Online Bible

Málɩ́kɩ 5 - Neyo

Zozíi sa nyɔ nyumozìzi kɔ́kɔ́mnɩ́ jɩ̀
( Matíe 8.28‑34 ; Lúkɩ 8.26‑39 )

¹ Zozíi ya ɔ́ kʋjɩ̀nyʋ̀àà sɔ́ dí lé á ŋnɩ nyíé a bɩ́, Zelazenɩ́nyʋa a bhlɩ́ɛ́ a mnɩ́.

² Mà á ŋnɩ lé Zozíi kwlíi kɔ́ɔ̀kʋ́ a, nyɔ wlʋ́ lésigwlèè kʋ ʋ́ gɔ̀ a mnɩ́ lé ɔ́ yi Zozíi nyúzɔ kʋ́. Nyɔɔ́ nyumozìzi kʋ̀ ɔ la jɩ̀,

³ lésié a nyièdɩ ɔ́ pʋ́lɛ. Mà nyɔɔ́, nyʋaá nɩ́ míi lé a kɔ́ɔ́ kpó ŋwʋ́. Ɔ́ bhɩɩ́ a gʋagʋ́ nɩ́ yɩ́ ɔ yɩ́ lɛ́ ŋwɔ́ɔ.

⁴ Á ya kɔ́kɔ́mnɩ́ kʋ́ trányɩ, á yɔɔ́ kpí bhɩ ŋwʋ́, á yɔɔ́ sáà cɩ́ɩ ŋwʋ́. Mà ɔ́ ŋáta kpíé, lé ɔ́ díé cɩ́ɛ. Nyɔ nɩ́ ʋ́ kʋ lé ɔ kɔ́ɔ́ míi.

⁵ Gàgàzrɩ̀, lé dɩ́bɩ, ɔ́ bile lésié yà kíkíé sɔ́ a nyièdɩ, lé ɔ́ gbo. Ɔ́ ka cɔ́kwɩpɩ lé ɔ́ kpakpla ɔ nyoku.

⁶ Mà, ɔ yɩ́ bhli kɔ́ɔ̀kʋ́ Zozíi jɩ̀ drɩ̀ mɔ̀ɔ a, ɔ́ fa sóo lé ɔ́ mʋ lé ɔ́ sra koti sá,

⁷ lé ɔ́ bhɩa wɔlɩ́, ɔ́ anɩ́: «Lagɔ a Yuwliyʋ, Zozíi! Wɔlɩ gbá ɩ̀ yrálɛ mɔ́ɔ mʋ́ a? Ɩ́bhìè, ɩ́ sra mɔ̀ wlú! Lagɔ a ŋnɩ́ɛ́ mʋ́, nà nyɛ́ mɔ́ɔ nyakalɩ!»

⁸ Bhʋ́ Zozíi srʋ nyumozùzùò mà: «Wlʋ́ nyɔɔ́ jɩ̀, nyumo zùzù!»

⁹ Lé Zozíi yrá nyɔɔ́, ɔ́ anɩ́: «Nà ŋnɩ́ áa?» Nyɔɔ́ anɩ́: «Ná ŋnɩ́ ɩ̀ ŋwɔ́ɔ, à nɩ́ bɛ́. À zù kpanyɩ.»

¹⁰ Lé ɔ́ bhibhie sɔ́kʋ́ Zozíi lé ɔ́ srʋ ɔ́ mà ɔ ná jɩ́ɩlɩɩ́ bhlɩ́ɛ́ lɩ̀à mnɩ́.

¹¹ Mà kíké kʋ ʋ́ gɔ̀, lé gékpíbhuzàlɩ a kpa káda kʋ mɔ̀ɔmɔ̀ ɩ́ lie.

¹² Naa nyumozìzìè srʋ Zozíi, ɩ́ anɩ́: «Ɩ́bhìè, fa àmɔ̀ bhuzàlɩ kpà kádàà mnɩ́ bhè cíe àmɔ̀ mɔ̀ɔ sá bhè à kà a mnɩ́ pla!»

¹³ Lé Zozíi nyɩ́ɩ́ nyúzɔ lé ɩ́ wlʋ́ nyɔɔ́ jɩ̀. Ɩ́ mʋ lé ɩ́ pla bhuzàlɩ̀ɛ̀ a mnɩ́. Mà bhuzàlɩ̀ɛ̀ fa sóo, lé ɩ́ kwlíi kíkéé. Lé ɩ́ lɔ̀fɩ́ɛ́ kɔ́sɔ jié lé jié bhlɩ́ɩ́. Ɩ́ ŋwɔ́ɔ yuosa bhuzàlɩ a du.

¹⁴ Mà nyʋaá à síe bhuzàlɩ̀ɛ̀ a á gú. Á gú lé á fa dú dí, lé á fa sáà bìdí kʋ́ dí. Ɩ́ ka ŋnɩ́ a, nyʋa wlʋ́ mɔ̀ɔmɔ̀, lé á yi dʋdʋ̀ kà.

¹⁵ Á ŋnɩ Zozíi gɔ̀ a, á dʋdʋ̀ a, nyɔɔ́ nyumozìzi kɔ́kɔ́mnɩ́ɛ́ kʋ la jɩ̀ a, ɔ́ bɔ́ɔ ʋ́ ɔ yíjɩ̀ ya gbɩ́ ɔ́ pla koti mʋ́. Mà nyʋaá yɛ́ ɔ́ a, ŋanɩmɛɛ́ yi la kʋ́.

¹⁶ À yɛ́ wɔlɩ́ɛ́ a bhá dà, á sa nyʋa ànàà dí. Wɔlíɛ́ fɩ́ɛ́ ɩ̀ ŋnɩ nyɔɔ́, lé ɩ̀ ŋnɩ bhuzàlɩ̀ɛ̀ a, á sɩɩ́ mɔ̀ɔ.

¹⁷ Mà, nyʋaá sra Zozíi wlú, á anɩ́, ɔ wlʋ́ á bhlɩ́ɛ́ a mnɩ́.

¹⁸ Zozíi pla gɔ́lʋ́ɔ́ ɔ ká yrɩ́bhà, nyɔɔ́ nyumozìzìè wlʋ́ lɛ́ jɩ̀ a ɔ́ yi lé ɔ́ bhibhie Zozíi lé ɔ yɔ̀sɔ́ ká mʋ.

¹⁹ Mà Zozíi nɩ́ ŋwnʋ́. Ɔ́ srʋ nyɔɔ́, ɔ́ anɩ́: «Mʋ gbó, mʋ nà nyʋa gɔ̀, lé sa laa dí. Cémʋ́ Kanyɔ yɛ́ nà gbɩ́ a ŋazɩ kʋ́, lé ɔ́ nɩ nà zà a, mʋ lé sa laa dí.»

²⁰ Ɔ́ cí sɩ́tɛ̀ a, nyɔɔ́ ɔ́ɔ mʋ yɩ́. Ɔ́ mʋ a, ɔ́ bhli ɔ bhlé a bhlɩ́ɛ́ á wlele Dí Kʋ́gbá a lé ɔ́ sa mɔ̀ɔ a nyʋa dí. Ɔ́ srʋ á cémʋ́ Zozíi nɩ ɔ́ zà a. Mà nyʋaá fɩ́ɛ́ nú wɔlɩ́ɛ́ a, ɩ́ mna a neé.

Zozíi yalɩma ŋwnɔ́ a múó lé ɔ́ galà Zayilúsʋ a ŋnɩ́keyʋ
( Matíe 9.18‑26 ; Lúkɩ 8.40‑56 )

²¹ Tányɩɛ́ mʋ́ Zozíi wlʋ́ nyíé a bɩ́ lé ɔ́ dí a, ɔ́ kʋ àyɩ nyíé gɔ̀, lé nyʋa kɔ́kɔ́mnɩ́ yi lé á glalɔɔ́ klʋ́.

²² Bhʋ́ á kʋ lé zúfʋcɛcɩwlʋɔ́ a cífɩnyʋaá á nyièdɩ a cífɩɛ́ á wlele Zayilúsʋ a, ɔ́ yɛ́ Zozíi a, ɔ́ yi lé ɔ́ bhli ɔ́ bhɔ kʋ́,

²³ lé ɔ́ srʋ ɔ́ mà: «Ɩ́bhìè, ɩ́ sra mɔ̀ wlú, ná ŋníkeyʋɔ́ ɔ́ɔ kúé, yi bhè bhibhie ɔ wlú ɔ ká ʋ́ neé wlʋ́ àyé.»

²⁴ Lé ɔ yà Zozíi sɔ́ mʋ, mà nyʋaá à jɩ́ á kʋ́ a, a nɩ́ zumole bɛ́.

²⁵ Mà ŋwnɔ́ a múó kʋ á nyièdɩ, lɩkpɩ kʋ́gbá lɩkpɩ sɔ́ lɛ̀ lé dòlú wlʋ́ɔ́ mʋ́.

²⁶ Ŋwnɔ́ɔ́, ɔ́ ya kpanyɩ kalɩmɛ yɛ́ dɔ̀tányʋa wlɩɩ́, ɔ́ kakalɩɛ́ fɩ́ɛ́ ɔ́ yɩɩ́ nyʋa nyɛ́ ɔ ká yalɩma, bhè ɔ nɩ́ yalɩma, gúó pɩalɔɔ́ kɔ́ɔ̀kɔ́ kʋ́.

²⁷ Ɔ́ nú Zozíi a wɔlɩ́ a, bhʋ́ ɔ́ yi lé ɔ́ pla nyʋaá nyièdɩ lé ɔ́ plɩ́ Zozíi a bɩ́, lé ɔ́ gbɔ́ ɔ bàna.

²⁸ Ɔ́ srʋ ɔ nyoku mà: «Nɩ trányɩ lé nɩ gbɔ́ ɔ bàna a pʋpʋ́ a, ɩ́ yi yalɩma.»

²⁹ Mà ŋwnɔ́ɔ́ kʋ dáamúó lé dòlúó ʋ̀ wlʋ́ ɔ́ la mʋ́ a, ʋ́ dúò lé ɔ́ yɩbhlɩ saá mà ɔ́ ya yalɩma.

³⁰ Mà Zozíi yɩbhlɩ kakamnɩ́lɛ́ saá mà fɩ́ yɔɔ́ mʋ́ wlʋ́. Ɔ́ yrɩ́bhà, lé nyʋaá a nyièdɩ̀ɛ̀, ɔ́ yrá á mà: «Ɔ̀ gbɔ́ ná kótuó a?»

³¹ Bhʋ́ ɔ́ kʋjɩ̀nyʋ̀àà srʋ ɔ́ mà: «Ɩ̀ lɛ́bhɛ nyʋaá, á jɛ́jɩa mɔ̀ wlú lé ɩ̀ yrá á mà ɔ̀ gbɔ́ mɔ́ a?»

³² Lé Zozíi pláa yɩ́ lé ɔ́ dʋdʋ̀ ɔ nyoku gɔ̀, nyɔɔ́ ɔ̀ gbɔ́ ɔ́ a, ɔ kɔ́ ɔ́ yɛ́.

³³ Ŋwnɔ́ɔ́ ŋanɩmɛ yiloó kʋ́ ɔ́ lɔ̀fɩ́ɛ́ ɔ́ tɩ́tɛlɛ, wɔlɩ́ɛ́ ɩ̀ plɩ́ɩ ɔ́ kpɩkpɩ a mnɩ́ a zà, ɔ́ yi lé ɔ́ bhli Zozíi a drɩ̀, lé ɔ́ plɩ́ wɔlɩ́ɛ́ fɩ́ɛ́ kʋ́ lé ɔ́ cí ɩ cɩ́cása.

³⁴ Lé Zozíi srʋ ɔ́, ɔ́ anɩ́: «Ná yʋ́ʋ̀, nà fádùò ya mɔ̀ pʋ́à. Nà gúó ya zɩmnɛ́ bhɩa, mʋ yɩ́ blɔ̀blɔ́ a mnɩ́!»

³⁵ Wɔlíɛ́ kʋ bhlà Zozíi neé bhè nyʋa wlʋ́ zúfʋcɛcɩwlʋɔ́ a cífɩ a gbó, lé á yio srʋ ka mà: «Yʋ́ɔ́ ya kú, nàa ya flɛ́flɛ sa Másɛɛ̀ klʋ́!»

³⁶ Zozíi nú wɔlɩ́ɛ́ á cí a, mà ɔ nɩ́ ɩ́ mányɩ ɔ́ srʋ Zayilúsʋ mà: «Nàá gú, ŋwʋ́ mɔ̀ duo.»

³⁷ Ɔ́ na ká Zayilúsʋ a gbó mʋ a, cémʋ́ ɔ nɩ́ yrá lé yígàdà nyɔ jɩ́ ɔ́ kʋ́ a, ɔ́ srʋ Pɩ́ɛ́lɩ, Zákɩ lé ɔ nɩ́ayʋ́ Záan sɔ́ mà a yi a yɔ̀sɔ́ ká mʋ.

³⁸ Mà á ŋnɩ gbó a, nyʋaá kʋ̀ mɔ̀ɔ a, á dídilo bɩ́, á bhɔtɔ, a nyúgbùyrè klue.

³⁹ Zozíi pla wlʋɔ́ a mnɩ́ a, ɔ́ yrá nyʋaá mà: «Ɛ̀kʋ̀ʋ̀ bhè a ŋwíé lé a sa yrè a? Yʋ́ɔ́ nɩ́ kú, ɔ́ɔ ŋwɔ́mɛ.»

⁴⁰ Ɔ́ cí sɩ́tɛ̀ a, áa nyɩalɔɔ́, bhʋ́ ɔ́ jɩ́ɩlaá. Lé wlʋdrèè mnɩ́ á ŋwʋ́ yʋ́ɔ́ a, ɔ yà yʋ́ɔ́ ɔ tʋ́ lé ɔ nɛ́ lé ɔ́ kʋjɩ̀nyʋ̀àà taá sɔ́ pla mɔ̀ɔ.

⁴¹ Lé ɔ́ bhli yʋ́ɔ́ a glɔ̀gbá kʋ́, lé ɔ́ srʋ ɔ́ mà: «Talita kúmʋ!» Ɩ́ gba ŋwɔ́ɔ mà: «Ná ŋnɩ́keyʋ, náa srʋɛ mɔ̀ mà soglù.»

⁴² A kʋ dáamúó lé yʋ́ɔ́ soglù lé ɔ́ náa. Mà nyʋaá fɩ́ɛ́ kʋ̀ la ʋ́ a, neé mna a. Yʋ́ɔ́ ŋwɔ́ɔ lɩkpɩ kʋ́gbá lɩkpɩ sɔ́ a yʋ́.

⁴³ Mà Zozíi cɩa a nyúkwlí lé ɔ́ srʋ á mà wɔlɩ́ɛ́ a yɛ́ lɛ́ a, nyɔ ná yɩbhlɩɩ́, mà a nyɛ́ yʋ́ɔ́ lelilɩ ɔ ká li.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy