Málɩ́kɩ 14 - Neyo

Á yrá lé a ká Zozíi bhlá

¹ Zúfʋnyʋa a flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, ɛ́ yri sɔ́ tuo àyɩ mɔ̀ɔ lé ɛ ká ŋnɩ. Mà Lagɔ̀bʋ̀bɔ̀nyʋa káda yà lɔ̀ a másɛnyʋaá sɔ́ bhobho yrʋɔ́ á yi sá ŋwʋ́ lé á yi Zozíi kʋ́ bhli lé á yio bhlá a.

² Á núnu a, ɩ́mɩ́ ŋwɔ́ɔ mà: «À ná bhliloo glɩ̀sɩ́sɩ̀ɛ̀ a tányɩɛ́ kʋ́! Nyʋaá nɩ́ kɩ́ɩ́ wà, lé yrè yi klu.»

Ŋwnɔ́ ŋwʋ́ Zozíi a wlú dàŋwóni

³ Zozíi ya ɔ́ kʋjɩ̀nyʋ̀àà sɔ́ mʋ Betaníi lé ɔ́ pla kosugɔ̀bhànyɔ Simɔ́ɔ a dɛ́ kʋ́. Á kʋ liìda lé ŋwnɔ́ a múó yi, ɔ́ ka dàŋwónikpalá. Nɔ́nʋ́nyokwié á wlele nádɩ a, ɩ́mɩ́ á bhá lé á nɩ bhʋ́anɩ dàŋwónié, ɩ pɛ́lʋ́ tɛ́. Ŋwnɔ́ɔ́ ka kpáláá klʋ́ lé ɔ́ kɔ́sɔ dàŋwónié Zozíi wlú.

⁴ Mà nyʋa kʋ̀ ʋ́ a, á nyièdɩ a bhlɔ̀bhlɔ̀ ana nɩ́ wɔlɩ́ɛ́ ŋwnɔ́ɔ́ nɩ a wá a, á anɩ́: «Ɛ̀kʋ̀ʋ̀ lé ŋwnɔ́ɔ́ ŋáta dàŋwónié a?

⁵ À yi la mɛ́ pɛ́lʋ́ ŋwʋ́ lé à yi la cɩ́cá moníi kuo yɛ́ a. Lé moníe, à yi la mɩ́ ŋazɩ̀nyʋa nyɛ́ a?» Naa ŋwnɔ́ɔ́ mɔ́ á lɩ́kpɩlɛ la kʋ́.

⁶ Mà Zozíi nú a lɩ́kpɩ wɔlɩ́ a ɔ́ srʋ á, ɔ́ anɩ́: «A sa ŋwnɔ́ɔ́ né gɔ̀! Gbʋ́ gbá ɔ́ yɛ́ lé a bhlálɔɔ́ lɛ́ nyakalɩ a? Wɔlɩ drèè ɔ́ nɩ lɛ́ a, náma gbɩ ɔ́ nɩ mɔ́ɔ gɔ̀ a.

⁷ Ŋazɩ̀nyʋa, dɛ́ɛ́ a yà sɔ́ à kʋ kɔ́ɔ̀kɔ́. Tányɩɛ́ fɩ́ɛ́ mnɩ́ a nɩ wà a yi a námasa nɩ, mà mɔ́ɔ, ya amɔ sɔ́ à nɩ́ ka kɔ́ɔ̀kɔ́ dɛ́ kʋ.

⁸ Ɔ́ yi míi lé ɔ́ yi nɩ a, ɩ́mɩ́ ɔ́ nɩ. Ɔ́ dá kʋ́klʋ́ lé ɔ́ tá mɔ́ɔ dàŋwóni lé ná kwɩ́ɛ́ a yruó nɩ ŋnɩ yɩ́ a, a ká mɔ́ɔ zízìè.

⁹ Na srʋɛ amɔ cɩ́cása a mnɩ́ mà, zɩkpaá lɩ̀à zɔ̀ bhlɩ́ɛ́ fɩ́ɛ́ jɩ̀ á na ká Lagɔ a Námadìè sa a, ŋwnɔ́ɔ́ lɩ̀à, wɔlɩdrèè ɔ́ nɩ lɛ́ zɩmnɛ́ a, a nɩ́ ka á kɔ́ɔ̀kɔ́ kʋ́ drʋ, á yi a kɔ́ɔ̀kɔ́ cí.»

Zudáa yrá lé ɔ ká Zozíi sa à

¹⁰ Ɩ̀lɩa á lɔ̀fɩ́ɛ́ plɩ́ a, bhʋ́ Zozíi a kʋjɩ̀nyʋ̀àà kʋ́gbá sɔ́ɔ́ nyièdɩ a nyɔɔ́ á wlele Zudáa Sɩkalɩ́ɔ́tʋ a, ɔ́ wlʋ́ ʋ́ lé ɔ́ mʋ Lagɔ̀bʋ̀bɔ̀nyʋ̀àkádàà gɔ̀ mà ɔ ká á Zozíi nyɛ́.

¹¹ Mà ɔ́ srʋ á wɔlɩ́ɛ́ a, ɩ́ ka á kpanyɩ lɔlɔ kʋ́. Bhʋ́ á srʋ ɔ́ mà, nɩ̀ là àmɔ̀ mɔ́ a à yi mɔ̀ moníi nyɛ́. Bháa yɩ́ lɛ́ ʋ́ jɩ̀ a, Zudáa ɔ́ɔ mʋ́mɔ yɩ́ tányɩɛ́ mʋ́ ɔ́ yi á gɔ̀ Zozíi pɛ́lʋ́ ŋwʋ́ a.

Zozíi yà ɔ́ kʋjɩ̀nyʋ̀àà sɔ́ yrɩ̀lɩ flíiflíiglɩ̀sɩ́sɩ̀ɛ̀ a dɛɛ́

¹² Flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, lé ɛ̀ kɛ̀ɛ̀ tagàyrù kʋ́ á bhlálɛ lɛ́ bhlábhlɩ́ɛ́ a, Zozíi a kʋjɩ̀nyʋ̀àà yi lé á yrɔ́ɔ́ mà: «Dɛ́gbá ɩ̀ yrá lé à nɩ̀ gɩglà lé à kà li a?»

¹³ Ɩ́ ka ŋnɩ́ lé Zozíi cíe ɔ́ kʋjɩ̀nyʋ̀àà nyièdɩ á nyʋa a sɔ́ lé ɔ́ srʋ á mà: «A plɩ́ bhlà lé a mʋ dúó kʋ ɔ̀ drɩ̀ mɔ̀ a mnɩ́! A nɩ mʋ a, a yà nyɔ a múó sɔ́ yi gbɩ́dà, ɔ́ ka nyúkonyìde wlú. A jɩ́ ɔ́ kʋ́!

¹⁴ Dɛ́ɛ́ ɔ́ na ká pla a, a pla ʋ́ lé a yrá gbó a kanyɔ mà: Másɛɛ̀, anɩ́ dɛ́gbá a nɩ gɩglà lé ɔ yà ɔ́ kʋjɩ̀nyʋ̀àà sɔ́ ká flíiflíiglɩ̀sɩ́sɩ̀ɛ̀ a tányɩ li áa?

¹⁵ A nɩ cí saá, gbó a kanyɔ yi amɔ wlʋ a lagowlú ghlɩ drè dá pápa a, a mnɩ́ ya plɔ́plɔsa gɩglàlɔ̀. Mɔ̀ɔmɔ̀ a na ká bhlábhlɛ́ɛ́ pi.»

¹⁶ Lé ɔ́ kʋjɩ̀nyʋ̀àà sɔ́ɔ́ mʋ, mà cémʋ́ ɔ́ srʋ á, ɩ́mɩ́ á ŋnɩ ɔ̀, lé á pi flíiflíiglɩ̀sɩ́sɩ̀ɛ̀ a lelilɩɛ́.

Zozíi ŋwʋ́ ɔ́ kʋjɩ̀nyʋ̀àà ŋanɩmɛ yɩ́

¹⁷ Kosúgbòtànyɩ mʋ́ Zozíi yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́ ŋnɩ.

¹⁸ Á kʋ li da lé Zozíi sa né, ɔ́ anɩ́: «Cɩ́cása a mnɩ́ ná srʋɛ amɔ mà, amɔɔ́ kʋ lɛ́ dɛ́ lé yáà amɔ sɔ́ à lile lɛ́ kʋ́ a, á nyièdɩ a nyɔ yi mɔ́ɔ sa à.»

¹⁹ Mà wɔlɩdrèè Zozíi cí lɛ́ saá á bhlá á. Ɩ́ ka ŋnɩ a, nyɔ anɔ ɔ́ yrɔ́ɔ́ «Mɔ́ɔ ɩ̀ sa a?» Nyɔ anɔ ɔ́ yrɔ́ɔ́ mɔ́ɔ ɩ́ sa a?

²⁰ Á yrá lɛ́ saá, bhʋ́ Zozíi srʋ á, ɔ́ anɩ́: «Áa kʋ́gbá sɔ́ɔ́ nyièdɩ̀ɛ̀, nyɔɔ́ yɔ́ɔ̀sɔ́ à nà kà gá dàplʋɔ́ a mnɩ́ glɔ̀gbá fa lé à ká mɔ́ɔ lelilɩ bhá á, ɔ́mɔ́ nà kà mɔ́ɔ sa à.

²¹ Nyɔɔ́ a Yuwliyʋɔ́ ɔ́ɔ mnɛ yɩ́! Ɔ́ mnɛ yɩ́ kúdukʋ́, sɩ́tɛ̀ mʋ́ ɩ́ jɩ́jràlɔ̀ ɔ́ zà Lagɔ̀bɔ̀gʋ a mnɩ́, mà nyɔɔ́ nà kɔ̀ɔ̀ sa a ɔ́ ya miè! Bhʋ́anɩ nyɔɔ́ a nɩ nɩ́ la mɔ́ va a ɩ́ náa la!»

Mɛnʋ́ lelilɩɛ́ a liìda

²² Tányɩɛ́ mʋ́ á kʋ liìda a, Zozíi bhá flɔ́ɔbhuo lé ɔ́ pá á nyú, lé ɔ́ dédìè a mʋ́ lé ɔ́ bhábha ɔ́ kʋjɩ̀nyʋ̀àà. Ɔ́ anɩ́: «A bhá mà ná yɛ́kɛ́ kʋ̀ʋ!»

²³ Lé Zozíi bhá sɔ́kʋ́ duváaplɩ kʋ́ lé ɔ́ pá duváa nyú, lé ɔ́ nyɛ́ á lé á lɔ̀fɩ́ɛ́ mná.

²⁴ Lé ɔ́ srʋ á, ɔ́ anɩ́: «Àlɩa ŋwɔ́ɔ ná dòlú. Dòlúó lɩ̀à, ʋ́mʋ́ ŋwɔ́ɔ mɛnʋ́ yalʋ á dòlúó ʋ̀ kɔ́sɔ nyʋa kɔ́kɔ́mnɩ́ a zà sá.

²⁵ Cɩ́cása a mnɩ́, ná srʋɛ amɔ mà, nɩ́ ka yɩ́ sɔ́kʋ́ duváa mná, ɛ̀ nɩ̀ nɩ́ yɩ́ ɔ̀ Lagɔ a Léyibhlɩɛ́ a mnɩ́ ŋwɔ́ɔ a, mɔ̀ɔmɔ̀ tɛ̀ɛ̀ ná ká yɩ́ sɔ́kʋ́ duváa yala mná.»

²⁶ Zozíi srʋ yɩ́ lɛ́ má saá, áa bháa yɩ́ ʋ́ flíiflíiglɩ̀sɩ́sɩ̀ɛ̀ a lʋ́ a bhlɩbhlɩ́ɛ́ kʋ́ lé á mʋ Olivíe kikéé jɩ̀.

Zozíi anɩ́ Pɩ́ɛ́lɩ yio jɛɛ̀

²⁷ Lé Zozíi srʋ ɔ́ kʋjɩ̀nyʋ̀àà, ɔ́ anɩ́: «Cémʋ́ ɩ́ jɩ́jràlɔ̀ Lagɔ̀bɔ̀gʋ a mnɩ́ mà: Bhlábhlɩ́ɛ́ a dɛdɛ̀nyɔ̀ɔ̀ ɩ́ yio bhlá lé bhlábhlɩ́ɛ́ yi sá jɛlɔ̀ a, sɩ́tɛ̀ tɛ̀ɛ̀ ɩ́ na ká nilo. A yi gú lé a yi sá jɛlɔ̀.

²⁸ Lé ɔ́ srʋ á sɔ́kʋ́, ɔ́ anɩ́, nɩ galɔ̀ a ɩ́ yi amɔ Galilée gláa ka mʋ.»

²⁹ Pɩ́ɛ́lɩ anɩ́: «Nyʋaá fɩ́ɛ́ yi mɔ̀ bɩ́ wlʋ́, mà mɔ́ɔ nɩ́ ka kɛ́ mɔ̀ bɩ́ wlʋ́!»

³⁰ Bhʋ́ Zozíi srʋ ɔ́, ɔ́ anɩ́: «Pɩ́ɛ́lɩ ná srʋɛ mɔ̀ cɩ́cása a mnɩ́ mà mɔ̀, zɩmnɛ́ a yruó lɩ̀à kʋ́, dɩ́bɩ̀ɛ̀ lɩ̀à bhlɔ̀bhlɔ̀, tányɩɛ́ mʋ́ zizɩ̀èdɩ̀kɔ̀kʋ̀ɛ̀ ká sɔ́ɔ da wɔlɩ́ pá a, ɩ̀ yi fɩ́ɛ́ ta a kʋ́ ziè mà nɩ́ mɔ́ɔ yì.»

³¹ Mà Pɩ́ɛ́lɩ bhla sɔ́kʋ́ ɔ́ niwɔlɩɛ́ sá, ɔ́ anɩ́: «Nɩ́ ka kɔ́ɔ̀kɔ́ míi lé ká mɔ̀ jɛɛ̀. Ɩ́ yi céàna kʋʋ̀, ɩ nɩ́ ka céàna kʋʋ̀, yáà mɔ̀ sɔ́ à yi pla.» Zozíi a kʋjɩ̀nyʋ̀àà ànàà a lɔ̀fɩ́ɛ́, céamúó ámá á cí.

Zozíi bhibhie Gesemaníi

³² Zozíi yà ɔ́ kʋjɩ̀nyʋ̀àà sɔ́ mʋ dáamúó, bhʋ́ á wlele Gesemaníi. Lé Zozíi srʋ á, ɔ́ anɩ́: «A kʋ dɛ́ bhè ká mʋ ká bhibhie.»

³³ Ɔ́ na ká mʋ a, ɔ́ bhá Pɩ́ɛ́lɩ, Zákɩ lé Záan lé ɔ yàsɔ́ mʋ. Mà á mnɛ bhè duo gbláalɔɔ́ bhlà nyú lé ŋanɩmɛ gbíó wlú.

³⁴ Lé ɔ́ srʋ á, ɔ́ anɩ́: «Ná zuzu kʋ́ʋlɛ, lé na ká kú. Naa, a tuo dɛ́, a ná ŋwɔ́ɔ.»

³⁵ Lé ɔ́ wlʋ́laá gwá dɩgàsa a lé ɔ ká bhibhiè. Ɔ́ sra koti sá lé ɔ́ cíe bhibhie kʋ́, ɩ nɩ ŋwɔ́ɔ mà ɔ́ yi nyakalɩɛ́ ne wlʋ́ a, ɔ kɛ́ɛ́ ne wlʋ́.

³⁶ Ɔ́ bhibhie a, ɔ́ anɩ́: «Wé! À Tʋ́ʋ̀, ɩ́ yì saá mà mɔ̀, ɩ̀ míile wɔlɩ́ɛ́ fɩ́ɛ́, naa ɩ́bhìè yi bhè wláa mɔ́ɔ nyakalɩɛ́ fɩ́ɛ́ lɩ̀à gwá! Aan, nàa nɩ cémʋ́ ɩ́ yrá a, mà, nɩ cémʋ́ mɔ̀ nà duo wà a!»

³⁷ Zozíi yrɩ́bhà lé ɔ́ yi a gɔ̀ a, ɔ nɩ náa yie a, á ya ŋwɔ́ɔ. Bhʋ́ ɔ́ srʋ Pɩ́ɛ́lɩ: Ɔ́ anɩ́: «Simɔ́ɔ̀, nàà ŋwɔ́mɛɛ? Nɩ̀ɩ́ kɔ́ɔ̀kʋ́ míi lé ka glíiyie a múó a mnɩ́ gà à? Mà nàà ŋwɔ́mɛɛ?

³⁸ Lé ɔ́ srʋ á, ɔ anɩ́, a ná ŋwɔ́ɔ, a bhibhiè bhè nyumozìzi a pɔ́wa nɩ ka ayɩ nyúzɔ kʋ́ sa à. Wé! Nyɔ a wúgɔ ká yɩ́ la fɩ́, mà yɛ́kɛ́ɛ́ ɛ́mɛ́ nɩ́ yɩ́ fɩ́ kà!»

³⁹ Zozíi yrɩ́bha lé ɔ́ mʋ sɔ́kʋ́ bhibhie ka. Ɔ́ bhibhie a, wɔlɩceé a múó ámá ɔ́ cí.

⁴⁰ Lé ɔ́ yi sɔ́kʋ́ ɔ́ kʋjɩ̀nyʋ̀àà gɔ̀. Mà ɔ́ yi a, áa sɔ́ɔ́ kʋ ʋ́ á ŋwɔ́mɛ, yrá ya a yɩ́ yiè. Wɔlɩ́ɛ́ a ká cí a, á nɩ́ ɩ́ yì.

⁴¹ Tadàà ɔ́ yrɩ́bha lé ɔ́ yi a ɔ́ srʋ á, ɔ́ anɩ́: «Aa ŋwɔ́mɛɛ, lé aa bhlenyɔɔ́? Ɩ náa yɩ́! Mà glíiyié ya yɩ́ kla. Á na ká yɩ́ Nyɔɔ́ a Yuwliyʋɔ́ bhàlʋ̀nyʋa wlɩ pɛ́lʋ́ ŋwʋ́ʋ.

⁴² A soglù à ka mʋ mà ná pɛ́lʋ́ŋwʋ̀nyɔ̀ɔ̀ ɔ́mɔ́ ɔ̀ yie ɔ̀!»

Á ya Zozíi kʋ́ bhli

⁴³ Wɔlíɛ́ kʋ bhlà Zozíi neé bhè blà! Zudáa pla. Zudáa, Zozíi a kʋjɩ̀nyʋ̀àà kʋ́gbá sɔ́ɔ́ a nyièdɩ a nyɔ kʋ̀ʋ. Ɔ yà nyʋaá sɔ́ yi a, àna ka pá pá lɩ, Lagɔ̀bʋ̀bɔ̀nyʋa káda, lɔ̀ a másɛnyʋa yà dɔ̀panyʋa sɔ́ɔ̀ cíe á.

⁴⁴ Mà Zudáa yà nyʋaá sɔ́ núnuù lé ɔ́ srʋ á mà: «À nɩ mʋ a, nyɔɔ́ ná ká lɛ́ gbɩ̀ a, ɔ́mɔ́ kʋ̀ʋ. A bhlio kʋ́! A klɔɔ́ wlɩ lé a kɔ́ɔ́ fa!»

⁴⁵ Zudáa yi a, ɔ́ mʋ Zozíi mʋ́. Ɔ́ anɩ́: «Kanyɔɔ̀!» Lé ɔ́ gbɩ̀lɔ̀ɔ̀.

⁴⁶ Nyʋaá yɩbhlɩlɔɔ́ a, áa bhlio kʋ́.

⁴⁷ Ɩ́ ka ŋnɩ́ a, Zozíi a kʋjɩ̀nyʋ̀àà nyièdɩ a nyɔ a múó kpla mɔ̀ɔ jrɛ̀ lé ɔ́ dí Lagɔ̀bʋ̀bɔ̀nyɔ̀kádɔ̀ɔ̀ a cóyʋ nyúklú wlú.

⁴⁸ Mà Zozíi srʋ nyʋaá mà: «Bhè, ɛ̀ kʋ̀ʋ̀ lé a bhá pá pá lɩ lé a yi ná zà a? Nànɩ́ cémʋ́ nyʋa yi lɛ́ nyɩ́kpɔbhlanyɔ kʋ́ bhli ka a.

⁴⁹ Bhè yáà amɔ sɔ́ kʋ̀ kɔ́ɔ̀kɔ́ Lagɔ̀wlʋ̀kádʋ̀ɔ̀ a mnɩ́ lé ɩ́ cɩ́a ayɩ, a nɩ́ mɔ́ɔ mɔ̀ɔ kʋ́ bhlii. Cémʋ́ á jɩ́jrà Lagɔ̀bɔ̀gʋ a mnɩ́ ná zà a, sɩ́tɛ̀ mʋ́ ɩ́ ká lé ɩ ká nilo, ɩ́zà ɩ̀lɩa plɩ́ɩ lɛ́ sɩ́tɛ̀.»

⁵⁰ Tányɩɛ́ mʋ́ á bhli kɔ́ɔ̀kʋ́ Zozíi kʋ́ a, ɔ́ kʋjɩ̀nyʋ̀àà lɔ̀fɩ́ɛ́ gú lé, á jɛlɔ̀ sá.

⁵¹ Zɔ̀kpɩ́yʋ a múó kʋ la ʋ́ lé, ɔ́ gʋa la ɔ́ jɩ̀gbìlɔ̀kwɩ̀ɛ̀ blɛɛ́ lé ɔ́ jɩ́ɛ́ la Zozíi kʋ́. Nyʋaá bhli ɔ yà lokwɩ sɔ́ kʋ́,

⁵² mà ɔ́ tɩ à mɛ́ wlɩɩ́, ɔ́ kʋ ɔ nɛ́ và sa lé ɔ́ gú.

Á ŋwʋ́ Zozíi tɩ́tɩ́ jrè

⁵³ Nyʋaá bhli Zozíi kʋ́ a, á fɔɔ́ Lagɔ̀bʋ̀bɔ̀nyɔ̀kádɔ̀ɔ̀ a gbó. Lé Lagɔ̀bʋ̀bɔ̀nyʋ̀àkádàà fɩ́ɛ́ núnuù a yà lɔ̀ a másɛnyʋaá bhè dɔ̀panyʋaá fɩ́ɛ́ sɔ́, lé á ŋnɩlɔ̀ wlú.

⁵⁴ Mà, Pɩ́ɛ́lɩ jɩ́ Zozíi kʋ́, lé ɔ́ mʋ lé ɔ́ pla sáà Lagɔ̀bʋ̀bɔ̀nyɔ̀kádɔ̀ɔ̀ a gbó. Ɔ́ yi a, ɔ́ plɩ́ɩ gbó a dɛdɛ̀nyʋ̀àà a nyièdɩ kosu gɔ̀ lé ɔ́ bɔ́ɔ sá. Bhʋ́ ɔ́ kʋ lé ɔ́ wlɔ́ɔ.

⁵⁵ Mà Lagɔ̀bʋ̀bɔ̀nyʋ̀àkádàà yà tɩ́tɩ́plɔjrèè a nyʋaá fɩ́ɛ́ sɔ́, á mʋ́mɔ wɔlɩdrè nà kà ŋnɩ́ ka lé a ká Zozíi gbʋ́ wlú ŋwʋ́ʋ bhè a kɔ́ɔ́ bhlá a. Mà a nɩ́ wɔlɩdrè a múó coco yɛ́.

⁵⁶ Kɔ́kɔ́mnɩ́ yi kpɔkpláŋwɔ̀nɩ̀srɩ̀lɛ nɩ ka, lé á ŋwʋ́ Zozíi gbʋ́ wlú. Mà sɩ́tɛ̀ ɩ́ kʋ bhè á nɩ́ né a múó ka.

⁵⁷ Bhlɔ̀bhlɔ̀ ana yi lé á ŋwʋ́lɔɔ́ gbʋ́ wlú, á nie mà:

⁵⁸ «À nú ɔ́ neé mà: Mɔ́ɔ, ɩ́ yi Lagɔ̀gbìkádàà lɩ̀à wla, lé ɩ́ yi yrií ta bhá lé ɩ́ yi yígàdà a na pá, mà glɔ̀gbɩ́ a nɩ́ a ká bhá lé á ká a bhʋ́anaá pá.»

⁵⁹ Mà bhʋ́anɩ ŋwɔ́nɩ́srɩ̀lɛ̀ɛ̀ nyʋaá nɩ a, ɛ nɩ́ kɔ́ɔ̀kʋ́ ʋ́ ŋnɩ.

⁶⁰ Ɩ́ kʋ lɛ́ saá a, Lagɔ̀bʋ̀bɔ̀nyɔ̀kádɔ̀ɔ̀ so jrèè a mnɩ́ glù, lé ɔ́ yrá Zozíi mà: «Bhè mɔ̀ á ŋwʋ́lɛ gbʋ́ wlú a, nɩ́ sa née?»

⁶¹ Mà Zozíi nɩ́ ɔ́ né sra, ɔ́ bhlɔ́ɔ́ nibhó. Lé Lagɔ̀bʋ̀bɔ̀nyɔ̀kádɔ̀ɔ̀ yrá sɔ́kʋ́, ɔ́ anɩ́ mà: «Mɔ̀ ŋwɔ́ɔ lɛ́ Kláyɩ́sɩɩ? Lagɔ̀ɔ̀ a fa lɛ lɛ́ ŋnú a, ɔ yʋ́ɔ́ ɔ́mɔ́ ɩ̀ ŋwɔ́ɔ?»

⁶² Zozíi anɩ́: «Aan, ɔ́mɔ́ ɩ́ ŋwɔ́ɔ. Yruú yi ʋ́ kʋ lé a yi Nyɔɔ́ a Yuwliyʋɔ́ yɛ́, lé ɔ́ yi pɔ́wa ka Làgɔ̀ɔ̀ a lilie kʋ́ bɔ́ɔ. Fɩ́ɛ́, lé a yi ɔ́ yi yi ánɔ lagɔ̀jrùu a nyièdɩ yɛ́ɛ.»

⁶³ Ɔ́ cí lɛ́ saá, ɩ́ ka a Lagɔ̀bʋ̀bɔ̀nyɔ̀kádɔ̀ɔ̀ dɩ kʋ́. Ɩ́ ka ŋnɩ́ a, ɔ́mɔ́ mɔ̀glʋ̀ ɔ́ bànàà ɔ́ pla la mʋ́ a, ɔ́ ghla a. Ɔ́ anɩ́: «Bhè ŋwɔ́nɩ́srɩ̀nyʋa ànà gbá à mʋ́mɔ yɩ́ lɛ sɔ́kʋ́ a?»

⁶⁴ À lɔ̀fɩ́ɛ́, à klʋ́ lé ɔ́ vláa lɛ́ Lagɔ, naa wɔlɩ́ɛ́ cégbá mʋ́ a bhobhuí à? Ɔ́ yrá á kɔ́ɔ̀kʋ́ saá bhè á lɔ̀fɩ́ɛ́ á sa né, á anɩ́, Gbʋ́ yɔɔ́ gʋa, ɔ́ ka lé ɔ ka kú!

⁶⁵ Ɩ́ ka ŋnɩ́ lé, nyʋa àna pɔ́ɔ́ dàdɩ kʋ́. Á gʋa ɔ́ yi jɩ̀ lé á klálɔɔ́ gòdì klʋ́, á anɩ́: «Páa duo sá lé zɛ nyɔɔ́ bhite mɔ̀ a ɔ ŋnɩ́!» Sʋ́jàà à kʋ la ʋ́ a, á bhlio kʋ́ sáà lé á klálɔɔ́ kpɩ́ nyúkwlí.

Pɩ́ɛ́lɩ jɛɛ Zozíi

⁶⁶ Mà Pɩ́ɛ́lɩ kʋ àyɩ la ʋ́ jrùkʋ́, kosuó gɔ̀. Lé Lagɔ̀bʋ̀bɔ̀nyɔ̀kádɔ̀ɔ̀ a cóŋwnɔɔ́ ŋnɩ ʋ́.

⁶⁷ Pɩ́ɛ́lɩ kʋ la kosu gɔ̀, Lé ŋwnɔ́ɔ́ ŋnɩ ɔ́ gɔ̀. Ɔ́ dʋdʋ̀ ɔ diin, ɔ́ anɩ́: «Mɔ̀, nyɔɔ́ á wlele lɛ́ Nazalɛ́tɩ a Zozíi a, yɔ̀sɔ́ námnɩlɛ wázɔ̀ kʋ́.»

⁶⁸ Mà Pɩ́ɛ́lɩ wla ʋ́ kpá lé nyíé flʋ ʋ́, ɔ́ anɩ́: «Nɩ́ nú námasa wɔlɩ́ɛ́ ɩ̀ cíé a, nɩ́ ɩ́ yì.» Ɩ́ ka ŋnɩ́ lé Pɩ́ɛ́lɩ soglù lé ɔ́ mʋ gbine kʋ́ nynʋ́vʋ̀ kà [ɔ́ kʋ mɔ̀ɔmɔ̀ lé zizìèdɩ̀kɔ̀kʋ̀ɛ̀ pá wɔlɩ́].

⁶⁹ Mà ŋwnɔ́ɔ́ ŋnɩ sɔ́kʋ́ ɔ̀ Pɩ́ɛ́lɩ lé nyʋaá kʋ la ʋ́ a, ɔ́ srʋ á, ɔ́ anɩ́: «Nyɔ lɩ̀à, Zozíi a kʋjɩ̀nyʋ̀àà nyièdɩ a nyɔ kʋ̀.»

⁷⁰ Mà Pɩ́ɛ́lɩ ziè sɔ́kʋ́ sɔ́ɔda. Fɩɩ́n, lé nyʋaá srʋ ɔ́, á anɩ́: «Mɔ̀, Galiléeyʋ ɩ̀ ŋwɔ́ɔ, à yì saá cémʋ́ yɔ̀sɔ́ námnɩlɛ wázɔ̀ kʋ́ a.»

⁷¹ Pɩ́ɛ́lɩ anɩ́: «Ná gbàà! Nyɔɔ́ a sa lɛ́ a, ɩ́ sɔ́lɩ ná Lagɔ, nɩ́ ɔ́ yì.»

⁷² Pɩ́ɛ́lɩ a niwɔlɩ nɩ́ àyɩ bhli bhè zizìèdɩ̀kɔ̀kʋ̀ɛ̀ pá sɔ́ɔda wɔlɩ́. Lé Pɩ́ɛ́lɩ luo Zozíi a wɔlɩ́ɛ́ kʋ́. Zozíi srʋ ɔ́ la mà: «Pɩ́ɛ́lɩ zɩmnɛ́ a dɩ́bɩ̀ɛ̀ lɩ̀à bhlɔ̀bhlɔ̀, tányɩɛ́ mʋ́ zizìèdɩ̀kɔ̀kʋ̀ɛ̀ ká sɔ́ɔda wɔlɩ́ pá a ɩ̀ yi fɩ́ɛ́ taa kʋ́ ziè mà nɩ́ mɔ́ɔ yì.» Mà Pɩ́ɛ́lɩ luo Zozíi a wɔlɩ́ɛ́ kʋ́ a ɔ́ bháa ʋ́ nyúgbu kʋ́.