Matíe 12 - Neyo

Kleé bhlá Zozíi a kʋjɩ̀nyʋ̀àà

¹ Bhʋ́ a tányɩɛ́, Zúfʋnyʋa a nyɔbhleyru kʋ̀ʋ bhè Zozíi yà ɔ́ kʋjɩ̀nyʋ̀àà sɔ́ plɩ́lɛ bléelàgbɩ a mnɩ́ á mnɛ. Mà kleé bhláá a bhʋ́ a yruó kʋ́ a, ɩ́ ka ŋnɩ́ lé á kpla bléeyʋɔ́ lé á li.

² Mà tányɩɛ́ mʋ́ Falizɩ́ɛnyʋa yɛ́ a, á srʋ Zozíi mà: «Nà kʋjɩ̀nyʋ̀àà, wɔlɩ́ɛ́ á nie lɛ́ a, à Jràmáá a mnɩ́ nyɔbhleyruó kʋ́, nyɔ nɩ́ nɩ sɩ́tɛ̀.»

³ Bhʋ́ Zozíi srʋ á mà: «Tányɩɛ́ mʋ́ kleé bhlá wá Davídɩ yà ɔ kʋnamnɩnyʋaá sɔ́ a, ɩ́ wɔlɩ́ɛ́ ɔ́ nɩ wá a, a nɩ́ à zà mɩ́ Lagɔ̀bɔ̀gʋ a mnɩ́ zɛɛ?

⁴ Davídɩ pla wá Lagɔ̀wlʋ̀kádʋ̀ɔ̀ a mnɩ́, lé ɔ yà ɔ kʋnamnɩnyʋaá sɔ́ bhá wá ʋ́ bʋbɔ̀flɔ̀ɔ̀ lé á li wá mʋ́ a, bhè á jràmá a mnɩ́, ɔ ya ɔ́ kʋnamnɩnyʋaá sɔ́ nɩ́ ka lé a ka la mʋ́ li, Lagɔ̀bʋ̀bɔ̀nyʋ̀àà a múó kà la ʋ́ lɔ̀.

⁵ Ɩ́ zà a nɩ́ à zà Moyízɩ a lɔ̀ɔ̀ zɛɛ, cémʋ́ mʋ́ Lagɔ̀bʋ̀bɔ̀nyʋ̀àà mɔ̀glʋ̀, a nɩ mʋ Lagɔ̀wlʋ̀kádʋ̀ɔ̀ a mnɩ́ lé a nɩ́ ŋwʋ́ wá nyɔbhleyruó kpá a, sɩ́tɛ̀ ɩ́ kʋ bhè a nɩ́ à zà jràmá bhli.

⁶ Ná yie yɩ́ lɛ́ amɔ srʋ ka mà, wɔlɩ́ɛ́ kʋ̀ dɛ́ àmɔ̀ nyièdɩ a, ɩ́ ghlí lé ɩ́ zi Lagɔ̀wlʋ̀kádʋ̀ɔ̀ kʋ́!

⁷ A nɩ yì Lagɔ̀bɔ̀gʋ a mnɩ́ a wɔlɩdrèè ŋwɔ́ɔ mà: Ŋazɩ̀dùò ɩ́ bhá mɔ̀ɔ lé ɩ́ zi bʋbɔ̀lɩ kʋ́. A nɩ yì la mɩ́ a, a nɩ́ ka la nyʋa lɩ̀à flɛ́flɛ gbʋ wlú ŋwʋ́.

⁸ Nyɔɔ́ a Yuwliyʋɔ́ ɔ́mɔ́ ŋwɔ́ɔ nyɔbhleyruó a másɛ.»

Zozíi yalɩma glɔ̀gbɩbhlanyɔ

⁹ Zozíi wlʋ́ ʋ́ a, ɔ́ mʋ lé ɔ́ pla a zúfʋcɛcɩwlʋɔ́ a mnɩ́.

¹⁰ Mà nyɔ a múó kʋ mɔ̀ɔ ɔ́ ka kúkúglɔ̀gbá, naa Falizɩ́ɛnyʋaá ká Zozíi zɔ̀ sa lé a kɔ́ gbʋ́ nyɛ́ a, á yrɔ́ɔ́ mà: «À jràmá a mnɩ́, nyɔ yi míi lé ɔ́ yi gupuonyɔ yalɩma nyɔbhleyruó kʋ́ʋ?»

¹¹ Bhʋ́ Zozíi yrá á mà: «A nyièdɩ, nyɔ gbá ɔ̀ yi bhlábhlɛ́ a múó coco ka lé bhlábhlɛ́ɛ́ yi bhúkugba bhli nyɔbhleyruó kʋ́ lé ɔ̀ nɩ kɛɛ́ mɔ̀ɔ sa a?

¹² Bhè yrúkanyɔ ka gbʋ́ lé ɔ́ zi bhlábhlɛ́ kʋ́! Ɩ nɩ kʋ saá a, a jràmáá a mnɩ́, nyɔ yi míi lé ɔ́ yi nyɔbhleyruó kʋ́ námasa nɩ.»

¹³ Zozíi bhɩa cícíé zɔ̀ a, ɔ́ srʋ nyɔɔ́ mà: «Gbáa nà sɔɔ́ mʋ́!» Nyɔɔ́ gbáa ɔ́ sɔɔ́ mʋ́ a, ɔ́ yalɩma, ʋ́ plɩ ànʋ̀ɔ̀ bhísakʋ́.

¹⁴ Mà Falizɩ́ɛnyʋaá flʋ zɔ̀ a, á núnu lé cémʋ́ á na ká nɩ lé a ká Zozíi bhlá a, a kɩ́ɩ́ bhobho.

¹⁵ Tányɩɛ́ mʋ́ Zozíi yɩbhlɩ saá mà á na kɔ́ɔ́ bhlá a, ɔ́ wlʋ́ bhʋ́anɩ dɛ́ɛ́ lé ɔ́ mʋ. Mà Nyʋa kɔ́kɔ́mnɩ́ jɩ́ ɔ́ kʋ́. Á nyièdɩ a gupuonyʋa fɩ́ɛ́, ɔ́ yalɩmalaá

¹⁶ mà ɔ́ nyɛ́ á tába lé ɔ́ srʋ á mà: «Á ná cíi ná wɔlɩ́ nyɔ gɔ̀!»

¹⁷ Lé cémʋ́ Lagɔ a nékʋ́cinyɔ Ezayíi cí wá a, ɩ́ ká neé sralɔɔ̀.

¹⁸ Ɔ́ cí wá mà: A lɛ́bhɛɛ, ná cóyʋɔ́ lɩ̀à a, ɔ́mɔ́ ɩ́ bhá mɔ̀ɔ, Ɔ́mɔ́ ŋwɔ́ɔ ná Wàwàyʋ ɔ́mɔ́ ná zuzu wà. Ɔ́mɔ́ jɩ̀ na ká ná Blɔ̀blɔ̀zùzùò ŋwʋ́ lé ɔ̀ kà bhlɩ́ɛ́ fɩ́ɛ́ jɩ̀ plɩ́ɩ, Lé ɔ̀ kà ná námasaá bhlɩ́ɛ́ fɩ́ɛ́ a nyʋa gɔ̀ cíi.

¹⁹ Ɔ yà nyɔ sɔ́ nɩ́ ka lɩ́kpɩ̀, ɔ nɩ́ ka yrè sa à. Lé nyɔ nɩ́ ka sáà tríi ɔ lɩ́kpɩwɔlɩ nú.

²⁰ Zúzù vàà à glelolɛ́ ʋ́ mʋ́ a, ɔ nɩ́ ka á zɛ, Lé ɔ nɩ́ ka nápɛɛ́ ɛ̀ lʋɛ a nyúmoò, Sɩ́tɛ̀ mʋ ɔ́ na ká nɩ àààn, lé Lagɔ a námasa a, ká kʋ́ zi.

²¹ Lé bhlɩ́ɛ́ fɩ́ɛ́ kɔ́ɔ́ duo tɔ̀.

Zozíi yà Dɩ́blʋ̀ɔ̀ sɔ́ nɩ́ céamúó ŋwɔ́ɔ

²² Tányɩ a múó, nyʋa fa nyɔɔ́ nyumozùzu kʋ jɩ̀ a, Zozíi gɔ̀. Nyɔɔ́ nɩ́ yɛ́ kʋ́ ɔ nɩ́ cí lé Zozíi yalɩmalɔɔ́, bháa ʋ́ jɩ̀ a, ɔ́ cíé yɩ́ lé ɔ́ yɛ́ yɩ́ kʋ́.

²³ Mà nyʋa fɩ́ɛ́ à yɛ́ ɩ́ dá a, neé mna a, á anɩ́: «Davídɩ a Yuwliyʋɔ́ ɔ́mɔ́ nɩ́ lɛ́ dɛ́ kʋʋ?»

²⁴ Mà Falizɩ́ɛnyʋaá nú wɔlɩ́ɛ́ nyʋaá cíé a, á anɩ́: «Nyumozùzùò á wlele Bezebúlʋ, ʋ̀ kámalɛ nyumozìzìè fɩ́ɛ́ a, ʋ́mʋ́ nyɛ́ nyɔ lɩ̀à pɔ́wa lé ɔ́ jɩ́lɛ nyumozìzi.»

²⁵ Mà cémʋ́ Zozíi yì a yɩ́ a mnɩ́ a wɔlɩ́ a, ɔ́ srʋ á mà: «Léyibhlɩ nɩ dúlo mʋ́ lé ɛ nɩ bhla kʋ́ a, ɛ́ɛ bhɩa. Lé dú yà lɔ́lɔ́kpa sɔ́ nɩ́ sáà zɩkpa zɔ̀ kʋ lé ɩ ká mʋ́ dúlò ɩ ká kʋ́ bhla, lé ɩ nɩ́ ka ʋ́ bhɩa.

²⁶ Naa, Dɩ́blʋ̀ɔ̀ ŋwɔ́ɔ nyumozùzu a cífɩ a, ʋ nɩ jɩ́ɩ nyumozùzu a, ʋ nɩ́ ya ʋ nyoku tʋ́ fa a? Cégbá mʋ́ ʋ léyibhlɩɛ́ yi àyɩ ʋ́ kʋ a?

²⁷ Bezebúlʋ nɩ nyɛ́ mɔ́ɔ pɔ́wa lé ká nyumozìzi jɩ́ a, bhè a nyʋaá, ɔ̀ nyɛ́ á pɔ́wa lé á jɩ́lɛ nyumozìzi á? A nyʋaá mɔ̀glʋ̀ nà kà kɛ́zɔ̀ amɔ plɔɔ.

²⁸ Mà Lagɔ̀zùzu a ŋnɩ́ mʋ́ nɩ jɩ́ɩ nyumozìzi a, ná srʋɛ amɔ mà Lagɔ a Léyibhlɩɛ́ ya amɔ gɔ̀ ŋnɩ.

²⁹ Bhè cégbá mʋ́ á yi nyɔɔ́ kà fɩ́ a gbó pla, lé á yi ɔ́ kakalɩɛ fɩ́ɛ́ gɔ̀ bhá lé a nɩ́ kɔɔ́ fɩ́ɛ́ gʋa a? Áa gʋɔ́ fɩ́ɛ́, bhʋ́ á yi míi lé á yi ʋ́ ɔ kakalɩ bhá.

³⁰ Nyɔɔ́ yɔ́ɔ̀sɔ́ à nɩ́ núnu a, ná gblɩ̀nyɔ kʋ̀ʋ. Nyɔɔ́ nɩ nɩ́ mɔ́ɔ kʋ́ fa lé à kà nyʋa kʋ́ gʋ́gwlà a, ɔ́ɔ jɛlaá sá.

³¹ Ɩ́zà ná srʋɛ sáà amɔ mà, yrúkanyʋa á bhàlʋ̀ɔ̀ á nie Lagɔ a, ʋ́ yi cielo, nyumoé á cíé Lagɔ a zà a, ɛ́ yi cielo, mà nyɔ ká Blɔ̀blɔ̀zùzùò nyumowɔlɩ kʋ́ cí a, bhʋ́anɩ nyɔɔ́ nɩ́ ka cieloò.

³² Nyɔ yi nyumosa a céàna Nyɔɔ́ a Yuwliyʋɔ́ gɔ̀ cíi, ɔ́ yi cielo. Mà nyɔ ká Blɔ̀blɔ̀zùzùò nyumosa gɔ̀ cíi a, ɔ nɩ́ ka cieloò zɩmnɩ́ lé kɔ́ɔ̀kɔ́.

Suú lé ʋ bhí

³³ A lɛ́bhɛɛ suú nɩ ná a, ʋ bhí náa, mà ʋ nɩ nɩ́ yà a, ʋ bhí nɩ́ náma a. Lé suú a bhí á bhá lé á yɩbhlɩlʋʋ́.

³⁴ Amɔɔ́ wlʋ́ mànɩ́ bɛbɛlɩ a, cégbá mʋ́ náma niwɔlɩ yi amɔ neé wlʋ́ a, nyumo nyʋa yɩ? Wɔlɩ́ɛ́ kʋ̀ á di a yɩ́ a, ɩ́mɩ́ wlʋ́ɛ́ a neé.

³⁵ Nyɔ́ɔ́ ɔ̀ kɔ̀ɔ̀ gbɩ́ ná a, náma niwɔlɩ wlʋ́ɛ́ ɔ duo a yɩ́. Ɩ́zà nyɔɔ́ ɔ̀ kɔ̀ɔ gbí nyù a, nyumo niwɔlɩ wlʋ́ɛ́ ɔ duo a yɩ́.

³⁶ Náa srʋɛ amɔ mà, Lagɔ a tɩ́tɩ́ plɔyruó kʋ́, wɔlɩ́ɛ́ fɩ́ɛ́ nyʋa cí lé ɩ̀ nɩ́ gba ka a, a yà Lagɔ sɔ́ kɩ̀ɩ.

³⁷ Cícíwɔlɩɛ́ ɩ̀ wlʋ́ɛ́ mɔ̀ neé a, ɩ́mɩ́ sa mɔ̀ gbʋ́ wlú, ɩ́ a múó ɩ́mɩ́ gʋalɛ sáà mɔ̀ gbʋ́.»

Á yrálɛ Zozíi lɛ̀wɔ̀lɩ mʋ́

³⁸ Lɔ̀ a másɛnyʋa yà Falizɩ́ɛnyʋa a zùò sɔ́ srʋ Zozíi mà: «Másɛɛ̀, à yrá lé kà lɛ̀wɔ̀lɩ nɩ lé à kɩ̀ɩ yɛ́.»

³⁹ Á cí sɩ́tɛ̀ a, Zozíi srʋ á mà: «Amɔ zɩmnɛ́ a nyʋa kà a nɩnɩgbɩ nyù lé à nɩ́ mʋ́mɔ Lagɔ a, amɔ yrálɛ mɔ́ɔ lɛ̀wɔ̀lɩ mʋ́, a nɩ́ kɩɩ́ yɛ́, ɛ̀ nɩ̀ nɩ́ ka Lagɔ a nékʋ́cinyɔ Zonásɩ a tányɩɛ́ a lɛ̀wɔ̀lɩ̀ɛ̀ ŋwɔ́ɔ a.

⁴⁰ Cémʋ́ Lagɔ a nékʋ́cinyɔ Zonásɩ zi lɛ́ zrɩ̀ a mnɩ́ gàgàzrɩ̀ a yri ta lé dɩ́bɩ a yri ta a, sɩ́tɛ̀ mʋ́ Nyɔɔ́ a Yuwliyʋɔ́ na ká gàgàzrɩ̀ a yri ta lé dɩ́bɩ a yri ta glù zi.

⁴¹ Lagɔ a tɩ́tɩ́ plɔyruo, Ninívʋ a nyʋa yi kɛ́zɔ̀ jànyɩ̀ɛ̀ lɩ̀à mnɩ́ a nyʋa plɔɔ lé á yi á sɩa. Ɛ̀kʋ̀ʋ̀ a? Tányɩɛ́ mʋ́ Ninívʋ a nyʋa nú wá Lagɔ a nékʋ́cinyɔ Zonásɩ a cícíwɔlɩ a, á cɩ́cɩ wá a nɩnɩgbɩ lé á gà wá Lagɔ klʋ́. Mà nyɔ kʋ dɛ́ àmɔ̀ nyièdɩ lé ɔ́ zi Lagɔ a nékʋ́cinyɔ Zonásɩ kʋ́!

⁴² Lagɔ a tɩ́tɩ́ plɔyruó kʋ́, jie á zɔ̀ a léyiŋwnɔɔ́ kʋ̀ mɔ̀ɔ a, ɔ́ yi kɛ́zɔ̀ jànyɩ̀ɛ̀ lɩ̀à a gé sa à, máà ɔ́ wlʋ́ ɔ bhlé jie á zɔ̀ nɩɩ bɛ́ a, lé ɔ́ yi lóo Salomɔ́ɔ a dɔ̀ɔ̀ nyúkwlí pʋ ka, bhè nyɔ kʋ dɛ́ àmɔ̀ nyièdɩ lé ɔ́ zi Salomɔ́ɔ kʋ́!»

Nyumozùzùò yrɩ́bha lé ʋ́ yi

⁴³ Zozíi cí sɔ́kʋ́ mà: «Nyumozùzu nɩ wlʋ́ nyɔ jɩ̀ a, ʋ́ mnɛ zɩkpaá mnɩ́ nyɔ nɩ́ kʋ a, lé ʋ́ mʋ́mɔ náma plaada. Mà cémʋ́ ʋ nɩ́ yɛ́ sɩ́tɛ̀ a dɛ́ a,

⁴⁴ ɩ́ ka ŋnɩ́ lé ʋ́ srʋɛ ʋ nyoku mà: Ká ná wlʋɔ́ mnɩ́ ɩ́ wlʋ́ɛ́ lɛ́ a, yrɩ́bhà. Ʋ́ yrɩ́bha lé ʋ́ dʋdʋ̀ lé nyɔ nɩ́ mɔ̀ɔ kʋ lé mɔ̀ɔ ya nynʋpʋɔ, lé mɔ̀ɔ ya gɩglɔ̀.

⁴⁵ Ʋ́ʋ mnɛ nyumozìzi ànɩ a gbàásɔ́, ɩ̀ nyù lé ɩ̀ zio kʋ́ a bhá ka, lé ɔ yɩ̀sɔ́ yrɩ́bhalɛ wlʋ a mnɩ́ lé á plɩ́lɛ mɔ̀ɔ lé á bɔ́ɔ sá. Nyɔɔ́ nyumozìzìè kʋ lɛ́ jɩ̀ a, ɔ́ zɩkpa ŋátɔ lé á plɩ́ɛ́ ɔ́ tagàzɩ̀kpàà gɔ̀. Sɩ́tɛ̀ mʋ́ zɩmnɛ́ a nyumonyʋaá a wɔlɩ́ɛ́ na ká plɩ́.»

Zozíi mɔ̀glʋ̀ a lɔ́lɔ́kpa

⁴⁶ Zozíi kʋ àyɩ nyʋa a gɔ̀ cída lé ɔ nɛ́ yà ɔ níayúó sɔ́ yi, á nynʋ́vʋ̀ jrùkʋ́ á yrá a kɔ́ɔ́ gɔ̀ cíi. [

⁴⁷ Lé nyɔ a múó srʋ ɔ́ mà: «Ɩ̀ nɛ́ yà ɩ̀ níayúó sɔ́ kʋ jrùkʋ́, á yrá lé a ká mɔ̀ gɔ̀ cíi.»]

⁴⁸ Bhʋ́ Zozíi srʋ ɔ́ mà: «Ɔ̀ ŋwɔ́ɔ ɩ́ nɛ́ à? Lé nyʋa gbá ŋwɔ́ɔ ɩ́ níayúó à?»

⁴⁹ Lé ɔ́ tʋa ɔ́ kʋjɩ̀nyʋ̀àà wlie kʋ́ lé ɔ́ srʋ nyɔɔ́ mà: «Dʋdʋ̀ ɩ nɛ́ yà ɩ níayúó sɔ́ lɛ̀ɛ̀!

⁵⁰ A lɛ́bhɛɛ, nyɔ nie ɩ Tʋ́ɔ́ kʋ̀ ɔ̀ lagɔ gɔ̀ a duo kʋ́ a wɔlɩ́ a, ɔ́mɔ́ ŋwɔ́ɔ ɩ́ nɩ́ayʋ́ lé ɩ́ nɛ́.»