Málɩ́kɩ 15 - Neyo

Á fa Zozíi Pilátɩ drɩ̀

¹ Zrɩ̀ɩ zɩ kɔ́ɔ̀kʋ́ a, Lagɔ̀bʋ̀bɔ̀nyʋ̀àkádàà, lɔ̀ a másɛnyʋaá yà dɔ̀panyʋaá sɔ́, nyʋaá fɩ́ɛ́ kʋ̀ la tɩ́tɩ́plɔjrèè a mnɩ́ a, á yɛ́yɛ fɩ́ɛ́ lé á gʋa Zozíi, lé á fɔɔ́ Pilátɩ a gbó.

² Lé Pilátɩ yrá Zozíi, ɔ́ anɩ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi anɩ́: «Ɩ́mɩ́ ɩ̀ cí lɛ́.»

³ Lagɔ̀bʋ̀bɔ̀nyʋ̀àkádàà gʋalɔɔ́ wɔlɩ́ kɔ́kɔ́mnɩ́ jɩ̀,

⁴ ɩ́ ka ŋnɩ́ a, Pilátɩ yrɔ́ɔ́ sɔ́kʋ́, ɔ́ anɩ́: «Dʋdʋ̀, gbʋ́ á ŋwʋ́lɛ kɔ́ɔ̀kɔ́ mɔ̀ wlʋ́ lé nɩ́ sa née?»

⁵ Mà Zozíi nɩ́ srɔɔ́ né, neé ya Pilátɩ mna.

⁶ Flíiflíiglɩ̀sɩ́sɩ̀ɛ̀ fɩ́ɛ́ Pilátɩ sa jɩ̀ŋwʋ̀nyɔ a múó jɩ̀ɩ. Mà jɩ̀ŋwʋ̀nyɔ̀ɔ̀ nyʋa yrá lé ɔ̀ nɩ sá jɩ̀ɩ a, ámá à zɛlɔɔ́ ŋnɩ́.

⁷ Nyɔ a múó ɔ́mɔ́ á wlele Balabásɩ, nyʋaá yà gɔ̀mnànyʋ̀àà sɔ́ dúlo wá mʋ́ lé yrè klue wá a, ɔ́mɔ́ Balabásɩ kʋ wá mɩ́ mʋ́ lé á bhlá wá nyɔ.

⁸ Zúfʋnyʋaá lɔ̀fɩ́ɛ́ yi Pilátɩ a dɛ́, lé á srʋ ɔ́ mà cémʋ́ ɔ́ nie wá kɔ́ɔ̀kɔ́ lé ɔ́ sa wá jɩ̀ŋwʋ̀nyɔ jɩ̀ɩ a ɔ nɩ yɩ́ saá

⁹ Á cí a, Pilátɩ anɩ́: «Naa a yrá lé ɩ cíe Zúfʋnyʋa a lóo sáà?»

¹⁰ Pilátɩ yì la saá mà waza kà ŋnɩ́ lé Lagɔ̀bʋ̀bɔ̀nyʋ̀àkádàà lɔɔ́ Zozíi drɩ̀.

¹¹ Zɩ̀glàmà Lagɔ̀bʋ̀bɔ̀nyʋ̀àkádàà ya la nyʋaá fɩ́ɛ́ sú a ká Balabásɩ jɩ̀ɩ sa.

¹² Lé Pilátɩ yrá á sɔ́kʋ́, ɔ́ anɩ́: «Bhè ɔ̀lɩa, á wlele lɛ́ Zúfʋnyʋa a lóo a, cégbá a yrá lé nɩ nió áa?»

¹³ Bhè á ŋwʋ́ ɔ́ yrè, á anɩ́: «Kʋ ɔ́ kúsu jɩ̀!»

¹⁴ Pilátɩ anɩ́: «Bhè nyumoé a cégbá ɔ́ nɩ á?» Bhè á klu, á anɩ́: «Kʋ ɔ́ kúsu jɩ̀!»

¹⁵ Naa, Pilátɩ ká yɩ́ má lɔlɔ duo kʋ́ ŋwʋ́ a, ɔ́ cíe Balabásɩ sá lé, ɔ́ nɩ lé á sɩ́á fɩ́ɛ́ Zozíi, lé ɔ́ srʋ sʋ́jàà mà a kʋlɔɔ́ kúsuó jɩ̀.

Sʋ́jàà nyɩa Zozíi

¹⁶ Á fa Zozíi gɔ̀mnàwlʋ̀ a mnɩ́ lé á wle mɔ̀ɔ a sʋ́jàà fɩ́ɛ́

¹⁷ Á plɔɔ́ bànɩ̀zàla mʋ́ lé á nɩ nyníci wlùgblè lé á ŋwʋ́ ɔ̀ má wlú

¹⁸ Á pɔ́ɔ́ yúó, á nie: «Àyúó Zúfʋnyʋa a lóo!»

¹⁹ Á klálɔɔ́ bhlà zìzi wlú. Á ŋwnalɔɔ́ dàdɩ klʋ́, lé á sralɔɔ́ drɩ̀ koti sá.

²⁰ Á nyɩalɔɔ́ yɩ́ fɩ́ɛ́ lé á sɔɔ́ bànɩ̀zàlàà mʋ́, lé á plɔɔ́ ɔ kótié mʋ́. Á fle ɔ́ zɔ̀ lé á fɔɔ́ kúsuó jɩ̀ kʋ ka.

Á kʋ Zozíi kúsu jɩ̀

²¹ Mà nyɔ a múó kʋ ʋ́, ɔ́mɔ́ a wlele Simɔ́ɔ. Ɔ́ ŋwɔ́ɔ dúó a wlele Sɩlɛ́nɩ a nyɔ. Ɔ́mɔ́ ŋwɔ́ɔ Alɛzádrɩ yà Wlúfusɩ sɔ́ a tʋ́. Ɔ́ wlʋ́ɛ́ la lágbaá ɔ́ plɩ́ɛ́ lé á vídèlò kʋ́ lé á bhlio kʋ́ mà, ɔ gbɩdɩ̀ Zozíi a kúsuó.

²² Dɛ́ɛ́ á wlele Glɔgɔtáa a, mɔ̀ɔmɔ̀ á fa Zozíi. Glɔgɔtáa ŋnɩɛ́ ɩ́ gba ŋwɔ́ɔ mà wlúkofó a dɛ́.

²³ Nyʋa bhli gɔ́zɩ̀kàlɩ lé á la mílɩ lé á bhlábhlalɩ nʋ́ mʋ́, lé á nyɛ́ Zozíi mnáada, mà ɔ nɩ́ mná.

²⁴ Áa bhli yɩ́ mɔ́ kʋ lé á kʋlɔɔ́ kúsu jɩ̀. Lé á pá nɩ̀gbɩ lé á bhábha ɔ kótié.

²⁵ Geglìà a glíi fɛna a tányɩɛ́ bhʋ́ á kʋlɔɔ́ kúsuó jɩ̀.

²⁶ Á jɩ́jrà kplipá jɩ̀, wɔlɩ́ɛ́ kà ŋnɩ́ lé á na kɔ́ɔ́ bhlá a: «Zúfʋnyʋa a lóo.»

²⁷ Tányɩɛ́ mʋ́ á kʋ lɛ́ Zozi kúsuó jɩ̀ a, á kʋ sáà nyɩ́kpɔbhlanyʋa a sɔ́ kúsu jɩ̀. Múó kʋ la ɔ́ lilie kʋ́ lé ànɔ̀ɔ̀ kʋ la ɔ́ kɔmɩa kʋ́. [

²⁸ Cémʋ́ ɩ́ jɩ́jràlɔ̀ wá Lagɔ̀bɔ̀gʋ a mnɩ́ mà, á zɛlɔɔ́ sáà mónyùmònyʋa nyièdɩ, ɩ́ mɩ́ nilo.]

²⁹ Mà plɩ́plɩ́nyʋa trʋlɔɔ́. Á bíbie wɛ́ lé á nie: «Ééé! Mɔ̀ cí wá mà ɔ̀ yi Lagɔ̀gbìkádàà wla lé ɔ́ yi a yrií ta pá a,

³⁰ sa yɩ́ ʋ́ ɩ̀ nyoku neé à! Wlʋ́ yɩ́ kúsuó jɩ̀ lé kwlíi yɩ́!»

³¹ Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá sɔ́ nyɩalɔɔ́ la sáà, lé á nie á pʋpʋ́ a nyièdɩ mà: «Ɔ́ sa ʋ́ nyʋa neé, bhè ɔ nɩ́ míi ɔ ká ʋ́ ɔ nyoku neé sa à!

³² Ɔ́mɔ́ ɔ̀ anɩ́ ɔ̀ ŋwɔ́ɔ la Kláyɩ́sɩ a, lé ɔ̀ ŋwɔ́ɔ la Zúfʋnyʋa a lóo a, ɔ wlʋ́ yɩ́ kúsuó jɩ̀ ɔ kwlíi bhè à ka yɛ́! Bhʋ́ à yi ɔ́ fádùò ka à.» Nyʋaá ɔ yàsɔ́ kʋ kúsié jɩ̀ a, a sɛ́fʋɔ́ á trʋlɔɔ́ sáà.

Zozíi ya kú

³³ Yrɩ́zàbhlà kʋ̀ la ʋ́ mà sɩ́tɛ̀ ɩ́ kʋ̀ bhè cúcú kʋ bhlɩ́ɛ́ fɩ́ɛ́ jɩ̀ a plaàda lé glíiyi a ta kla.

³⁴ Kosúgbo a glíiyi ta kla yɩ́ a, bhʋ́ Zozíi sa né lé ɔ́ wleè: «Eloyíi! Eloyíi! Lama sabatani?» Ɩ́ gba ŋwɔ́ɔ mà: «Ná Lagɔ! Ná Lagɔ! Lɛ́gbá kʋ̀ʋ bhè ɩ̀ sà mɔ́ɔ nà glɔ̀gbá jɩ̀ a?»

³⁵ Bhlɔ̀bhlɔ̀nyʋ̀àà à kʋ̀ la ʋ́ a, á anɩ: «A pʋ nyúkwlí mà ɔ́ wle Elíi!»

³⁶ Múó fa sóo lé ɔ́ mʋ, lé ɔ́ ŋwʋ́a sápla bhʋ́gʋ̀nʋ a mnɩ́, lé ɔ́ gʋalaá zìzie yɩ́ lé ɔ́ nyɛ́ ɔ̀ má mnáada. Ɔ́ anɩ́: «À gláa lé à dʋdʋ̀, lé Elíi ɔ́ pá lɛ́ wɔlɩ́ a, ɔ kɔ́ɔ́ kúsuó jɩ̀ sa à.»

³⁷ Zozíi bhɩa wɔlɩ́ lé, ɔ́ nyobhuo bhɩa mɔ̀ɔ.

³⁸ Tányɩɛ́ a múó a mnɩ́ɛ́, Lagɔ̀wlʋ̀kádʋ̀ɔ̀ a mnɩ́ a lɔkwɩ kádɛ̀ɛ̀ ɛ́ ghlalɔ mʋ́ pɩ́ sɔ́. Ɛ́ bháa lagowlú lé ɛ́ jɩ́ dʋ̀dʋ kʋ́.

³⁹ Wlɔmɛ́ɛnyʋa a sʋ́jàà cífɩɛ́ kʋ̀ la ʋ́ a, ɔ́ yɛ́ cémʋ́ Zozíi kú a, bhʋ́ ɔ́ sa né, ɔ́ anɩ́: Cɩ́cása lé, nyɔɔ́ lɩ̀à ŋwɔ́ɔ la Lagɔ a Yuwliyʋ.

⁴⁰ Ŋwná kʋ la ʋ́, á wlʋ́ʋ la ʋ́ gwá lé á dʋdʋɛ. Á nyièdɩ̀ɛ̀, múó ŋwɔ́ɔ la Malí Madɩlɛ́nɩ, lé múó ŋwɔ́ɔ la Malíi. Ɔ́mɔ́ ŋwɔ́ɔ Zákɩ tòyilɛ yà Zozée sɔ́, a nɛ́. Lé múó ŋwɔ́ɔ la sáà Salomée.

⁴¹ Ŋwnáá lɩ̀à nɔnʋɔ́ fɩ́ɛ́ Zozíi zrɩ Galilée bhlɩɛ a mnɩ́ a, á yɛ́ɛ ʋ dá. A yɔ̀sɔ́ námɛ la lé á zrɩlɔɔ́ la gà. Ŋwná àna kʋ la ʋ́ lé á jɩ́ɛ́ la Zozíi kʋ́ lé á yi la sáà Zelízalɛ́mʋ.

Á zízìè Zozíi a gàzɛ̀ɛ̀

⁴² Kosúgbòtànyɩ̀ɛ̀ ya la yiosa ŋnɩ lé a ká la Zúfʋnyʋa a nyɔbhleyru a dʋ̀dʋ kʋ́ gɩglà.

⁴³ Mà Alimatée a nyɔ a múó á wlele Zɔ̀zɛ́fʋ a, ɔ́ ŋwɔ́ɔ tɩ́tɩ́plɔjrè a mnɩ́ a nyɩ́kpɔkádɔ, lé ɔ́ gláa sáà Lagɔ a Léyibhlɩɛ́ a yiyitanyɩ. Ɔ́mɔ́ ɔ̀ bhli ɔ́ duo kʋ́ lé srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀.

⁴⁴ Pilátɩ nú mà Zozíi ya la kú a, ɩ́ mnɔɔ́ neé. Ɩ́ ka ŋnɩ́ a, ɔ́ wle sʋ́ja a kámanyɔɔ́ lé ɔ́ yrɔ́ɔ́ lé tányɩɛ́ mʋ́ ɔ́ kú a, ɛ́ nɩ ya mʋ́ trʋma a, ɔ ká saá yɩbhlɩ.

⁴⁵ Á srʋ ɔ́ a bhʋ́ ɔ́ ŋwnʋ́ʋ lé Zɔ̀zɛ́fʋ bháʋ́ gàzɛ̀ɛ̀.

⁴⁶ Zɔ̀zɛ́fʋ mʋ lé ɔ kla cʋ́crʋ́ɛ pápɛ́ lé ɔ́ sa gàzɛ̀ɛ̀ kúsuó jɩ̀ lé ɔ́ pɩpɩɛ́. Ɔ́ ŋwʋ́ Zozíi lésuó ʋ̀ kʋ̀ cɔ́kʋ a mnɩ́ a. Lé ɔ́ bhísie cɔ́bhikáda lé ɔ́ sú lésuó né.

⁴⁷ Tányɩɛ́ mʋ́ á zizìè Zozíi a, Malí Madɩlɛ́nɩ yà Zozée ɔ nɛ́ Malíi sɔ́ kʋ la ʋ́, lé a ká la dɛ́ á na kɔ́ɔ́ la zízìè a yɛ́.