Málɩ́kɩ 10 - NeyoNyɔ yi míi lé ɔ́ yi ɔ ŋwnɔ́ jɩ́ɩ? ( Matíe 19.1‑12 ; Lúkɩ 16.18 ) 1 Zozíi wlʋ́ ʋ́ a, ɔ́ɔ mʋ Zudéebhlɩɛ́ a mnɩ́, mɔ̀ɔ a Zrʋdɛ́ɛnyié a bɩ́. Ɔ́ kʋ mɔ̀ɔmɔ̀ lé nyʋa kɔ́kɔ́mnɩ́ ŋnɩlɔɔ́ sɔ́kʋ́ ɔ̀, mà cémʋ́ ɔ́ nɔnʋ ʋ̀ ŋwɔ́ɔ cɩ́acʋ́ a, ɔ́ cíe sɔ́kʋ́ a cɩ́acʋ́ kʋ́. 2 Falizɩ́ɛnyʋa yio gɔ̀ a kɔ́ɔ́ zɔ̀ sa à. Lé á yrɔ́ɔ́, á anɩ́: «Másɛɛ̀, nyɔ yi míi lé ɔ́ yi ɔ ŋwnɔ́ jɩ́ɩ?» 3 Lé Zozíi mà ɔ́ yrá á, ɔ́ anɩ́: «Cégbá Moyízɩ a Jràmáá cíé a?» 4 Á anɩ́: «Moyízɩ a Jràmáá a mnɩ́ɛ́, nyɔ nɩ yrá ɔ ká ɔ ŋwnɔ́ jɩ́ɩ a, ɔ́ɔ gbɛlɔɔ́ bɔ́gʋ jɩ̀, ʋ́ nʋɔ́ ʋ̀ cíé mà ɔ nɩ́ yrá yɩ́ ɔ́mɔ́ a, fɩ́ɛ́ lé ɔ kɔ́ɔ́ jɩ́ɩ̀.» 5 Zozíi anɩ́: «A nyúkwlí tɛmɛ a zà Moyízɩ jɩ́jrà wɔlɩdrèè lɩ̀à. 6 Ɩ́zà Lagɔ̀bɔ̀gʋ cíé mà: Bháàda a, Lagɔ nɩ yʋwlɩ lé ʋ́ nɩ ŋwnɔ́. 7 Ɩ́mɩ́ ka ŋnɩ́ lé yʋwlɩ wlʋ́ɛ́ ɔ tʋ́ yà ɔ nɛ́ sɔ́ gɔ̀ lé ɔ yà ɔ ŋwnɔ́ sɔ́ kʋɛ dáamúó, 8 lé áa sɔ́ɔ́ plɩ́ɛ́ lɛ́ a múó. A nɩ́ yɩ́ sɔ́ bhli, mà nyɔ a múó á ŋwɔ́ɔ yɩ́. 9 Naa, lɛ́ɛ́ Lagɔ ya jányɩ a, nyɔ ná yi yɩ́, lé ɔ kɛ́ɛ́ yɩ́ sɩsa à!» 10 Zozíi yà ɔ́ kʋjɩ̀nyʋ̀àà sɔ́ mʋ gbó a, á yrálɔɔ́ wɔlɩdrèè Falizɩ́ɛnyʋaá yrálɔɔ́ lɛ́ kʋ́ a, á gba kʋ́, 11 bhʋ́ ɔ́ srʋ á mà: «Nyɔ nɩ jɩ́ɩ ɔ ŋwnɔ́ a lé ɔ ká yígàdà ŋwnɔ bhá a, ná srʋɛ amɔ mà bhʋ́anɩ nyɔɔ́, ɔ́ ya ŋnɩ́gbʋ yɛ́. 12 Ɩ́zà ŋwnɔ́ɔ́ ɔ́mɔ́ ɔ̀ nɩ wlʋ́ ɔ nyʋtʋ gɔ̀ lé ɔ̀ ka yígàdà yʋwlɩ bhá a, bhʋ́anɩ ŋwnɔ́ɔ́, ɔ́ ya yuwligbʋ yɛ́.» Zozíi pá yúó nyú ( Matíe 19.13‑15 ; Lúkɩ 18.15‑17 ) 13 Tányɩ a múó nyʋa la Zozíi yúó gɔ̀, ɔ ká á gbɔ́ bhè jɔ̀lʋ ká á pla à. Mà ɔ́ kʋjɩ̀nyʋ̀àà fa nyʋaá cícíé. 14 Ɔ́ yɛ́ wɔlɩ́ɛ́ a, ɩ́ kpɩ́tɔɔ́ duo kʋ́ ɔ́ kʋjɩ̀nyʋ̀àà a zà. Bhʋ́ ɔ́ srʋ á, ɔ́ anɩ́: «A cíe yúóó sá a ká mɔ́ɔ gɔ̀ yi! A ná jɩ́laá mà Lagɔ a Léyibhlɩɛ́, nyʋaá a kʋ̀ yúó bhísakʋ́ a, a bhlé kʋ̀ʋ. 15 Náa srʋɛ amɔ cɩ́cása mà, ɔ̀ nɩ̀ nɩ́ Lagɔ a Léyibhlɩɛ́ a wɔlɩ́ɛ́ kʋ́ bhli yʋ́ bhísakʋ́ a, ɔ nɩ́ ka kɛ́ mɔ̀ɔ pla.» 16 Lé Zozíi gbɩ̀ yúóó, lé ɔ́ ŋwʋ́ á glɔ̀gbɩ́ jɩ̀ lé ɔ́ pá á nyú. Lóo yi Zozíi yrá ka ( Matíe 19.16‑30 ; Lúkɩ 18.18‑30 ) 17 Zozíi na ká mʋ a, nyɔ a múó yi lé ɔ́ sra ɔ drɩ̀ koti sá, lé ɔ́ yrɔ́ɔ́ mà: «Námamasɛɛ̀, srʋ mɔ́ɔ ca á, cégbá mʋ́ ɩ́ yi nɩ lé ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?» 18 Lé Zozíi srʋ ɔ́ mà: «Ɛ̀kʋ̀ʋ̀ lé ɩ̀ nie námamasɛ a? Nyɔ nɩ́ lɛ́ kɔ́ɔ́ lɩ̀à a mnɩ́ kʋ lé ɔ ká námaà, ɛ̀ nɩ̀ nɩ́ Lagɔ a múó ŋwɔ́ɔ a. 19 Ɩ̀ yì Lagɔ̀jràmáá à cíé lɛ́ mà: Nàá bhlá nyɔ, nàá bháʋ́ ɩ̀ liyʋ a ŋwnɔ́, nàá ghlíi, nàá nɩ kpɔkpláŋwɔ̀nɩ̀srɩ̀lɛ, nàá nyɩ́glɩ̀ nyɔ, ŋwʋ́ ʋ́ ɩ̀ tʋ́ lé ɩ̀ nɛ́.» 20 Bhʋ́ nyɔɔ́ srʋ ɔ́ mà: «Másɛɛ̀, bháa ná zɔ̀kpɩ́ anɔ kʋ́ lé yi lé ŋnɩ zɩmnɛ́, yáa wɔlɩ́ɛ́ fɩ́ɛ́ lɩ̀à nɩ.» 21 Mà Zozíi dʋdʋ̀ nyɔɔ́, lé ɔ́ wàwʋ́ kɔ́sɔlɔɔ́ duo kʋ́. Lé ɔ́ srʋ ɔ́, ɔ́ anɩ́: «Wɔlɩdrè a múó coco nɩ́ àyɩ lɛ́ nɩ a, ámá à ŋwɔ́ɔ mà: Mʋ lé ŋwʋ́ nà kakalɩɛ́ fɩ́ɛ́ pɛ́lʋ́, lé bhábha nà moníe fɩ́ɛ́ ŋazɩ̀nyʋa lé ka Lagɔɔ́ a léyri li, bhè yi lé jɩ́ mɔ́ɔ kʋ́.» 22 Mà nyɔɔ́ nú wɔlɩ́ a, cémʋ́ ɔ́ ŋwɔ́ɔ lɛkanyɔ kádɔ a, ɩ́ bhlɔ́ɔ́ kpanyɩ. Ɩ́ wɔtɔmalɔɔ́ kpɩkpɩ gɔ̀ lé ɔ́ mʋ. Lagɔ a Léyibhlɩɛ́ a mnɩ́ a plaplʋ́ ka gbʋ́ 23 Zozíi a kʋjɩ̀nyʋ̀àà à glalɔɔ́ klʋ́ a, ɔ́ dʋdʋ̀ a lé ɔ́ srʋ á, ɔ́ anɩ́: «Lɛkanyɔ ká Lagɔ a Léyibhlɩɛ́ a mnɩ́ pla a, ɩ́ ka gbʋ́!» 24 Ɔ́ cí sɩ́tɛ̀ a, neé mna ɔ́ kʋjɩ̀nyʋ̀àà. Lé ɔ́ srʋ á sɔ́kʋ́ mà: «Ná yúóyɩ, ná srʋɛ amɔ mà Lagɔ a Léyibhlɩɛ́ a mnɩ́ a plaplʋ́ ka gbʋ́! 25 Lɛkanyɔ ká Lagɔ a Léyibhlɩɛ́ a mnɩ́ pla a, ɩ́ ka fɩ́ lé ɩ́ zi mnagwlì ká la kwʋɛ́ a fleé a mnɩ́ blée a kʋ́.» 26 Ɔ kʋjɩ̀nyʋ̀àà, wɔlɩ́ɛ́ mnaá neé lé á yráyra a nyoku mà: «Naa, cémʋ́ ɩ́ kʋ lɛ́ a, nyɔ yi ʋ́ neé wlʋ́ʋ?» 27 Lé Zozíi dʋdʋ̀ a, ɔ́ anɩ́: «Lagɔ míile wɔlɩ́ɛ́ fɩ́ɛ́. Lɛ́ɛ́ nyɔ nɩ́ ka lɛ́ míi a, Lagɔ míileé.» 28 Lé Pɩ́ɛ́lɩ srʋ ɔ́ mà: «Másɛɛ̀, dʋdʋ̀ àmɔ̀, à wlʋ́ à kakalɩɛ fɩ́ɛ́ a gbʋ́ lé à jɩ́ mɔ̀ kʋ́.» 29 Zozíi anɩ́: «Cícása a mnɩ́ náa srʋɛ amɔ mà nyɔ nɩ wlʋ́ ɔ nɩ́ayúó ò, ɔ nɛ́ ò, tʋ́ ò, ɔ yúó gɔ̀ a, lé ɔ nɩ wlʋ́ ɔ́ wlʋʋ́ bhè lágbɩ sɔ́ a gbʋ́ ná zà lé Lagɔ a Námadìè a zà 30 lɩ́ɛ́ fɩ́ɛ́ ɔ́ wlʋ́ lɛ́ gɔ̀ a, tányɩɛ́ mʋ́ ɔ́ kʋ àyɩ kɔ́ a, ɔ́ yi ɩ cí a gwlɩ̀ a gbɩ́ yɛ́. Ɔ́ yi ghlɩ yɛ́, ɔ́ yi níayúó yɛ́, ɔ́ yi nɛ́nyʋa yɛ́, ɔ́ yi yúó yɛ́, ɔ́ yi lágbɩ yɛ́, lé ɔ́ yi sáà kalɩmɛ yɛ́. Fɩ́ɛ́ lé bhʋ́anɩ nyɔɔ́, ɔ́ yi kɔ́ɔ́ ʋ̀ nɩ́ bhɩàda ka a yɛ́. 31 À cíé lɛ́ dɛ́ a, nyʋaá kʋ̀ drɩ̀ a, kɔ́kɔ́mnɩ́ yi bɩ́ plɩ́ɩ̀. Lé ànàà kʋ̀ bɩ́ a, kɔ́kɔ́mnɩ́ yi drɩ̀ plɩ́ɩ̀.» Zozíi cí sɔ́kʋ́ mà ɔ́ yi kú lé ɔ́ yi galɔ̀ ( Matíe 20.17‑19 ; Lúkɩ 18.31‑34 ) 32 Zozíi yà ɔ́ kʋjɩ̀nyʋ̀àà sɔ́ mnɛ Zelízalɛ́mʋ a, ɔ́mɔ́ kʋ drɩ̀ lé á gbɛlɔɔ́ jɩ̀. Mà ŋanɩmɛ bhláá lé nyʋaá à jɩ́ á la sáà kʋ́ a, ŋanɩmɛ yi laa kʋ́. Zozíi gʋ́gwlà ɔ́ kʋjɩ̀nyʋ̀àà kʋ́gbá sɔ́ɔ́ kʋ́, lé wɔlɩ́ɛ́ nà kɔ̀ɔ̀ ŋnɩ a, ɔ́ srʋ à mɩ́. 33 Ɔ́ anɩ́: «A dʋdʋ̀ʋ̀, à nɩ̀ mʋ Zelízalɛ́mʋ a, á yi Nyɔɔ́ a Yuwliyʋɔ́ kʋ́ bhli lé á yio Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ wlɩɩ́ pɛ́lʋ́ ŋwʋ́ʋ. Á yio tɩ́tɩ́ ŋwʋ́ lé á yio nyʋa à nɩ́ Lagɔ yì a wlɩɩ́ ŋwʋ́ mà a bhlɔ́ɔ́. 34 Á yio nyɩà, á yio dàdɩ klʋ́ ŋwna à, á yio sɩ́á, á yio bhlá lé ɔ́ yi kú, mà tayruó kʋ́ ɔ́ yi galɔ̀.» Zákɩ yà Záan sɔ́ yrá sáà léyikpi Zozíi gɔ̀ ( Matíe 20.20‑28 ) 35 Tányɩɛ́ mʋ́ á mnɛ la a, Zebedée a yúóó, Zákɩ yà Záan sɔ́ yi Zozíi gɔ̀ lé á srʋ ɔ́ mà: «Másɛɛ̀, wɔlɩdrè a múó à nà kà mɔ̀ mʋ́ yráa, à yrá lé nɩ àmɔ̀ má gà.» 36 Ɔ́ anɩ́: «À nà gbá a?» 37 Á anɩ́: «Nà léyikpoó a jɩ̀bɔ̀tànyɩ nɩ ŋnɩ a, nɩ lé ààà sɔ́ɔ́ à kà mɔ̀ gɔ̀ bɔ́ɔ. Bhlɛ̀gbɩ́ ká nà lilie kʋ́ bɔ́ɔ lé ànɔ ká nà kɔmɩa kʋ́ bɔ́ɔ.» 38 Ɔ́ anɩ́: «Wɔlɩdrèè a yrálɛ lɛ́ mɔ́ɔ mʋ́ a, a nɩ́ a gba yì. Nyakalɩplɩɛ́ ná ká lɛ́ mʋ́ mná a, a yi míi lé a yie mʋ́ mná a? Lé a yi ŋwnʋ́ lé nyakalɩɛ́ nà kà mɔ́ɔ wlú gbí a, ɛ́ yi amɔ wlú gbíi?» 39 Á anɩ́: «Aan! À yi míi.» Bhʋ́ Zozíi anɩ́: «Cɩ́cása, nyakalɩ plɩɛ́ ná ká lɛ́ mʋ́ mná a, a yie mʋ́ mná a lé kalɩmɛɛ́ ná ká lɛ́ yɛ́ a, a yie yɛ́. 40 Mà nyɔ a múó ká ná lilie kʋ́ bɔ́ɔ lé ànɔ ká ná kɔmɩa kʋ́ bɔ́ɔ a, mɔ́ɔ nɩ́ pá bhʋ́anɩ nyʋaá ŋnɩ́, mà Lagɔ mɔ̀glʋ̀ gbázɩ̀ a mʋ́.» A nyièdɩ a kámanyɔɔ́ ɔ plɩ́ a góo 41 Zozíi a kʋjɩ̀nyʋ̀àà kʋ́gbá ànàà nú wɔlɩ́ɛ́ Zákɩ yà Záan sɔ́ fɔɔ́ gɔ̀ a, ɩ́ bhláalaá dɩ. 42 Lé ɔ́ wle á lé ɔ́ srʋ á mà: «Nyʋaá a dʋdʋɛ lɛ́ lé à ŋwɔ́ɔ lɛ́ bhlɩ́ɛ́ a kámanyʋa a, áa kwle a lía, a nyɩ́kpɔkádɩ̀lɛ a zà. Ɩ̀lɩa á lɔ̀fɩ́ɛ́, à yìi. 43 Mà amɔ nyièdɩ, ɩ ná plɩ́ɩ sɩ́tɛ̀. Ɔ̀ nɩ̀ wà lé ɔ̀ ka káma a, ɔ plɩ́ a cóyʋ. 44 Amɔ nyièdɩ ɔ̀ nɩ wà lé ɔ̀ kà ɔ lía tíe a, ɔ plɩ́ a lɔ̀fɩ́ɛ́ a góo. 45 Mà Nyɔɔ́ a Yuwliyʋɔ́ ɔ́ɔ nɩ́ yi lé a kɔ́ɔ́ gà zrɩ, mà ɔ́ɔ yi lé ɔ ká nyʋa gà zrɩ, ɩ́zà ɔ ká ɔ kɔ́ nyɛ́ lé ɔ kwɩ́ɛ́ ká nyʋa kɔ́kɔ́mnɩ́ ʋ́ neé sa à.» Zozíi yalɩma yɩ́cucúbhlanyɔ Batimée ( Matíe 20.29‑34 ; Lúkɩ 18.35‑43 ) 46 Zozíi yà ɔ́ kʋjɩ̀nyʋ̀àà sɔ́ ŋnɩ Zelikóo. Á wlʋ́ɛ́ yɩ́ lɛ́ dúó a mnɩ́ a, nyʋa kɔ́kɔ́mnɩ́ jɩ́ á kʋ́. Mà nyɔ a múó, ɔ́mɔ́ ŋwɔ́ɔ Batimée, nyɔɔ́ á wlele Timée a, ɔ yʋ́ kʋ̀. Batimée nɩ́ yɛ́ kʋ́, nyúzɔ̀kɩ̀kèlí gɔ̀ ɔ́ bɔ́ɔlɛɛ́ lé ɔ́ zra plɩ́plɩ́nyʋa. 47 Ɔ́ nú mà Nazalɛ́tɩ a Zozíi plɩ́ɛ́ a, ɔ́ pá gbányìdi lé ɔ́ wleó, ɔ́ anɩ́: «Davídɩ a yʋ́ʋ̀, Zozíi, Ɩ́bhìè yɛ́ ná ŋazɩ kʋ́ àyé!» 48 Ɔ́ cí sɩ́tɛ̀ a, nyʋa fɔɔ́ cícíé ɔ ká né kʋ́ bhli, mà ɔ nɩ́ á mányɩ, ɔ́ wle sɔ́kʋ́ fɩ́ sa: «Davídɩ a yʋ́ʋ̀, ɩ́ bhibhie mɔ̀ yɛ́ ná gbɩ́ a ŋazɩ kʋ́ àyé!» 49 Lé Zozíi nynʋ́vʋ̀, lé ɔ́ srʋ nyʋaá mà: «A lɔɔ́.» Lé á srʋ Batimée, á anɩ́: «Ŋwʋ́ fɩ́ lé soglù, mà mɔ̀ ɔ́ wle.» 50 Mà Batimée pá ɔ kótu kádʋ̀ɔ̀ klá, lé ɔ́ vídè kʋ́ lé soglù. Lé ɔ́ ŋnɩ Zozíi gɔ̀. 51 Lé Zozíi yrɔ́ɔ́ mà: «Lɛ́gbá ɩ̀ yrá a, lé nɩ nɩ nà zà a?» Batimée anɩ́: «Másɛɛ̀, Ɩ́bhìè, nɩ lé ká kʋ́ yɛ́!» 52 Ɔ cí saá a, Zozíi srʋ ɔ́ mà: «Nà Lagɔ a fádùò ya mɔ̀ yalɩma.» A kʋ dáamúó lé Batimée a yɩ́ɛ́ wlée, lé ɔ́ jɩ́ Zozíi kʋ́. |
© (Active), Wycliffe Bible Translators, Inc. All rights reserved.
Wycliffe Bible Translators, Inc.