ́ ɩ́ gbázɩ̀ mʋ́!»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy