Lúkɩ 24 - Neyo

Zozíi galɔ̀

¹ Sɔ́lɩ a geglìà míí, ŋwnáá soglù lé á bhá dàŋwónié á yrɩ̀lɩ̀la a, lé á mʋ lési jɩ̀.

² Mà á dʋdʋ̀ a, cɔ́kʋɔ́ ɔ̀ sú la lésuó a pladàà né a, ʋ́ ya ʋ́ nékʋ́ wlʋ́.

³ Ŋwnáá pla lésuó a mnɩ́ lé á dʋdʋ̀ a, Kanyɔ Zozíi a gàzɛ̀ɛ̀ nɩ́ mɔ̀ kʋ.

⁴ Wɔlíɛ́ a ká cí a, a nɩ́ɩ yì, á dʋdʋ̀ sɔ́kʋ́ a, á yɛ́ nyʋa a sɔ́, bànɩ á pla mʋ́ a, ɩ́ lʋɛ plátatata.

⁵ Mà Ŋanɩmɛɛ́ nɩ á lé á sra sra wɛ́ sá, lé nyʋaá yráa mà: «Ɛ̀kʋ̀ʋ̀ lé nyɔɔ́ ɔ̀ gà a, a mʋ́mɔlɔɔ́ kúdùkuo nyièdɩ áa?

⁶ Ɔ́ nɩ́ dɛ́ kʋ, ɔ́ ya galɔ̀. Bhè a luo bhlɛ́! Tányɩɛ́ mʋ́ a yɔ̀sɔ́ kʋ wá Galilée a, cémʋ́ ɔ́ srʋ wá amɔ a, sɩ́tɛ̀ mʋ́ ɩ́ plɩ́ɩ.

⁷ Ɔ́ srʋ wá amɔ mà: Á ka lé a ká Nyɔɔ́ a Yuwliyʋɔ́ bhalʋnyʋa wlɩɩ pɛ́lʋ́ ŋwʋ́ lé a kɔ́ɔ́ kúsu jɩ̀ kʋ a kɔ́ɔ́ bhlá. Mà ɔ nɩ kú a, tayruó kʋ́, ɔ́ yi galɔ̀.»

⁸ Nyʋaá cí saá a, ŋwnáá luo Zozíi a cícíwɔlɩɛ́ kʋ́.

⁹ Á wlʋ́ lesuó a mnɩ́ lé á yi a, áa sa Zozíi a cíecíenyʋaá kʋ́gbá bhlɛ̀gbɩɛ́ lé kʋjɩ̀nyʋ̀àà àna fɩ́ɛ́ sɔ́ dí.

¹⁰ Malí Madɩlɛ́nɩ lé Zánɩ, lé Zákɩ ɔ nɛ́ Malíi, lé yígàdà ŋwna àna, ámá là díé lé a srʋ cíecíenyʋaá.

¹¹ Mà a nɩ díé á la a, wɔlɩ́ kʋ́ bhá, á dùòkʋ́ áa nyɩ́glɩlaá.

¹² Mà sɩ́tɛ̀ ɩ́ kʋ lé Pɩ́ɛ́lɩ soglù, lé ɔ́ fa soó lé ɔ́ mʋ lésuó gɔ̀, ɔ́ gbísá lé ɔ́ dʋdʋ̀ ʋ mnɩ́ a, lɔkwɩɛ́ á bhá lé á pɩpɩa la gàzɛ̀ a, ɛ́ pʋ́ lesuó a mnɩ́ dʋ̀dʋ kʋ́. Neé mna Pɩ́ɛ́lɩ lé ɔ́ yrɩ́bha lé ɔ́ mʋ gbó.

Kʋjɩ̀nyʋa sɔ́ mʋ Emayúsʋ lé Zozíi flʋlaa yɩ́

¹³ Bhʋ́ a yru a múó mnɩ́, Zozíi a kʋjɩ̀nyʋ̀àà a sɔ́ mʋ dú a múó a mnɩ́, ʋ́mʋ́ á wlele Emayúsʋ. Nyɔ ká Zelízalɛ́mʋ wlʋ́ lé ɔ ká Emayúsʋ mʋ a, ɔ́ nie glíyi sɔ́ nyúzɔ kʋ́.

¹⁴ Naa, wɔlɩ́ɛ́ fɩ́ɛ́ ɩ̀ plɩ́ɩ Zelízalɛ́mʋ a, á namɛ bhè á ŋwʋ́lɩɩ́ dí kʋ́.

¹⁵ Mà á bhábhalɛ wɔlɩ́ neé á námɛ a mnɛ lé Zozíi ŋnɩ á gɔ̀, lé ɔ yà sɔ́ námnɩ kʋ́.

¹⁶ Á yɛ́ ɔ kʋ́, mà a nɩ́ ɔ́ yɩbhlɩ.

¹⁷ Lé ɔ́ yráa mà: «Wɔlɩ́ gbá a bhábhalɛ lɛ́ neé bhè a námɛ a?» Ɔ́ yrá a, áa nynʋ́vʋ̀, kpɩkpɩ wɔtɔmalaá gɔ̀.

¹⁸ Lé á nyièdɩ a nyɔ a múó sa ne, ɔ́mɔ́ á wlele Kleopásɩ, ɔ́ anɩ́: «Wɔlɩ́ɛ́ ɩ̀ plɩ́ɩ Zelízalɛ́mʋ yrié sɔ́ɔ́ lɩ̀à a, nà múó coco ŋwɔ́ɔ nyɔ lé ɔ̀ kʋ̀ la ɔ̀ lé ɔ̀ nɩ́ɩ yìi.»

¹⁹ Ɔ́ anɩ́: «Wɔlɩ ànɩ gbá áa?» Bhʋ́ á srʋ ɔ́ mà: «Wɔlɩ́ɛ́ ɩ̀ ŋnɩ Nazalɛ́tɩ a Zozíe ɔ̀ ŋwɔ́ɔ wázɔ̀ Lagɔ a nékʋ́cinyɔ kádɔ̀ɔ̀ lé ɔ̀ kɔ̀ɔ̀ nɩnɩgbɩ yà ɔ cícíwɔlɩ sɔ́ ka wázɔ̀ pɔ́wa Lagɔ yà bhlɩ́ a mnɩ́ a nyʋa sɔ́ drɩ̀ a.

²⁰ À Lagɔ̀bʋ̀bɔ̀nyʋ̀àkádàà lé à nyɩ́kpɔkáda a sɔ́ núnuu lé á salɔɔ́ nyʋa wlɩ a kɔɔ́ kúbhlajɩ̀ɩ ŋwʋ́ lé á kʋlɔɔ́ kúsu jɩ̀ a.

²¹ Bhè àmɔ̀, à di yì la saá mà ɔ́mɔ́ yi la lé ɔ̀ ka la ʋ́ Izrayɛ́lɩnyʋa a bhlɩ́ɛ́ ʋ́ neé saà. Wɔlíɛ́ plɩ́ lɛ́ a, ɩ́ yri ta lɛ̀ zɩmnɛ́.

²² Wɔlíɛ́ plɩ́ a, ŋwnáá zùò kʋ̀ amɔ nyièdɩ lé á mna àmɔ̀ neé, zizìèdàà lɩ̀à á mʋ lésuó gɔ̀.

²³ Á mʋ a, á nɩ́ ɔ̀ gàzɛ̀ɛ̀ lésuó a mnɩ́ ŋnɩ, ámá srʋ lɛ́ àmɔ̀ mà, kplɔkplɔzìzi flʋlaa yɩ́, lé ɩ́ srʋ á mà Zozíi ya gàlɔ̀.

²⁴ Lé nyʋa wlʋ́ àmɔ̀ nyièdɩ, lé á mʋ sáà lesuó gɔ̀, céé ŋwnáá cí a, ɩ́mɩ́ tɛ̀ɛ̀ á ŋnɩ ɔ̀, a nɩ́ ɔ́ yɛ́.»

²⁵ Nyʋaá a cícíwɔlɩɛ́ bhli a, bhʋ́ Zozíi srʋ á mà: «Amɔ a nɩ́ bhobhoé kaà lé á di nɩ́ bhli sɩsɔɔ́ wɔlɩ́ kʋ́, ɩ́ ka ŋnɩ a, wɔlɩ́ɛ́ fɩ́ɛ́ Lagɔ a nékʋ́cinyʋa cí wá a, a nɩ́ ɩ́ wɔlɩ́ kʋ́ bhá!

²⁶ Kláyɩ́sɩ nɩ́ ka la fɩ́ɛ́ kalɩmɛ yɛ́ fɩ́ɛ́ lé ɔ ká la ɔ́ blɔ́blɔ́ɔ́?»

²⁷ Lé wɔlɩ́ɛ́ ɩ̀ kʋ̀ Lagɔ̀bɔ̀gwɩ a mnɩ́ lé á cí ɔ́ zà kàkàkà a, bháa Moyízɩ yà Lagɔ a nékʋ́cinyʋaá a lɔ̀fɩ́ɛ́ sɔ́ jɩ̀ lé kɔ̀ɔ̀ jɩ̀ ŋnɩ a, ɔ́ sɩsa à mɩ́ mʋ́.

²⁸ Dúó mnɩ́ á mnɛ a, á mnɛ yɩ́ mʋ́ gɔ̀ ŋnɩ ka a, Zozíi nɩ cémʋ́ ɔ́ɔ plɩ́ɛ́ a.

²⁹ Mà bhʋ́ á tɛ́ma ní kʋ́ lé á srʋ ɔ́ mà: «Pʋ́ʋ amɔ gɔ̀ mà yrʋ́ ya lagɔ bhɩa, lé cúcú pla yɩ́.» Ɔ́ nú a cícíwɔlɩɛ́ lé ɔ́ pla ʋ́.

³⁰ Mà á gblà lelitebhle jɩ̀ a, ɔ́ bháʋ́ flɔ́ɔbuó, ɔ́ pá Lagɔ yúó lé ɔ́ dédìà mʋ́, lé ɔ́ bhábhalaá.

³¹ Bhʋ́ a yɩ́ kalɔ klʋ́ lé á yɩbhlɩlɔɔ́. Mà á kʋ dáamúó lé ɔ́ mɔ́mnɔlaá yɩ́.

³² Ɔ́ mɔ́mnɔ ʋ́ a, bhʋ́ á nie cɩɩ́ mà: «Mà ɩ́mɩ́ ɩ̀ nɩ́ la lɛ́ ŋnɩ́ ka lé à dié nɩ́ si la lɛ́ àmɔ̀ mnɩ́ nyúzɔ kʋ́ʋ Tányɩɛ́ mʋ́ ɔ́ sɩsala lɛ́ àmɔ̀ Lagɔ̀bɔ̀gʋ̀ɔ̀ mnɩ́ a jɩ́jràlɩ̀ɛ̀ mʋ́ a?»

³³ Á bhɩa cícíé zɔ̀ a, áa soglù lé á yrɩ́bha Zelízalɛ́mʋ, á mʋ a, á ŋnɩ ɔ̀ nyʋa ànàà cíecíenyʋaá kʋ́gbá bhlɛ̀gbɩɛ́ yà kʋjɩ̀nyʋ̀àà àna sɔ́, á ŋnɩlɔ ʋ́ wlú.

³⁴ Lé á srʋ á mà: «Kanyɔɔ̀ ya cɩ́cása galɔ̀! Ɔ́ ya Simɔ́ɔ yɩ́ flʋ!»

³⁵ Lé áa sɔ́ɔ́, cémʋ́ á yɩbhlɩlɔɔ́ a, á sa mɔ̀ mɩ́, lé wɔlɩ́ɛ́ fɩ́ɛ́ ɩ̀ plɩ́ɩ nyúzɔ kʋ́ a, lé á kʋ liìda a, ɩ flɔ́ɔbhuó a bhábhadàà, bhʋ́alɛ á yɩbhlɩlɔɔ́, á sa mɔ̀ɔ ɩ́ lɔ̀fɩ́ɛ́.

Zozíi flʋ ɔ́ kʋjɩ̀nyʋ̀àà yɩ́

³⁶ Mà wɔlɩ́ɛ́ kʋ á bhlà neé bhè blà, Zozíi nynʋ́vʋ̀ á nyièdɩ kʋ́. Lé ɔ́ srʋ á: «Ɔ́ anɩ́, pʋ́pʋ́ɛ́ yi!»

³⁷ Mà ŋanɩmɛɛ́ yilaá kʋ́ lé á ghéè, á dùòkʋ́ gàgàkʋ flʋlaa yɩ́.

³⁸ Lé ɔ́ srʋ á mà: «Ŋanɩmɛ gbá bhlá amɔ áa? Ɛ̀kʋ̀ʋ̀ lé a gúé áa?

³⁹ A dʋdʋ̀ ná glɔ̀gbɩ́ɛ́, lé ná kokokpíé sɔ́, mɔ́ɔ kʋ̀ʋ, mɔ́ɔ mɔ̀glʋ̀ kʋ̀ʋ. A gbɔ́gbɔ̀ mɔ́ɔ a, a dʋdʋ̀ʋ̀, zuzu nɩ́ yɛ́kɛ́ ka a, ʋ nɩ́ féyi ka a, bhè mɔ́ɔ ɩ́ kaa yɛ́kɛ́ yà féyi sɔ́.»

⁴⁰ Ɔ́ cíé bhè ɔ́ pápalaá ɔ́ glɔ̀gbɩ́ɛ́ lé ɔ́ kokokpíé.

⁴¹ Mà neé mnaá, lé lɔlɔ ka ŋnɩ́ lé a nɩ́ wɔlɩ́ɛ́ ɔ́ cí a cɩ́cása kʋ́ bhá. Lé ɔ́ yrá á: «A ka dɛ́ lelilɛɛ?»

⁴² Á lɔɔ́ flányɩflányɩ zrìdrè.

⁴³ Lé ɔ́ bháʋ́ má lé ɔ́ li a klʋ́ jɩ̀.

⁴⁴ Lé ɔ́ srʋ á mànɩ́: «A lɛ́bhɛɛ wɔlɩ́ɛ́ ɩ́ srʋ wá amɔ tányɩɛ́ mʋ́ yáà amɔ sɔ́ à kʋ̀ àyɩ wá ʋ́ a, ɩ́ srʋ wá amɔ mà: Ná wɔlɩ́ɛ́ fɩ́ɛ́ ɩ̀ jɩ́jrɔ̀ wá Moyízɩ a Jràmábɔ̀gwɩ̀ɛ̀ a mnɩ́, lé Lagɔ a nékʋ́cinyʋaá a bɔ́gwɩ̀ɛ̀ a mnɩ́ lé lɔbhlɩbɔ̀gwɩ̀ɛ̀ a mnɩ́ a, ɩ́ yi niloò.»

⁴⁵ Lé ɔ́ ka á bhobhoé klʋ́, a ká Lagɔ̀bɔ̀gʋ a mnɩ́ nú.

⁴⁶ Ɔ́ srʋ á mà: «A jɩ́jrà mà Kláyɩ́sɩ yi kalɩmɛ yɛ́, lé ɔ́ yi galɔ̀ tayruó kʋ́,

⁴⁷ lé ɔ ŋnɩ́ mʋ́, á na ká lɔ́wɩ a lɔ̀fɩ́ɛ́ Lagɔ̀wɔ̀lɩ̀ɛ̀ gɔ̀ cíi lé a ká a nyumoé a gbʋ́ wlʋ́ lé Lagɔ ká a ciè, Zelízalɛ́mʋ mʋ́ ɩ́ na ká niníé bháa.

⁴⁸ Amɔ yɛ́ɛ ɩ́ lɔ̀fɩ́ɛ́ lɩ̀à a dá lé à ŋwɔ́ɔ ɩ ŋwɔ́nɩ́srɩ̀nyʋa.

⁴⁹ Lé wɔlɩ́ɛ́ à Tʋ́ cí wá mà ɔ́ yi wá amɔ nɩ a, mɔ́ɔ mɔ̀glʋ̀, nɩ mʋ a, ɩ́ yií amɔ jɩ̀ kwlée. A kʋ dú a gláa mà Lagɔ a pɔ́wa yi amɔ jɩ̀ kwlíi.»

Zozíi gblà lagɔɔ́

⁵⁰ Yri plɩ́ a, Zozíi yà ɔ́ kʋjɩ̀nyʋ̀àà sɔ́ wlʋ́ Zelízalɛ́mʋ lé á mʋ Betaníi a gbàkɩ, lé ɔ́ bhá glɔ̀gbɩ́ kʋ́, lé ɔ́ pá á nyú.

⁵¹ Ɔ́ kʋ a nyúpada lé Lagɔ bhá à mɔ́ nyièdɩ lé ɔ́ gblà lagɔɔ́.

⁵² Bhè ámá, á bhɩa ɔ́ bʋbɔ̀lɛ̀ zɔ̀ a, áa bháa ʋ́ lɔlɔ kʋ́ lé à yʋ sɔ́ yrɩ́bha lé á mʋ Zelízalɛ́mʋ.

⁵³ Yrié fɩ́ɛ́ kʋ́, á kʋ Lagɔ̀wlʋ̀kádʋ̀ɔ̀ a mnɩ́, á falɛ Lagɔ ŋwnú.