Matíe 10 - Neyo

Zozíi cie cíecíenyʋa kʋ́gbá sɔ́

¹ Zozíi wle ɔ́ kʋjɩ̀nyʋ̀àà kʋ́gbá sɔ́ɔ́ lé ɔ́ nyɛ́ á pɔ́wa a ká nyumozìzi jɩ́ɩ, a ká bhlábhlágu ya bhlɛ́kanyʋa fɩ́ɛ́ sɔ́ yalɩma.

² Zozíi a cíecíenyʋaá kʋ́gbá sɔ́ɔ́ a ŋnɩ́ lɛ̀: Tagàanɔɔ́ ɔ́mɔ́ ŋwɔ́ɔ Simɔ́ɔ, á wlele sáà mɔ́ Pɩ́ɛ́lɩ lé ɔ nɩ́ayʋ́ Adrée, Zebedée a yʋ́ Zákɩ lé ɔ nɩ́ayʋ́ Záan.

³ Filípʋ lé Batelemíi, Tomáa lé lapóo a kʋbhlinyɔɔ́ Matíe, Afée a yʋ́ Zákɩ lé Tadée,

⁴ bhlɩ́ɛ́ a kʋbhlanyɔ Simɔ́ɔ lé Zudáa Sɩkalɩ́ɔ́tʋɔ́ ɔ̀ nà kà lɛ́ Zozíi nyʋa né kʋ́ nyɛ́ a.

Zozíi cíe ɔ cíecíenyʋaá kʋ́gbá sɔ́ɔ́ Lagɔ̀nɔ̀nʋ kʋ́

⁵ Zozíi cíe ɔ́ cíecíenyʋaá kʋ́gbá sɔ́ɔ́ Lagɔ̀nɔ̀nʋ kʋ́, á na ká mʋ a, ɔ́ srʋ á mà: «A ná plɩ́ɩ bhlɩ́ɛ́ mnɩ́ Zúfʋnyʋa nɩ́ kʋ a, lé a ná mʋ sáà Samalitɛ́ɛnyʋa a dí a mnɩ́.

⁶ A nɩ mʋ a, a mʋ Izrayɛ́lɩnyʋaá yà tuo bhlábhlɩ́ bhísakʋ́ a gɔ̀.

⁷ A kʋ nyúzɔ kʋ́ lé a pá wɔlɩ́, a cí mà: Lagɔ a Léyibhlɩɛ́ ya amɔ gɔ̀ mɛ́.

⁸ A yalɩma gupuonyʋa, a gala kúdùkuo, a nɩ lé kosugɔ̀bhlànyʋa ká kplɔɔ, a jɩ́ɩ nyumozìzi. Cémʋ́ á nyɛ́ lɛ́ amɔ lé á nɩ́ lɛ́ amɔ lɛ́ mʋ́ yráa a, a nyɛ́ sɩ́tɛ̀ lé a ná yráa nyɔ lɛ́ mʋ́.

⁹ A ná bhá sìkàà, a ná bhá moníi, a ná ŋwʋ́ sáà moníi pɔ́kɩ̀tɩɩ́,

¹⁰ a ná fa sakɔ́sɩ, a ná fa kóti sɔ́ sɔ́, a ná fa síi, a ná fa zìzìe, mà nyɔ nɩ zrɩ nɔnʋ a, ɔ́ ka lé ɔ ká li.

¹¹ A nɩ ŋnɩ dú kʋ́ a, ɛ́ yi náa gékpíduú, dutoyilɛ̀, a yrá, nyɔ nɩ yi amɔ kʋplada bhá a, a ká ɔ dɛ́ kʋ́ pla a. A nɩ pla ʋ́ kʋ́ a, a kʋ bhʋ́alɛ́ àààn lé a ká dú a mnɩ́ wlʋ́.

¹² A nɩ pla gbó a mnɩ́ a, a pá mɔ̀ɔ a nyʋa yúó, a cí mà: A lɩ́ wɔtɔma kʋ́.

¹³ Gbóó a mnɩ́ a nyʋa nɩ bhli amɔ námasa kʋ́ a, nyúó a pá a, ʋ́ yi a kʋ́ ŋnɩ, mà a nɩ nɩ́ amɔ námasa kʋ́ bhli a, a nyúó yi amɔ kʋ́ yrɩ́bhà!

¹⁴ A nɩ ŋnɩ dú kʋ́, ɩ́zà a nɩ pla wlʋ a mnɩ́ lé mɔ̀ a nyʋa nɩ nɩ́ amɔ námasa kʋ́ bhli lé a nɩ nɩ́ a cícíwɔlɩ nyúkwlí pʋ a, a wlʋ́ mɔ̀ɔ, mà a nɩ cí mànɩ́ a ká mʋ a, a gbɔ́dɔ̀ ʋ́ a kokokpí jɩ̀ a mʋ́mʋɩɛ́!

¹⁵ Náa srʋɛ sáà yɩ́ lɛ́ amɔ cɩ́cása, mà Lagɔ a tɩ́tɩ́ plɔ yruó kʋ́, wɔlɩ́ɛ́ nà kà ŋnɩ a, ɩ́ yi wɔlɩ́ɛ́ ŋnɩ wá Sɔdɔ́mʋ yà Gɔmɔláa sɔ́ a nyʋa a nɩɛ́ gɔ̀ plɩ́.

Zozíi a kʋjɩ̀nyʋ̀àà yi kalɩmɛ yɛ́

¹⁶ Ná anɩ́, náa cíe amɔ, a yɩbhlɩ saá mà a mnɛ cémʋ́ bhlábhlɩ́ mnɛ lɛ́ klávʋ̀ʋ nyièdɩ a, a ŋwʋ́ a nyoku yɩ́gɔ̀ bɛbɛlɩ bhísakʋ́, lé a bhá sáà diwɔtɩ kpóòkpí bhísakʋ́!

¹⁷ A mányɩ, mà nyʋa yi amɔ tɩ́tɩ́ ŋwʋ́ dú a cífɩ a drɩ̀, á yi sáà amɔ a zúfʋcɛcɩghlɩ a mnɩ́ sɩ́á ka fa.

¹⁸ Á yi amɔ gɔ̀mna yà léyuo sɔ́ a dú wleè ná zà, amɔ nà kà kɛ́zɔ̀ yáa ámá bhè nyʋaá à nɩ́ Zúfʋnyʋa ŋwɔ́ɔ a, sɔ́ a ŋwɔ́nɩ́srɩ̀lɛ nɩ.

¹⁹ Mà a nɩ ŋwʋ́ amɔ tɩ́tɩ́ cífɩ a drɩ̀ a, di ná gbláa amɔ nyú wɔlɩ́ɛ́ a na ká cí a, lé cémʋ́ a na kɩ́ɩ́ cí a zà, mà cémʋ́ a na kɩ́ɩ́ cí a, Lagɔ yi lɛ amɔ mɩ́ neé pá a.

²⁰ Amɔ nɩ́ a ká lɛ cí, a tʋ́ Lagɔ a zuzu nà kà lɛ amɔ neé cíi.

²¹ Nɩ́ayúó yi bhlábhla à, tʋ́ yi ɔ yʋ́ sa á, á yio bhlá, yúó yi a tinyʋa yà a nɛ́nyʋa sɔ́ sa à, á yi a bhlá.

²² Nyʋa fɩ́ɛ́ yi amɔ mʋ́ gblɩ̀ ná zà, mà ɔ̀ nà kà duo kʋ́ tɛ́ma lé zɔ̀bhɩayruó ká ŋnɩ a, ɔ́ yi ʋ́ neé wlʋ́.

²³ A nɩ bhli amɔ nyumosa kʋ́ dú a mnɩ́ a, a gú lé a mʋ yígàdàdu a mnɩ́. Mà náa srʋɛ amɔ cícása, a nɩ́ ka Izrayɛ́lɩbhlɩɛ́ a bhlibhlie zɔ̀ bhɩa lé Nyɔɔ́ a Yuwliyʋɔ́ yi yi.

²⁴ Sùklúyʋ nɩ́ ɔ másɛ kʋ́ zi lé cóyʋ nɩ́ ɔ kanyɔ kʋ́ zi.

²⁵ Sùklúyʋ ka lé ɔ ká ɔ másɛ wlú ŋnɩ lé cóyʋɔ́ ká sáà ɔ kanyɔ wlú ŋnɩ. A nɩ wle gbikanyɔ Bezebúlʋ ŋwɔ́ɔ nyumozìzi a cífɩ a, a yɩbhlɩ saá mà á yi kɛ́zɔ̀ ɔ gbó vláa!

Zozíi a kʋjɩ̀nyɔ nɩ́ gú

²⁶ Nyɔ a ŋanɩmɛ ná bhlá amɔ mà wɔlɩ́ɛ́ fɩ́ɛ́ ɩ̀ zúzùò a, ɩ́ yi zɔ̀ flʋ, lé wɔlɩ́ɛ́ ɩ̀ nilo koti kʋ́ a, ɩ́ yi yɩbhlɩlɔɔ̀.

²⁷ Wɔlɩ́ɛ́ ɩ́ srʋɛ amɔ cúcú a mnɩ́ a, a cíí gàgàzrɩ̀; wɔlɩ́ɛ́ á ŋwúwŋuole amɔ nyúkwlí a, a pɩ́ɩ́ gbányìdi kʋ́.

²⁸ A ná gúu nyɩ́kpɔbhlanyʋa, mà a nɩ́ ka a zizi a bhlábhlʋ́ míi. Lagɔ a nɩ gúu, ʋ́mʋ́ kà pɔ́wa, lé ʋ̀ yi míi ʋ̀ yi nyɔ yà ɔ zuzu sɔ́ kosugàlàà à nɩ́ bhɩa kʋ́ a mnɩ́ páà.

²⁹ A nɩ́ saá yì mà nyɔ ŋwʋ́ɛ́ nimni sʋsʋ́ʋ́ a sɔ́ pɛ́lʋ́ tòku a múó a zà a? Ɩ nɩ́ pɛ́lʋ́ ka a, sɩ́tɛ̀ ɩ́ kʋ bhè múó nɩ bhli zɔ̀ a, à Tʋ́ Lagɔ yì saá.

³⁰ Ɛ̀ nɩ ŋwɔ́ɔ amɔ a, ɔ́ yì a wlú a nyɩ́é a zumole.

³¹ Ŋanɩmɛ ná bhlá amɔ, mà a ka gbʋ́ lé a zi nimni kɔ́kɔ́mnɩ́ kʋ́.

³² Ɩ́mɩ́ kà ŋnɩ́ a zà nyɔ nɩ cíi nyʋa fɩ́ɛ́ a klʋ́ mà ná kʋjɩ̀nyɔ ɔ́ ŋwɔ́ɔ a, ná sɛ́fʋɔ́ ɩ́ yi sáà ɩ Tʋ́ɔ́ ɔ̀ kʋ̀ lagɔɔ́ a Ɔ klʋ́ cí mà cícása ná nyɔ kʋ̀ʋ.

³³ Ɩ́zà nyɔ nɩ cí nyʋa a drɩ̀ mà ɔ nɩ́ mɔ́ɔ yì a, ɩ́ yi sáà ɩ Tʋ́ɔ́ ɔ̀ kʋ lagɔɔ́ a Ɔ drɩ̀ cíi mà nɩ́ sáà mɔ́ yì.

Dʋ̀dʋ kʋ́ a kʋ wɔtɔmalɛɛ́ a zà Zozíi nɩ́ yi

³⁴ A ná bhobho mà náa yi lé Dʋ̀dʋ kʋ́ ká kʋ́ wɔtɔma, nɩ́ Dʋ̀dʋ kʋ́ a kʋ wɔtɔmalɛɛ́ a zà yi, tʋ́ ɩ́ la lé ɩ́ yi.

³⁵ Náa yi lé yʋ́ yà ɔ tʋ́ sɔ́ ká mʋ́ dúlo lé ŋnɩ́keyʋ yà ɔ nɛ́ sɔ́ ká mʋ́ dúlo, lé ŋwnɔ́ yà ɔ ŋwʋ́trɔ sɔ́ ká sáà mʋ́ dúlo,

³⁶ ɩ́zà a lɔ́lɔ́kpɩnyʋa nà kà yɩ́ à gblɩ̀nyʋa plɩ́.

³⁷ Nɩ̀ wà ɩ̀ tʋ́ ya ɩ̀ nɛ́ sɔ́ lé nɩ̀ zi mɔ́ɔ kʋ́ a, nɩ́ ná kʋ́jɩ̀jɩ́ɛ́ neé bhɩa, nɩ̀ wà nà mnɩ́ a yʋ́ lé nɩ̀ zi mɔ́ɔ kʋ́ a, nɩ́ sáà ná kʋ́jɩ̀jɩ́ɛ́ neé bhɩa.

³⁸ Mɔ̀ nyɔɔ́ nɩ̀ nɩ́ nà kúsu gbɩdɩ̀ lé kà mɔ́ɔ kʋ́ jɩ́ a, nɩ́ ná kʋ́jɩ̀jɩ́ɛ́ neé bhɩa.

³⁹ Mɔ̀ nyɔɔ́ ɔ̀ bhá mɔ̀ɔ nà zɩkpa a kʋ bhlalɛ a, á yi mɔ̀ wlɩ wlʋ́, mà ɔ nɩ tɩ ɔ́ zɩkpa ná zà a, ɔ́ yi ʋ́ neé wlʋ́.

Nyɔɔ́ bhli amɔ námasa kʋ́ a, mɔ́ɔ ɔ́ bhli námasa kʋ́

⁴⁰ Nyɔ nɩ bhli amɔ námasa kʋ́ a, mɔ́ɔ ɔ́ bhli námasa kʋ́. Lé ɔ̀ nɩ̀ bhli mɔ́ɔ námasa kʋ́ a, nyɔɔ́ ɔ̀ cíe mɔ́ a, ɔ́mɔ́ ɔ́ bhli námasa kʋ́.

⁴¹ Nyɔɔ́ nɩ̀ bhli Lagɔ a nékʋ́cinyɔ námasa kʋ́ a cémʋ́ á bhlile Lagɔ a nékʋ́cinyɔ kʋ́ a, á yio sɩ́tɛ̀ dàzɩ̀. Lé nyɔɔ́ nɩ̀ bhli nyɔɔ́ kɔ̀ɔ nɩnɩgbɩ srísá námasa a kʋ́ cémʋ́ á ka lé a kɔ́ɔ́ kʋ́ bhli a, á yio sáà sɩ́tɛ̀ dàzɩ̀.

⁴² Náa srʋɛ amɔ cícása, nyɔɔ́ nɩ̀ nyɛ́ yúóó lɩ̀à a nyièdɩ a yʋ́ nyúwɔtʋkɔpʋ mnáàda ná kʋ́jɩ̀jɩ́ɛ́ a ŋnɩ́ mʋ́ a, ɔ́ nɩ dàzɩ̀ɛ̀ nɩ́ ka tuo.»