Lúkɩ 22 - Neyo

Zudáa ŋwnʋ́ʋ lé ɔ ká Zozíi saà

¹ Zúfʋnyʋa a flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, ɛ́ ya ʋ́ mɛ́.

² Mà Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ bhobho cémʋ́ á yi nɩ lé á yi Zozíi kʋ́ bhli lé á yio bhlá a, mà á gúle sáà nyʋaá à yi glɩ̀sɩ́sɩ̀ɛ̀ kʋ́ a, kʋ́.

³ Naa Zozíi a kʋjɩ̀nyʋ̀àà kʋ́gbá sɔ́ɔ, á nyièdɩ a nyɔ á wlele Zudáa Sɩkalɩ́ɔ́tʋ a, Dɩ́blʋ̀ɔ̀ kwlílo mʋ́.

⁴ Lé Zudáa mʋ lé ɔ yà Lagɔ̀bʋ̀bɔ̀nyʋ̀àkádàà yà Lagɔ̀wlʋ̀ a dɛdɛ̀nyʋa sɔ́ núnuu, lé cémʋ́ á na ká Zozíi kʋ́ bhli a, á ŋwʋ́lɩɩ́ kʋ́.

⁵ Wɔlíɛ́ a lɔlɔɔ́ nɩ́ á lé a yɔ̀sɔ́ núnuu a kɔ́ɔ́ moníi nyɛ́.

⁶ Zudáa ŋwnʋ́lɩɩ́ kʋ́, ɩ́ ka ŋnɩ́ lé ɔ́ nie sáà fɩ́ɛ́ ɔ ká cásɩ yɛ́ bhè ɔ ká á Zozíi wlɩɩ́ ŋwʋ́ bhè nyʋaá à yi glɩ̀sɩ́sɩ̀ɛ̀ kʋ́ a, a nɩ ka saá yɩbhlɩ.

Zozíi a kʋjɩ̀nyʋ̀àà yrɩ̀lɩ̀ flíiflíiglɩ̀sɩ́sɩ̀ɛ̀ a zà

⁷ Flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, lé ɛ̀ kɛ̀ɛ̀ yruú kʋ́ á bhlalɛ wá bhlábhlɩ́ɛ́ a, ʋ́ ŋnɩ a,

⁸ Zozíi cíe Pɩ́ɛ́lɩ lé Záan, ɔ́ anɩ́: «A mʋ lé a ká flíiflíiglɩ̀sɩ́sɩ̀ɛ̀ a zà dʋ̀dʋ kʋ́ gɩglà, a ká pi à kà li!»

⁹ Lé á yrɔ́ɔ́ mà: «Dɛ́gbá à nɩ̀ gɩglà lé à kà pi áa?»

¹⁰ Ɔ́ srʋ á mà: «Dúó kʋ̀ amɔ drɩ̀ mɔ̀ɔ a, a nɩ ŋnɩ mɔ̀ɔ a, a yà nyɔ a múó sɔ́ yi gbɩ́dà, ɔ́ sro nyúkonyìde wlú, a jɩ́ ɔ́ kʋ́, dɛ́ ɔ́ na ká pla a, a pla ʋ́,

¹¹ a nɩ pla ʋ́ a, a srʋ gbó a kanyɔ mà: Másɛ anɩ́, pápa àmɔ̀ wlʋdrèè mnɩ́ ɔ yà ɔ́ kʋjɩ̀nyʋ̀àà sɔ́ na ká flíiflíiglɩ̀sɩ́sɩ̀ɛ̀ yɛ́ a.

¹² A nɩ yrá sɩ́tɛ̀ a, ɔ́ yi amɔ wlʋ a lagowlú mɔ̀ ghlɩdrìkáda a múó dá pápa a, a mnɩ́ ya gɩglɔ̀, mɔ̀ɔ a na ká glɩ̀sɩ́sɩ̀lèlìlɩ̀ɛ̀ piì.»

¹³ Zozíi bhɩa cícíé zɔ̀ a, nyʋaá sɔ́ɔ soglù lé á mʋ dúo mnɩ́, céé tɛ̀ɛ̀ ɔ́ srʋ á a, sɩ́tɛ̀ tɛ̀ɛ̀ ɩ́ plɩ́ɩ. Lé á pi lelilɩɛ́.

Zozíi yà ɔ cíecíenyʋaá sɔ́ li flíiflíiglɩ̀sɩ́sɩ̀ɛ̀ a lelilɩ

¹⁴ Lelitanyɩ ŋnɩ a, Zozíi yà ɔ cíecíenyʋaá sɔ́ gblà tébhle jɩ̀.

¹⁵ Lé ɔ́ srʋ á mà: «Ná duo kʋ la kpanyɩ flíiflíiglɩ̀sɩ́sɩ̀ɛ̀ lɩ̀à jɩ̀, ɩ́ yra la lé ya amɔ sɔ́ à kà la kʋ́ li, fɩ́ɛ́ lé ná kalɩmɛ a tányɩ ká la ŋnɩ.

¹⁶ Ya amɔ sɔ́ à nɩ ka yɩ́ sɔ́kʋ́ kʋ́ li lé Lagɔ a Léyibhlɩɛ́ a yiyitanyɩɛ́ yi ŋnɩ.»

¹⁷ Lé ɔ́ bhá duváaplɩ kʋ́, lé ɔ́ pá Lagɔ yúó lé ɔ́ srʋ á mà: «A bhá a ká mná, a bhábha plɩɛ́ né kʋ́,

¹⁸ mà náa srʋɛ yɩ́ lɛ amɔ, bháa yɩ́ lɛ́ zɩmnɛ́ jɩ̀ a, nɩ́ ka yɩ́ sɔ́kʋ́ duváa mná lé Lagɔ a Léyibhlɩɛ́ a yiyitanyɩɛ́ yi ŋnɩ.»

¹⁹ Lé ɔ́ bhá flɔ́ɔbhuo kʋ́ lé ɔ́ pá Lagɔ yúó lé ɔ́ dédìà mʋ́ lé ɔ́ bhábha á lɔ̀fɩ́ɛ́ lé ɔ́ srʋ á sɔ́kʋ́ mà: «Flɔ́ɔbhuó lɩ̀à, ná yɛ́kɛ́ kʋ̀, ɛ́mɛ́ ɩ́ nyɛ́ amɔ a zà. Sɩ́tɛ̀ a nɩ nɩ ná zà bhè a ká kɛ́zɔ̀ mɔ́ɔ luo!»

²⁰ Á bhɩa lilie zɔ̀ a, ɔ́ bhá duváaplɩ kʋ́, lé ɔ́ nyɛ́ à mɛ́ lé ɔ́ srʋ á mà: «Duváa lɩ̀à, ná dòlú kʋ, ʋ́mʋ́ ŋwɔ́ɔ mɛnʋ́yalʋ a dòlúó ɔ̀ kɔ́sɔ a zà sá a.

²¹ Bhè a dʋdʋ̀, nyɔɔ́ ɔ̀ nà kà mɔ́ɔ sa a, ɔ́ kʋ dɛ́ àmɔ̀ nyièdɩ, tébhleé lɩ̀à jɩ̀ yɔ́ɔ̀ sɔ́ à lile kʋ́.

²² Aan, Nyɔɔ́ a Yuwliyʋɔ́, ɔ́ɔ mnɛ yɩ́, sɩ́tɛ̀ á jɩ́jrà wá ɔ zà Lagɔ̀bɔ̀gʋ a mnɩ́, mà nyɔɔ́ nà kɔ̀ɔ̀ sa a, kplé lé ɛ́ klɔɔ́!»

²³ Zozíi cí sɩ́tɛ̀ a, á yráyralɛ, á nie mà: «Bhè nyɔ gbá kʋ̀ àmɔ̀ nyièdɩ ɔ̀ nà kɔ̀ɔ̀ sa áa?»

Kʋjɩ̀nyʋ̀àà gbá zi aa lɔ̀fɩ́ɛ́ a nyièdɩ kʋ́ a?

²⁴ Á kʋ ayɩ ʋ́ lida lé á pʋpʋ a nyièdɩ, á bháa ʋ́ wɔlɩdrè a kʋbhlalɛ kʋ́, ɩ́mɩ́ ŋwɔ́ɔ mà: «Nyɔ gbá zi aa lɔ̀fɩ́ɛ́ a nyièdɩ kʋ́ áa? Á yrá lé á kɔ́ɔ́ yɩbhlɩɩ̀.»

²⁵ Lé Zozíi srʋ á mà: «Bhlɩ́ a mnɩ́ a léyuó kʋ̀ mɔ̀ a, nyʋaá á kámalɛ a, áa kwlé a, lé á yrá lé a cí kɔ́ɔ̀kɔ́ a námasa.

²⁶ Mà amɔ, a nɩ wɔlɩ́ɛ́ yà ámá ánɩɛ́ sɔ́ nɩ́ céamúó ŋwɔ́ɔ. Amɔ a nɩ nyɔɔ́ ɔ̀ zi kʋ́ a, a bɩ́kʋ́ anɔ bhísakʋ́ ɔ́ na ka nɩ, nyɔɔ́ kámalɛ a, a cóyʋ bhísakʋ́ ɔ́ na ká nɩ.

²⁷ Bhè ànɔ gbá kɛtɛkʋ́ zi yɩ́ lɛ́ aa nyièdɩ kʋ́ áa? Ɔ̀ kʋ̀ tébhle jɩ̀ aa? Mà ɔ̀ ŋwʋ́ɛ́ tébhleé áa? À nɩ́ ɔ̀ kʋ̀ tébhle jɩ̀ a ŋwɔ́ɔ? À nɩ̀ ŋwɔ́ɔ mɔ́ a, aa nyièdɩ a cóyʋ ɩ ŋwɔ́ɔ.

²⁸ Amɔ, kalɩmɛ fɩ́ɛ́ ɩ́ yɛ́ lɛ́ a, á nyièdɩ a nyɔ nɩ́ mɔ́ɔ gwá wlʋ́, aa tɛ́ma duo kʋ́ lé a kʋ mɔ́ gɔ̀.

²⁹ Ɩ ŋnɩ́ɛ́ mʋ́ náa ká amɔ Léyibhlɩɛ́ nyɛ́, cémʋ́ ɩ Tʋ́ nyɛ́ lɛ́ mɔ́ɔ a.

³⁰ Ɩ́zà ná Léyibhlɩɛ́ a mnɩ́, ya amɔ sɔ́ nà kà kʋ́ lii, à kà kʋ́ mnáa, lé a yi sáà ɛ mnɩ́ a léyikpié jɩ̀ bɔ́ɔ, a ká Izrayɛ́lɩnyʋa lɔ́lɔ́kpɩɛ́ kʋ́gbá sɔ́ɔ́ a tɩ́tɩ́ plɔɔ̀.»

Simɔ́ Pɩ́ɛ́lɩ yi Zozíi jɛɛ

³¹ Zozíi bhɩa cícíé zɔ̀ a, ɔ́ wle Simɔ́ Pɩ́ɛ́lɩ: «Simɔ́ɔ̀, Simɔ́ɔ̀, Dɩ́blʋ yrá lé ɔ ká amɔ mʋ́ gbázɩ̀, cémʋ́ á pʋɛ lɛ́ sɩ́ká lé á gbázɩɛ lɛ́ a fɩfɩ mʋ́ a.

³² Mà yáa nà wlú bhibhie, lé nà fádùò nɩ ka mɔ̀ dá trʋma, lé nà duo nɩ yrɩ́bha a, cíi ɩ̀ níayúó gɔ̀ a ká sáà mʋ́ tɛ́ma.»

³³ Ɔ́ cí sɩ́tɛ̀ a, Pɩ́ɛ́lɩ anɩ́: «Kanyɔɔ̀, yáa ghlɩ̀lɩ̀, dɛ́ɛ́ nà kà pla a, ɩ́ yi ʋ́ pla, ɛ́ yi náa jɩ̀ɩ à yie pla, ɛ́ yi náa kwɩ́ɩ, yáa mɔ̀ sɔ́ à yi pla.»

³⁴ Pɩ́ɛ́lɩ cíi a, Zozíi anɩ́: «Pɩ́ɛ́lɩ náa srʋɛ mɔ̀, mà zɩmnɛ́ lɩ̀à, zizìèdɩ̀kɔ̀kʋ̀ɛ̀ nɩ́ ka wɔlɩ́ pá lé ɩ̀ yi taa kʋ́ ziè mà nɩ́ mɔ́ɔ yì.»

Zozíi srʋ ɔ́ kʋjɩ̀nyʋ̀àà mà a yrɩ̀lɩ

³⁵ Zozíi srʋ á sɔ́kʋ́ mà: «Tányɩɛ́ mʋ́ ɩ́ cíe wá amɔ lé a mʋ wá lé a nɩ́ wá moníi fa, a nɩ́ wá bódu fa, a nɩ́ wá sáà síi fa a, a mʋ a, lɛ́ mákɩ wá amɔɔ?» Á anɩ́: «Másɛɛ̀, à mʋ a, lɛ́ nɩ́ wá àmɔ̀ mákɩ.»

³⁶ Bhʋ́ ɔ́ srʋ á mà: «Mà náa srʋɛ yɩ́ cɩɩ́ amɔ, ɔ̀ nɩ̀ kà moníi a mʋ́ŋwʋ̀lɛ a, ɔ bháʋ́ mɛ́, ɔ̀ nɩ̀ kà mʋ́tɩtalɛ a, ɔ bháʋ́ mɛ́, ɔ̀ nɩ̀ nɩ́ jrɛ̀ ka a, ɔ ŋwʋ́ ɔ kótu pɛ́lʋ́ ɔ ká jrɛ̀ kla.

³⁷ Mà náa srʋɛ amɔ mà wɔlɩ́ɛ́ ɩ̀ jɩ́jrɔ̀ Lagɔ̀bɔ̀gʋ a mnɩ́ a, ɩ́ ká lé ɩ ŋnɩ. Á jɩ́jrà mɔ̀ɔ mà: Nyɩ́kpɔbhlanyʋa á nyièdɩ á ŋwʋ́ ɔ́. Na, wɔlɩ́ɛ́ fɩ́ɛ́ ɩ̀ jɩ́jrɔ̀ ná zà a, ɩ́ tanyɩɛ́ ya ŋnɩ.»

³⁸ Ɔ́ cí saá a, ɔ́ kʋjɩ̀nyʋ̀àà anɩ́: «Kanyɔɔ̀, à kà jɛ̀lɩ̀ sɔ́, ɩ́mɩ́ lɛ!» Zozíi anɩ́: «Ɩ́ náa!»

Zozíi faa Olivíe kikéé a gbaka

³⁹ Zozíi flʋzɔ̀ lé ɔ́ fa Olivíe kikéé a gbaka, sɩ́tɛ̀ ɔ́ nie kɔ́ɔ̀kɔ́, lé ɔ́ kʋjɩ̀nyʋ̀àà jɩ́ɔ́ mɔ̀ɔmɔ̀ kʋ́.

⁴⁰ Á ŋnɩ mɔ̀ɔmɔ̀ a, ɔ́ srʋ á mà: «A bhibhie, a nɩ ka amɔ zɔ̀ sa à.»

⁴¹ Lé ɔ́ wlʋ́ la tòyipɛ gwá, lé ɔ́ sra koti sá, lé ɔ́ cíe bhibhie kʋ́.

⁴² Ɔ́ bhibhie wɔlɩɛ mnɩ́ ɔ́ anɩ́: «Wé! À Tʋ́, nɩ̀ wà a, wláa mɔ́ɔ kalɩmɛ lɩ̀à gwá! Mà nàa nɩ cémʋ́ ná duo yrá a, nɩ cémʋ́ ɩ̀ yrá a!»

⁴³ Ɔ́ kʋ bhibhieda, lé kplɔkplɔzùzu kwlíi, lé ʋ́ nyɛ́ ɔ́ fɩ́.

⁴⁴ Mà ŋanɩmɛ yi Zozíi kʋ́, lé bhobhoé zio wlú, sɩ́tɛ̀ ɩ́ kʋ lé ɔ́ ŋwʋ́ fɩ́ lé ɔ́ bhibhie, ɔ́ kʋ bhibhieda lé bhúbhú gbíó wlʋ́, mà nɩ̀ yɩ́ʋ́ a, nànɩ dòlú, ʋ́ wlʋ́ɔ́ mʋ́ ʋ́ tʋɛ dʋ̀dʋ kʋ́.

⁴⁵ Ɔ́ bhɩa bhibhie zɔ̀ lé ɔ́ soglù lé ɔ́ yi ɔ́ kʋjɩ̀nyʋ̀àà gɔ̀, mà ɔ́ yi a, kpɩkpɩ a wɔtɔmalɛɛ́ ya á yrá pá, á ya ŋwɔ́ɔ.

⁴⁶ Bhʋ́ ɔ́ srʋ á mà: «Ɛ̀kʋ̀ʋ̀ bhè a ŋwɔ́mɛ áa? A soglù a ká bhibhie, bhè a nɩ ka amɔ zɔ̀ sa à!»

Nyʋa yi Zozíi kʋ bhli ka

⁴⁷ Wɔlíɛ́ kʋɔ́ bhlà neé bhè blà nyʋa pla. Nyʋaá à pla a, a nɩ́ zumole bɛ́, Zozíi a kʋjɩ̀nyɔ Zudáa kʋ á drɩ̀. Ɔ́ yi lé ɔ́ ŋnɩ Zozíi gɔ̀ lé ɔ́ gbɩlɔɔ lé ɔ́ kpɛ́ ɔ nékʋ́.

⁴⁸ Lé Zozíi yrɔ́ɔ́ mà: «Zudáà, nékʋ́kpɛkpʋ́ ɩ̀ bhá lé ɩ̀ sà Nyɔɔ́ a Yuwliyʋɔ́ ɔ́?»

⁴⁹ Nyʋa yà Zozíi sɔ́ námɛ a, tányɩɛ́ mʋ́ á yɛ́ wɔlɩ́ɛ́ nà kà ŋnɩ a, bhʋ́ á yrɔ́ɔ́ mà: «Kanyɔɔ̀, à yàsɔ́ à vʋ jɛ̀lɩɩ?»

⁵⁰ Ɩ́ kʋ bhlà má neé, bhè á nyièdɩ a nyɔ a múó kpla mɔ̀ jrɛ̀, lé ɔ́ di Lagɔ̀bʋ̀bɔ̀nyɔ̀kádɔ̀ɔ̀ a cóyʋ a lilinyuklú kʋ́.

⁵¹ Zozíi anɩ́: «Ɩ náa cío sá.» Lé ɔ́ gbɔ́ nyɔ a nyúklúó lé ɔ́ yalɩma.

⁵² Lé Zozíi srʋ Lagɔ̀bʋ̀bɔ̀nyʋ̀àkádàà lé Lagɔ̀wlʋ̀ a dɛdɛ̀nyʋ̀àkádàà lé dɔ̀panyʋaá yio kʋ bhli ka a, mà: «A dʋdʋ̀ cémʋ́ a náa lé a yi a, a ka jɛ̀lɩ̀, a ka sií, nànɩ cémʋ́ a yi lɛ́ kàpàkápányɔ kʋ bhli ka a.

⁵³ Bhè Lagɔ a yrié fɩ́ɛ́ kʋ́, ya amɔ sɔ́ kʋ̀ kɔ́ɔ̀kɔ́ Lagɔ̀wlʋ̀kádʋ̀ɔ̀ a mnɩ́, a nɩ́ ɔ̀ mɔ́ɔ kʋ bhli ka mʋ, máà aa nɩ tányɩɛ́ ŋwɔ́ɔ nyumozìzi a pɔ́wa a tányɩɛ́ a, ɛ́mɛ́ ŋnɩ.»

Simɔ́ Pɩ́ɛ́lɩ ziè Zozíi a zà

⁵⁴ Lé nyʋaá bhli Zozíi kʋ́, lé á fɔɔ́ Lagɔ̀bʋ̀bɔ̀nyɔ̀kádɔ̀ɔ̀ a gbó. Mà Pɩ́ɛ́lɩ jɩ́ á kʋ́ dɩgàsa, dɩgàsa, ɔ nɩ́ mɛ́ á gɔ̀.

⁵⁵ Mà nyʋa pápa kosugàla kʋ́ Lagɔ̀bʋ̀bɔ̀nyɔ̀kádɔ̀ɔ̀ a gbó a nyièdɩ, á glàlàà klʋ́, Pɩ́ɛ́lɩ plɩ́ aa nyièdɩ lé ɔ́ bɔ́ɔ sá.

⁵⁶ Mà cóŋwnɔ a múó bɔ́ɔ kosuó gɔ̀, ɔ́mɔ́ yɩbhlɩ Pɩ́ɛ́lɩ a sabɔ̀anɔ kosuó gɔ̀ dʋ̀dʋ kʋ́, ŋwnɔ́ dʋdʋ̀ ɔ̀ diin ɔ́ anɩ́: «Ɔ̀lɩa, ɔ yɔ̀sɔ́ námɛ wázɔ̀!»

⁵⁷ Mà Pɩ́ɛ́lɩ ziè, ɔ́ srʋ ŋwnɔ́ɔ́ mà: «Nyɔɔ́ ɩ̀ sa a, nɩ́ ɔ́ yì.»

⁵⁸ Fɩɩn, lé nyɔ a múó yɛ́ sɔ́kʋ́ Pɩ́ɛ́lɩ lé ɔ́ srʋ ɔ́ mà: «Mɔ̀, á nyièdɩ a nyɔ ɩ̀ ŋwɔ́ɔ!» Pɩ́ɛ́lɩ anɩ́: «Kpɔkplá, nɩ́ a nyièdɩ a nyɔ ŋwɔ́ɔ!»

⁵⁹ Glíyie a múó plɩ́ a, nyɔ ànɔ a múó yi sɔ́kʋ́, ɔ́ anɩ́: «Nyɔɔ́ lɩ̀à Galiléeyʋ kʋ̀ʋ, cɩ́cása a mnɩ́ ɔ yɔ̀sɔ́ námɛ wázɔ̀.»

⁶⁰ Pɩ́ɛ́lɩ anɩ́: «Mɔ̀ɔ, wɔlɩ́ɛ́ ɩ̀ yrá kà lɛ́ cí a, nɩ́ɩ yì!» Mà ɔ́ niwɔlɩɛ́ bhli bhlà saá bhè, kɔkʋɛ́ pá wɔlɩ́.

⁶¹ Lé Kanyɔ yrɩ́bha wlú, ɔ́ dʋdʋ̀ Pɩ́ɛ́lɩ yɩ́. Mà tányɩɛ́ mʋ́ ɔ́ dʋdʋ̀ ɔ kɔ́ɔ̀kʋ́ a, wɔlɩ́ɛ́ Kanyɔ srʋ ɔ́ wázɔ̀ a, bhlilo duo kʋ́, ɔ́ srʋ ɔ́ wázɔ̀ mà: «Pɩ́ɛ́lɩɩ̀ zɩmnɛ́ɛ́ lɩ̀à, ɩ̀ yi fɩ́ɛ́ ná wlú a zà taa kʋ́ ziè, mà nɩ́ mɔ́ɔ yì, fɩ́ɛ́ lé zizìèdɩ̀kɔ̀kʋ̀ɛ̀ ká wɔlɩ́ pá.»

⁶² Wɔlíɛ́ bhlá Pɩ́ɛ́lɩ ɩ́ nio lé ɔ yà nyúgbu sɔ́ flʋ zɔ̀, ɔ́ ŋwí àààn lé ɔ́ sɩa.

Á bhɩtɩ Zozíi

⁶³ Mà nyʋaá à dɛdɛ Zozíi a, á nyɩalɔɔ́, lé á bhitoó.

⁶⁴ Á gʋa ɔ yíjɩ̀, lé á srʋ ɔ́ mà: «Lagɔ a nékʋ́cinyɔ ɩ̀ ŋwɔ́ɔ, nyɔ ɔ̀ bhite mɔ̀ a, zɛlɔɔ ŋnɩ́.»

⁶⁵ Á trʋlɔɔ́ lé á srʋ ɔ́ nyumo wɔlɩ́ kɔ́kɔ́mnɩ́.

Á ŋwʋ́ Zozíi tɩ́tɩ́

⁶⁶ Zrɩ̀ɩ zɩ a, zúfʋnyʋa a dɔ̀panyʋa, Lagɔ̀bʋ̀bɔ̀nyʋa káda, lé lɔ̀ a másɛnyʋa, á ŋnɩlɔ̀ wlú, lé á wle Zozíi aa lɔ̀ a tɩ́tɩ́plɔjrè a mnɩ́.

⁶⁷ Lé á srʋ ɔ́ mà: «Mɔ̀ nɩ̀ ŋwɔ́ɔ cɩ́cása Kláyɩ́sɩ a, srʋ àmɔ̀!» Zozíi anɩ́: «Nɩ srʋ amɔ a, a nɩ́ kɩɩ cɩ́cása kʋ́ bhá.

⁶⁸ Lé nɩ yráa sáà amɔ wɔlɩ́ kʋ́ a, a nɩ́ ka lɛ mɔ́ ɩ ása nyɛ́.

⁶⁹ Mà a yɩbhlɩ saá mà: Bháa yɩ́ lɛ́ zɩmnɛ́ jɩ̀ a, Nyɔɔ́ a Yuwliyʋɔ́ na ká yɩ́ Lagɔɔ kà pɔ́wa a, lilie kʋ́ bɔ́ɔ.»

⁷⁰ Bhʋ́ á yrɔ́ɔ́ mà: «Mɔ̀ ŋwɔ́ɔ cɩ́cása Lagɔ a Yuwliyʋɔ́ ɔ?» Ɔ́ anɩ́: «Ɩ́mɩ́ fɩ́ɛ́ a cí lɛ́.»

⁷¹ Zozíi cíi a, á anɩ́ mà: «Àmɔ̀ à klʋ́ mʋ́ ɔ́ ŋwʋ́ wɔlɩ́ɛ́, à nɩ́ a ká yɩ́ sɔ́kʋ́ ŋwɔ́nɩ́srɩ̀nyʋa mʋ́mɔɔ̀.»