Málɩ́kɩ 3 - Neyo

Zozíi yalɩma bhlɛ́kanyɔ nyɔbhleyru kʋ́

¹ Zozíi yi sɔ́kʋ́ zúfʋcɛcɩwlʋ a mnɩ́. Ɔ́ yi a, glɔ̀gbàpʋ bhlanyɔ kʋ mɔ̀ɔ.

² Falizɩ́ɛnyʋaá kʋ̀ ʋ́ a, á mányɩ lɛ Zozíi a nɩnɩgbɩ, ɔ nɩ yi nyɔ yalɩma nyɔbhleyruó kʋ́ a, a kɩ́ɩ́ yɛ́ lé a kɔ́ɔ́ gbʋ́ nyɛ́ɛ̀.

³ Lé Zozíi srʋ bhlɛ́kanyɔɔ́, ɔ́ anɩ́: «Soglù lé nynʋ́vʋ̀ kʋ́ nyʋaá fɩ́ɛ́ a klʋ́ jɩ̀!»

⁴ Lé Zozíi yrá jrèè, ɔ́ anɩ́: «Mà, nyɔbhleyruó kʋ́, námasa nyɔ nɩ nɩɩ? Mà nyumosa ɔ nɩ nɩɩ? Nyɔ, ɔ́ɔ nɩ pʋ́a ɔ liyʋʋ? Mà, ɔ dʋdʋ̀ ɔ yɩ́ lé ɔ kúu?» Mà ɔ́ yrá á lɛ́ saá, á lɔ̀fɩ́ɛ́ dìdiniii! Nyɔ a múó nɩ́ kɔtɔɔ̀.

⁵ Ɔ́ bie jrèè gɔ̀ yɩ́ lé ɔ́ dʋdʋ̀, ɔ́ duo sie. Nyʋaá à kʋ̀ la ʋ́ a, á ka la mɔ́ dɩ kʋ́, a mɔ́nyùmòè a zà. Lé ɔ́ srʋ bhlɛ́kanyɔɔ́, ɔ́ anɩ́: «Gbáa nà sɔɔ́ mʋ́!» Nyɔɔ́ gbáa ɔ́ sɔɔ́ mʋ́ a, ɔ́ yalɩma.

⁶ Falizɩ́ɛnyʋaá wlʋ́ Lagɔ̀wlʋ̀ɔ̀ a mnɩ́ a, á kʋ dáamúó lé a yà Elódʋ a nyʋa sɔ́ yɛ́yɛ lé cémʋ́ á na ká Zozíi mʋ́ bhlábhla a, a kɩ́ɩ́ bhobhoò.

Nyʋa kɔ́kɔ́mnɩ́ yì Zozíi

⁷ Tányɩ kʋ sɔ́kʋ́ ʋ́ lé Zozíi yà ɔ́ kʋjɩ̀nyʋ̀àà sɔ́ mʋ Galilée nyíplʋɔ́ gɔ̀, nyʋa kɔ́kɔ́mnɩ́ jɩ́ ɔ́ wá kʋ́. Àna wlʋ́ Galilée lé Zudée.

⁸ Wɔlíɛ́ Zozíi nɩ lé nyʋa nú a, ɩ́zà, nyʋa kɔ́kɔ́mnɩ́ gbɛlɔɔ́ jɩ̀. Nyʋa àna wlʋ́ Zelízalɛ́mʋ lé àna wlʋ́ Iduméebhlɩ kʋ́ lé Zrʋdɛ́ɛnyié a bɩ́. Àna wlʋ́ Tílɩ lé Sidɔ́ɔ.

⁹ Ɩ́ ka ŋnɩ́ a Zozíi srʋ ɔ́ kʋjɩ̀nyʋ̀àà mà a mʋ́mɔ gɔ́lʋ́ ɔ ká pla, nyʋa nɩ kɔɔ́ bhúbhuò.

¹⁰ Cémʋ́ ɔ́ yalɩma lɛ nyʋa kɔ́kɔ́mnɩ́ a, nyʋaá fɩ́ɛ́ gú bhlá a, á yrá lé a kɔ́ɔ́ gbɔ́.

¹¹ Nyʋaá nyumozìzi kʋ jɩ̀ a, á yɛ́ kɔ́ɔ̀kʋ́ Zozíi a, á bhliloó drɩ̀. Nyumozìzìè pá wɔlɩ́ lé ɩ́ cíé, ɩ́ nie, «Mɔ̀, Lagɔ a Yuwliyʋ ɩ̀ ŋwɔ́ɔ!»

¹² Bhʋ́ Zozíi srʋ nyumozìzìè mà, ɩ bhli né kʋ́, nyʋa nɩ kɔɔ́ yɩbhlɩ.

Zozíi gbázɩ̀ ɔ cíecíenyʋaá a kʋ́gbá sɔ́ mʋ́

¹³ Zozíi mʋ kíké wlú, lé nyʋaá ɔ́ wà a ɔ́ pá á wɔlɩ́ lé á yio gɔ̀.

¹⁴ Lé ɔ́ gbázɩ̀ nyʋa kʋ́gbá sɔ́ mʋ́, ámá à ŋwɔ́ɔ ɔ cíecíenyʋa. Mà ámá ɔ yàsɔ́ na ká kʋ́ námnɩ̀ lé ɔ ká á cíè. A ká Lagɔ a Námadìè nyʋa sa à.

¹⁵ Ɔ ká á pɔ́wa nyɛ́ lé a ká nyumozìzi jɩ́ɩ̀.

¹⁶ Áa kʋ́gbá sɔ́ɔ́ a ŋnɩ́ lɛ̀ɛ̀: Simɔ́ɔ ɔ́mɔ́ Zozíi ŋwʋ́ Pɩ́ɛ́lɩ ŋnɩ,

¹⁷ Zebedée a yúó, Zákɩ yà Záan sɔ́, ámá ɔ́ ŋwʋ́ Bɔanɛgɛsɩ ŋnɩ́. Ɩ́ gba ŋwɔ́ɔ mà, ɔ́ gbúgblule Lagɔ bhísakʋ́.

¹⁸ Ɔ́ wle Adrée, Filípʋ lé Batelemíi. Ɔ́ wle sáà Matíe lé Tomáa yà Afée a yʋ́ɔ́ Zákɩ sɔ́. Ɔ́ wle Tadée lé bhlɩ́ɛ́ a kʋbhlanyɔ Simɔ́ɔ.

¹⁹ Ɔ́ wlee sáà Zudáa Sɩkalɩ́ɔ́tʋ. Zudáa Sɩkalɩ́ɔ́tʋ ɔ́mɔ́ sà lɛ́ Zozíi lé á bhlɔ́ɔ́.

Á ŋáta Zozíi

²⁰ Lé Zozíi ya ɔ́ kʋjɩ̀nyʋ̀àà sɔ́ yi gbó. Mà cémʋ́ nyʋa zù kpanyɩ ʋ́ a, a nɩ́ cásɩ yɛ́ lé a ká li.

²¹ Zozíi a lɔ́lɔ́kpa nú cémʋ́ ɔ́ nié a, á anɩ́: «Ɔ wlú ya ŋátɔ̀.» Ɩ́ ka ŋnɩ́ a, á anɩ́ a kɔ́ɔ́ bhá ka yi.

²² Lɔ̀ a másɛnyʋaá à wlʋ́ Zelízalɛ́mʋ a, á anɩ́: «Nyumo zùzùò ʋ̀ kámalɛ nyumozìzìè fɩ́ɛ́ lé á wlele Bezebúlʋ a, ʋ́mʋ́ kʋ̀ ɔ̀ mʋ́. Ʋ́mʋ́ nyɛ́ ɔ́ pɔ́wa lé ɔ́ jɩ́lɛ nyumozìzi.»

²³ Ɩ́ ka ŋnɩ́ a, Zozíi wle á lé ɔ́ pá á dɔ̀. Ɔ́ srʋ á mà: «Cégbá mʋ́ Dɩ́blʋ yi míi lé ɔ́ yi ɔ́ nyoku jɩ́ɩ a?

²⁴ Léyibhlɩ a múó a mnɩ́ a nyʋa nɩ dúlo mʋ́, lé a nɩ vʋ a, bhʋ́anɩ léyibhlɩ́ɛ́ nɩ́ námà.

²⁵ Lɔ́lɔ́kpa a múó a mnɩ́ a nyʋa nɩ dúlo mʋ́ a, bhʋ́anɩ lɔ́lɔ́kpaá áa bhɩa.

²⁶ Naa, Dɩ́blʋ nɩ ka ɔ nyoku tʋ́ la a, ɔ nɩ la ɔ nyoku tʋ́ a, ɔ pɔ́waá nɩ́ kla dʋ́, áa tuo.

²⁷ Nyɔ nɩ́ ka míi lé ɔ liyʋɔ́ kà fɩ́ a, ɔ ká ɔ́ wlʋɔ́ a mnɩ́ pla lé ɔ ká ɔ́ kakalɩ fa. Ɔ kɩ́ɩ́ fa a, ɔ́ɔ yio fɩ́ɛ́ gʋa bhʋ́ ɔ́ yi míi lé ɔ́ yi ɔ́ wlʋɔ́ a mnɩ́ pla lé ɔ́ yi ɔ́ kakalɩ fa.

²⁸ Mà nyɔ yi nyumoé a céàna nɩ, cícíwɔlɩ yà nɩnɩgbɩ sɔ́ a mnɩ́, ɔ nɩ bhibhie Lagɔ a ɔ́ cieloó.

²⁹ Mà ɛ́ nɩ ŋwɔ́ɔ Blɔ̀blɔ̀zùzùò ʋ́mʋ́ ɔ nɩ nyumò kʋ́ a, bhʋ́anɩ nyɔɔ́, ɔ nɩ́ cieleé ka kɔ́ lé kɔ́.»

³⁰ Á anɩ́: «Ɔ yà nyumozùzu sɔ́ zrɩlɛ kʋ́ a ɩ́ zà ɔ́ srʋɛ àyɩ sɩ́tɛ̀.»

Zozíi a lɔ́lɔ́kpa

³¹ Bhʋ́ a tányɩɛ́ a múó a mnɩ́, Zozíi ɔ níayúó yà ɔ nɛ́ sɔ́ yi. Á yi a, á nynʋ́vʋ̀ jrùkʋ́ lé á nɩ lé á wleó.

³² Nyʋa kɔ́kɔ́mnɩ́ bɔ́ɔ Zozíi gɔ̀ á glalɔɔ́ klʋ́. Lé á srʋ ɔ́, á anɩ́: «Ɩ̀ nɛ́ lé ɩ̀ níayúó sɔ́ nynʋ́vʋ̀ ɔ̀ jrùkʋ́ á yrá nà zà.»

³³ Zozíi anɩ́: «Ɔ̀ ŋwɔ́ɔ ɩ nɛ́ yà ɩ níayúó sɔ́ a?»

³⁴ Ɔ́ pláa yɩ́ lé ɔ́ dʋdʋ̀ nyʋaá à glalɔɔ́ klʋ́ a jɩ̀ lé ɔ́ srʋ á, ɔ́ anɩ́: «A dʋdʋ̀ nyʋaá lɩ̀à, ámá à ŋwɔ́ɔ ɩ nɛ́ lé ɩ́ níayúó.

³⁵ Nyɔɔ́ ɔ̀ nie wɔlɩ́ɛ́ Lagɔ wà a, ɔ́mɔ́ ɔ̀ ŋwɔ́ɔ ɩ nɩ́ayʋ́, yà ɩ nɛ́ sɔ́.»