Online Bible

Lúkɩ 3 - Neyo

Zán Batísɩ srʋ nyʋa mà á cɩ́cɩ á nɩnɩgbɩ
( Matíe 3.1‑12 ; Málɩ́kɩ 1.2‑6 ; Záan 1.19‑23 )

¹ Gɔ̀mnàà á wlele wá Tibɛ́lɩ Sezáa a, ɔ́ bhá lɩkpɩ kʋ́gbá lɩkpɩ gbɩ́ lé ɔ́ bɔ́ɔ kpóó jɩ̀, lé Pɔ́sʋ Pilátɩ ŋwɔ́ɔ wá yɩ́ Zudéebhlɩɛ́ a gɔ̀mna. Gɔ̀mna ànɔ̀ɔ̀ á wlele wá Elódʋ Tatrákɩ a, Galiléebhlɩɛ́ a gɔ̀mna ɔ́ ŋwɔ́ɔ wá lé ɔ nɩ́ayʋ Filípʋ ŋwɔ́ɔ wá Ituléebhlɩ yà Trakonitídɩbhlɩ sɔ́ a gɔ̀mna à, gɔ̀mna ànɔ kʋ wá sáà ʋ́ lé á wleloó wá Lizaníásɩ, ɔ́mɔ́ ɔ̀ kámalɛ wá Abɩlɛ́nɩbhlɩɛ́.

² Anásɩ yà Kayífʋ sɔ́ Lagɔ̀bʋ̀bɔ̀nyʋa káda á ŋwɔ́ɔ wá, ɩ tányɩɛ́ mʋ́ Zakalíi a yʋ́ Záan, Lagɔ cíloó wá gɔ̀ zɩkpɩkɔfʋ́ a mnɩ́.

³ Lé Záan bhli Zrʋdɛ́ɛnyié gɔ̀ a bhlɩ́ɛ́ a lɔ̀fɩ́ɛ́, ɔ́ pá wɔlɩ́, ɔ́ nie: «A cɩ́cɩ a nɩnɩgbɩ! Ká amɔ nyú wlú ŋwʋ́, bhè Lagɔ ká amɔ a nyumoé ciè.»

⁴ Cémʋ́ ɩ́ jɩ́jràlɔ̀ Lagɔ a nékʋ́cinyɔ Ezayíi a bɔ́gʋ̀ɔ̀ a mnɩ́ a, ɩ́mɩ́ ɩ̀ niloò, ɩ́mɩ́ ɩ̀ ŋwɔ́ɔ mà: Nyɔ pá wɔlɩ́ zɩkpɩkɔfʋ́ a mnɩ́, ɔ́ nie: A gɩglà Kanyɔ a nyúzɔ̀ɔ̀ Lé a srí ɔ nyízɛ̀ɛ̀ sá!

⁵ A sú gbàzrɩ̀ɛ̀ fɩ́ɛ́ né. Kíkíé yà gbʋgbɩ́ɛ́ fɩ́ɛ́ sɔ́, a mímilɩɩ́ kʋ́, lé a kwlélɩɩ́ sá. Nyízɛ̀ɛ̀ ɛ̀ sɔsɩɔ mɔ̀ɔ a, ɛ́ srílo yɩ́ sa Lé nyízɛ̀ɛ̀ ɛ̀ nyù a, ɛ́ yi yɩ́ gɩglàlɔ̀.

⁶ Lé nyʋa fɩ́ɛ́ ká saá yɩbhlɩ mà Lagɔ yrá lé ɔ ká ʋ́ má neé saà.

⁷ Bhʋ́ a tanyɩɛ́, nyʋa kɔ́kɔ́mnɩ́ yie wá Záan gɔ̀ nyú wlú ŋwʋ̀ kà, lé Záan srʋ á wá mà: «Amɔɔ́ à nyù mnɩ́ bɛbɛlɩ bhísakʋ́ a, ɔ̀ pápa amɔ cémʋ́ á nie lé á gúle Lagɔ a dɩŋwʋ̀yrùò ʋ̀ yie áa?

⁸ A nɩnɩgbɩ ka lé ɩ ká nyʋa srʋ mà a ya cɩ́cɩɩ̀! Lé a ná srʋ flɛ́flɛ̀sa a nyoku mà, à tʋ́ʋ̀ ŋwɔ́ɔ Ablaámʋ! Náa srʋɛ amɔ mà, Lagɔ nɩ wà a, ɔ́ yi cɔ́kwɩɛ́ lɩ̀à Ablaámʋ a yúó mʋ́ pláa.

⁹ A dʋdʋ̀ʋ̀, dɔ̀mɛ̀ɛ̀ ya yrɩ̀lɩ̀ ɛ ká suó a bhlíkpié dédìè. Suó ʋ̀ nɩ́ trʋ námabhi a, á yi ʋ́ bhla lé á yi ʋ́ kosuú páa.»

¹⁰ Wɔlíɛ́ Záan cí a, ɩ́ nɩ nyʋaá lé á yrɔ́ɔ́ mà: «Naa cégbá à yi yɩ́ lɛ́ nɩ à?»

¹¹ Bhʋ́ ɔ́ srʋ á mà: «Ɔ̀ nɩ̀ kà kóti sɔ́ a, ɔ nyɛ́ ɔ liyʋɔ́ ɔ̀ nɩ́ lɛ́ ka a múó, ɔ̀ nɩ̀ kà sáà lelilɛ a, céamúó ɩ́mɩ́ ɔ nɩ nɩ!»

¹² Lapóo a kʋbhlinyʋa yi sáà ʋ́, a ká nyú wlú ŋwʋ́, á yrá Záan mà: «Másɛɛ̀, bhè àmɔ̀, cégbá mʋ́ à yi nɩ áa?»

¹³ Lé ɔ́ srʋ á, ɔ́ anɩ́: «Wɔlíɛ́ kʋ́ á cíe amɔ a, ɩ́mɩ́ a nɩ nɩ, mà a ná bhá nyʋa lɩ́ gɔ̀ lé a ká gɔ̀ plɩ́!»

¹⁴ Lé sʋ́ja a sɛ́fʋ yrɔ́ɔ́: «Bhè àmɔ̀ cégbá à nɩ̀ nɩ áa?» Záan anɩ́: «A ná fa nyɔ fɩ́ gɔ̀ lé a kɔ́ɔ́ moníi gɔ̀ bhá, a ná ŋwʋ́ nyɔ gbʋ́ wlú flɛ́flɛ̀sa, cémʋ́ á pɛ́lɛ amɔ a, ɩ́mɩ́ a nɩ bháʋ́.»

¹⁵ Nyʋaá fɩ́ɛ́ à gláa Kláyɩ́sɩ a yiyitanyɩɛ́ a, á yrá a nyoku mà Záan lɩ̀à ɔ́mɔ́ ɔ̀ nɩ ka lɛ́ ʋ́ Kláyɩ́sɩɛ́ ŋwɔ́ɔ?

¹⁶ Ɩ́ ka ŋnɩ́ lé Záan srʋ á mà: «Mɔ́ɔ, nyú ɩ́ ŋwʋ́ɛ́ amɔ wlú, mà nyɔɔ́ ɔ̀ yie mɔ́ɔ bɩ́ a, ɔ́ ka fɩ́ lé ɔ́ zi mɔ́ɔ kʋ́, nɩ́ ɔ sí a bhlí a tɔ́sɔɛ́ neé bhɩa. Ɛ̀ nɩ̀ ŋwɔ́ɔ ɔ́mɔ́ a, Blɔ̀blɔ̀zùzùò lé kosu, ɩ́mɩ́ mʋ́ ɔ́ na ká amɔ nyú wlú ŋwʋ́.

¹⁷ Ɔ́ gbá bɩ́tɛ́ɛ́ mʋ́ ɔ́ na ká pʋ a wlɩɩ́, ɛ́mɛ́ ɔ́ na ká bhá lé ɔ ká fɩfɩɛ́ yà yʋ́ɔ́ sɔ́ yɩ́ sɩsa à. Yʋ́ɔ́, ɔ́ kʋ́ʋ́ wlʋ kʋ́ ŋwʋ́, ɩ́zà fɩfɩɛ́ ɩ́mɩ́ ɔ́ na ká kosuú páa lé ɩ ká si. Bhʋ́anɩ kosuó ʋ̀ nɩ́ nyúmo kɔ́ɔ̀kɔ́ a.»

¹⁸ Lagɔ a Námadìè, sɩ́tɛ̀ mʋ́ Záan sɩsalɩɩ́ wá mʋ́, lé ɔ́ cɩ́alɛ wá sáà nyʋa dɩgàlɩ ànɩ kɔ́kɔ́mnɩ́.

Elódʋ ŋwʋ́ Zán Batísɩ jɩ̀ɩ

¹⁹ Mà tányɩ kʋ wá ʋ́ lé gɔ̀mnàà á wlele wá Elódʋ a, ɔ́ bháʋ́ ɔ nɩ́ayʋ́ a ŋwnɔ́ɔ́ á wlele wá Elodíádɩ a, lé ɔ́ ŋwʋ́ ɔ́ gbó. Elódʋ nɩ sɔ́kʋ́ nyumo wɔlɩ́ ànɩ kɔ́kɔ́mnɩ́, ɩ́ ka ŋnɩ́ lé Záan lɩ́kpɩlɔɔ́ kʋ́.

²⁰ Nyumo wɔlɩ́ɛ́ Elódʋ gbɛ̀ sɔ́kʋ́ ʋ́ jɩ̀ a, ɩ́mɩ́ ŋwɔ́ɔ mà, ɔ́ bhli Záan kʋ́, lé ɔ́ ŋwʋ́ ɔ́ jɩ̀ɩ.

Záan ŋwʋ́ Zozíi nyú wlú
( Matíe 3.13‑17 ; Málɩ́kɩ 1.9‑11 )

²¹ Tányɩɛ́ mʋ́ Záan ŋwʋ́ɛ́ wá nyʋa nyú wlú a, Zozíi yi wá sáà ʋ́, lé Záan ŋwʋ́ ɔ́ wá nyú wlú lé ɔ́ bhibhie lé lagɔ̀yɩ̀ɛ̀ kalɔ klʋ́,

²² lé Blɔ̀blɔ̀zùzùò kwlíloó jɩ̀ cémʋ́ kpóòkpú kwlíe lɛ́ a. Lé niwɔlɩ wlʋ́ lagɔɔ́ lé ɩ́ kwlíi, ɩ́mɩ́ ɩ̀ ŋwɔ́ɔ mà: «Mɔ̀ ŋwɔ́ɔ ná Wàwàyʋ, mɔ̀ jɩ̀ ná duo kʋʋ̀.»

Zozíi a lɔ́lɔ́kpa a mnɩ́ a nyʋa
( Matíe 1.1‑17 )

²³ Zozíi ká Lagɔ̀nɔ̀nʋ kʋ́ cíe a, ɔ́ ka lɩkpɩ a glʋ̀ lé kʋ́gbá. Nyʋa yì saá mà Zɔ̀zɛ́fʋ a yʋ́ ɔ́ ŋwɔ́ɔ̀. Zɔ̀zɛ́fʋɔ́ Elíi a yʋ́ ɔ́ ŋwɔ́ɔ̀.

²⁴ Elíi Matátɩ a yʋ́ ɔ́ ŋwɔ́ɔ, lé Matátɩ ŋwɔ́ɔ Levíi a yʋ́. Levíi ŋwɔ́ɔ Melikíi a yʋ́, lé Melikíi ŋwɔ́ɔ Yanayíi a yʋ́. Yanayíi ŋwɔ́ɔ Zɔ̀zɛ́fʋ a yʋ́,

²⁵ lé Zɔ̀zɛ́fʋ ŋwɔ́ɔ Matatíásɩ a yʋ́. Matatíásɩ ŋwɔ́ɔ Amɔ́sʋ a yʋ́, lé Amɔ́sʋ ŋwɔ́ɔ Nayúmʋ a yʋ́. Nayúmʋ ŋwɔ́ɔ Esríi a yʋ́, lé Esríi ŋwɔ́ɔ Nagayíi a yʋ́.

²⁶ Nagayíi ŋwɔ́ɔ Máatɩ a yʋ́, lé Máatɩ ŋwɔ́ɔ Matatíásɩ a yʋ́. Matatíásɩ ŋwɔ́ɔ Sɛmɛyíi a yʋ́, lé Sɛmɛyíi ŋwɔ́ɔ Yosékɩ a yʋ́. Yosékɩ ŋwɔ́ɔ Yodáa a yʋ́,

²⁷ lé Yodáa ŋwɔ́ɔ Yowanáa a yʋ́. Yowanáa ŋwɔ́ɔ Wlesáa a yʋ́, lé Wlesáa ŋwɔ́ɔ Zɔlɔbabɛ́lɩ a yʋ́. Zɔlɔbabɛ́lɩ ŋwɔ́ɔ Salatɩ́ɛ́lɩ a yʋ́, lé Salatɩ́ɛ́lɩ ŋwɔ́ɔ Nelíi a yʋ́.

²⁸ Nelíi ŋwɔ́ɔ Melikíi a yʋ́, lé Melikíi ŋwɔ́ɔ Adíi a yʋ́. Adíi ŋwɔ́ɔ Kosámʋ a yʋ́, lé Kosámʋ ŋwɔ́ɔ Ɛmadáamʋ a yʋ́. Ɛmadáamʋ ŋwɔ́ɔ Ɛ́lɩ a yʋ́,

²⁹ lé Ɛ́lɩ ŋwɔ́ɔ Zozíi a yʋ́. Zozíi ŋwɔ́ɔ Eliezée a yʋ́, lé Eliezée ŋwɔ́ɔ Yorímʋ a yʋ́. Yorímʋ ŋwɔ́ɔ Matátɩ a yʋ́ lé Matátɩ ŋwɔ́ɔ Levíi a yʋ́.

³⁰ Levíi ŋwɔ́ɔ Simeyɔ́ɔ a yʋ́, lé Simeyɔ́ɔ ŋwɔ́ɔ Zudáa a yʋ́. Zudáa ŋwɔ́ɔ Zɔ̀zɛ́fʋ a yʋ́, lé Zɔ̀zɛ́fʋ ŋwɔ́ɔ Yonámʋ a yʋ́. Yonámʋ ŋwɔ́ɔ Eliakímʋ a yʋ́,

³¹ lé Eliakímʋ ŋwɔ́ɔ Meleyáa a yʋ́. Meleyáa ŋwɔ́ɔ Menáa a yʋ́, lé Menáa ŋwɔ́ɔ Matatáa a yʋ́. Matatáa ŋwɔ́ɔ Natáa a yʋ́, lé Natáa ŋwɔ́ɔ Davídɩ a yʋ́.

³² Davídɩ ŋwɔ́ɔ Jesée a yʋ́, lé Jesée ŋwɔ́ɔ Yobédɩ a yʋ́. Yobédɩ ŋwɔ́ɔ Boózʋ a yʋ́, lé Boózʋ ŋwɔ́ɔ Saláa a yʋ́. Saláa ŋwɔ́ɔ Naasɔ́ɔ a yʋ́,

³³ lé Naasɔ́ɔ ŋwɔ́ɔ Aminadábʋ a yʋ́. Aminadábʋ ŋwɔ́ɔ Adɩmɛ́ɛ a yʋ́, lé Adɩmɛ́ɛ ŋwɔ́ɔ Aníi a yʋ́. Aníi ŋwɔ́ɔ Esrómʋ a yʋ́, lé Esrómʋ ŋwɔ́ɔ Falɛ́zɩ a yʋ́. Falɛ́zɩ ŋwɔ́ɔ Zudáa a yʋ́,

³⁴ lé Zudáa ŋwɔ́ɔ Zakɔ́bʋ a yʋ́. Zakɔ́bʋ ŋwɔ́ɔ Izákɩ a yʋ́, lé Izákɩ ŋwɔ́ɔ Ablaámʋ a yʋ́. Ablaámʋ ŋwɔ́ɔ Taláa a yʋ́, lé Taláa ŋwɔ́ɔ Nayɔ́ɔ a yʋ́.

³⁵ Nayɔ́ɔ ŋwɔ́ɔ Serúzʋ a yʋ́, lé Serúzʋ ŋwɔ́ɔ Wlagawúu a yʋ́. Wlagawúu ŋwɔ́ɔ Pelɛ́zɩ a yʋ́, lé Falɛ́kɩ ŋwɔ́ɔ Ɛbɛ́ɛ a yʋ́. Ɛbɛ́ɛ ŋwɔ́ɔ Saláa a yʋ́,

³⁶ lé Saláa ŋwɔ́ɔ Kainámʋ a yʋ́. Kainámʋ ŋwɔ́ɔ Afasádɩ a yʋ́, lé Afasádɩ ŋwɔ́ɔ Sɛ́mʋ a yʋ́. Sɛ́mʋ ŋwɔ́ɔ Nowée a yʋ́, lé Nowée ŋwɔ́ɔ Lamɛ́kɩ a yʋ́.

³⁷ Lamɛ́kɩ ŋwɔ́ɔ Matúzalɛ́mʋ a yʋ́, lé Matúzalɛ́mʋ ŋwɔ́ɔ Ɛnɔ́kɩ a yʋ́. Ɛnɔ́kɩ ŋwɔ́ɔ Yalɛ́dɩ a yʋ́, lé Yalɛ́dɩ ŋwɔ́ɔ Malelélɩ a yʋ́. Malelélɩ ŋwɔ́ɔ Kainámʋ a yʋ́,

³⁸ lé Kainámʋ ŋwɔ́ɔ Ɛnɔ́sɩ a yʋ́. Ɛnɔ́sɩ ŋwɔ́ɔ Sɛ́tɩ a yʋ́, lé Sɛ́tɩ ŋwɔ́ɔ Adámʋ a yʋ́. Lé Adámʋ ŋwɔ́ɔ Lagɔ a Yuwliyʋ.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy