Málɩ́kɩ 9 - Neyo

¹ Lé Zozíi srʋ á sɔ́kʋ́ ɔ́ anɩ́: «Náa srʋɛ amɔ cɩ́cása a mnɩ́ mà nyʋa àna kʋ bhʋ́alɛ́ lé á yi fɩ́ɛ́ Lagɔ a Léyibhlɩɛ́ a pɔ́waá yɛ́, lé a kwɩ́ɛ́ a tányɩ yi ŋnɩ.»

Zozíi a kʋjɩ̀nyʋ̀àà taa yɛ́ ɔ blɔ̀blɔ́ɔ́

² Zozíi cí lɛ́ saá lé yrií gbɩ́flɔ́ plɩ́ a, ɔ́ bhá Pɩ́ɛ́lɩ, Zákɩ lé Záan, lé ɔ fa á kíkí káda wlú. Ɔ yà sɔ́ cɩ́ɩ́n kʋ la mɔ̀ɔmɔ̀ lé ɔ́ cɩ́cɩ a klʋ́ jɩ̀.

³ Mà ɔ kótié lʋɛ, lé ɩ́ plɩ́ plátatata. Cémʋ́ ɩ́ pɔ́lʋma a, nyɔ nɩ́ à zà dɛ́ zɩkpa zɔ̀ kóti wɔlɔɔ̀ lé ɩ ká sɩ́tɛ̀ pɔ́lʋma à.

⁴ Á dʋdʋ̀ a, á yɩbhlɩ Moyízɩ lé Elíi, a yà Zozíi sɔ́ ŋwʋ́ɛ́ díi.

⁵ Bhʋ́ Pɩ́ɛ́lɩ srʋ Zozíi, ɔ́ anɩ́: «Másɛɛ̀, dɛ́ɛ́ à kʋ̀ lɛ́ a, bhʋ́ náa! À kà gbògbí a ta pá a, nà nʋ, Moyízɩ a nʋ, lé Elíi a nʋ.»

⁶ Ŋanɩmɛɛ́ yilaá kʋ́, ɩ́ ka ŋnɩ́ lé wɔlɩ́ɛ́ Pɩ́ɛ́lɩ na ká la cí a ɔ nɩ́ ɩ́ yì, ɩ́zà ɔ́ cí saá.

⁷ Lé jrùu yi lé ʋ́ zízìè a. Lé niwɔlɩ flʋ jrùu a mnɩ́ ɩ́ anɩ́: «Ɔ̀lɩa, ná Wàwàyùwlìyʋ kʋ̀! A pʋ ɔ nyúkwlí!»

⁸ Dáamúó, á dʋdʋ̀ a, Moyízɩ yà Elíi sɔ́ ya ʋ́ mɔ́mnɔɔ̀, á yà Zozíi sɔ́ cɩ́ɩ́n tuo ʋ́.

⁹ Tányɩɛ́ mʋ́ á wlʋ́ kíkéé wlú a, Zozíi srʋ á mà wɔlɩ́ɛ́ á yɛ́ɛlɛ́ mɔ̀ɔmɔ̀ a á ná sa nyɔ di àààn lé, Nyɔɔ́ a Yuwliyʋɔ́ ká fɩ́ɛ́ galɔ̀.

¹⁰ Cémʋ́ ɔ́ srʋ á la mà a ná sa la nyɔ dí a, á ŋwʋ́ ɩ́ kpá, mà á yráyralɛ a nyoku mà: «Wɔlɩdrè gbá ɔ́ na ká la cí, lé à ŋwɔ́ɔ galɔ̀ɛ̀ a?»

Zozíi anɩ́ Zán Batísɩ ya wá Elíi a bhleé yi

¹¹ Lé Zozíi a kʋjɩ̀nyʋ̀àà yrɔ́ɔ́ mà: «Másɛɛ̀, cégbá mʋ́ ɩ́ kʋ lé lɔ̀ a másɛnyʋaá nie mà Lagɔ a nékʋ́cinyɔ Elíi yi la zɩkpa zɔ̀ yrɩ́bhà fɩ́ɛ́ lé Kláyɩ́sɩ yi la yi áa?»

¹² Lé Zozíi srʋ á, ɔ́ anɩ́: «Aan, á jɩ́jrà mà, Elíi yi fɩ́ɛ́ yi lé ɔ́ yi dʋ̀dʋ kʋ́ gɩglà. Bhè ɛ̀kʋ̀ʋ̀ lé á jɩ́jrà sɔ́kʋ́ mà, Nyɔɔ́ a Yuwliyʋɔ́ yi nyakalɩ kádɛ mʋ́ blée, lé nyʋa nɩ́ kɔɔ́ mányɩ a?

¹³ Ná srʋɛ amɔ mà Elíi ya wá yi, mà cémʋ́ ɩ́ jɩ́jràlɔ̀ ɔ zà Lagɔ̀bɔ̀gwɩ a mnɩ́ a, sɩ́tɛ̀ mʋ́ á bhliloó nyumosa kʋ́.»

Zozíi saa yʋ́ nyumozùzu jɩ̀

¹⁴ Zozíi yà ɔ́ kʋjɩ̀nyʋ̀àà taa sɔ́ ŋnɩ ɔ́ kʋjɩ̀nyʋ̀àà ànàà tuo la ʋ́ a gɔ̀ a, á dʋdʋ̀ a, nyʋa kɔ́kɔ́mnɩ́ glalaá klʋ́, a yà lɔ̀ a másɛnyʋa sɔ́ bhlalɛ.

¹⁵ Nyʋaá à kʋ la ʋ́ a, á yɛ́ ɔ́ kɔ́ɔ̀kʋ́ a neé mnaá, á fa sóo lé á yio gbɩ̀ kà.

¹⁶ Lé ɔ́ yrá ɔ́ kʋjɩ̀nyʋ̀àà mà: «Wɔlɩ́ gbá a yà nyʋaá sɔ́ bhlalɛ kʋ́ a?»

¹⁷ Nyɔ a múó kʋ jrè a nyièdɩ ɔ́ srʋ Zozíi, ɔ́ anɩ́: «Másɛɛ̀, ɩ́bhìè mɔ̀ ɩ́ la ná yʋ́ɔ́! Nyumozùzu kʋ̀ ɔ jɩ̀ a, ʋ́ nie lé ɔ nɩ́ cí.

¹⁸ Dɛ́ɛ́ ʋ́ kwlíloó jɩ̀ a, ʋ́ pálɔɔ́ sá lé ʋ́ nie lé fɩ́flɩɩ lalɔɔ́ neé, lé ɔ́ lie ɔ́ glàà, lé ʋ́ nie lé ɔ́ jɛ. Ɩ́ srʋ nà kʋjɩ̀nyʋ̀àà mà á sɔɔ́ nyumozùzùò jɩ̀ a á nɩ́ míi.»

¹⁹ Nyɔɔ́ cí lɛ́ saá, Zozíi anɩ́: «Amɔ a ŋwɔ́ɔ kamnɩ́nyʋaá à nɩ́ lɛ́ Lagɔ a fádùò ka a! A bhobho mà yáà amɔ sɔ́ dɛ́ à nà kà kɔ́ɔ̀kɔ́ kʋʋ? Ɩ́ yi àyɩ duo kʋ́ tɛ́ma tòyipɛ á zà? A la mɔ́ɔ yʋ́ɔ́!»

²⁰ Lé á lɔɔ́ yʋ́ɔ́. Mà nyumozùzùò yɛ́ kɔ́ɔ̀kʋ́ Zozíi a, ʋ́ ŋwʋ́ fɩ́ lé ʋ́ vɔ́gɔ̀ yʋ́ɔ́ lé ʋ́ pálɔɔ́ sá. Ɔ́ bhísiò lé ɔ́ neé la fɩ́flɩɩ́.

²¹ Lé Zozíi yrá ɔ tʋ́ mà: «Bhè nà yʋ́ɔ́, tányɩ gbá mʋ́ gúó bhálɔɔ́ kʋ́ à?» Nyɔɔ́ anɩ́: «Ɔ́ ŋwɔ́ɔ àyɩ yʋ́ lé nyumozùzùò bháalɔɔ́ kʋ́.

²² Tányɩ kʋɛ ʋ́ lé ʋ́ pálɔɔ́ kosuú, ʋ́ pálɔɔ́ nyíé ʋ kɔ́ɔ́ bhlá. Ɩ́bhìè, yɛ́ à gbɩ́ a ŋazɩ kʋ́ bhè yi àmɔ̀ kʋ́ nɩ̀ yi míi a!»

²³ Zozíi anɩ́: «Lé sɩ́tɛ̀ ɩ̀ cí lɛ́ mà nɩ̀ yi míi a! Mà nyɔ nɩ ka Lagɔ a fádùò a ɔ́ míile lɩ́ɛ́ fɩ́ɛ́.»

²⁴ Lé yʋ́ɔ́ ɔ tʋ́ sa né, ɔ́ anɩ́: «Ɩ́ ka Lagɔ a fádùò, fa mɔ́ɔ kʋ́ mà ná fádùò nɩ́ mʋ́ tɛ́!»

²⁵ Zozíi dʋ̀dʋ nyʋaá à yilo mʋ́ a á zumoleé a, ɔ́ gáa zuzùò kʋ́. Ɔ́ anɩ́: «Nyumozùzu! Mɔ̀ nie lé yʋ́ɔ́ lɩ̀à nɩ́ nú lé ɔ nɩ́ cí! Naa náa srʋɛ mɔ̀ lé wlʋ́ ɔ́ jɩ̀ lé nà yi yɩ́ kɛ́!»

²⁶ Zozíi cí lɛ́ sɩ́tɛ̀ a, nyumozùzùò gá a ʋ́ bhɔ́gɔ̀ yʋ́ɔ́ kʋ́ fɩ́ sa, lé ʋ́ wlʋ́ ɔ́ jɩ̀. Ʋ́ wlʋ́ ɔ́ jɩ̀ a, nɩ̀ yɛ́ ɔ́ a nànɩ́ cémʋ́ ɔ́ɔ kú a. Ɩ́ nɩ lé, kɔ́kɔ́mnɩ́ anɩ́ ɔ́ɔ kú.

²⁷ Mà Zozíi bhli ɔ́ glɔ̀gbá kʋ́ lé ɔ́ bhɔ́ɔ́ kʋ́ lé ɔ́ nynʋ́vʋ̀lɔ̀ɔ̀ kʋ́.

²⁸ Zozíi yà ɔ́ kʋjɩ̀nyʋ̀àà sɔ́ yi gbó a, bhʋ́ á yrálɔɔ́ koté kʋ́, á anɩ́: «Másɛɛ̀, cégbá mʋ́ ɩ́ kʋ lé àmɔ̀ à nɩ́ zuzùò a jɩ́lɛɛ míi a?»

²⁹ Ɔ́ anɩ́: «Sɩ́tɛ̀ a nyumozìzìè lɩ̀à, bhibhie wɔlɩ́ ɩ̀ jɩ́lɩɩ́.»

Zozíi anɩ́ ɔ́ yi kú lé ɔ́ yi galɔ̀

³⁰ Zozíi yà ɔ́ kʋjɩ̀nyʋ̀àà sɔ́ wlʋ́ ʋ́ a, áa díi Galilée. Ɔ nɩ́ yrá lé nyʋa yɩbhlɩlɔɔ́ dá.

³¹ Ɔ́ cɩ́a ɔ́ kʋjɩ̀nyʋ̀àà, lé ɔ́ srʋ á mà: «Nyɔɔ́ a Yuwliyʋɔ́, á yio saà, lé á yio bhlá. Mà ɔ nɩ kú a, tayruó kʋ́, ɔ́ yi galɔ̀.»

³² Zozíi cí yɩ́ flɛ́flɛ̀sa saá mà ɔ́ kʋjɩ̀nyʋ̀àà nɩ́ wɔlɩ́ɛ́ ɔ́ cí a mnɩ́ nú. Á gú lé a nɩ́ ɔ́ ɩ́ gbaá kʋ́ yráà.

Ɔ̀ nɩ̀ yrá ɔ̀ kà ɔ lía tíe a, ɔ plɩ́ a góo

³³ Zozíi ya ɔ́ kʋjɩ̀nyʋ̀àà sɔ́ ŋnɩ Kapɛnayʋ́mʋ a, lé á pla gbó a, Zozíi yrá á, ɔ́ anɩ́: «À yie la lɛ́ nyúzɔ kʋ́ a, wɔlɩ́ gbá a bhlalɛ la lɛ́ kʋ́ a?»

³⁴ Ɔ́ yrá á a, a nɩ́ né saà, máà á yie la lɛ́ a, á bhlalɛ la, lé ɔ̀ ŋwɔ́ɔ á nyièdɩ a kámanyɔ a, a kɔ́ɔ́ yɩbhlɩɩ̀.

³⁵ Zozíi bɔ́ɔ sá a, bhʋ́ ɔ́ wle á lé ɔ́ srʋ á mà: «Nyɔ ɔ̀ nɩ̀ yrá lé ɔ kà ɔ lía a drɩ̀ kʋ lé ɔ ká á tíe a, bhʋ́anɩ nyɔɔ́ ɔ́ ka lé ɔ bhɩa bɩ́, lé ɔ plɩ́ ɔ lía a lɔ̀fɩ́ɛ́ a cóyʋ.»

³⁶ Lé ɔ́ bhá yítòyilɛ̀, lé ɔ́ lɔɔ́ jrè a nyièdɩ, ɔ́ gbɩ̀lɔ̀ɔ̀ lé ɔ́ pápa,

³⁷ ɔ́ anɩ́: «Ɔ̀ nɩ̀ bhli yʋ́ɔ́ lɩ̀à bhísakʋ́ a yʋ́ námasa kʋ́ ná ŋnɩ́ mʋ́ a, mɔ́ɔ ɔ́ bhli námasa kʋ́. Ɩ́zà ɔ̀ nɩ bhli sáà mɔ́ɔ námasa kʋ́ a, mɔ́ɔ ɔ nɩ́ námasa kʋ́ bhli, mà Nyɔɔ́ ɔ̀ cíe mɔ́ɔ a, ɔ́mɔ́ ɔ́ bhli námasa kʋ́.»

Nyɔɔ́ nɩ̀ nɩ́ àmɔ̀ mʋ́ gblɩ̀ a, a nyɔɔ́ kʋ̀

³⁸ Zozíi cí lɛ́ saá, Záan anɩ́: «Másɛɛ̀, dɛ́ à mʋ lɛ́ a, à yɛ́ nyɔ, ɔ́ jɩ́lɛ nyumozìzi nà ŋnɩ́ mʋ́, mà cémʋ́ ɔ nɩ́ à nyièdɩ a nyɔ ŋwɔ́ɔ a, à srʋ ɔ́ mà ɔ tɔ́pʋʋ̀.»

³⁹ Zozíi anɩ́: «A cíosá mà nyɔ nɩ́ ka ná ŋnɩ́ mʋ́ lɛ̀wɔ̀lɩ nɩ, lé ɔ ká sɔ́kʋ́ ná nyumowɔlɩ cí.

⁴⁰ Nyɔɔ́ ɔ̀ nɩ́ àmɔ̀ mʋ́ gblɩ̀ a, ɔ́ ŋwɔ́ɔ à nyɔɔ́.

⁴¹ Nyɔ nɩ nyɛ́ amɔ Kláyɩ́sɩ a ŋnɩ́ mʋ́ nyúkɔpʋ lé a nɩ mná a, cɩ́cása a mnɩ́, ná srʋɛ amɔ mà Lagɔ yio dàzɩ̀.

Zozíi nyɛ́ ɔ́ kʋjɩ̀nyʋ̀àà tába

⁴² Nyɔ nɩ̀ nɩ lé yúóó lɩ̀à, à ka ná fádùò a, á nyièdɩ a yʋ́ a múó nɩ nɩ nyumosa a, bhʋ́anɩ nyɔɔ́, á yió cɔ́kʋ kádʋ blɛɛ́ gʋà, lé a yió jié páà.

⁴³ Nà glɔ̀gbá nɩ̀ nɩ lé nɩ nɩ nyumoé a, dí á kʋ́, nɩ̀ fa sɔdrè lé nɩ̀ mʋ Lagɔ a Léyibhlɩɛ́ a mnɩ́ a, ɩ́ náa lé ɩ́ zi ka sɩɩ́ a sɔ́ lé kà Dɩ́blʋ a kosugàlàà à nɩ́ bhɩa kʋ́ a a mnɩ́ bhli a kʋ́. [

⁴⁴ Mɔ̀ɔ a kalɩmɛ nɩ́ bhɩa lé mɔ̀ɔ a kosuó nɩ́ nyúmo kɔ́ɔ̀kɔ́.]

⁴⁵ Nà bhɔɔ́ nɩ̀ nɩ lé nɩ nɩ nyumosa a, díú kʋ́, nɩ fa bhɔdrè lé nɩ mʋ Lagɔɔ́ a, ɩ́ náa lé ɩ́ zi kà bhɩɩ́ a sɔ́ fa lé kà Dɩ́blʋ̀ɔ̀ a kosugàlàà a mnɩ́ bhli a kʋ́. [

⁴⁶ Mɔ̀ɔ a kalɩmɛ ya mɔ̀ɔ a kosuó sɔ́ nɩ́ ka kɔ́ɔ̀kɔ́ a zà bhɩa.]

⁴⁷ Nà yɩ́ nɩ̀ nɩ lé nɩ nyumosa a, sɛɛ́ mɔ̀ɔ, nɩ fa yɩ́ a múó lé nɩ mʋ Lagɔ a Léyibhlɩɛ́ a mnɩ́ a, ɩ́ náa lé ɩ́ zi kà fa lé Dɩ́blʋ̀ɔ̀ a kosugàlàà a mnɩ́ bhli a kʋ́,

⁴⁸ bhè mɔ̀ɔ a kalɩmɛ nɩ́ bhɩa lé mɔ̀ɔ a kosuó nɩ́ nyúmo kɔ́ɔ̀kɔ́.

⁴⁹ Cémʋ́ gùu bhlálɔ lɛ́ zrì zʋ a, sɩ́tɛ̀ mʋ́ nyʋaá fɩ́ɛ́ na ká kosugàlàà à nɩ́ nyumo kɔ́ɔ̀kɔ́ a mnɩ́ kʋʋ.

⁵⁰ Gùò mɛ́nɩmalɛ kʋ̀ʋ. Mà ʋ nɩ ya mɛ́nɩmɛ bhɩa ɔ̀ yi yɩ́ lɛ́ mʋ́ mɛ́nɩma áa? Naa, gùu bhísakʋ́ a nɩ kʋʋ lé a núnuù.»