Online Bible

Lúkɩ 6 - Neyo

Zozíi kámalɛ Zúfʋnyʋa a nyɔbhleyruó
( Matíe 12.1‑8 ; Málɩ́kɩ 2.23‑28 )

¹ Zúfʋnyʋa a nyɔbhleyruó kʋ́, bhʋ́ Zozíi yralɛ la nyʋa a jɔ̀lagbɩ̀ɛ̀ mʋ́ ɔ́ plɩ́ɛ́ ɔ́ mnɛ. Bhè ɔ́ kʋjɩ̀nyʋ̀àà kʋ ɔ bɩ́ á wɛ́wɩa jɔ̀jʋ, á gʋzʋʋ́ lé á lie.

² Bhʋ́ bhlɔ̀bhlɔ̀ Falizɩ́ɛnyʋaá yɛ́ á a, á yráa mà: «Bhè ɛ̀kʋ̀ʋ̀ lé àa jràmá a mnɩ́ a wɔlɩ́ɛ́ a nɩ́ nɩ Zúfʋnyʋa a nyɔbhleyru kʋ́ a, aanɩ áa?»

³ Bhʋ́ Zozíi srʋ á mà: «Bhè tányɩɛ́ mʋ́ kleé bhlá wá Davídɩ yà ɔ kʋnamnɩnyʋaá sɔ́ a, ɩ́ wɔlɩ́ɛ́ ɔ́ nɩ wá a, a nɩ́ à zà mɩ́ Lagɔ̀bɔ̀gʋ a mnɩ́ zɛɛ?

⁴ Ɔ́ pla wá Lagɔ̀wlʋ̀ɔ̀ a mnɩ́, lé ɔ́ bhá wá mɔ̀ɔ flɔ́ɔ, lé ɔ́ li, lé ɔ́ nyɛ́ wá sáà ɔ kʋnamnɩnyʋaá lé á li. Bhè Lagɔ̀bʋ̀bɔ̀nyʋ̀àà a múó a flɔ́ɔ kʋ̀ʋ.»

⁵ Lé Zozíi srʋ á sɔ́kʋ́ mà: «Nyɔɔ́ a Yuwliyʋɔ́ ɔ́mɔ́ ɔ̀ ŋwɔ́ɔ Zúfʋnyʋa a nyɔbhleyruó a kámanyɔ.»

Zozíi yalɩma bhlɛ́kanyɔ Zúfʋnyʋa a nyɔbhleyruó
( Matíe 12.9‑14 ; Málɩ́kɩ 3.1‑6 )

⁶ Zúfʋnyʋa a nyɔbhleyru ànʋ ŋnɩ sɔ́kʋ́, lé Zozíi pla zúfʋcɛcɩwlʋɔ́ a mnɩ́, lé ɔ́ bháa ʋ́ nyʋa a cɩ́acʋ́ kʋ́. Mà nyɔ a múó kʋ̀ ʋ́ a, ɔ́ lilisɔ bhlɔ́, ʋ nɩ́ crí.

⁷ Bhè lɔ̀ a másɛnyʋa yà Falizɩ́ɛnyʋa sɔ́ kʋ ʋ́, á ŋwʋ́ɛ́ Zozíi yɩ́gɔ̀ ɔ nɩ yi nyɔɔ́ yalɩma Zúfʋnyʋa a nyɔbhleyruó kʋ́ a, a kɩ́ɩ́ yɛ́ bhè a kɔ́ɔ́ gbʋ́ jɩ̀ gʋà.

⁸ Mà cémʋ́ ɔ́ yì á di a yɩ́ a wɔlɩ́ a, ɔ́ srʋ bhlɛ́kanyɔɔ́ mà: «Soglù lé nynʋ́vʋ̀ jrè a nyièdɩ kʋ́!» Lé nyɔɔ́ soglù lé ɔ́ nynʋ́vʋ̀ kʋ́.

⁹ Lé Zozíi yrá á, ɔ́ anɩ́: «Náa yrá ca áa, Zúfʋnyʋa a nyɔbhleyruó, à jràmá a mnɩ́, cégbá á nie áa? Nyɔ nɩ námasa a, mà ɔ nɩ nyumosa a? Nyɔ pʋ́a ɔ liyʋʋ, mà ɔ bhusu ɔ liyʋ á zɩkpa a?»

¹⁰ Zozíi cíé bhè ɔ́ pláa yɩ́ ɔ́ dʋdʋɛ jrèè a mnɩ́ a nyʋaá kʋ̀ mɔ̀ a, lé ɔ́ srʋ bhlɛ́kanyɔɔ́ mà: «Gbáa nà sɔɔ́ mʋ́!» Mà nyɔɔ́ gbáa ɔ́ sɔɔ́ mʋ́ a, ɔ́ɔ yalɩmaà.

¹¹ Lɔ̀ a másɛnyʋaá yà Falizɩ́ɛnyʋaá sɔ́, wɔlɩ́ɛ́ Zozíi nɩ a, a nɩ́ɩ́ wà, ɩ́ ka á dɩ kʋ́, ɩ́ nɩ lé á pʋpʋ a nyièdɩ, á bhla Zozíi a wɔlɩ́ kʋ́, cémʋ́ á yii kʋ́ bhli a, á kɩ́ɩ́ bhobhoò.

Zozíi gbázɩ̀ ɔ cíecíenyʋaá kʋ́gbá sɔ́ mʋ́
( Matíe 10.1‑4 ; Málɩ́kɩ 3.13‑19 )

¹² Bhʋ́ a yrié a mnɩ́, Zozíi mʋ kíké wlú bhibhie ka. Ɔ́ kʋ dɩ́bɩ Lagɔ á bhibhieda àààn, lé zrɩ̀ɩ zɩ.

¹³ Zrɩ̀ɩ zɩ a, ɔ́ wle ɔ́ kʋjɩ̀nyʋ̀àà lé ɔ́ gbázɩ̀ a nyièdɩ nyʋa a kʋ́gbá nyʋa a sɔ́ mʋ́, ámá ɔ́ ŋwʋ́ ɔ cíecíenyʋa ŋnɩ́.

¹⁴ Áa kʋ́gbá sɔ́ɔ́ ámá à ŋwɔ́ɔ: Simɔ́ɔ, ɔ́ ŋwʋ́ Pɩ́ɛ́lɩ ŋnɩ a, lé ɔ nɩ́ayʋ́ Adrée, Zákɩ, Záan, Filípʋ, lé Batelemíi,

¹⁵ Matíe, Tomáa, Afée a yʋ́ Zákɩ lé Simɔ́ɔ, mà ɔ́mɔ́ á wlele Zelótʋ,

¹⁶ Zákɩ a yʋ́ Zúdʋ lé Zudáa Sɩkalɩ́ɔ́tʋ, ɔ́mɔ́ ŋwʋ́ lɛ́ Zozíi pɛ́lʋ́.

Nyʋa kɔ́kɔ́mnɩ́ yi Zozíi gɔ̀ lé ɔ́ yalɩmalaá
( Matíe 4.23‑25 )

¹⁷ Lé Zozíi yà nyʋaá sɔ́ kwlíi kíkéé lé á ŋnɩ dɛ́ɛ́ ɛ̀ bhlɔ sá a, mà á ŋnɩ ʋ́ a, ɔ́ kʋjɩ̀nyʋ̀àà àna kɔ́kɔ́mnɩ́ kʋ ʋ́, á ŋnɩ á gɔ̀ lé á ŋnʋ́vʋ̀. Nyʋa kɔ́kɔ́mnɩ́ wlʋ́ Zudée a díé fɩ́ɛ́ mnɩ́ lé á yi, àna wlʋ́ Zelízalɛ́mʋ, Tílɩ yà Sidɔ́ɔ sɔ́ a díé ɩ̀ gbálɔ ʋ́ nyíé gɔ̀ sá a, ɩ mnɩ́.

¹⁸ Nyʋa á yio nyúkwlí pʋ ka, bhè ɔ ká á sáà yalɩma. Ɔ́ yalɩma sáà nyʋaá nyumozìzi kʋ jɩ̀ lé ɩ́ yɩa kwlɩ́ a.

¹⁹ Mà nyʋa fɩ́ɛ́ à yrá lé a kɔ́ɔ́ gbɔ́ a, máà pɔ́wa kʋ ɔ́ mʋ́, á fɩ́ɛ́ wlʋ́ ɔ́ gɔ̀ lé ɛ́ yalɩmalɛ nyʋa.

Námasa lé nyumosa
( Matíe 5.1‑12 )

²⁰ Mà tányɩɛ́ mʋ́ Zozíi bhá yɩ́ kʋ́ lé ɔ́ dʋdʋ̀ ɔ́ kʋjɩ̀nyʋ̀àà jɩ̀ a, ɔ́ srʋ á mà: «A ya pʋ́, amɔɔ́ nyazɩ̀ɛ̀ bhlá a, Amɔ ŋwɔ́ɔ kɛ́zɔ̀ Lagɔ a Léyibhlɩɛ́ a kanyʋa!

²¹ A ya pʋ́, amɔɔ́ kleé bhlá a, A yi kɛ́zɔ̀ lʋ. A ya pʋ́, amɔɔ́ à ŋwíé a, A yi kɛ́zɔ̀ lɔlɔ nɩ!

²² A ya pʋ́! Nyʋa nɩ gblɩ̀ amɔ lé a nɩ nɩ́ a wɔlɩ́ mányɩ lé a nɩ trʋ amɔ lé nɩ cí a nyumosa Nyɔɔ́ a Yuwliyʋɔ́ a zà a.

²³ A nɩ lɔlɔ, yruó kʋ́ ɩ́ na ká ŋnɩ a, a blì lɔlɔ a zà mà náma wɔlɩ́ gláalɛ amɔ lagɔ̀duú! Cémʋ́ á bhlile lɛ́ amɔ kʋ́ a, sɩ́tɛ̀ tɛ̀ɛ̀ a tinyʋa bhlile wá sáà Lagɔ a nékʋ́cinyʋa kʋ́.

²⁴ Kplé ya amɔ kla, amɔɔ́ à li léyri a: a nɩ námɛɛ́ ɛ́mɛ́ a yɛ́ lɛ́!

²⁵ Kplé ya amɔ kla, amɔɔ́ kà lʋlʋnɩkplɩɛ́ a: kleé yi kɛ́zɔ̀ amɔ bhlá! Kplé ya amɔ kla, amɔɔ́ à nyɩa a: a di yi kɛ́zɔ̀ si lé mɩ́ɔ́ yi kɛ́zɔ̀ amɔ gblʋ́ʋ̀!

²⁶ Kplé ya amɔ kla, amɔɔ́ kà a námasa nyʋaá fɩ́ɛ́ cíé a: sɩ́tɛ̀ tɛ̀ɛ̀ a tinyʋa cíé wá kpɔkplá lagɔ̀ɔ̀ a nékʋ́cinyʋa a, á zà!

Zozíi anɩ́ nyɔ wà ɔ gblɩ̀nyɔ
( Matíe 5.38‑48 ; 7.12 )

²⁷ Mà náa srʋɛ amɔ, amɔɔ́ à pʋɛ mɔ́ɔ nyúkwlí a, a wà a gblɩ̀nyʋa. Nyʋaá à nɩ́ amɔ wà a, a nɩ a námɛɛ́!

²⁸ Nyʋa à bhusule amɔ a, a pá á nyú! Nyʋa à bhlile amɔ nyumosa kʋ́ a, a bhibhie a wlú!

²⁹ Nyɔ nɩ wla mɔ̀ kpá nyúklú a, tʋalɔɔ́ ànʋ̀ɔ̀! Nyɔ nɩ bháʋ́ nà lɔkwɩ a, nyɛ́ ɔ́ lɔkwɩɛ́ a bùbúó!

³⁰ Nyɔ nɩ zra mɔ̀ a, nyɛ́ ɔ́! Nyɔ nɩ bháʋ́ nà lɛ́ a, nàá yrálɔɔ́ ɔ̀ mɛ́ mʋ́!

³¹ Cémʋ́ a yrá lé nyʋa nɩ nɩ a zà a, a nɩ sáà sɩ́tɛ̀ nyʋa a zà!

³² Nyʋa à wà amɔ a, áa múó a nɩ wà a, námɛ cegbá a nɩ áa? Bhàlʋ̀nyʋa a sɛ́fʋ á wà sáà nyʋaá à wà a.

³³ Nyʋaá à nie amɔ námɛ a, ámá a nɩ bhli námasa kʋ́ a námɛ cegbá a nɩ áa? Bhàlʋ̀nyʋa a sɛ́fʋ sáà sɩ́tɛ̀ á nie.

³⁴ Nyʋaá nɩ̀ gbla lɛ́ lé à yi mɔ̀ mɛ́ nyɛ́ a, ámá nɩ gbla a, námɛ cegbá ɩ̀ nɩ áa? Bhàlʋ̀nyʋa a sɛ́fʋ, sɩ́tɛ̀ á nie.

³⁵ A wà áa gblɩ̀nyʋa lé a nɩ a námɛ! A nɩ gbla nyɔ lɛ́ a, a sɛɛ́ duo bɩ́! A nɩ nɩ sɩ́tɛ̀ a, jɔ̀lʋ kádʋ yi amɔ plaà, lé a yi à tʋ́ Lagɔ a yúó plɩ́. Lagɔ náa bhàlʋ̀nyʋa a zà lé mónyùmònyʋa a zà.

³⁶ Ɩ́bhìè cémʋ́ a Tʋ́ Lagɔ a duo náa lɛ́ a, sɩ́tɛ̀ mʋ́ á di nɩ náma!

Cémʋ́ ɩ̀ bhlile ɩ̀ lía kʋ́ a, sɩ́tɛ̀ Lagɔ bhlile mɔ̀ kʋ́
( Matíe 7.1‑5 )

³⁷ A ná plɔ a lía, bhè Lagɔ nɩ ka amɔ plɔɔ! A ná gʋa a lía gbʋ́, bhè Lagɔ nɩ́ ka amɔ gbʋ́ gʋa! A cie a lía, bhʋ́ Lagɔ yi amɔ cie!

³⁸ A nyɛ́ a lía, bhè Lagɔ ká amɔ nyɛ́! Ɔ nɩ nyɛ́ amɔ a, ɔ ká amɔ cɩ́cáda nyɛ́, bhʋ́ ɔ́ yi cɩ́cáda plí lé ɔ́ yi a kʋ́ yíè ɔ́ yi ʋ́ kʋ́ pɛpɩà lé bhʋ́alɛ́ yi wlúmɩ́à lé ɔ́ yi amɔ nyɛ́. Lɛ́ɛ́ nà kà mʋ́ mɩ́zɩ̀ a, ɛ́mɛ́ Lagɔ na ká kɛ́zɔ̀ bhá, lé ɔ ká nà nɩ dɛ́ mɩ́zɩ̀.»

Sipɩʋ yà ŋányɩ sɔ́ a núnúó

³⁹ Lé Zozíi pá sɔ́kʋ́ núnúó àna a múó, ɔ́ anɩ́: «Yɩ́cucúkanyɔ yi míi lé ɔ́ yi ɔ liyɩcucúkanyɔ tíee? Áa sɔ́ɔ nɩ́ ka gbàzrʋ̀ bhlii?

⁴⁰ Kʋjɩ̀nyɔ a fíke nɩ́ plɩ́ ɔ másɛ gɔ̀, mà nyɔɔ́ ɔ̀ cɩ́a námasa a, ɔ́mɔ́ ŋnɩ ɔ másɛ wlú.

⁴¹ Ɛ̀kʋ̀ʋ̀ bhè ɩ dʋdʋɛ ɩ̀ liyʋ a yɩ́ a ŋányɩɛ́ kʋ̀ mɔ̀ a, bhè nɩ́ yɛ́ nàa nɩ yɩ́ a suó kʋ̀ mɔ̀ a, kʋ́ à?

⁴² Cégbá mʋ́ ɩ̀ yi ɩ̀ nɩ́ayʋ srʋ mà: Má a yʋ́ʋ̀ kʋ diin bhè ká nà yɩ́ a ŋányɩɛ́ kʋ̀ mɔ̀ɔ a mɔ̀ɔ saà, bhè nɩɩ́ yɛ́ nànɩ yɩ́ a suó kʋ̀ mɔ̀ɔ a, kʋ́ à? Yrʋnyɔɔ̀, sa fɩ́ɛ́ mɔ̀ɔ nà nɩ yɩ́ a suó kʋ̀ mɔ̀ɔ a, bhʋ́ ɩ̀ yi kʋ́ yɛ́, lé ɩ̀ yi mɔ̀ɔ ɩ̀ nɩ́ayʋ a yɩ́ a mnɩ́ a ŋányɩɛ́ sa à.

Suú yà ʋ bhúó sɔ́ a núnúó
( Matíe 7.16‑20 ; 12.33‑35 )

⁴³ Suó ʋ̀ ná a, ʋ nɩ́ trʋ nyumo bhuo, lé suó ʋ̀ nyù a, nɩ́ trʋ sáà náma bhuo.

⁴⁴ Suú a bhí á bhá lé á yɩbhlɩlʋʋ́. A nɩ́ à zà maglósu wlú figíesu a bhí saà. Lé a nɩ́ à zà sáà glàyʋ avʋkáasu wlú saà.

⁴⁵ Nyɔɔ́ ɔ̀ náa, námawɔlɩ ɩ̀ kʋɛ ɔ́ duo a mnɩ́, ɩ mnɩ́ ɔ́ bhá lé ɔ́ nie námasa. Ɩ́zà nyumonyɔ, nyumoé kʋ̀ ɔ́ duo a mnɩ́ a, ɛ mnɩ́ ɔ́ bhá lé ɔ́ nie nyumowɔlɩ. Wɔlíɛ́ ɩ̀ kʋ̀ nyɔ a duo a mnɩ́ a, ɩ́mɩ́ lalɔɔ́ neé.

Ghlɩ a cí a sɔ́ a núnúó
( Matíe 7.24‑27 )

⁴⁶ Bhè ɛ̀kʋ̀ʋ̀ bhè a wlele mɔ́ɔ Kanyɔ, Kanyɔ, bhè a nɩ́ nɩ cémʋ́ ɩ́ yrá à?

⁴⁷ Nyɔɔ́ ɔ̀ yie mɔ́ɔ gɔ̀ lé ɔ̀ pʋɛ ná cícíwɔlɩ nyúkwlí lé ɔ̀ námɛ ɩ sá a, nyɔɔ́ ɔ́ wlʋ́ a, ká amɔ mɔ́ pápa à:

⁴⁸ Ɔ́ wlʋ́ mànɩ́ nyɔ nà kà wlʋ pá, lé ɔ̀ wlúe bhúkuo lé á trʋmalɛ mʋ́, lé ɔ́ flʋ cɔ́kʋ kʋ́ lé cɔ́kʋɔ́ jɩ̀, ɔ̀ srí wlʋ a. Nyú yi bhla, ʋ́ yi gblʋ́ʋ, lúlúó yi yi, wlʋɔ́ nɩ́ crí, ʋ́ʋ pálɔ námasa ɩ́zà.

⁴⁹ Mà nyɔ nɩ̀ nú ná cícíwɔlɩ lé ɔ̀ nɩ́ nɩ ɩ sá a, ɔ́ wlʋ́ mànɩ́ nyɔɔ́ ɔ̀ sríé wlʋ dʋ̀dʋ̀pʋ̀pʋ́ jɩ̀ a, tányɩɛ́ mʋ́ nyú kádʋ nɩ bhla lé ʋ nɩ gblʋ́ʋ a, wlʋɔ́ ʋ́ʋ bhlie.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy