Lúkɩ 7 - NeyoZozíi yalɩma sʋ́ja a kámanyɔ a cóyʋ ( Matíe 8.5‑13 ) 1 Tányɩɛ́ mʋ́ Zozíi bhɩa nyʋa a glalɔ kʋ́ a gɔ̀ cile zɔ̀ a, ɔ́ɔ mʋ Kapɛnayʋ́mʋ. 2 Wlɔmɛ́ɛsʋ̀ja a kámanyɔ a múó a gbakalɩmacoyʋ nɩ́ yà, ɔ́ɔ kúé yɩ́ yuosa. 3 Naa ɔ́ nú Zozíi a wɔlɩ́ a, bhʋ́ ɔ́ cíe Zúfʋnyʋa á dɔ̀panyʋa á zùò, a mʋ a srʋ Zozíi ɔ yi ɔ́ ká ʋ́ ɔ cóyʋ neé saà. 4 Lé á mʋ Zozíi wlú sra ka lé á srʋ ɔ́ mà: «Nyɔɔ́ ɔ̀ cíe àmɔ̀ a, Ɩ́bhìè ŋwʋ́ wɔlɩ́ɛ́ ɔ́ yralɛ mɔ̀ mʋ́ a, kpá àyé, 5 mà ɔ́ wà námasa à bhlɩ́ɛ́ lɩ̀à, ɔ́mɔ́ ɔ̀ pá à zúfʋcɛcɩwlʋɔ́.» 6 Lé a yà Zozíi sɔ́ á mʋ. Mà á mnɛ gbóó gɔ̀ ŋnɩ ka bhè, sʋ́jàyʋ̀ɔ̀ cíe ɔ bheyinyʋa a srʋ Zozíi mà: «Kanyɔɔ̀, nàa bhɩa flɛ́ɛsa ɩ̀ nyoku kwlɩ́ lé kà gbó ŋnɩ, mà nɩ́ɩ kʋ́ wà! 7 Ɩ́mɩ́ kɛtɛkʋ́ kà ŋnɩ́ lé ɩ́ cíe nyʋa lé nɩ́ lɛ́ mɔ̀ gɔ̀ ŋnɩ. Naa, ɩ́bhìè cí wɔlɩdrè bhè ná cóyʋɔ́ ká yalɩma a! 8 Mɔ́ɔ, sʋ́jàyʋ ɩ́ ŋwɔ́ɔ, mà ɩ́ ka kámanyɔ, lé ná sɛ́fʋɔ́, ɩ́ kámalɛ sáà sʋ́ja. Ɩ́ srʋɛ sʋ́jàyʋ mà, mʋ lé ɔ́ mnɛ. Lé ɩ́ srʋɛ sʋ́jàyʋ ànɔ mà yi, lé ɔ́ yie. Nɩ srʋ ná cóyʋ mà ɔ nɩ lɛ́ a, ɔ́ nie.» 9 Tányɩɛ́ mʋ́ Zozíi nú wɔlɩ́ɛ́ sʋ́jàyʋ̀ɔ̀ cí a, ɩ́ bhlálɔ lɔlɔ, ɩ́ ka ŋnɩ́ lé nyʋa à jɩ́ ɔ́ kʋ́ a, ɔ́ gàlàà klʋ́ lé ɔ́ srʋ á mà: «Náa srʋɛ amɔ mà, Lagɔ a fádùò á sʋ́jàyʋ̀ɔ̀ lɩ̀à ka a, nɩ́ à zà ɔ bhísakʋ́ a ditátɩ́kanyɔ dɛ́ Izrayɛ́lɩ yɛ́ɛ.» 10 Lé nyʋa sʋ́jàyʋ̀ɔ̀ cíe a, á yrɩ́bha wá. Mà á ŋnɩ gbó a, sʋ́jàyʋ̀ɔ̀ a cóyʋɔ́ ya yalɩma. Nayínɩ a kʋ́zrɩ̀ŋwnɔ a yʋ́ wlʋ́ kú yra 11 Zozíi mʋ dú a múó a mnɩ́, ʋ́mʋ́ á wlele Nayínɩ. Ɔ́ kʋjɩ̀nyʋ̀àà yà nyʋa àna kɔ́kɔ́mnɩ́ sɔ́ gbɛlɔɔ́ jɩ̀. 12 Tányɩɛ́ mʋ́ ɔ́ ŋnɩ dú a nékʋ́ lé ɔ́ dʋdʋ̀ a, nyʋa gbɩdɩɛ kúdùkʋ á mnɛ lési jɩ̀. Ɩ́mɩ́ ŋwɔ́ɔ mà kʋ́zrɩ̀ŋwnɔ á yuwliyʋ kú, ɔ yʋ́ɔ́ a múó coco ɔ́ ka a, ɔ́mɔ́ yʋ́ɔ́ mɔ́ kú. 13 Tányɩɛ́ mʋ́ Kanyɔ yɛ́ kʋ́zrɩ̀ŋnɔ̀ɔ̀ a, ɔ́ ŋazɩ kɔ́sɔlɔɔ kʋ́, lé ɔ́ srʋ ɔ́ mà: «Nàa ŋwí!» 14 Lé ɔ́ ŋnɩ kúlɔkwlɩ́ɛ́ gɔ̀ lé ɔ́ gbɔ́ ɛ́ lé nyʋaá à gbɩdɩɛ́ a, á nynʋ́vʋ̀. Zozíi anɩ́: «Zɔ̀kpɩ́yʋʋ̀, náa srʋɛ mɔ̀ mà soglù!» 15 Lé vùkù zɔ̀kpɩ́yʋɔ́ soglù, ɔ́ bɔ́ɔ kɔ́ɔ̀kʋ́ sá a, ɔ́ɔ bháa ʋ́ cícíé kʋ́, lé Zozíi nyɛ́ ɔ́ ɔ nɛ́. 16 Ŋanɩmɛ yi nyʋaá fɩ́ɛ́ kʋ̀ ʋ́ a, kʋ́, lé á bháa ʋ́ Lagɔ a ŋwnú falɛ kʋ́, á nie: «Lagɔ a nékʋ́cinyɔ kádɔ ya àmɔ̀ nyièdɩ yi, lé Lagɔ ya ʋ yúó kʋ́ yii!» 17 Wɔlíɛ́ Zozíi nɩ a, ɩ́ bhli Zudéebhlɩɛ́ yà ɛ gɔ̀ a díé fɩ́ɛ́ sɔ́. Zán Batísɩ cíe ɔ́ kʋjɩ̀nyʋ̀àà a sɔ́ Zozíi gɔ̀ ( Matíe 11.2‑19 ) 18 Záan á kʋjɩ̀nyʋ̀àà yi lé á salɔɔ́ Zozíi a díé fɩ́ɛ́. Záan nú wɔlɩ́ɛ́ a, ɔ́ wle ɔ́ kʋjɩ̀nyʋ̀àà a sɔ́, 19 lé ɔ́ cía Kanyɔ gɔ̀, a kɔɔ́ yrá mà: «Mɔ̀ ŋwɔ́ɔ nyɔɔ́ nà kà wá yi lé ɔ̀ kà wá ʋ́ àmɔ̀ neé sa a, mà à gláa àyɩ mɔ́ɔ?» 20 Záan a kʋjɩ̀nyʋ̀àà ŋnɩ Zozíi gɔ̀ a, á srʋ ɔ́ mà: «Zán Batísɩ cíe àmɔ̀, ɔ́ anɩ́ à yrá mɔ̀ mà, nyɔɔ́ nà kà wá yi lé ɔ̀ kà wá ʋ́ àmɔ̀ neé sa a, ɔ́mɔ́ nɩ ŋwɔ́ɔ a? Ɩ́zà à nɩ̀ yi àyɩ sɔ́kʋ́ mɔ́ gla a?» 21 Bhè bhʋ́ a tányɩɛ́, Zozíi kʋ ʋ́ ɔ́ yalɩmalɛ gupuonyʋa kɔ́kɔ́mnɩ́, ŋwʋ́ yɩ́ bhlɛ́ kanyʋa, àna nyumozìzi kʋ jɩ̀, yɩ́bhlanyʋa, ɔ́ yalɩmalaá. 22 Naa ɔ́ srʋ Záan a kʋjɩ̀nyʋ̀àà mà: «A nɩ mʋ a, a srʋ Záan wɔlɩ́ɛ́ a yɛ́ lé a nú a, a srʋ ɔ́ mànɩ́ yɩ́bhlanyʋa a yɩ́ kalɔ klʋ́, kplákplányʋa námɛ, kosugɔ̀bhlànyʋa kplɔ, nyúkwlítelí nyʋa núé, kúdùkuo galɔ̀, lé ŋazɩ̀nyʋa pʋɛ Lagɔ̀wɔ̀lɩ̀ɛ̀ nyúkwlí. 23 Nyɔɔ́ nɩ̀ kà kɔ́ɔ̀kɔ́ ná fádùò á a, ɔ́ ya pʋ́!» Zozíi cí Zán Batísɩ a wɔlɩ́ 24 Nyʋaá Záan cíe a, á mʋ fɩ́ɛ́, lé Zozíi srʋ jrèè mnɩ́ a nyʋa Záan a wɔlɩ́, ɔ́ srʋ á mà: «Lɛ́gbá a mʋ lɛ́ zɩkpaá à nɩ́ lɛ́ jɩ̀ ka a, mnɩ́ dʋdʋ̀ kà a? Zúzùvòò vʋ̀vɔ̀lʋ vɔ́gɔ̀ a? 25 Mà lɛ́gbá a mʋ dʋdʋ̀ kà a? Nyɔɔ́ ɔ̀ yrʋ́ʋ námasa áa? Bhè nyʋaá à yrʋ́ɛ námasa lé à ŋwɔ́ɔ lɛkanyʋa a, léyigbi a mnɩ́ á sí à! 26 Bhè, a mʋ lɛ́ kɛtɛkʋ́ dʋdʋ̀ kà a? Lagɔ a nékʋ́cinyɔɔ́? Aan! Lagɔ a nékʋ́cinyɔ kʋ̀ cɩ́cása ʋ́! Lé náa srʋɛ sáà amɔ mà, ɔ́ zi Lagɔ a nékʋ́cinyɔ kʋ́! 27 Zán Batísɩ, ka ŋnɩ́ lé á jɩ́jrà Lagɔ̀bɔ̀gʋ a mnɩ́ mà: Ɩ́ yi ná cíecíenyɔɔ́ cíè Ɔ ká bhlà plɩ́ Lé ɔ ká nà nyúzɔ̀ɔ̀ gɩglà. 28 Náa srʋɛ amɔ mà, nyʋa à ŋwɔ́ɔ nyɩ́kpɔkáda lé à kà a ŋnɩ́ ɩ̀ mnɛ a, á nyɔ nɩ́ Záan kʋ́ zi! Bhè, lagɔ a Léyibhlɩɛ́ a mnɩ́ a nyɩ́kpɔtòyilɛ̀ ŋwnɔ́ kʋ́ lé ɔ́ zio kʋ́. 29 Nyʋaá fɩ́ɛ́ à pʋ Záan nyúkwlí a, ŋwʋ́ yɩ́ lɛ́ lapóo a kʋbhlinyʋaá, á ka Lagɔ̀wɔ̀lɩ̀ɛ̀ a cɩ́cása, ɩ́ ka ŋnɩ́ lé á ŋwnʋ́ʋ lé Záan ŋwʋ́ á nyú wlú. 30 Mà ɛ̀ nɩ̀ ŋwɔ́ɔ Falizɩ́ɛnyʋaá yà Jràmá a másɛnyʋaá sɔ́ a, cémʋ́ a nɩ́ wɔlɩ́ɛ́ Lagɔ yrálɛ wá má mʋ́ a, kʋ́ ŋwnʋ́ a, a nɩ́ Záan a nyúó wlú ŋwʋ́.» 31 Zozíi anɩ́ mà: «Jànyɩ̀ɛ̀ lɩ̀à a, nyʋaá lɛ́gbá ɩ́ yi bhá lé ɩ́ yi a pápa áa? Lɛ́gbá á wlʋ́ʋ áa? 32 Nɩ̀ yɛ́ a, nànɩ́ cémʋ́ yúó kʋ dú a crɩ́kpaá lé á wle a lía lé á srʋ á mà, amɔ kà ŋnɩ́ lé à pá blɩ̀kwɛ bhè a nɩ́ yɛ! À pá sáà nyúgbʋ̀wɔ̀lɩ a ká ŋwí, bhè a nɩ́ ŋwí! 33 A dʋdʋ̀ Zán Batísɩ, ɔ́ yi wá a, ɔ́ nɩ́ li wá, ɔ́ nɩ́ mná wá nʋ́, ɩ́ ka ŋnɩ́ lé a cíé wá ɔ zà mà nyumozùzu kʋ̀ɔ̀ wá jɩ̀. 34 Lé Nyɔɔ́ a Yuwliyʋɔ́ yi, mà ɔ́ yi a, ɔ́ lie, ɔ́ mná, ɩ́ ka ŋnɩ́ lé a cíé wá ɔ́ zà mà, nyɔɔ́ lɩ̀à, námasa ɔ́ lie lé ɔ́ mná sáà námasa duváa, lapóo a kʋbhlinyʋa yà bhàlʋ̀nyʋa sɔ́ ɔ́ kla bheyi! 35 Mà nyʋaá fɩ́ɛ́ ŋwnʋ́ Lagɔ̀wɔ̀lɩ̀ɛ̀ kʋ́ a, á yɩbhlɩ ɩ cɩ́cása.» Zozíi cie kàpàkápáŋnɔ 36 Falizɩ́ɛnyʋa a nyièdɩ a Falizɩ́ɛyʋ a múó wle Zozíi a ká kʋ́ li, lé Zozíi mʋ ɔ́ gbó lé á gblà tébhle jɩ̀. 37 Mà dúó mnɩ́ kʋ kàpàkápáŋnɔ a múó, ŋwnɔ́ɔ́ nú mà Zozíi yie Falizɩ́ɛyʋɔ́ a gbó li ka a, ɔ́ bhá dìèpà dàŋwónikpalá 38 lé ɔ́ plɩ́ɩ Zozíi a bɩ́, lé ɔ́ ŋnɩ ɔ bhɩɩ́ zɔ̀. Ɔ́ ŋwí aan lé ɔ yɩ́ a mɩ́ɔ́ búdò Zozíi a kokokpíé lé ɔ́ bhá ɔ wlú a nyí ɔ́ sɛ mɩ́ɔ́ ʋ̀ gblʋ́ɛ a. Ɔ́ lúbhole ɔ́ kokokpíé, ɔ́ kpɩ́ɩ́ jɩ̀ bhè ɔ́ kɔ́kʋɔlɩɩ́ bhlà dàŋwóni jɩ̀. 39 Mà Falizɩ́ɛyʋɔ́ ɔ̀ wle Zozíi lilie a zà a, ɔ́ dʋdʋɛ wɔlɩ́ɛ́ ŋwnɔ́ɔ́ nie a, ɔ́ srʋ ɔ nyoku mà: «Nyɔɔ́ lɩ̀à nɩ ŋwɔ́ɔ la cɩ́cása Lagɔ a nékʋ́cinyɔ a, ɔ́ yi la saá yɩbhlɩ mà ŋwnɔ́ɔ́ ɔ̀ gbɔ́gbɔ lɛ́ ʋ́ mɔ́ a, kàpàkápáŋnɔ kʋ̀ʋ.» 40 Bhʋ́ Zozíi srʋ Falizɩ́ɛyʋɔ́ mà: «Simɔ́ɔ̀, náa ká mɔ̀ wɔlɩ́ srʋ.» Simɔ́ɔ anɩ́: «Másɛɛ̀, máà cí!» 41 Zozíi anɩ́: «Nyʋa sɔ́, ka wá nyɔ a múó a kpa, múó ka flèejì a dú lé gwlɩ̀ gbɩ́ a kpa. Lé ànɔ ka flèejì a gwlɩ̀ sɔ́ lé kʋ́gbá a kpa. 42 Mà cémʋ́ nyʋaá sɔ́ɔ́ nɩ́ lɛ́ ka lé a ká ɔ kpaá pɛ́ɛ a, nyɔɔ́ cielaá kpaá. Naa Simɔ́ɔ, áa sɔ́ɔ́, ànɔ̀ gbá nyɔɔ́ a wɔlɩ́ na ká kpanyɩ lɔlɔ kʋ́ ka a?» 43 Simɔ́ɔ anɩ́: «Nyɔɔ́ á cie moníe kɔ́kɔ́mnɩ́ a.» Zozíi anɩ́: «Ɩ̀ cía ɩ́mɩ́ kʋ̀ʋ!» 44 Lé Zozíi gà ŋwnɔ́ɔ́ klʋ́, lé ɔ́ srʋ Simɔ́ɔ, ɔ́ anɩ́: «Ɩ̀ yɛ́ ŋwnɔ́ɔ́ lɩ̀à kʋ́ʋ? Ɩ́ pla nà gbó a, nɩ́ɩ mɔ́ɔ nyú nyɛ́ lé ká ná kokokpí kʋ́ wɔlɔ, mà ŋwnɔ́ɔ́ lɩ̀à bhá ɔ mɩ́ɔ́ lé ɔ́ wɔlɔ ná kokokpí kʋ́, ɔ́ bhá ɔ wlú a nyí lé ɔ́ sɩɩ kʋ́. 45 Ɩ́ pla nà gbó a nɩ́ɩ mɔ́ɔ gbɩ̀ lé kà ná nékʋ́ kpɛ́, mà ɔ́mɔ́, nɩ ka la lɛ́ nà dɛ́ yi a, ná kokokpí a múó jɩ̀ a kpɛ́kpɛ́ nɔnʋ ɔ́ kà. 46 Nɩ́ɩ sáà mɔ́ɔ kpʋ́ wlú ŋwʋ́, mà ɔ́mɔ́, ɔ́ ŋwʋ́ mɔ́ɔ nɔ́nʋ́ dàŋwóni kokokpí jɩ̀. 47 Ná srʋɛ yɩ́ sáà mɔ̀ mà, ŋwnɔ́ɔ́ lɩ̀à nyumoé fɩ́ɛ́ ɔ́ nɩ wá a, ɛ́ yɔɔ́ wá cieloo, ɩ́zà ɔ́ nie lɛ́ námasaá fɩ́ɛ́ lɩ̀à mɔ́ɔ gà. Nyɔ á ciele lɛtòyipɛ a, wàwʋ́ tòyipɛ ɔ́ tʋalɛ.» 48 Lé Zozíi srʋ ŋwnɔ́ɔ́ mà: «Nàa nyumoé ya mɔ̀ cieloo!» 49 Ɔ́ cí sɩ́tɛ̀ a, nyʋaá kʋ̀ ʋ́ lida a, á yra á nyoku mà: «Bhè nyɩ́kpɔcegbá lɛ̀ bhè ɔ̀ ciele nyʋa a nyumoé à?» 50 Lé Zozíi srʋ sɔ́kʋ́ ŋwnɔ́ɔ́ mà: «Nà fádùò ya mɔ̀ pʋ́a, mʋ kʋwɔtɔmasa.» |
© (Active), Wycliffe Bible Translators, Inc. All rights reserved.
Wycliffe Bible Translators, Inc.