Málɩ́kɩ 12 - Neyo

Nyɩ́kpɔbhlanɔnʋzrɩ̀nyʋa a núnúóó

¹ Lé Zozíi pá núnúó, ɔ́ anɩ́: «Nyɔ a múó, ɔ́mɔ́ ɔ̀ glɩ ɔ glàyʋ̀làgba. Ɔ́ kɩkla lágbàà, lé ɔ́ nɩ mɔ̀ɔ glàyʋ a cɩa da. Lágbàà a dɛdɛ̀ a zà, ɔ́ pá mɔ̀ɔ gbadʋ́. Lé ɔ́ ŋwʋ́ mɔ̀ɔ nɔnʋzrɩ̀nyʋa bhè ɔ yà ámá sɔ́ ká lɛ bhábhà. Lé ɔ́ mʋ wɛ́ɛ.

² Glàyʋ̀ɔ̀ a zalɩmatànyɩ̀ɛ̀ ŋnɩ a, ɔ́ cíe ɔ cóyʋ mà ɔ mʋ lé ɔ yɛ́ nɔnʋzrɩ̀nyʋa lé cémʋ́ a yɔ̀sɔ́ ŋwʋ́ʋ wázɔ̀ kʋ́ a, á ká yɩ́ saá bhábhà.

³ Mà nyɔɔ́ mʋ a, á bhlio kʋ́ lé á bhitoó, lé á jɩ́ɩlɔɔ́ lé ɔ yà glɔ̀gbɩ kɔfɩ́ɛ́ sɔ́ yrɩ́bhà.

⁴ Lé lágbàà a kanyɔ cíe sɔ́kʋ́ sɔ́ nyɔ ànɔ. Á bhlio kʋ́, á klálɔɔ́ gòdì klú, á trʋlɔɔ́ lé á jɩ́ɩlɔɔ́.

⁵ Lé ɔ́ cíe sɔ́kʋ́ ɔ cóyʋ ànɔ a múó, á bhlio kʋ́ á bhitoó lé á bhlɔ́ɔ́. Ɩ́ kʋ lɛ́ saá, cóyuo kɔ́kɔ́mnɩ́ ɔ́ cíe yɩ́ mɔ̀ɔmɔ̀. Mà á mʋ a, nɔnʋzrɩ̀nyʋ̀àà bhɩtɩ àna, lé á bhlá àna.

⁶ Bhʋ́ ɔ́ cíe yɩ́ cɩɩ́ bɩ́kʋ́ bhɩàda ɔ́ mnɩ́ a yʋ́, ɔ́ wàwàyʋ̀ɔ̀ a múó ɔ́ ka a. Ɔ́ srʋ ɔ nyoku mà: A nɩ́ yɛ́ ɔ́ a, a yio kpá ŋwʋ́.

⁷ Mà ɩ nɩ́ sɩ́tɛ̀ plɩ́ɩ̀, á yɛ́ ɔ́ a á srʋ srʋ, á anɩ́: Ɔ̀ nà kà lɛ́ lágbàà jáa kʋ́ li a, ɔ́mɔ́ yie lɛ́ ɔ̀! A yi à bhlɔ́ɔ́ bhè lágbàà ká àmɔ̀ wlɩ plɩ́ɩ.

⁸ Á bhlio kʋ lé á bhlɔ́ɔ́ lé á pá ɔ gàzɛ̀ɛ̀ klá.

⁹ Naa lágbàà a kanyɔ nɩ yi a, cégbá mʋ́ ɔ́ na ká nɩ a? Ɔ nɩ yi a, ɔ́ na ká nɔnʋzrɩ̀nyʋ̀àà bhlá, lé ɔ ká lágbàà mnɩ́ yígàdà nyʋa ŋwʋ́.

¹⁰ A ya lɛ́ wɔlɩdrèè lɩ̀à Lagɔ̀bɔ̀gʋ a mnɩ́ zɛ a? Ɩ́ jɩ́jrɔ̀ mɔ̀ɔ mà: Cɔ́kʋɔ́ ghlɩpanyʋaá nɩ́ lɛ́ mányɩ a, Ʋ́mʋ́ ʋ̀ bhli yɩ́ lɛ́ wlʋɔ́ kʋ́.

¹¹ Kanyɔ Lagɔ ɔ̀ nɩ lé ɩ́ plɩ́ɩ saá. Ɩ́ lɔ̀fɩ́ɛ́ lɩ̀à ɩ́ ŋwɔ́ɔ námawɔlɩ. »

¹² Mà Zozíi cí lɛ́ saá a, Zúfʋnyʋa kádàà yì la saá mà ámá ɔ́ sa. Ɩ́ ka ŋnɩ́ a, á mʋ́mɔ la cémʋ́ á yi nɩ bhè á yio bhlá a, mà cémʋ́ á gúle la jrèè kʋ́ a á wlʋ́ɔ́ gɔ̀ lé á mʋ.

Lagɔ̀jràmáá cíé mà a pɛ́ɛ lapóo a?

¹³ Lé á cíe Falizɩ́ɛnyʋa yà Elódʋ a nyʋa a zùò sɔ́ mà a mʋ lé a sa Zozíi zɔ̀ bhè ɔ́mɔ́ mɔ̀glʋ̀ ɔ né kɔ́ɔ́ gbʋ́ gʋa.

¹⁴ Á yi lé á yrɔ́ɔ́ mà: «Másɛɛ̀, à yì saá mà ɩ̀ cíé cɩ́cása, nɩ̀ɩ́ gbázɩ̀ nyʋa mʋ́, lé nɩ̀ɩ́ gúu sáà nyʋa a klʋ́ a wɔlɩ́ a ŋwʋ́ŋwʋ́ɛ́ lé ɩ̀ cɩ́alɛ námasa nyʋaá à bhlie Lagɔ a nyúzɔ a. Náa, srʋ caá àmɔ̀, à pɛ́ɛ Wlɔmɛ́ɛnyʋa a lóo kádɔ Sezáa a lapóo? Mà à ná pɛ́ɛlaá a?»

¹⁵ Mà Zozíi yɛ́ á nyumo bhobhoé a mnɩ́ a, bhʋ́ ɔ́ yrá á, ɔ́ anɩ́: «Ɛ̀kʋ̀ʋ̀ lé a sa mɔ́ɔ zɔ̀ a? A la caá mɔ́ɔ flèejìè bhè kɛ́ yɛ́!»

¹⁶ Á lɔɔ́ flèejìè a, lé ɔ́ yrá á, ɔ́ anɩ́: «Nyɔ gbá ɔ̀ kɔ̀ɔ̀ wlú á ŋwʋ́ flèejìè jɩ̀ a, lé ɔ̀ kɔ̀ ŋnɩ́ á jɩ́jrà ʋ́ jɩ̀ a?» Á anɩ́: «Lóo kádɔ Sezáa.»

¹⁷ Zozíi anɩ́: «Àà! Naa, ɛ̀ nɩ̀ ŋwɔ́ɔ saá a, lɛ́ ɛ̀ ŋwɔ́ɔ Sezáa a lɛ́ a, a nyɛ́ɛ́ Sezáa, ɩ́zà lɛ́ ɛ̀ ŋwɔ́ɔ Lagɔ a lɛ́ a, a nyɛ́ɛ́ Lagɔ!» Mà Zozíi cílɛ́ saá a, nyʋaá neé mnaá.

Kúdùkuo á galɔ̀ɛ̀

¹⁸ Zúfʋnyʋa a lɔ́lɔ́kpa ànàà á wlele lɛ́ Sadisɩɛ́nyʋa lé à nɩ́ bhá lɛ́ kúdùkuo a galɔ̀wɔ̀lɩ̀ɛ̀ cɩ́cása kʋ́ a, á yi Zozíi yrá ka mà:

¹⁹ «Másɛɛ̀, Moyízɩ a Jràmáá nie mà: Nyɔ yà ɔ ŋwnɔ́ sɔ́ nɩ nɩ́ yʋ́ va lé ɔ nɩ kú a, ɔ nɩ́ayʋ́ bhá kʋ́zrɩ̀ŋnɔ̀ɔ̀ lé ɔ lɔ́lɔ́kpaá nɩ ka tuò.

²⁰ Naa, dʋdʋ̀ʋ̀ nɩ́ayúó gbàásɔ́ kʋ la ʋ́, tagà anɔ sí ɔ́ ka la ŋwnɔ́, mà ɔ yɔ̀sɔ́ nɩ́ yʋ́ va, lé ɔ́ kú.

²¹ Lé sɔ́ anɔ bhá kʋ́zrɩ̀ŋnɔ̀ɔ̀. Ɔ yɔ̀sɔ́ nɩ́ sáà yʋ́ va lé ɔ́ kú. Lé ta ánɔɔ́ bhɔ́ɔ́, mà céamúó, ɔ yɔ̀sɔ́ nɩ́ yʋ́ va.

²² Mà níayúó kú sɩ́tɛ̀ àààn, lé áa gbàásɔ́ɔ́ bhɩa ʋ́. Lé ŋwnɔ́ɔ́ mà ɔ́ pla mɔ̀ɔ sáà lé ɔ́ kú.

²³ Naa kúdùkuo nɩ galɔ̀ cɩ́cása a, ànɔ̀ gbá kɛtɛkʋ́ nà kà ŋwnɔ́ɔ́ bhá à? Máà áa gbàásɔ́ɔ́ bhɔ́ɔ́ la.»

²⁴ Lé Zozíi srʋ á, ɔ́ anɩ́: «Cémʋ́ a cíle lɛ́ dɛ́ a, a ya tuò. Ɛ̀kʋ̀ʋ̀ a? Lagɔ̀wɔ̀lɩ̀ɛ̀ a zɛlɛ lɛ́ a, a nɩ́ ɩ gba yì, lé Lagɔ a pɔ́waá cémʋ́ á kʋ a a nɩ́ ɩ́ sáà yì.

²⁵ Cémʋ́ ɩ́ kʋ lɛ́ a, nyʋa nɩ galɔ̀ a, sísí wɔlɩ́ nɩ́ yɩ́ ɔ̀ Lagɔɔ́ kʋ, nyʋa na ká yɩ́ kplɔkplɔzìzi bísakʋ́ kʋʋ̀.

²⁶ Ɩ̀ ŋwɔ́ɔ lɛ́ kúó a galàwɔ̀lɩ a, à nɩ́ à zà mɩ́ Moyízɩ a bɔ́gʋ̀ɔ̀ a mnɩ́ yɛ́ɛ? Bɔ́gʋ̀ɔ̀ a mnɩ́ Lagɔ srʋ Moyízɩ vɩ́da vɩ́da kpàkáá gɔ̀ mà: Mɔ́ɔ ɔ̀ ŋwɔ́ɔ Ablaámʋ a Lagɔ, Izákɩ a Lagɔ lé Zakɔ́bʋ a Lagɔ?

²⁷ Ɩ́ gba à ŋwɔ́ɔ mà Lagɔ nɩ́ kúdùkuo a Lagɔ ŋwɔ́ɔ, mà ʋ́ ŋwɔ́ɔ gàgànyʋa a Lagɔ. Naa cémʋ́ a cile lɛ́ ʋ́ a, a ya mnɔ́ɔ mɔ̀glʋ̀.»

Jràmá gbá à kámalɛ áa?

²⁸ Lɔ̀ a másɛ ànɔ a múó kʋ la ʋ́, lé ɔ́ pʋ a la nyúkwlí. Ɔ́ yɩbhlɩ lɛ́ saá mà Zozíi ŋwnʋ́ námasa Sadisɩɛ́nyʋaá kɔ́sɩ̀nɛ̀ɛ̀ kʋ́ a, ɔ́ ŋnɩ ɔ́ gɔ̀ lé ɔ́ yrɔ́ɔ́ mà: «Másɛɛ̀, Jràmá gbá a zi jràmá a lɔ̀fɩ́ɛ́ a nyièdɩ kʋ́ à?»

²⁹ Zozíi anɩ́: «Jràmá à zi jràmá a lɔ̀fɩ́ɛ́ a nyièdɩ kʋ́ a, ámá à ŋwɔ́ɔ: Pʋ nyúkwlí Izrayɛ́lɩ! À Kanyɔ Lagɔ a múó ɔ̀ ŋwɔ́ɔ Kanyɔ!

³⁰ Naa, wà Kanyɔɔ́ ɔ̀ ŋwɔ́ɔ nà Lagɔ a nà duo a lɔ̀fɩ́ɛ́ a mnɩ́, nà zuzu a lɔ̀fɩ́ɛ́ a mnɩ́, nà bhobhoé a lɔ̀fɩ́ɛ́ a mnɩ́, ɩ́zà nà fɩ́ɛ́ a lɔ̀fɩ́ɛ́ a mnɩ́.

³¹ Sɔ́ jràmáá à gbɛ àlɩa jɩ̀ a, á cíé mà: Cémʋ́ ɩ̀ wà lɛ́ ɩ̀ nyoku a, wà sáà sɩ́tɛ̀ ɩ̀ liyʋ. Jràmá nɩ́ yɩ́ sɔ́kʋ́ ʋ́ bɩ́ kʋ lé a ká yɩ́ Jràmɩ́ cié sɔ́ɔ́ lɩ̀à kʋ́ zi.»

³² Lé lɔ̀ a másɛɛ́ srʋ Zozíi mà: «Cɩ́cása Másɛɛ̀, ɩ̀ cíé cɩ́cása mà: Kanyɔ Lagɔ a múó ɔ̀ ŋwɔ́ɔ Lagɔ, Lagɔ nɩ́ yɩ́ sɔ́kʋ́ ʋ́ kʋ ɛ̀ nɩ nɩ́ ʋ́ a múó ŋwɔ́ɔ a.

³³ Naa nyɔ nɩ wà Lagɔ ɔ duo a lɔ̀fɩ́ɛ́ a mnɩ́, ɔ fíkeé a lɔ̀fɩ́ɛ́ a mnɩ́ lé ɔ fɩ́ɛ́ a lɔ̀fɩ́ɛ́ a mnɩ́. Ɩ́zà cémʋ́ ɔ́ wà lɛ́ ɔ nyoku a, ɔ nɩ wà sáà sɩ́tɛ̀ ɔ liyʋ a. Ɩ́mɩ́ jràmɩ́ɛ́ sɔ́ɔ́ lɩ̀à ɩ́ zi bʋbɔ̀lɛ̀ kʋ́.»

³⁴ Zozíi yɩbhlɩ saá mà nyɔɔ́ nú námasa ɔ cícíwɔlɩɛ́ mnɩ́ a, ɔ́ srʋ ɔ́ mà: «Mɔ̀, nɩ́ yɩ́ Lagɔ a Léyibhlɩɛ́ dá trʋ̀.» Ɔ́ cí sɩ́tɛ̀ a, nyɔɔ́ nɩ́ yɩ́ sɔ́kʋ́ mɔ́ kwɔ́sɩnɛ kʋ́ yrá à.

Kláyɩ́sɩ zi lóo Davídɩ kʋ́

³⁵ Zozíi kʋ la Lagɔ̀wlʋ̀ɔ̀ a mnɩ́ cɩ́àda lé ɔ́ yrá, ɔ́ anɩ́: «Ɛ̀kʋ̀ʋ̀ bhè lɔ̀ a másɛnyʋaá nɩ cɩ́a, lé á nie mà, Kláyɩ́sɩ ŋwɔ́ɔ Davídɩ a yʋ́ à?

³⁶ Bhè Davídɩ mɔ̀glʋ̀, tányɩɛ́ mʋ́ Blɔ̀blɔ̀zùzùò kwlílo wá jɩ̀ a, bhʋ́ ɔ́ cí wá mà: Kanyɔ Lagɔ srʋ ná Kanyɔ mà: Plɩ́ɩ ná lilie kʋ́ lé bɔ́ɔ sá! Lé ká nɩ lé kà nà gblɩ̀nyʋa jɩ̀ námnɩɩ̀.

³⁷ Davídɩ mɔ̀glʋ̀ wle wá Kláyɩ́sɩ ɔ Kanyɔ, naa cégbá mʋ́ ɩ́ kʋ lé ɔ́ yi sɔ́kʋ́ ɔ yʋ́ plɩ́ à?» Zozíi cí lɛ́ saá a, nyʋaá fɩ́ɛ́ à pʋɔ nyúkwlí a, ɩ́ ka la má lɔlɔ kʋ́.

Zozíi anɩ́ a mányɩ lɔ̀ a másɛnyʋa a nɩnɩgbɩ kʋ́

³⁸ Zozíi a cɩ́acʋ́ɔ́ a mnɩ́ɛ́, bhʋ́ ɔ́ cí, ɔ́ anɩ́: «Lɔ̀ a másɛnyʋaá yà á bànɩ̀vàyi sɔ́ wà bibíé, lé á yrá lé nyʋa fɩ́ɛ́ pá á yúó jrìnyiedɩ. Naa, a mányɩ á nɩnɩgbɩ̀ɛ̀ kʋ́!

³⁹ A nɩ pla zúfʋcɛcɩghlɩɛ́ a mnɩ́ a á wà drɩ̀ a kpí a mnɩ́ a bɔ́ɔlɛɛ́. A nɩ wle á glɩ̀sɩ́sɩ kʋ́ lé a nɩ yi a, nyɩ́kpɔkádàà a kpíé a mnɩ́ mɔ̀ɔ á yrá lé a ká bɔ́ɔ.

⁴⁰ Á yie sáà lé á nyɩ́glɩlɛ kʋ́zrɩ̀ŋwna lé á bháʋ́ á kakalɩɛ fɩ́ɛ́. A nɩ bhibhie a, á trʋmalɛ gbʋ́ a sá á bhibhie wɔlɩ́ɛ́ mʋ́ lé nyʋa ká á yɩ́ gɔ̀ ŋwʋ́. Á yi Lagɔ a drɩ̀ ɩ́ kpaá pɛ́ɛ.»

Ŋazɩ̀kʋ̀zrɩ̀ŋwnɔ̀ɔ̀ nyɛ́ lé ɔ́ zi lɛkanyʋa kʋ́

⁴¹ Zozíi mʋ lé ɔ́ plɩ́ɩ Lagɔ̀wlʋ̀ɔ̀ a mnɩ́ a bhɔ́klɔɔ́ gɔ̀ lé ɔ bɔ́ɔ sá. Bhʋ́ ɔ́ kʋ lé ɔ́ dʋdʋɛ nyʋa à ŋwʋ́ɛ́ mɔ̀ɔ moníi a. Léyuo kɔ́kɔ́mnɩ́ yie lé á ŋwʋ́ɛ́ mɔ̀ɔ moníi kɔ́kɔ́mnɩ́.

⁴² Mà ŋazɩ̀kʋ́zrɩ̀wnɔ a múó yi, ɔ́ fa pìkìni yi a sɔ́ lé ɔ́ páa mɔ̀ɔ mɩ́.

⁴³ Bhʋ́ Zozíi wle ɔ́ kʋjɩ̀nyʋ̀àà lé ɔ́ srʋ á mà: «Cícása a mnɩ́, náa srʋɛ amɔ mà ŋazɩ̀kʋ̀zrɩ̀ŋwnɔ̀ɔ̀ lɩ̀à, ɔ́mɔ́ nyɛ́ kpanyɩ lé ɔ̀ zi nyʋaá fɩ́ɛ́ à ŋwʋ́ bhɔ́klɔɔ́ a mnɩ́ moníi a kʋ́.

⁴⁴ Ámá ànàà, moníe á nyɛ́ lɛ́ a, ɩ nɩ́ á gbʋ́ ka à. Mà ɔ́mɔ́ moníe fɩ́ɛ́ ɔ́ ka la lɛ́, lé ɔ ká la ɔ nyoku kʋ́ bhla a, ɩ́mɩ́ ɔ́ nyɛ́ lɛ́.»