Online Bible

Málɩ́kɩ 7 - Neyo

Lagɔ a Jràmáá ka gbʋ́ lé a zi a tinyʋa a jràmáá kʋ́
( Matíe 15.1‑9 )

¹ Falizɩ́ɛnyʋaá lé lɔ̀ a másɛnyʋa a zùò wlʋ́ Zelízalɛ́mʋ, lé á yi lé á ŋnɩlɔ̀ Zozíi gɔ̀ wlú.

² Á núnuù, ɩ́mɩ́ ŋwɔ́ɔ mà Zozíi a kʋjɩ̀nyʋ̀àà, àna nɩ́ wɔlɔ wlɩ lé á lie cémʋ́ Zúfʋnyʋa a gba nɩ́ yrá lé a nɩ a, ɩ́mɩ́ á nie.

³ Bhè Falizɩ́ɛnyʋa lé Zúfʋnyʋa a lɔ̀fɩ́ɛ́ sɔ́ nɩ cí mànɩ́ a ká li a, á wɔlɔ fɩ́ɛ́ námasa wlɩ lé á lie, ɩ́mɩ́ ŋwʋ́ɛ́ a tinyʋa a gbaá kpá.

⁴ A nɩ wlʋ́ sáà mágɩ̀tɩ kʋ́ a, á wɔlɔ fɩ́ɛ́ wlɩ lé á lie. Wɔlɩdrì ànɩ kɔ́kɔ́mnɩ́ kʋ sáà ʋ́ lé á nií. Á ka cémʋ́ á wɔlɔ a kɔ́pɩ, a bíi lé a nyidi sɔ́ a mnɩ́ a.

⁵ Lé Falizɩ́ɛnyʋaá yà lɔ̀ a másɛnyʋaá sɔ́ yrá Zozíi mà: «Ɛ̀kʋ̀ʋ̀ lé nà kʋjɩ̀nyʋ̀àà nɩ́ ŋwʋ́ lɛ́ à tinyʋa a gbaá kpá a, lé a nɩ cí mànɩ́ á ká li a, á nɩ́ wɔlɔ wlɩ a?»

⁶ Lé Zozíi srʋ á mà: «Ɩ̀ wlʋ́ɛ́ lɛ́ amɔ neé a, ɩ́mɩ́ nɩ́ a di a mnɩ́ kʋ! Lagɔ a nékʋ́cinyɔ Ezayíi a wɔlɩ mɛ́ wá lé ɔ́ cíé wá amɔ a zà mà Lagɔ anɩ́: Lɔ́lɔ́kpaá lɩ̀à neé mʋ́ á bʋbɔlɔɔ́, Mà á di wlʋ́ lɔɔ́ gwá.

⁷ Flɛ́flɛ̀sa á yie lɛ́ bʋbɔ̀ kà, Mà a cɩ́a cɩ́a wɔlɩɛ́ nɩ́ gba ka. Zɩkpa zɔ̀ a nyʋa a jràmáá ámá á cɩ́alɛ.

⁸ Lé amɔ, a tinyʋa a jràmáá ámá a ŋwʋ́ɛ́ kpá, ɩ́zà Lagɔ̀jràmáá ámá a gbʋ́gbʋɛ.»

⁹ Lé Zozíi srʋ á ɔ́ anɩ́: «A wɔlɩ́ mɛ́ɛ, a nie sáá fɩ́ɛ́ lé a pá Lagɔ̀jràmáá klá, lé a bháʋ́ a tinyʋa a jràmáá.

¹⁰ Mà Moyízɩ anɩ́: Ŋwʋ́ ʋ́ ɩ̀ tʋ́ lé ɩ̀ nɛ́! Lé ɔ cíi sɔ́kʋ́ mà: Nyɔ nɩ bhʋ́sʋ ɔ tʋ́ ɩ́zà ɔ nɛ́ a, bhʋ́anɩ nyɔɔ́ a bhlɔ́ɔ́!

¹¹ Lé amɔ ànàà a nie mà: Nyɔ yi míi lé ɔ́ yi ɔ tʋ́ yà ɔ nɛ́ sɔ́ srʋ mà, ɩ́ yi la míi lé ɩ́ yi la amɔ kʋ́ yi, mà lɛ́ɛ́ na ká la amɔ nyɛ́ a, ɛ́ ŋwɔ́ɔ yɩ́ klɔbanɩ ɩ́ gba ŋwɔ́ɔ mà, yɛ́ɛ glɔ̀gbá jɩ̀ ŋwʋ́, Lagɔ na ká yɩ́ mɛ́ nyɛ́.

¹² A nie lé bhʋ́anɩ nyɔɔ́ nɩ́ nyɛ́ yɩ́ ɔ tʋ́ yà ɔ nɛ́ sɔ́ lɛ́.

¹³ A bhá a tinyʋa a jràmáá lé a sa ʋ́ Lagɔ̀jràmáá. A ka sɔ́kʋ́ nyumo gbɩ kɔ́kɔ́mnɩ́ lé a nií.»

Wɔlíɛ́ ɩ̀ bhusule nyɔ a
( Matíe 15.10‑20 )

¹⁴ Zozíi wle sɔ́kʋ́ jrèè lé ɔ srʋ á mà: «A lɔ̀fɩ́ɛ́, a pʋ nyúkwlí lé cémʋ́ ná ká cí a a kɩ́ɩ́ nú.

¹⁵ Lɛ́ɛ́ nyɔ li lɛ́, lé ɛ̀ mʋ lɛ́ ɔ mnɩ́ a, ɛ́mɛ́ nɩ́ tɔ́ɔ́ sɩsɩ́ Lagɔ a drɩ̀, mà ɩ̀ wlʋ́ɛ́ nyɔ a neé a, ɩ́mɩ́ tɔ́ɔ́ sɩsɩ́ Lagɔ á drɩ̀. [

¹⁶ Naa, ɔ̀ nɩ ka nyúkwlí lé ɔ̀ ká nú a, ɔ nú!]»

¹⁷ Zozíi wlʋ́ jrèè gɔ̀ lé ɔ mʋ gbó a, ɔ́ kʋjɩ̀nyʋ̀àà yrá wɔlɩ́ɛ́ ɔ́ cí la a, ɩ́ gba.

¹⁸ Bhʋ́ ɔ́ srʋ á mà: «Ɔ́ɔ́! A sɛ́fʋ sáà, a bhobhoé nɩ́ ʋ́ ŋnɩɩ? A nɩ́ saá yì mà lɛ́ɛ́ nyɔ li lɛ́, lé ɛ̀ mnɛ lɛ́ ɔ mnɩ́ a, ɛ nɩ́ tɔ́ɔ́ sɩsɩ́ɩ?

¹⁹ A yɩbhlɩ saá mà lɛ́ɛ́ nyɔ li lɛ́ a, mnɩ́ mʋ́ ɛ́ bhliloó, lé ɔ́ plalɛɛ klá kʋ́ mà ɛ̀ nɩ́ duo a mnɩ́ ŋwɔ́ɔ.» Ɩ́mɩ́ ka ŋnɩ́ lé ɔ́ srʋ á mà nyɔ yi míi lé ɔ́ yi lelilɩɛ́ fɩ́ɛ́ li.

²⁰ Ɔ́ cí, ɔ́ anɩ́: «Ɩ̀ wlʋ́ɛ́ nyɔ a duo a mnɩ́ a, ɩ́mɩ́ tɔ́ɔ́ sɩsɩ́.

²¹ Duo a mnɩ́ nyumo bhobhoé wlʋ́ɛ́, ɛ́mɛ́ nie lé nyɔ ka lɛ dɩba. Ɛ́mɛ́ nie lé ɔ́ ghlíe, lé ɔ́ bhlá sáà ɔ lía.

²² Ɛ́mɛ́ nie lé ŋwnɔ́ yrá yuwle lé yuwle yrá ŋwná, ɩ́mɩ́ nie lɛ́ sáà lé nyɔ mɛ́ lɛ́ kʋ́ lé ɔ́ nyù lɛ́ sáà mnɩ́. Ɩ́mɩ́ ŋwɔ́ɔ lɛ́ nyʋaá a nyɩ́glɩ̀lɛ̀ lé kàpàkápá. Ɩ́mɩ́ ŋwɔ́ɔ lɛ́ sáà nyɔ ɔ liyʋ a lɛ́ ɛ̀ sɔɔ́ duo mnɩ́ a. Ɩ́mɩ́ ŋwɔ́ɔ lɛ́ nyumosa a mɔ̀ɔsasʋ́, lé ɩ̀ ŋwɔ́ɔ lɛ́ blìpapʋ́ lé nɩnalɛ̀ɛ̀.

²³ Sɩ́tɛ̀ a nyumo wɔlɩɛ́ fɩ́ɛ́, nyɔ a duo a mnɩ́ ɩ́ wlʋ́ɛ́, ɩ́mɩ́ tɔ́ɔ́ sɩsɩ́ Lagɔ a drɩ̀.»

Lówùdùŋwnɔ ka Zozíi a fádùò
( Matíe 15.21‑28 )

²⁴ Zozíi wlʋ́ ʋ́ a, ɔ́ mʋ Tílɩbhlɩ kʋ́ lé ɔ́ pla dáamúó kʋ́, ɔ nɩ́ yrá lé nyʋa yɩbhlɩlɔɔ́ dá, mà ɔ nɩ́ ka míi lé ɔ ká zúzùò.

²⁵ Ŋwnɔ́ a múó kʋ la ʋ́ lé ɔ́ ka la ŋnɩ́keyʋ. Mà nyumozùzu kʋ ɔ la jɩ̀. Ŋwnɔ́ɔ́ nú kɔ́ɔ̀kʋ́ Zozíi a wɔlɩ́ a, ɔ́ yi lé ɔ́ sra ɔ́ drɩ̀ koti sá.

²⁶ Ɔ́ ŋwɔ́ɔ Silofenísɩ a yrʋ́kwla mà ɛ̀ nɩ́ Zúfʋyrʋkwla ŋwɔ́ɔ. Ɔ́ yi Zozíi gɔ̀ a, ɔ́ srɔɔ wlú lé ɔ́ srʋ ɔ́ mà, ɔ ŋnɩ́keyʋɔ́ a jɩ̀ a nyumozùzùò, ɔ jɩ́ɩlʋʋ́.

²⁷ Mà Zozíi srʋ ɔ́ mà: «Cíe fɩ́ɛ́ yúóó sá lé a ká li a ká lʋ, mà nà bhá yúó a lelilɩɛ́ lé kɩ̀ɩ vʋ̀ʋ pá.»

²⁸ Ŋwnɔ́ɔ́ anɩ́: «Aan mà, Kanyɔɔ̀, yúó nɩ kʋ liìda a, ɩ́ lelilɩɛ́ ɩ̀ bhlie lɛ́ tébhle zɔ̀ a, vʋ̀ʋ lií à!»

²⁹ Ɩ́mɩ́ ŋwɔ́ɔ Zozíi mà: «Yà yɩ́ saá cí a, plɩ́ lé mʋ gbó mà nyumozùzùò ya nà ŋnɩ́keyʋɔ́ jɩ̀ wlʋ́!»

³⁰ Ŋwnɔ́ɔ́ yrɩ́bhà lé ɔ́ mʋ gbó a, ɔ́ nɩ náa dʋdʋɛ a, ɔ ŋnɩ́keyʋɔ́ pʋ́ bɔ̀gɩ jɩ̀. Nyumozùzùò yɔɔ́ jɩ̀ wlʋ́.

Zozíi yalɩma mùmùdɛ̀lɩ́
( Matíe 15.29‑31 )

³¹ Zozíi wlʋ́ Tílɩbhlɩɛ́ a mnɩ́ a, ɔ́ flʋ Sidɔ́ɔ yà Dí Kʋ́gbá a bhlɩɛ́ a mnɩ́ sɔ́ lé ɔ́ yrɩ́bha Galilée a nyíé gɔ̀.

³² Lé á lɔɔ́ nyɔ gɔ̀. Nyɔɔ́ nɩ́ nú lé ɔ cícíwɔlɩɛ́ nɩ́ kplɔɔ̀. Lé á bhibhie Zozíi mà ɔ gbɛlɔɔ́ glɔ̀gbá jɩ̀ lé ɔ bhibhie ɔ wlú bhè ɔ ká yalɩmà.

³³ Lé ɔ yà nyɔɔ́ sɔ́ wlʋ́ʋ jrèè gwá, lé ɔ́ ŋwʋ́ nyɔ a nyúkwlí ɔ wlie ɔ́ ŋwna wlie dàdɩ yɩ́ lé ɔ́ gbɔ́ nyɔ a mɩɔɔ́.

³⁴ Ɔ́ dʋdʋ̀ lagɔɔ́ lé ɔ́ dru nyobhuo, ɔ́ srʋ nyɔɔ́ mà: «Efata!» Ɩ́ gba ŋwɔ́ɔ mà: «Kalɔ klʋ́!»

³⁵ Dáamúóó nyɔɔ́ yalɩmà, ɔ nyúkwlíé wlée lé ɔ́ mɩɔɔ́ flíi.

³⁶ Lé Zozíi nyɛ́ nyʋaá tába, ɔ́ srʋ á námasa mà á nɩ mʋ a, a ná sa nyɔ dí. Mà Zozíi yi lɛ́ saá nyʋa srʋ, mà a nɩ mʋ a, á sa lɛ nyʋa dí.

³⁷ Wɔlíɛ́ fɩ́ɛ́ Zozíi nɩ lɛ́ sɩ́tɛ̀ a, ɩ́ mna nyʋa neé, lé á nie mà: «Wɔlíɛ́ fɩ́ɛ́ ɔ́ nɩ a, ɩ́ náa kpanyɩ! Ɔ́ nɩ lé nyʋaá à nɩ́ nú la a, á núé, lé à nɩ́ míi la cícíé a, á cíé!»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy