Online Bible

Matíe 11 - Neyo

Zán Batísɩ cíe nyʋa
( Lúkɩ 7.18‑35 )

¹ Tányɩɛ́ mʋ́ Zozíi bhɩa ɔ́ kʋjɩ̀nyʋ̀àà kʋ́gbá sɔ́ɔ́ a cɩ́alɛ zɔ̀ a, ɔ́ mʋ bhlɩ́ a mnɩ́ a dí a mnɩ́ cɩ́a ka lé ɔ ká Lagɔ̀wɔ̀lɩ̀ɛ̀ cí.

² Mà bhʋ́ a tányɩɛ́ Zán Batísɩ kʋ jɩ̀ɩ lé ɔ́ nú wɔlɩ́ɛ́ fɩ́ɛ́ Kláyɩ́sɩ nie a, ɩ́ nɩ lé ɔ́ cíe ɔ́ kʋjɩ̀nyʋ̀àà á zùò Zozíi bɩ́.

³ Ɔ́ srʋ á mà a yrá námasa Zozíi, a cí mà: «Mɔ̀ ŋwɔ́ɔ lɛ́ Kláyɩ́sɩɛ́ yie lɛ́ a, mà à gláa àyɩ yígàdà anɔɔ?»

⁴ Bhʋ́ Zozíi srʋ á mà: «A nɩ mʋ a, a srʋ Záan, wɔlɩ́ɛ́ a nú lé a yɛ́ a.

⁵ Nyʋaá yɩ́cucú bhlá a, á yɛ́ yɩ́ kʋ́, nyʋaá à kpɩ́tɩɛ a, á námɛ yɩ́ námasa, kosugɔ̀bhlànyʋa ya kplɔɔ̀, nyʋaá à nɩ́ nú a, á núé, kúdùkuo galɔ lé ŋazɩ̀nyʋa pʋɛ yɩ́ Lagɔ a námadìè nyúkwlí.

⁶ Nyɔɔ́ nɩ̀ kà ná fádùò lé ɔ̀ nɩ nɩ́ Lagɔ̀nyùzɔ kʋ́ wlʋ́ ná zà a, ɔ́ ya pʋ́!»

Á fa Zán Batísɩ ŋwnú

⁷ Záan a kʋjɩ̀nyʋ̀àà mʋ yɩ́ fɩ́ɛ́, lé Zozíi srʋ yɩ́ nyʋaá fɩ́ɛ́ kʋ̀ jrè gɔ̀ a, Záan a gɔ̀ a wɔlɩ́, ɔ́ anɩ́: «Lɛ́gbá a mʋ lɛ́ ɔ̀ zɩkpa a mnɩ́ dʋdʋ̀ kà a? Zúzùvòò vʋ̀vɔ̀lʋ̀ɔ̀ à vɔ́gɔ lɛ́ a?

⁸ Bhè a mʋ lɛ́ kɛtɛkʋ́ dʋdʋ̀ kà a? Nyɔɔ́ ɔ̀ pla náma kotie mʋ́ a? Nyʋaá à pla náma kotie mʋ́ a, léyuo a gbí mʋ́ á síe à!

⁹ Lɛ́gbá a mʋ lɛ́ kɛtɛkʋ́ nɩ ka áa? A ká Lagɔ a nékʋ́cinyɔɔ́ yɛ́ɛ? Aan, mà náa srʋɛ amɔ cícása mà ɔ́ zi Lagɔ a nékʋ́cinyɔ kʋ́!

¹⁰ Ɔ ŋnɩ́ mʋ́ á jɩ́jrà Lagɔ̀bɔ̀gʋ a mnɩ́ mà: Ɩ̀ lɛ́bhɛɛ, ɩ́ yi ná cíecíenyɔɔ́ cíè ɔ ká bhlà plɩ́, Lé ɔ ká nà nyúzɔ̀ɔ̀ gɩglà.

¹¹ Náa srʋɛ amɔ cícása mà yrúkanyʋaá fɩ́ɛ́ a nyièdɩ, nyɔ nɩ́ mɔ̀ɔ kʋ lé ɔ ká Zán Batísɩ kʋ́ zi. Mà sɩ́tɛ̀ ɩ́ kʋ bhè Lagɔ a Léyibhlɩɛ́ a mnɩ́, nyɔɔ́ ɔ̀ ŋwɔ́ɔ mɔ̀ɔ a nyɩ́kpɔtòyilɛ̀ a, ɔ́ ŋwnɔ́ kʋ́ lé ɔ́ zi Záan kʋ́.

¹² Bháa Zán Batísɩ a tányɩɛ́ jɩ̀ lé kà zɩmnɛ́ ŋnɩ a, Lagɔ a Léyibhlɩɛ́, á bhlalɛɛ kʋ́, nyʋaá kà fɩ́ a, ámá pla mɔ̀ɔ.

¹³ Lagɔ a nékʋ́cinyʋaá fɩ́ɛ́ yà Moyízɩ a lɔ̀ɔ̀ sɔ́ kʋ Lagɔ a wɔlɩ́ɛ́ nà kà ŋnɩ a cída àààn, lé Záan a tányɩ ŋnɩ.

¹⁴ A nɩ yrá lé a kɩ́ɩ́ cícása wle a, náa srʋɛ amɔ mà, ɔ́mɔ́ Záan mɔ́ ŋwɔ́ɔ Elíi nà kà wá yi lé ɔ̀ kɔ̀ɔ̀ wɔlɩ́ á cíé wá a.

¹⁵ Ɔ̀ nɩ̀ kà nyúkwlí lé ɔ̀ kà nú a, ɔ nú!

¹⁶ Nyɔ gbá ɩ́ yi lɛ́ jànyɩ̀ɛ̀ lɩ̀à mnɩ́ a nyʋaá pápa áa? Nɩ̀ yɛ́ a, nànɩ́ yúó bɔ́ɔ crɩ́kpaá à wle a lía lé à srʋɛ mà:

¹⁷ À pá amɔ blɩ̀kwɛ gà bhè a nɩ́ yɛ. À pá nyúgbùwɔ̀lɩ bhè a nɩ́ zɩzrà.

¹⁸ A lɛ́bhɛɛ, Záan ya yi. Ɔ nɩ́ li, ɔ́ nɩ́ mná, ɩ́ ka ŋnɩ́ lé nyʋa anɩ́ mà: Nyumozùzu kʋ ɔ jɩ̀.

¹⁹ Nyɔɔ́ a Yuwliyʋɔ́ yi a, ɔ́ lie lé ɔ́ mna, ɩ́ ka ŋnɩ́ lé nyʋa nie sɔ́kʋ́ mà: A dʋdʋ̀ nyɔɔ́ lɩ̀à, lelilíé yà nʋmnánɔnʋ sɔ́ ɔ́ ka a, lapóo a kʋbhlinyʋa yà bhàlʋ̀nyʋa sɔ́ ŋwɔ́ɔ ɔ bheyinyʋa. Mà nɩnɩgbɩ á bhá lé á yɩbhlɩlɛ Lagɔ a fíkeé.»

Zozíi lɩ́kpɩ̀
( Lúkɩ 10.13‑15 )

²⁰ Zozíi lɩ́kpɩ díé mnɩ́ ɔ́ nɩ lɛ̀wɔ̀lɩ kɔ́kɔ́mnɩ́ a kʋ́, cémʋ́ mɔ̀ a nyʋa nɩ́ ŋwnʋ́ lé a ká a nɩnɩgbɩ cɩ́cɩ a.

²¹ Ɔ́ srʋ mɔ̀ɔ a nyʋaá mà: «Amɔ Kolazɛ́ɛ a nyʋa, kplé ya amɔ kla! Amɔ Besayidáa a nyʋa a sɛ́fʋ sáà, kplé ya amɔ kla! Ɛ̀kʋ̀ʋ̀ a? Lɛ̀wɔ̀lɩ̀ɛ̀ fɩ́ɛ́ ɩ̀ nilo lɛ́ amɔ nyièdɩ a, sɩ́tɛ̀ mʋ́ ɩ nɩ nilo la Tílɩ yà Sidɔ́ɔ sɔ́ a, mɔ̀ɔ a nyʋa ya wá a nyumoé yɩbhlɩ, á ya wá sɩsɩ́ pla, á ya wá bhɛ̀gɩ yrʋ́ʋ̀, á ya wá tʋ́tɔ vli.

²² Aan, náa srʋɛ amɔ mà, Lagɔ a tɩ́tɩ́ plɔyruó, Tílɩ yà Sidɔ́ɔ a nyʋa sɔ́ a nɛɛ́ yi yɔ́lʋma lé ɛ́ yi amɔ kʋ́ zi!

²³ Bhè mɔ̀ Kapɛnayʋ́mʋ! Nà dùòkʋ́ ɩ̀ yi gblà lé ɩ̀ yi lagɔ gbɔ́ɔ? Kpɔkplá di ɩ̀ wʋ́ɛ́! Glù mʋ́ nà kà pla! Ɩ̀ yi mʋ àààn, lé ɩ̀ yi kúdukʋ́ ŋnɩ. Máà Lɛ̀wɔ̀lɩ̀ɛ̀ fɩ́ɛ́ ɩ̀ nilo mɔ̀ gɔ̀ a, sɩ́tɛ̀ mʋ́ ɩ nɩ nilo la Sɔdɔ́mʋ a, Sodɔ́mʋdùò kʋ àyɩ la ʋ́ lé yi lé ŋnɩ zɩmnɛ́.

²⁴ Ɩ́mɩ́ kà ŋnɩ́ lé ɩ́ srʋɛ amɔ lé a ká saá yɩbhlɩ, mà Lagɔ a tɩ́tɩ́ plɔyruo kʋ́, Sɔdɔ́mʋ a nɩɛ́ yi yɔ́lʋma lé ɩ́ yi a nɩɛ́ kʋ́ zi.»

A yi Zozíi mʋ́ bhè a ká pʋ́
( Lúkɩ 10.21‑22 )

²⁵ Bhʋ́ a tányɩɛ́, Zozíi bháʋ́ niwɔlɩ, ɔ́ anɩ́: «Weé à Tʋ́ʋ̀, lagɔɔ́ yà dʋ̀dʋ kʋ́ sɔ́ a Kanyɔɔ̀, àyúó cémʋ́ ɩ̀ nɩ lé ɩ̀ zízìè wɔlɩ́ɛ́ fɩ́ɛ́ lɩ̀à dɩgàlɩ̀zrɩ̀nyʋa yà fíke nyʋa sɔ́ yɩ́ lé ɩ̀ tʋalɩɩ́ yúó a, ɩ́zà ɩ́ falɛ mɔ̀ ŋnú!

²⁶ Aan Tʋ́ʋ̀, cémʋ́ ɩ̀ yrá wá a, sɩ́tɛ̀ mʋ́ ɩ́ plɩ́ɩ.

²⁷ Ɩ Tʋ́ nyɛ́ mɔ́ɔ wɔlɩ́ɛ́ fɩ́ɛ́ a cɛ́cɩ. Nyɔ nɩ́ Yuwliyʋɔ́ yì, ɛ̀ nɩ̀ nɩ́ Tʋ́ɔ́ ŋwɔ́ɔ a, nyɔ nɩ́ sáà Tʋ́ɔ́ yì, ɛ̀ nɩ̀ nɩ́ ɔ Yuwliyʋɔ́ ŋwɔ́ɔ a, lé nyʋaá Yuwliyʋɔ́ yrá lé à kà Tʋ́ɔ́ yɩbhlɩ a, ámá ɔ́ pápalɔɔ́.

²⁸ A yi mɔ́ɔ mʋ́ amɔ nyʋaá fɩ́ɛ́ sro lé à yà gbɩdɩ̀ɛ̀ sɩa a, lé bhobhoé ya wlú zi a, ká amɔ wlú sa à, bhè a ká nyɔɔ́bhleè.

²⁹ Wɔlɩ́ɛ́ ná ká amɔ mʋ́ yrá a, a nií, lé cémʋ́ ná ká amɔ tíe a, a náa sɩ́tɛ̀, mà diwɔta ɩ́ ka a, nɩ́ gbʋgbà kʋ́, nɩ́ ka sáà amɔ kalɩmɛ mʋ́ ŋwʋ́ lé á zizi ká nyɔbhleè!

³⁰ Aan, ná nɔnʋzrɩ̀zríɛ́ nɩ́ ka lé bódùò ná ká amɔ gbɩdɩ̀ da nyɛ́ a, ʋ nɩ́ kʋ́ ŋwnɔ́.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy