Málɩ́kɩ 2 - Neyo

Zozíi yalɩma kplákplányɔ lé ɔ́ cieloó ɔ́ nyumoé

¹ Yrií zùò plɩ́ a, Zozíi yrɩ́bha Kapɛnayʋ́mʋ. Nyʋaá nú mà ɔ́ kʋ gbó a,

² á lɔ̀fɩ́ɛ́ yi lé á ŋnɩlɔ̀ ɔ̀ wlú. Mà wlʋɔ́ yíè lé nyʋa àna tuo jrùkʋ́. Ɩ́ nɩ lé bhɔɔ́ a ŋwʋ́da nɩ́ kʋ. Bhʋ́ á kʋ lé ɔ́ cɩ́alaá Lagɔ̀wɔ̀lɩ̀ɛ̀.

³ Nyʋa àna yio gɔ̀, á nyièdɩ̀ɛ̀, àna á mɔ̀na gbɩdɩɛ kplákplányɔ gbàpʋ́ jɩ̀.

⁴ Mà nyʋaá a zumoleé ka ŋnɩ lé a nɩ́ míi lé a kɔ́ɔ́ Zozíi a drɩ̀ fa. Ɩ́ ka ŋnɩ́ a, á gblà wlʋɔ́ wlú, lé á dí mɔ̀ɔ fleé, ɔ́ kʋ gbàpʋ́ɔ́ jɩ̀, lé á kwléeloó Zozíi drɩ̀.

⁵ Zozíi yɛ́ a fá dùò a, ɔ́ srʋ kplákplányɔɔ́, ɔ́ anɩ́: «Ná yʋ́ʋ̀, nà nyumoé ya mɔ̀ cieloò!»

⁶ Ɔ́ cí saá a, lɔ̀ a másɛnyʋaá kʋ̀ wlʋɔ́ a mnɩ́ a, á yráyra a, ɩ́mɩ́ ŋwɔ́ɔ mà:

⁷ «Ɛ̀kʋ̀ʋ̀ lé nyɔɔ́ cíé saá a, lé ɔ́ ŋáta Lagɔ a ŋnɩ́ à? Ɔ̀ yi míi lé ɔ̀ yi nyɔ ɔ́ nyumoé cie á? Ɛ̀ nɩ̀ nɩ́ Lagɔ a múó ŋwɔ́ɔ a!»

⁸ Zozíi yɩbhlɩ kɔ́ɔ̀kʋ́ a bhobhoé kʋ̀ á di a yɩ́ a, ɔ́ yrá á mà: «Ɛ̀kʋ̀ʋ̀ lé a ka saá a bhobhoé a?

⁹ Ká kplákplányɔ srʋ mà: Nà nyumoé ya mɔ̀ cielo a, ɩ́zà kɔ́ɔ́ sáà srʋ mà, bhá nà gbàpʋ́ɔ́ kʋ́ lé ka náa a, ɩ́mɩ́ wɔlɩdrìè sɔ́ lɩ̀à mnɩ́ɛ́ àna gbá ka fɩ́ a?

¹⁰ A ka lé a ká saá yɩbhlɩ mà, dɛ́ dʋ̀dʋ̀ɔ̀ lɩ̀à kʋ́ɔ́, Nyɔɔ́ a Yuwliyʋɔ́ míi lé ɔ ká nyʋa a nyumoé ciè.» Zozíi cí lɛ́ sɩ́tɛ̀ a, ɔ́ srʋ kplákplányɔɔ́, ɔ́ anɩ́:

¹¹ «Náa srʋɛ mɔ̀ mà: Soglù, bhá nà gbàpʋ́ɔ́ kʋ́ lé mʋ gbó!»

¹² Á kʋ dáamúó nyʋaá lɔ̀fɩ́ɛ́ a klʋ́ jɩ̀, nyɔɔ́ soglù, ɔ́ bháʋ́ ɔ gbàpʋ́ɔ́ lé ɔ́ mʋ. Nyʋaá neé mnaá, á anɩ́: «À nɩ́ à zà saá wɔlɩ́ yɛ́!» Ɩ́ ka ŋnɩ́ lé á fa Lagɔ ŋnú.

Zozíi yi bhàlʋ̀nyʋa á zà

¹³ Ɩ̀lɩa lɔ̀fɩ́ɛ́ plɩ́ yɩ́ a, Zozíi yrɩ́bha sɔ́kʋ́ Galilée a nyíplʋɔ́ gɔ̀, nyʋa kɔ́kɔ́mnɩ́ yio gɔ̀ cɩ́á ka.

¹⁴ Ɔ́ kʋ plɩ́ɩda lé ɔ́ yɛ́ lapóowlʋ a mnɩ́ nyɔ, Afée a yʋ́ɔ́ á wlele Levíi a, lé ɔ́ pɔ́ɔ́ wɔlɩ́ ɔ́ anɩ́: «Levíi, jɩ́ mɔ́ɔ kʋ́!» Lé Levíi soglù, lé ɔ́ jɩ́ ɔ́ kʋ́.

¹⁵ Tányɩ a múó Zozíi mʋ Levíi a gbó li ka ɔ yà ɔ́ kʋjɩ̀nyʋ̀àà sɔ́, yà lapóo a kʋbhlinyʋa lé yígàdà bhàlʋ̀nyʋa kɔ́kɔ́mnɩ́ sɔ́. Sɩ́tɛ̀ a nyɩ́kpɔceé à jɩ́ɛ́ la mɔ́ kʋ́ a a nɩ́ zumole bɛ́.

¹⁶ Naa, tányɩɛ́ mʋ́ Falizɩ́ɛnyʋaá a jrèè a mnɩ́ a lɔ̀ a másɛnyʋa yɛ́ Zozíi, ɔ yàsɔ́ kʋ liɩ̀da a, bhʋ́ á yrá ɔ́ kʋjɩ̀nyʋ̀àà mà: «Ɛ̀kʋ̀ʋ̀ lé ɔ yà lapóo a kʋbhlinyʋaá lé bhàlʋ̀nyʋ̀àà sɔ́ lile kʋ́ a?»

¹⁷ Zozíi nú wɔlɩ́ɛ́ á cí a, bhʋ́ ɔ́ srʋ á, ɔ́ anɩ́: «Nyɔɔ́ ɔ̀ kɔ̀ɔ̀ lɩ́ tɛ́ mʋ́ a, ɔ nɩ́ mʋ́mɔ gɔ́zɩ̀nɩ̀nyʋa, mà gupuonyʋa ámá mʋ́mɔ gɔ́zɩ̀nɩ̀nyʋa. Nyʋaá ànàà à kà a nɩnɩgbɩ srí sá a, nɩ́ a zà yi, mà bhàlʋ̀nyʋ̀àà á zà ɩ́ yi.»

Bhlagɔ̀gɔ̀ gbɩ yà Lagɔ a Námadìè sɔ́ nɩ́ wlʋ́ʋ̀

¹⁸ Yruú kʋ ʋ́ a Zán Batísɩ a kʋjɩ̀nyʋ̀àà yà Falizɩ́ɛnyʋa sɔ́ pʋ́ʋ kleé. Nyʋa yi Zozíi gɔ̀, lé á yrɔ́ɔ́, á anɩ́: «Ɛ̀kʋ̀ʋ̀ bhè Zán Batísɩ a kʋjɩ̀nyʋ̀àà yà Falizɩ́ɛnyʋa sɔ́ pʋ́ʋlɛ kleé bhè nà naá nɩ́ pʋ́ʋ kleé ámá bhísakʋ́ a?»

¹⁹ Bhʋ́ Zozíi srʋ á, ɔ́ anɩ́: «Nyɔ nɩ fláa ŋwnɔ́, lé bhʋ́alɛ́ lɔlɔ nɩ dà à, lelilɩ nɩ kʋ ʋ́ a, ɔ bheyinyʋaá ɔ́ wle a á yi ɔ́mɔ́ yʋwlɩɛ́ ɔ̀ síé lɛ́ a drɩ̀ kʋ lé, á yi kleé pʋ́ʋ? A nɩ́ nɩ saá. Dɛ́ɛ́ a yà yʋwlɩɛ́ sɔ́ kʋ àyɩ ʋ́ a, á nɩ́ ka kleé pʋ́ʋ.

²⁰ Mà tányɩ yi ʋ́ kʋ lé á yi a yʋwlɩɛ́ nyièdɩ sa à. Bhʋ́ a tányɩɛ́, á yi kleé pʋ́ʋ.

²¹ Nyɔ nɩ́ bhá lokupɩʋ yalʋ lé ɔ kʋ́ʋ́ kótu zʋ jɩ̀ kplá a. Ɔ nɩ nɩ saá, lokupɩʋ yalʋɔ́ jrie kótu zʋ̀ɔ̀ lé ʋ́ díú gɔ̀ fleé lé fleé ghlímole.

²² Nyɔ nɩ́ bhá sáà nɔyalʋ lé ɔ kʋ́ʋ́ bhlagɔ̀gɔ̀ jìdàní a mnɩ́ sá ŋwʋ́ʋ. Ɔ nɩ nií a, nʋ́ɔ́ yi bháa lé jìdàníé yi wlɔwlɔɔ̀, lé nʋ́ɔ́ yà jìdàníé sɔ́ yi ŋátɔ̀. Ɩ́ ka ŋnɩ́ a nʋyalʋ, jɩ̀dàní yalɛ a mnɩ́ á ŋwʋ́lʋʋ sá.»

Zozíi sa Zúfʋnyʋa a nyɔbhleyruó gbɔ̀ɔ

²³ Zúfʋnyʋa a nyɔbhleyru kʋ́, Zozíi yà ɔ́ kʋjɩ̀nyʋ̀àà sɔ́ kʋ nyɔ̀làgbɩ a bhlii da, á plɩ́ɛ́ á mnɛ, mà ɔ́ kʋjɩ̀nyʋ̀àà námɛ bhè á kpla lágbɩ a mnɩ́ a nyɔ̀ɔ̀ yɩ́.

²⁴ Falizɩ́ɛnyʋaá yɛ́ á, á srʋ Zozíi, á anɩ́: «Lɛbhɛ cémʋ́ nà kʋjɩ̀nyʋ̀àà nie nyɔbhleyruó kʋ́ a! Ɛ̀kʋ̀ʋ̀ lé a nɩ́ ŋwʋ́ lɛ́ à jràmáá kpá a?»

²⁵ Bhʋ́ Zozíi srʋ á, ɔ́ anɩ́: «Wɔlɩdrèè Davídɩ nɩ wá a, a nɩ́ a zà má Lagɔ̀bɔ̀gʋ a mnɩ́ zɛɛ? Tányɩ a múó, Davídɩ yà ɔ́ kʋjɩ̀nyʋ̀àà sɔ́, a nɩ́ lelilɛ ka kleé bhlá a,

²⁶ bhʋ́ ɔ́ pla Lagɔ̀bʋ̀bɔ̀dàà, Lagɔ̀bʋ̀bɔ̀nyɔ̀kádɔ̀ɔ̀ Abiatáa a tányɩ. Mà bʋbɔ̀dàà flɔ́ɔ ʋ́mʋ́ Davídɩ bháʋ́ lé ɔ́ li. Ɔ́ nyɛ́ sáà ɔ́ kʋnamnɩnyʋaá lé á li. Bhè bʋbɔ̀nyʋa a múó kà lɔ̀ lé a kʋ̀ʋ̀ li.»

²⁷ Lé Zozíi srʋ á sɔ́kʋ́, ɔ́ anɩ́: «Nyɔbhleyruó nyɔ a zà ʋ́ nilo, mà nyɔ nɩ́ nyɔbhleyruó a zà nilo.

²⁸ Ɩ́zà Nyɔɔ́ a Yuwliyʋɔ́ ŋwɔ́ɔ lɛ́ nyɔbhleyruó a Kanyɔ.»